Read Southern Kisi Cho̍o̍bū 16 Bible Online

Cho̍o̍bū 16 - Southern Kisi bible

Cho̍o̍bū 16

¹O̍ ko̍ŋ kɔ̍ɔ̍lī mi̍ Cho̍o̍bū di̍mī māā,

²Sɔ̍ɔ̍ŋ nya̍ chō ya̍ mu᷅ŋ dīmūllo̍ kpo̍u̍ wo̍ŋ, ō cho̍ sɔ̍ɔ̍ŋ ŋ̄ sūmīāl a̍ ya̍ le̍, I̍ tu̍e̍ī ni̍ŋ mu̍ŋ. Ō cho̍ kɔ᷅l te̍ nya̍ hīŋ ya̍ nyɔ̄ɔ̄lū ni᷄ŋ te̍. Lā hīŋ māhūnāā le̍ ya̍ kɔ̄l tāmbɛ̍i̍ che̍le̍ŋ chɔ̄ɔ̄lū kē.

³Mɛ̄ɛ̍ lā Sāŋga̍ wɔ̍ a̍ ya̍ sɔ̄ɔ̍ŋ fo̍ndo᷄ŋ mu᷅ŋ dīmūllo̍ le̍? Ɔ̍ɔ̄ le̍ sa̍bū nya̍ chō hīōūwɔ̄ɔ̍ lāchī a̍ ya̍ dīōmndā wāā nu̍a̍ā dīmūllo̍ wo̍?

⁴Tē ndu̍ o̍o̍ wa̍ pɛ̍ āā nya̍ cho̍ o̍ fo̍ndā ya̍ i̍ cho̍ ho̍ō wo̍ ni̍, dīōmndā nya̍ chō ya̍ la᷅ŋ dīmūllo̍ le̍ ya̍ kɔ̄llo̍ nyɔ̄ɔ̄lōo̍ ni᷄ŋ nda̍ŋ I̍ wa̍ nya̍ la̍ dīmūl. Nyɛ̄ o̍ nyɛ̄ nya̍ chō ya̍ dīmūllo̍, I̍ wa̍ nya̍ ndu̍ dīmūl, ndu̍yɛ̍ ya̍ bɛ̍ɛ̍ mī ya̍ i̍i̍ hi̍i̍lūl nya̍ bōlle̍ŋ, mɛ̄ɛ̍ nya̍ sūāā nu̍a̍ā mī lā lūāā bo᷅lle̍ yɛ̍.

⁵Dīāllūŋ kālāŋ nya̍ chō ya̍ mu᷅ŋ kīo̍o̍ wo̍ŋ I̍ wa̍ nya̍ mu̍ŋ kē. I̍ wa̍ nya̍ kɔ̄lta̍ŋ nyɔ̄ɔ̄lū, mɛ̄ɛ̍ nya̍ chō ya̍ nu̍a̍ā kɔ̄llo̍ nyɔ̄ɔ̄lōo̍ ni᷄ŋ, le̍ mī pu̍ɛ̍ɛ̍nu̍ŋ a̍ sāŋga̍ cho̍ ya̍ chōo̍ wo̍ yɛ̍.

⁶Kɛ̍ su̍ŋ su̍ŋ I̍ so̍o̍ bɛ̍ɛ̍, nyɛ̄ nɛ̄īyāa̍ cho̍ ya̍ o̍ ŋ̄dīāllo̍, ō pɛ̍ŋgī le̍ la̍ŋ te̍. Ndu̍yɛ̍ I̍ me̍i̍ vɛ̍lɛ̄ bɛ̍ɛ̍ ō pɛ̍ŋgī le̍.

⁷Kpōko̍ Mɛ̄lɛ̄ka̍, a̍ so̍li̍ ya̍ yōōmūa̍ŋ fɔ̍. Yu̍ŋgu̍ nūu̍ kpo̍u̍, a̍ bīī ma̍ chīī nda̍ dīū.

⁸Dɛ̍nɛ̍ pa̍lāā ŋ tūsi̍ ya̍ chōo̍ wo̍ ō chō ō bɔ̍ɔ̍ Mɛ̄lɛ̄ka̍. A̍ to̍sa̍ mi̍ nya̍ū mi̍ yɔ̄nu᷄ŋ pa̍āla̍ŋ kpo̍so̍ŋ. Wāŋndā chō ni᷅ŋ dīmīo̍o̍ māā yɔ̄ŋ wɔ̄ɔ̍ŋndo̍ ya̍ I̍ to̍sa̍ ni̍, nyɛ̄ kōŋ dɛ̍nɛ̍ pa̍lāa̍ ho̍ō tōl la̍ chōo̍ ni̍.

⁹Mɛ̄lɛ̄ka̍ dɔ̄ɔ̄nu᷄ŋ tu̍mbe̍ bɔ̍ɔ̍ a̍ ya̍. Ō chīŋa̍la᷅ŋ ya̍ ko̍ mɛ̄ɛ̍ kpɔ̍kūŋndo̍ dēl nu̍a̍ā vīsīo̍o̍ chōo̍ mbō sɛ̄ɛ̄si̍a̍a̍ ndu̍ yɛ̍. Mɛ̄lɛ̄ka̍ tūūlu̍ kɔ̄l a̍ ya̍ mbo̍ tūl ya̍ lēyɛ̄. Ō tāmbu̍ kɔ̄l a̍ ya̍ mbo̍ sīīŋgūū ya̍ ya̍a̍mɔ̍ɔ̍nɔ̍ ndɔ̄.

