Read Southern Kisi Cho̍o̍bū 19 Bible Online

Cho̍o̍bū 19 - Southern Kisi bible

Cho̍o̍bū 19

¹O̍ ko̍ŋ kɔ̍ɔ̍lī, mi̍ Cho̍o̍bū di̍mī āā Sɛ̄īyo̍ cho̍ ni᷅ŋ ō bɛ̄ɛ̄ndīa̍ŋ le̍ ya̍.

²Lā pɛ̄ŋgi̍ ni᷅ŋ ya̍ kɔ̄llo̍ tɛ̄ɛ̄mbūū wo̍ a̍ dīōmndā nya̍ chō ya̍ la᷅ŋ dīmūllo̍ la̍ŋ.

³Dīōmnda̍ tɛ̍ɛ̍mbūū ya̍ kɔ̄llo̍ la̍ŋ kpo̍sōŋ ko̍ni̍ nya̍ chō ya̍ dīmūllo̍ nī, dīmīo̍o̍ mī lā mīŋgī so̍ndō lēchōo̍. Si̍ɔ̍mbu̍la̍ ve᷅ nya̍ le̍ ya̍ dīōmndā wāā nu̍a̍ā dīmūllo̍ le̍?

⁴Ndu̍ o̍o̍ wa̍ bɛ̍ɛ̍ āā yɔ̄ŋ wɔ̄ɔ̍ŋndo̍ lēkɛ̍ndɛ̍ī ya̍ i̍i̍ to̍sa̍ ni̍, ō cho̍ ba̍ nyā ha̍vɛ̍i̍ le̍ cho̍ ko̍ŋ te̍.

⁵Le̍ mɛ̄ɛ̍ dɛ̍nɛ̍ pa̍lāa̍ tōl la̍ chōo̍ yɛ̍, nyɛ̍ kōŋ nya̍ dīmi̍ ni̍ māā yɔ̄ŋ wɔ̄ɔ̍ŋndo̍ ya̍ I̍ to̍sa̍ ni̍. Lā yi̍ya᷄ŋ nu̍a̍ā māā lā bɛ̄nda̍ mi̍ lā hīāū ya̍ le̍.

⁶Lā sīna̍ pɛ̍ŋgu̍ māā Mɛ̄lɛ̄ka̍ tu̍si̍ ya̍ sāŋgāa̍ ho̍ō chōo̍ ni̍. Ndu̍ ye̍ŋ ya̍ yāŋɔ̄ɔ̄le̍ŋ nde᷅ŋ ni̍ mi̍ ha̍ū.

⁷I̍ cho̍ cha᷄ŋndo̍ fe̍e̍e̍ ma̍a̍, dɛ̍nɛ̍ pa̍lāa̍ tōl la̍ chōo̍, lā pīŋi̍ ya̍ fɔ̍, wānā o̍ wānā mu̍lī ya̍ dīōm te̍. I̍ cho̍ ŋɔ̄ɔ̄chīa̍ŋndo̍ le̍ wāna̍ ma̍lā ya̍ wo̍, kɛ̍ wānā o̍ wānā cho̍ mbō sōō le̍ ya̍ le̍.

⁸Mɛ̄lɛ̄ka̍ kīnda̍ ya̍ nɛ̄īyo̍ lāchī, I̍ nɔ̍lā mī hi̍o̍ū le̍. Ō tūsi̍ ya̍ nyūmmā bɛ̄ndūa̍ŋ lāchī kpi᷅ŋgbi̍.

⁹Mɛ̄lɛ̄ka̍ chīi̍ bɛ̄ɛ̄le̍ nīle̍ŋ, sūl nūu̍ kpo̍u̍ ō chīi̍ pūū.

¹⁰Mɛ̄lɛ̄ka̍ chīi̍ a̍ ya̍. Nyɛ̄ o̍ nyɛ̄ ya̍ i̍i̍ nɔ̍ ō chīi̍ tɛ̄ɛ̄mbūū. I̍ cho̍ ni᷅ŋ māchūāā mɛ̄ɛ̍ nda̍ sūŋgū nu̍a̍ā yɔ̄mndo̍ mā ma᷄l ndu̍ lɛ̄ŋ mbō vēsa̍ŋ yɛ̍. I̍ nɔ̍ lɛ̍ tīīnda᷄ŋ o̍ tīīnda᷄ŋ te̍.

¹¹Mɛ̄lɛ̄ka̍ dɔ̄ɔ̄nu᷄ŋ tu̍mbe̍ a̍ ya̍ mbo̍ tūsī ya̍ nyɛ̄ pālāa̍ chōo̍. Ō bīī ya̍ mɛ̄ɛ̍ wāŋndo̍ bīī nu̍a̍ā ya̍a̍mɔ̍ɔ̍nɔ̍ ndɔ̄ɔ̍ yɛ̍.

