Read Southern Kisi Cho̍o̍bū 20 Bible Online

Cho̍o̍bū 20 - Southern Kisi bible

Cho̍o̍bū 20

¹O̍ ko̍ŋ kɔ̍ɔ̍lī, mi̍ So̍fāā, Cho̍o̍bū chāa̍ŋ ndɔ̍ fu̍la̍ lɛ̄ŋndē Na̍a̍māle̍ŋ ndo̍ ō mūlī Cho̍o̍bū dīōm, mbo̍ dīmī māā,

²Cho̍o̍bū, dīōmndā ŋ̄ chō dīmīo̍o̍ ki̍nɛ̍i̍ la̍ŋ, lā chō ya̍ pālāa̍ bɔ̄ɔ̍. Le̍la̍ŋ I̍ cho̍ nu̍m dīōm mūlī.

³Nyɛ̄ o̍ nyɛ̄ ŋ̄ chō dīmīo̍o̍ bɛ̄ɛ̄la̍ŋ ko̍ni̍ ŋ̄ chō ya̍ tɛ̄ɛ̄mbūūwo̍ ni̍. Kɛ̍ I̍ si̍nā mɛ̄ɛ̍ ya̍ I̍ cho̍ nu̍m dīōm mūlī yɛ̍.

⁴Cho̍o̍bū, kāni̍ ma̍si̍ndɛ̄, chɔ̍ŋ bɛ̍ɛ̍ a̍ te̍le̍ŋ Mɛ̄lɛ̄ka̍ tōōsi̍a̍a̍ wāna̍ chi̍o̍o̍ wo̍, ā sīnā he̍ī pɛ̄ŋgu̍.

⁵Ā sīnā māā wāna̍ dɛ̍nɛ̍ wɔ̍ɔ̍ŋndo̍ ndu̍ kɔ̄l ndɔ̄ kɛ̍ndɔ̄ɔ̍ ō bēndu̍ bu̍ le̍. Ā sīnā māā wāna̍ kɛ̍ɛ̄ ho̍ō Mɛ̄lɛ̄ka̍ wo̍, kɔ̄l ndɔ̄ kɛ̍ndɔ̄ɔ̍ le̍ te̍le̍ŋ bi̍ŋgī ko̍ni̍ o̍ cho̍ ni̍.

⁶Mɛ̄ɛ̍ mɛ̄ɛ̍ o̍ si̍mnu᷄ŋ o̍ bɛ̍ndū, ndu̍yɛ̍ mbō bāndu̍, mbō kūndu᷄ŋ ha̍la̍a̍ chōo̍ cho̍o̍,

⁷mɛ̄ɛ̍ hūēīye̍ ī kūānūŋ nu̍a̍ā a̍ chu̍ndo̍o̍ yɛ̍, le̍nde̍ nda̍ lō o̍ lēpīlɛ̍ ni᷄ŋ ni̍. Wānāā nda̍ a̍a̍ si̍nā ndu̍ bɛ̍ɛ̍ pa̍a̍ndū wa̍ nyūnāa̍ nda̍ nyūnā ni᷅ŋ ni̍ le̍ nāa̍ o̍ hi̍o̍ū wa̍.

⁸Mɛ̄ɛ̍ wāŋndo̍ ō sɔ̄l nu̍a̍ā lūa̍a̍ŋ tē pāa̍le̍ŋ lē sɛ̄ pɛ̍, ō lo̍o̍nūŋ ndɛ̍ ma̍ŋ te̍ yɛ̍, le̍nde̍ i̍ yɔ̍nūŋ a̍ ndu̍ ni̍, wānā se̍e̍lūŋ ndɛ̍ ndu̍ le̍. Mɛ̄ɛ̍ wāŋndo̍ ō chā nu̍a̍ā yi̍lāŋndo̍ īchɔ̄l tē pāa̍le̍ŋ lē sɛ̄ pɛ̍, ō lo̍o̍nūŋ ndɛ̍ nyɛ̄ o̍ che᷅ wo̍ le̍ yɛ̍, le̍nde̍ wāŋnda̍ ā pūɛ̄ɛ̄nūŋ a̍ ndu̍ ni̍.

⁹Wānāā nda̍ a̍a̍ cha᷅ ndu̍ pāāndū wa̍ kpo̍u̍ ā chi᷅ lɛ̍ ndu̍ le̍. Fo̍ndā ndɔ̍ o̍ wa̍ pāāndū īchāli̍ wo̍, wānā chi᷅ lɛ̍ ndu̍ lo̍ŋ te̍.

¹⁰Nyɛ̄ o̍ nyɛ̄ ndu̍ o̍o̍ bi̍ī wānāā tāmbɛ̍i̍ya̍ o̍ lābā o̍ ka̍fāla̍ŋ ni᷄ŋ, mī chūāā ndūa̍a̍ ā kōma̍ mi̍ŋgī wānāā tāmbɛ̍i̍ya̍a̍ ka̍ŋ o̍ lābā kpo̍u̍.

¹¹Kpāāya̍ ndɔ̍ īchūā pīāāndūya̍ ndu̍ o̍o̍ nɔ̍ wo̍ kpo̍u̍, mbō kūɛ̄ o̍ pūūlōo̍ bɛ̄ŋgu̍ nāa̍ ndu̍ pi̍la̍ o̍ ku̍ɛ̄ wa̍.