¹⁰Wāŋnda̍ Sīīŋgu̍u̍ ya̍ ni᷅ŋ nyɛ̄ ndā ma̍māā. Ā bīī ma̍ chūūŋgi̍āŋ na̍a̍ pi᷅lɛ̍ le̍ ya̍ māmɔ̄ɔ̍. Ā chō ya̍ kpa᷅ŋnde̍ lɔ̄ɔ̍ mā mām ya̍.

¹¹Mɛ̄lɛ̄ka̍ ma᷄l la̍ wānāa̍ kɛ̍ɛ̍ ndu̍ wa̍ o̍ bā fɔ̍. Ō ma᷄l la̍ wa̍nāā dɛ̍nɛ̍ wɔ̍ɔ̍ŋāā bɛ̄ndūa̍a̍ o̍ ba̍.

¹²Ya̍ wa̍ŋnu̍ŋ o̍ kɔ̄l nyūlū bɛ̄ndōo̍ ni᷄ŋ ndo̍, Mɛ̄lɛ̄ka̍ sāa̍ ya̍ kɛ̄se̍i̍ mbo̍ vīɔ̄l la̍, mɛ̄ɛ̍ nda̍ vīɔ̄l nu̍a̍ā nyɔ̄ɔ̍ mbō chīīnu̍ŋ yɛ̍. Mɛ̄lɛ̄ka̍ sīīŋgu̍u̍ ya̍ ni᷅ŋ māsīīŋgūāā nyɛ̄ ndɔ̄ vi̍a̍ā a̍ chīŋɔ̍ma̍ ndūa̍ŋ.

¹³Chīŋɔ̍ma̍ ndūa̍ŋ mā chō fūlāa̍ bā o̍ ba̍ mī mā lūɛ̄ī ya̍ o̍ ŋ̄dīāl. Ō vīī vi̍i̍ ya̍ a̍ ma̍ŋ mbo̍ bōōlūū ya̍. Ndu̍yɛ̍ īnyīɛ̍ɛ̍ bɛ̍ɛ̍ i̍ cho̍ ndu̍ bīyɔ̄ɔ̄ le̍ ya̍ le̍.

¹⁴Bōōlūūwo̍ tu̍ŋ o̍ cho̍ ya̍ ni̍, kɔ̄ɔ̄ kīōlū bɛ̍ɛ̍. Mɛ̄lɛ̄ka̍ de᷄l la̍ chōo̍, mɛ̄ɛ̍ ku̍u̍ba̍nɔ̍ chɔ̄ūwo̍ dēl nu̍a̍ā ya̍a̍mɔ̍ɔ̍nɔ̍ ndɔ̄ɔ̍ chōo̍ yɛ̍.

¹⁵Nyɛ̄lā lābɛ̍kīla̍ŋ,[4] la̍ŋ la̍ cho̍ ni᷅ŋ nyɛ̄ chūɛ̄ɛ̄na᷄ŋ ya̍ I̍ wo̍u̍nūŋ ndo̍ ni̍. Mɛ̄lɛ̄ka̍ yēm ya̍, mi̍ cha᷅l o̍ chu̍ndo̍o̍ ni᷄ŋ.

¹⁶Hɔ̄lta̍ŋ lā dīū yā ni᷅ŋ pɛ᷅ŋ a̍ cha᷄ŋ ndo̍, chɔ̄ bɛ̍ɛ̍ I̍ cho̍ lɛ̍ lāpi̍ le̍ a̍ mɛ̍mi̍a̍ŋ.

¹⁷Ndu̍yɛ̍ I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍. Pīɛ̄īlē nīle̍ŋ lē chō lē dīāndāā wa̍la̍ŋ Mɛ̍lɛ̄ka̍ o̍ hɔ̄l.

¹⁸Dīyɔ̄ɔ̍ nda̍ dīī ya̍ ho̍ō ni̍, lā vi᷅ŋ wāŋnda̍ ndi̍ le̍. Yāmɛ̍i̍ kīōlu̍ a̍ pīɔ̍m nūu̍ o̍kɔ̄ɔ̄.

¹⁹I̍ si̍nā māā mɛ̄ɛ̍ na̍a̍ ŋ̄ sūāā nu̍a̍ā yɛ̍ bɛ̍ɛ̍, I̍ nɔ̍ wāŋndo̍ chōo̍ cho̍o̍ o̍ su̍a̍ā le̍ ya̍ wo̍. I̍ nɔ̍ yāma̍nɔ̄ ni̍ si᷅m mbō sōō le̍ ya̍ wo̍.

²⁰Le̍la̍ŋ mi̍ chē bɛ̍ɛ̍ mi̍ chāāŋāā ni̍a̍a̍ ā wā ya̍ māmɔ̄ɔ̍, kɛ̍ I̍ sa̍ŋgā a̍ chūmndo̍ nāa̍ Mɛ̄lɛ̄ka̍ chūā le̍ mālāa̍ le̍.

²¹Ō nɛ̄ɛ̄ kpe̍e̍kpe̍i̍ ya̍ I̍ cho̍ yɛ̄ sɔ̄lā mbō nyɔ̄ɔ̄lu̍l la̍ Mɛ̄lɛ̄ka̍, mbō sōō le̍ ya̍ mɛ̄ɛ̍ wāŋndo̍ sūāā nu̍a̍ā le̍ chāa̍ŋ ndɔ̄ yɛ̍?

²²Yōōmū nūu̍ fūūlu̍u̍ o̍ mɛ̄ɛ̄lu̍ la̍ŋ. I̍ cho̍ hūnɔ̄ɔ̄ kɔ̄la̍ŋ nāa̍ ya̍ I̍ nɔ̍lā lɛ̍ mī mi̍i̍ŋgu̍ na̍nu᷄ŋ te̍ wa̍.