¹²Ō yɔ᷄ŋ so̍vɛ̄i̍ya̍a̍ ndūa̍a̍ le̍ ya̍ hūnɔ̄ɔ̍ dēlɔ̄ɔ̍ chōo̍. So̍vɛ̄i̍ya̍a̍ ndūa̍a̍ hu᷄ŋ ba̍lū tɛ̍ndi̍i̍ nūu̍, ma̍ bɛ̄ɛ̄ndīa̍ŋ le̍ ya̍ dēlɔ̄ɔ̍ chōo̍.

¹³Mɛ̄lɛ̄ka̍ tōsa̍ pɔ̄mbūāā nīa̍a̍ sɔ̍ɔ̍ŋgūū lɛ̍ ya̍ īkɛ̄i̍ le̍. Wānāā nda̍ a̍a̍ si̍nā ya̍ pāāndū wa̍ kpo̍u̍ ā chā ni᷅ŋ ya̍ ko̍ āā wānā che᷅le̍ŋ ni̍.

¹⁴Wānāya᷅ŋ nūu̍ŋ a̍ chāāŋāā nīa̍a̍ ā kɛ̄ɛ̍ ya̍ ni᷅ŋ

¹⁵Wānāa̍ wa̍ pāāndū mīālla̍ o̍ ya̍ lo̍ chi̍ɛ̍ī ni̍ŋ nda̍ kpo̍u̍ ā pūɛ̄ɛ̄nu̍ŋ ni᷅ŋ ya̍. Bu̍ɛ̍i̍yāā nīāā la̍a̍ndūa̍a̍, ā chā ya̍ ni᷅ŋ ko̍ bɛ̍ɛ̍ āā wāna̍ lēkāa̍ ni̍, ā chā ya̍ ni᷅ŋ ko̍ bɛ̍ɛ̍ āā wānā che᷅le̍ŋ ni̍.

¹⁶I̍ ve̍e̍lu̍ ni᷅ŋ bɛ̍ɛ̍ bu̍ɛ̍i̍yāā nīa̍a̍ ō pīlɛ̍ ō mu̍lī ya̍ dīōm te̍. I̍ nyɔ̍ɔ̍lu̍ ni᷅ŋ bɛ̍ɛ̍ o̍ pi᷅lɛ̍ le̍ ya̍ mālāa̍ ō sɔ̍ɔ̍ŋgūū ya̍ īkɛ̄i̍ le̍.

¹⁷La̍a̍ nūu̍ bɛ̍ɛ̍ ō nɔ̍lā lɛ̍ mbō si᷄m ya̍ īkɛ̄i̍ le̍, a̍ hūēīyīī wɔ̄ɔ̍ŋīi̍ cho̍ ya̍ fūlāa̍ ni᷄ŋ nde̍. Chūŋ nūu̍ tōsa̍ pɔ̄mbūāā nīa̍a̍ (a̍ bɛ̍ndāā nīa̍a̍) ā sɔ̍ɔ̍ŋgūū lɛ̍ ya̍ īkɛ̄i̍ le̍.

¹⁸Chūāāmbūāā pɔ̄mbūa̍a̍ kpo̍u̍, ā chō ni᷅ŋ ya̍ māmɔ̄ɔ̍, tē I̍ chɛ̍ŋ pɛ̍ ā ma᷄m ya̍.

¹⁹Chāāŋāā nīa̍a̍ na̍a̍ ŋ̍ chi̍ī ba̍lta̍ pāāndū wa̍ kpo̍u̍, ā tu᷄l la̍ ni᷅ŋ lēyɛ̄. Wānāā ya̍ i̍i̍ ka̍a̍la̍ kāālā bɛ̄ndōo̍ wa̍ tu᷅ ā ma᷄l la̍.

²⁰I̍ yɔ̍nu̍ŋ ni᷅ŋ pāāla̍ŋ a̍ kɔ̄lōo̍ kpo̍sōŋ, a̍ nyāū ya̍ I̍ nya̍u̍ wo̍. Sɔ̍ŋgɔ̍ wānā vi̍lɛ̍i̍ ko̍ni̍ ya̍ I̍ cho̍ ni᷅ŋ ni̍.

²¹Le̍la̍ŋ yāndi̍i̍ chāāŋāā nīa̍a̍, nyīɛ̍ɛ̍ye̍ bīi̍ nya̍ le̍ ya̍ fɔ̍, kāni̍ fo̍ndōle̍, Mɛ̄lɛ̄ka̍ lɔ̄ɔ̄ ya̍ ō bɔ̄ɔ̍.

