Read Southern Kisi Cho̍o̍bū 18 Bible Online

Cho̍o̍bū 18 - Southern Kisi bible

Cho̍o̍bū 18

¹O̍ ko̍ŋ kɔ̍ɔ̍lī, mi̍ Bi̍li̍dāā, Cho̍o̍bū chāa̍ŋ ndɔ̍ fu̍la̍ Su̍a̍ā wo̍, ō dīmūl Cho̍o̍bū māā, Cho̍o̍bū, ā sa̍ŋga̍ wɔ̍ a̍ sūɛ̍i̍ le̍? To̍sa̍ wɔ̍ ni᷅ŋ sūɛ̍i̍ kɔ̄l kālu̍ mā me̍i̍ yɔ̄ ni᷅ŋ, na̍a̍ bɛ̍ɛ̍ mī ŋ̄ sōō.

³Ŋ̄ cho̍ la̍chɔ̍lū le̍, wāŋndā chīe̍e̍ya̍ na̍a̍ ŋ̄ chō ni̍. Cha᷅ na̍a̍ māā lādīɔ̄m te̍ na̍a̍ ŋ̄ chō le̍.

⁴Ō cho̍ wa̍nā le̍ bo̍o̍lu̍u̍ nu̍m te̍ Cho̍o̍bū, nūm pi̍la̍ bo̍o̍lu̍ŋ o̍ tu̍mbe̍ nu̍mndo̍ ni᷄ŋ ni̍. Ā nɔ̄ o̍ kɔ̄l tu̍mbe̍ nu̍mndo̍ nɔ̄lā mbō tōsa̍ mī chi̍e̍ēŋndo̍ ho̍ō ō lo̍ fo̍ndō? Bāā Mɛ̄lɛ̄ka̍ fāŋa̍ pēmbūŋ bɛ̄ndo᷄ŋ o̍ fo̍ndālā ndāla̍ŋ, le̍ tu̍mbe̍ ŋ̄ dɔ̄ɔ̄nu᷄ŋ ndo̍?

⁵Ke̍ŋ i̍ yɔ̍nūŋ te̍ Cho̍o̍bū. Wāna̍ dɛ̍nɛ̍ wɔ̍ɔ̍ŋndo̍ ndu̍ pīɔ̍mndo̍ o̍ nɔ̍ ni̍ mbō sɔ̍lā. Yōōmū ndɔ̄ɔ̍ chō hūnɔ̄ɔ̄ nyūm lē pīlɛ̍ kpe̍, mɛ̄ɛ̍ nda̍ nyūmī nu̍a̍ā yīŋnde̍ŋ yɛ̍.

⁶Ō chō hūnɔ̄ɔ̄ nyūm mɛ̄ɛ̍ la̍mbūi̍yo̍ nyūm nu̍a̍ā chīɛ̄ī ni̍ŋ, mī nyūmnda̍ŋ mā tōl lɛ̍. Yōōmū ndɔ̄ɔ̍ chō hūnɔ̄ɔ̄ chūwɔ̄ɔ̄.

⁷Kpāāya̍ ndɔ̄ɔ̍ chō hūnɔ̄ɔ̄ chūwɔ̄ɔ̄, ō vɛ̍ lɛ̍ ni̍ŋ ba̍lɔ̄ɔ̍ a̍ tīīnda᷄ŋndo̍ nɔ̄ɔ̍ māā pāāndū le̍. Tūūlā ndɔ̄la̍ wɔ̍ɔ̍ŋnda̍ŋ, lā chō ndu̍ hūnɔ̄ɔ̄ mālɔ̄ɔ̄ o̍ nyɛ̄ pālāa̍ ni᷄ŋ.

⁸Yāŋɔ̄ɔ̄lē ndu̍ pi̍la̍ ya̍ŋ nde̍ŋ ō chō hūnɔ̄ɔ̄ hāū o̍ le̍ŋ. Ō chō hūnɔ̄ɔ̄ pēlēi̍ mālɔ̄ɔ̄ o̍ so̍o̍ŋ kpa̍līo̍o̍ ni᷄ŋ, mbō de᷄l lēni᷄ŋ.

⁹Yāŋɔ̄ɔ̄le̍ŋ lē chō ndu̍ hūnɔ̄ɔ̄ pēlēi̍ sāā. Lē chō ndu̍ hūnɔ̄ɔ̄ tɔ̄ndīī kɔ̄ɔ̄līe̍i̍ sāālā.

¹⁰Ā kɛ̄su̍l ndu̍ chu̍āŋnde̍ŋ o̍ nɛ̄ī. Nāa̍ o̍ hi̍a̍ū wa̍ kpe̍e̍kpe̍i̍ nda̍ ye᷄ŋ ndu̍ yāŋɔ̄ɔ̄le̍ŋ ni̍.

¹¹Sɔ̍ɔ̍ŋ lu̍e̍ī ndu̍ sīōōŋīī bɛ̄ndūe̍i̍ yo̍ŋ ki̍nɛ̍i̍ ŋ̍ cho̍ ndu̍ ŋ̄ bālāā ni̍. Ndu̍yɛ̍ bā o̍ hi̍a̍ū ko̍ ŋ̍ tu̍āl ndu̍ kɔ̄ɔ̄lī ni̍.

