Read Southern Kisi Cho̍o̍bū 17 Bible Online

Cho̍o̍bū 17 - Southern Kisi bible

Cho̍o̍bū 17

¹I̍ nɔ̍ lɛ̍ māyōōmū o̍ māyōōmū le̍. Pālɛ̍i̍ nīi̍ ya̍ I̍ nɔ̍ le̍ wāa̍ o̍ chi̍e̍ēŋndo̍ chōo̍ ve̍, ī chō ni᷅ŋ hūnɔ̄ɔ̍ chūwɔ̄ɔ̍. Sɛ̄īyo̍ chō ni᷅ŋ ō bɛ̄ɛ̄ndīa̍ŋ le̍ ya̍.

²Wāŋnda̍ hu᷄ŋ ba̍lū ya̍ ma̍ sāā ya̍ māmɔ̄ɔ̍. Ya̍ o̍ hɔ̄l kpe̍e̍kpe̍i̍ nda̍ hu᷄ŋ si᷅m ni̍, mā dīmī di̍ōmndā wɔ̄ɔ̍ŋnda̍ŋ a̍ ya̍.

³Yāndi̍i̍ Mɛ̄lɛ̄ka̍, so̍o̍ le̍ ya̍ mā pi̍ŋi̍ ya̍ fɔ̍. I̍ nɔ̍ lɛ̍ wānā o̍ wānā che̍le̍ŋ mbō si᷄m ya̍ kɔ̄ɔ̄lī le̍.

⁴Nūm pi̍la̍ to̍sa̍ chāāŋāā nīa̍a̍ ā si̍nā lɛ̍ nyɛ̄ o̍ nyɛ̄ pɛ̄ŋgu̍ le̍. Le̍la̍ŋ to̍sā mā nɔ̄la̍ ya̍ yōmɔ̄ɔ̄ le̍.

⁵Wāŋnda̍ dīmi̍ māā wānā o̍ wāna̍ to̍sa̍l chāa̍ŋ ndɔ̍ yālāle̍ŋ pɛ̍, le̍ hāli̍kpe̍ŋ mbō sɔ̄la̍ nyɛ᷄m chāa̍ŋ ndɔ̄ɔ̍ŋ, māā wānā ko̍ŋ chūāūwāā ndūa̍a̍ Mɛ̄lɛ̄ka̍ tūsī nyɛ᷅ pālāa̍ chōo̍ ni̍.

⁶Mɛ̄lɛ̄ka̍ tōsa̍ mi̍ wāŋnda̍ si̍i̍ŋgūū ya̍ ni᷅ŋ nyɛ̄ māmāā, wānā mɛ̍ɛ̍ndāŋ ya̍ ko̍ ō tūfū lɔ̍lūa̍ŋ.

⁷Mɔ̍nɛ̍i̍ cho̍ o̍ kɔ̄l nūu̍ ni᷄ŋ nde̍ ī chō ī bɔ̄ɔ̍, chɔ̄ bɛ̍ɛ̍ I̍ cho̍ lɛ̍ lāpi̍ le̍. I̍ yɔ̍nu̍ŋ ni᷅ŋ pāāla̍ŋ kpo̍sōŋ a̍ nyāūwo̍.

⁸Wānāa̍ chu̍a̍nu̍ŋ māā nda̍ chō sa̍kpō wa̍, kɔ̄ndɔ̄fi̍llo̍ bīī nda̍ a̍ nyɛ̍ yɔ̍nu̍ŋ a̍ ya̍ wo̍. Nda̍ kpo̍u̍ ā kīlu̍l la̍ yāmɛ̍i̍, māā I̍ cho̍ wa̍nā dɔ̍ū ti̍i̍nda᷄ŋ o̍ Mɛ̄lɛ̄ka̍ ni᷄ŋ te̍, nyɛ̄ kōŋ nyɛ̄ pālāa̍ tōl la̍ chōo̍ ni̍.

⁹Kɛ̍ ndu̍yɛ̍ wānā o̍ wāna̍ cho̍ wāna̍ tōnya̍a̍, lɔ̍ɔ̍ o̍ lɔ̍ɔ̍ hīōūwɔ̄ɔ̍ o̍ hi̍a̍ū la̍chi̍ a̍ sɔ̄ɔ̍ŋ tōnya̍ŋ tōsāa̍ ni̍. Wānā o̍ wāna̍ nɔ̍ la̍ba᷅ o̍ yɔ̄ŋ wɔ̄ɔ̍ŋ ni᷄ŋ te̍, le̍ te̍le̍ŋ o̍ te̍le̍ŋ dīāllūŋ kālāŋ sɛ̄nɛ̄īyo̍ŋ o̍ sɔ̍lā ni̍.