²²Vɛ᷅ mi̍ nya̍ wā ya̍ vɛ̄lɛ̄ nyɛ̄ pālāā chēle̍ŋ hāndɔ̄ɔ̍ chōo̍, o̍ nyɛ̄ pālāā Mɛ̄lɛ̄ka̍ tūsi̍ ya̍ ho̍ō chōo̍ wo̍ kɔ̄ɔ̄lī? Lā pɛ̄ŋgi̍ ni᷅ŋ ya̍ kɔ̄llo̍ tɛ̄ɛ̄mbūū wo̍ a̍ ya̍ dīōmndā wāā nu̍a̍ā dīmūllo̍ le̍?

²³Ndu̍ o̍o̍ bɛ̍ndā bɔ̍ɔ̍ mī wāŋndo̍ ndu̍ o̍o̍ pōōnyi̍a̍a̍ dīōmndā nīla̍ŋ. Ndu̍ o̍o̍ wa᷅ bɔ̍ɔ̍ o̍ kɛ̍ndɛ̄ mī dīōmndā nīla̍ŋ la̍a̍ wa̍ o̍ yāu̍wo̍ cho̍o̍.

²⁴I̍ ye̍e̍ma̍ mī wāŋndo̍ pōōnyi̍a̍a̍ dīōmndā nīla̍ŋ o̍ pōū yɛ̍ndɔ̄ɔ̍ chōo̍. Mbō pōōnyi̍a̍a̍ la̍ŋ nyɛ̄ kɛ̄ndɛ̄ kɛ̄ndɛ̄ a̍ kpɛ̄kīle̍ īchīli̍ŋnde̍ŋ, le̍ mī dīōmndā lāŋ lā wa̍ lā kɛ̄sīāā le̍ fɛ̍ɛ̍ŋ a̍ fɛ̍ɛ̍ŋ.

²⁵Kāni̍ fo̍ndōle̍, I̍ si̍nā māā wāna̍ ba̍ŋā ya̍ wo̍ ō chō yōōmū. Ndu̍ cho̍ hūnɔ̄ɔ̄ mɛ̄ɛ̄lū īsīsi̍ o̍ chi̍e̍ēŋndo̍ chōo̍ ni̍ mbō sōō le̍ ya̍.

²⁶Le̍la̍ŋ, mi̍ chē bɛ̍ɛ̍ mi̍ nāa̍ chīī ya̍ kpo̍u̍, kɛ̍ I̍ cho̍ lō o̍ dīāllo̍ŋ mu᷅ŋ ni᷄ŋ mī hu̍ŋ chɔ᷅ Mɛ̄lɛ̄ka̍.

²⁷I̍ cho̍ ndu̍ hūnɔ̄ɔ̄ chɔ̄ a̍ hɔ̄ltē nīle̍ŋ pɛ̍ɛ̍ŋ. Ndūyɛ̍ I̍ cho̍ ndu̍ chɔ̄ māā mīāl te̍, I̍ cho̍ ndu̍ hūnɔ̄ɔ̄ chɔ̄ māā wāna̍ ya̍ I̍ si̍nā. Kɔ̄l nūu̍ chō bɔ̄ɔ̍ a̍ nya̍a̍lo̍o̍, le̍ mɛ̄ɛ̍ he̍ī ī chō hūnɔ̄ɔ̄ yɔ̄nɔ᷄ŋ yɛ̍.

²⁸Tē lā dīmi̍ pɛ̍ māā lā chō ya̍ dɛ̍nɛ̍ pa̍lāā chēle̍ŋ chɔ̄ɔ̄lū tūsī chōo̍, kāni̍ fo̍ndōle̍ māā ya̍ pi̍la̍ nu̍u̍va̍ ndu̍ ni̍,

²⁹mɛ̄ɛ̍ sīōōŋnde̍ wa̍ nya̍ pɔ̍ɔ̍, kāni̍ fo̍ndōle̍, le̍ tu̍mbe̍ Mɛ̄lɛ̄ka̍ dūāūnūŋ ni̍ŋ a̍ nya̍ mbō dīu̍ nya̍ a̍ mūɛ̄ī fāŋnde̍ wo̍. Mɛ̄lɛ̄ka̍ chō hūnɔ̄ɔ̄ tu̍mbe̍ dɔ̍ɔ̍nɔ᷄ŋ a̍ wānāā dɛ̍nɛ̍ wɔ̍ɔ̍ŋnda̍, mbō tūsi̍ nda̍ dɛ̍nɛ̍ pa̍lāa̍ chōo̍ a̍ mūɛ̄ī fāŋnde̍. O̍ ko̍ŋ nya̍ chō sīnā ni̍ māā wāŋndo̍ chō o̍ ki̍lūl wa̍nāā dɛ̍nɛ̍ wɔ̍ɔ̍ŋnda̍ yāmɛ̍i̍ mbō tūsī nda̍ dɛ̍nɛ̍ pa̍lāa̍ chōo̍ wo̍.