¹²Yīa̍a̍ŋ mā chīi̍ ndu̍ yōōmūa̍ŋ kpo̍u̍. Le̍ te̍le̍ŋ o̍ te̍le̍ŋ, nyɛ̄ pālāā bɛ̄ndōo̍ chu̍ū lɛ̍ ndu̍ chōo̍ le̍.

¹³Nāā wɔ̄ɔ̍ŋndo̍ de᷄l ndu̍ chōo̍ mbo̍ tɛ̄ɛ̄mbūū ndu̍ kɔ̄ɔ̍le̍ŋ kpo̍u̍. Nāā pīɔ̍mndo̍ chīi̍ ndu̍ bāla̍ŋ a̍ pēlo̍ŋ kīlī.

¹⁴Ō wānu̍ŋ o̍ tɛ̍ndīi̍ ndɔ̄ɔ̍ ni᷄ŋ a̍ kɔ̄l nyūlū, ō wa̍ yīya᷄ŋndo̍ māā nyɛ̄ nɔ̍lā mbō yɔ̄nu̍ŋ a̍ ndu̍ le̍, kɛ̍ pīɔ̍mndo̍ sōli̍ ndu̍ lo̍ŋ mbo̍ kūā a̍ ndu̍ o̍ māsa̍ wāŋ vīlɛ̍i̍ya̍ lo̍.

¹⁵Wānāā chēle̍ŋāa̍ cho̍ bɛ̍ɛ̍ wa̍nāā ndɔ̄ le̍ wa̍ nda̍ cho̍ ni᷅ŋ o̍ tɛ̍ndi̍i̍ ndɔ̄ɔ̍ ni᷄ŋ ni̍. Ā dɔ̄ū kōo̍wa̍ŋ o̍ tɛ̍ndi̍i̍ ndɔ̄ɔ̍ ni᷄ŋ, yɔ̄ŋi̍ nāā wɔ̄ɔ̍ŋ cho̍ lo̍ŋ ndo̍ ō bīi̍ wa̍nāa̍ cho̍ le̍ni̍ŋ nda̍.

¹⁶Ō chō ni᷅ŋ māchūāā, mɛ̄ɛ̍ yɔ̄mndo̍, pūūndu̍ŋ ndɔ̄ɔ̍ŋ ŋ̄ sīānūŋ nu̍a̍ā lēbɛ̄ŋgu̍, mī lɛ̄ūwo̍ŋ vēsa̍ŋ le̍ chōo̍ yɛ̍.

¹⁷Wānā o̍ wānā pu̍ɛ̍ɛ̍nu̍ŋ ni᷅ŋ a̍ ndu̍ o̍kɔ̄ɔ̄, wāŋnda̍ de᷅l lɛ̍ bɛ̍ɛ̍ kɔ̍l a̍ ndu̍ le̍.

¹⁸Mɛ̄lɛ̄ka̍ chō ndu̍ sōlī wānāa̍ cho̍ yōōmū wa̍ tɛ̄ɛ̄ŋ, mbō yɛ̄ɛ̄ ndu̍ o̍ nyūmmā bɛ̄ndūa̍ŋ ni᷄ŋ chi̍e̍e̍ pīɔ̍m. Ō chō ndu̍ hūnɔ̄ɔ̄ fāŋā o̍ chi̍e̍ēŋndo̍ ho̍ō chōo̍ ba̍ū.

¹⁹Ndu̍yɛ̍ ō mɛ̍ī ni̍ŋ chu̍ā o̍ chūā, kɛ̄lɛ̄ŋgāā chūā māmā wānāā ndūa̍a̍ tɛ̄ɛ̄ŋ te̍, wānā pi᷅lɛ̍ bɛ̍ɛ̍ lo᷅ ni̍ŋ o̍ yu̍ŋgu̍ ndɔ̄ɔ̍ chōo̍ le̍.

²⁰Wānāa̍ cho̍ bā pāa̍le̍ŋ lē chāŋndo̍, a̍ bā pāa̍le̍ŋ lē dēl lo̍ wa̍ ni̍, nda̍ kpo̍u̍ ā chō tūēīyɔ̄ɔ̄ a̍ nyɛ̄ pālāā bɛ̄ndu̍ tu̍āl ni̍ŋ ndu̍ chōo̍, wo̍ o̍kɔ̄ɔ̄ mī kɔ̄ndɔ̄fi̍llo̍ bīī nda̍.

²¹Wānāā dɛ̍nɛ̍ wɔ̍ɔ̍ŋnda̍, a̍ wānāa̍ do̍u̍ ti̍i̍nda᷄ŋ ndāa̍ o̍ Mɛ̄lɛ̄ka̍ ni᷄ŋ te̍ wa̍, nda̍ kpo̍u̍, nu̍a̍ā i̍ yɔ̍nūŋ a̍ nda̍ ni̍.