¹⁰Kɛ̍ nya̍ nya̍ mɛ̄ɛ̍ nyā chō tu᷅, ā yɔ᷄ŋ bɛ̍ɛ̍ mī lā si᷄m vɛ̄lɛ̄ ya̍ o̍ hɔ̄l, nyɛ̄ o̍ nyɛ̄ nya̍ dīmu̍l la̍ mī lā mīīŋgu̍ vɛ̄lɛ̄ sōndō lēchōo̍ kpo̍lo̍to̍to̍, wānā pi᷅lɛ̍ bɛ̍ɛ̍ I̍ se̍e̍lu̍ŋ nya̍ tɛ̄ɛ̄ŋ mbō wa̍ wāna̍ kɔ̄l kālu̍ le̍.

¹¹Pālɛ̍i̍ nīi̍ ya̍ I̍ nɔ̍ le̍ wāa̍ o̍ chi̍e̍ēŋndo̍ chōo̍ ve̍ ī fūūlu̍u̍ o̍ mɛ̄ɛ̄lu̍la̍ŋ Tūūlā nīla̍ŋ kpo̍u̍ lā tāmbu̍. Nyɛ̄ o̍ nyɛ̄ ya̍ i̍i̍ ye̍e̍ma̍ a̍ kɔ̄l nūu̍, I̍ sɔ̍lā lɛ̍ ndu̍ le̍.

¹²Chāāŋāā nīa̍a̍ nda̍, nyūmnda̍ŋ nda̍ dīmi̍ ni̍ māā ma̍ŋ ma̍ cho̍ nyɛ̄ wa̍wo̍ŋndo̍ ni̍. Tē nyūmnda̍ŋ mā tōl pɛ̍, nda̍ dīmi̍ māā nyɛ̄ wa̍wo̍ŋndo̍ hīŋ.

¹³I̍ si̍nā ni᷅ŋ māā chi̍e̍e̍ wāŋ vīlɛ̍i̍ya̍ cho̍ ni᷅ŋ ō bɛ̄ɛ̄ndīa̍ŋ le̍ ya̍. Lo̍ŋ ya̍ I̍ cho̍ lākɔ̄ wā īhīni̍ o̍ nyūmmā bɛ̄ndūa̍ŋ ni᷄ŋ ni̍.

¹⁴Sɛ̄īyo̍ wa᷅ ni̍ŋ sɔ̍ŋgɔ̍ fi̍nyā nūu̍ nī. Dōndo̍po᷅llāa̍ wa᷅ ni̍ŋ ya̍ dīo̍o̍ wa̍ nda̍ wa᷅ ni̍ŋ sɔ̍ŋgɔ̍ kāla̍ nūu̍ ni̍, nda̍ ko̍ wa᷅ ni̍ŋ vɛ̍lɛ̄ sɔ̍ŋgɔ̍ yēmāa̍ nīa̍a̍ ni̍.

¹⁵Nyɛ̄ o̍ nyɛ̄ cho̍ lɛ̍ mī wa̍ lēhɔ̄l o̍ nɛ̄ī le̍ ndu̍ le̍? Ō yɛ̄ɛ̄ wa̍nā chɔ᷅m yɛ̍ ya̍ vɛ̄lɛ̄ mī wa̍ lēhɔ̄l o̍ nɛ̄ī le̍ ndu̍?

¹⁶Tē I̍ vi᷅ ni᷅ŋ pɛ̍ mī ku̍ɛ̄ o̍ wāŋ vīlɛ̍i̍ya̍ lo̍ chi̍e̍e̍, nāa̍ dīōla̍ŋ lā wā ya̍ lā kīīndīāā kɔ̄ɔ̄lī wa̍, ō yɛ̄ɛ̄ che᷅le̍ŋ ya̍ I̍ wa᷅ yɛ̍ vɛ̄lɛ̄ lēhɔ̄l o̍ nɛ̄ī māā ō chō ya̍ lāchī?