¹²Wāna̍ yɔ̄ŋ wɔ̄ɔ̍ŋndo̍ mɛ̄ɛ̍ līa̍a̍ŋ mā yēēla̍ nu̍a̍ā yɛ̍, le̍nde̍ yɔ̄ŋ wɔ̄ɔ̍ŋndo̍ ō yēēla̍ ndu̍ o̍ sōndō ni̍. Mbō vēŋ ndu̍ o̍ dīɔ̄ɔ̄mūle̍ŋ bɛ̄ŋgu̍ kpi̍ŋ,

¹³ō ye̍e̍mā bɛ̍ɛ̍ mbō sōli̍ŋ ndu̍ o̍ sōndō le̍, Mbō kɛ̄si̍ŋ ndu̍ o̍ sōndō ō ye̍e̍mā bɛ̍ɛ̍ mbō fūla̍ ndu̍ o̍ sōndō le̍.

¹⁴Kɛ̍ ndu̍yɛ̍ tē ō mēl ndu̍ pɛ̍ ō wāāla̍ ndu̍ o̍ dēmbē, tē ō mēl ndu̍ pɛ̍ ō sīmnu᷄ŋ ndu̍ ni᷄ŋ māā lo̍lō kūī.

¹⁵Sūltā pi̍la̍lā o̍ mi̍si̍ ki̍nɛ̍i̍ la̍ŋ, ō chō la̍ŋ kūūsūū kpo̍u̍. Mɛ̄lɛ̄ka̍ chō ndu̍ la̍ŋ sōlī ni᷄ŋ kpo̍u̍

¹⁶Nyɛ̍ o̍ cho̍ ko̍ŋ di̍o̍o̍ mbo̍ yēēlā ndu̍ o̍ sōndō wo̍, ō chō māchūāā mɛ̄ɛ̍ yɛ̍īmā kɛ̄ūwo̍ mā chō nu̍a̍ā yɛ̍. Yɛ̍īmā kɛ̄ū mā māŋ, ma̍ŋ ma̍ cho̍ ndu̍ dīyɔ̄ɔ̄ ni̍.

¹⁷Dɛ̍nɛ̍ kɛ̍ndɛ̄ bɛ̄ndu̍ wa᷅ ni̍ŋ o̍ ku̍a̍ŋna᷄ŋ kɛ᷅ kɛ᷅ mɛ̄ɛ̍ pēēla̍ pɔ̍mbɔ̄la̍ŋ lā hīāū nu̍a̍ā yɛ̍ wo̍, ō tu̍i̍ī ndu̍ ni̍ŋ ye̍e̍lā le̍.

¹⁸Nyɛ̄ o̍ nyɛ̄ o̍ chu̍u̍ŋgi̍a̍a̍ o̍ sāŋgā ndɔ̄ɔ̍ ni᷄ŋ ō chō ndu̍, mīŋgī wāŋnda̍ o̍ lābā kpo̍u̍. Tɔ̄nɔ̄ o̍ tɔ̄nɔ̄ o̍ sɔ̍la̍ o̍ yākōle̍ ndɔ̄le̍ŋ ni᷄ŋ, ō cho̍ ndu̍ tɔ̄nɔ̄ di̍o̍ le̍.

¹⁹Kāni̍ fo̍ndōle̍, le̍ mɛ̄ɛ̍ o̍ kɛ̍ɛ̍ le̍ wānāā tāmbɛ̍i̍ya̍ mālāa̍, mbo̍ tūsī nda̍ nyɛ̄ pālāa̍ chōo̍ yɛ̍. Chīɛ̄īlā pi̍la̍ la̍ŋ, mbo̍ lō o̍ ko̍ŋ mbo̍ pōōndīāā la̍ŋ a̍ ka̍ka̍.

²⁰Mɛ̄ɛ̍ mɛ̄ɛ̍ o̍ sɔ̍la̍ ō hi̍nī kɔ̍l te̍, a̍ hɔ̄ltē bɛ̄ndūlē o̍ nɔ̍ le̍ŋ. Ō nɔ̍lā mbō mānda̍ nyɛ̄ o̍ nyɛ̄ le̍.

²¹Nyɛ̄ o̍ nyɛ̄ o̍ ka̍ndu̍ dīo̍o̍ pɛ̍ mɛ̄ɛ̍ mbō chīi̍ ndu̍ kpo̍u̍, ō mɛ̍ī nyɛ᷅ o̍ nyɛ̄ le̍. Le̍la̍ŋ dɛ̍nɛ̍ ndɔ̄ kɛ̍ndɔ̄ɔ̍ ō hi̍ū la̍chi̍ le̍.

²²Te̍le̍ŋ o̍ cho̍ bāla̍ŋ pīɔ̄ nyɛ̄ kɛ̄ndɛ̄ kɛ̍ndɛ̄ wo̍, a̍ te̍le̍ŋ ko̍ŋ nyɛ̄ pālāa̍ ō chō ndu̍ tōlɔ̄ɔ̄ chōo̍ ni̍.

²³A̍ te̍le̍ŋ o̍ cho̍ pu᷄m nyɛ᷅ kɛ̄ndɛ̄ kɛ̍ndɛ̄ wo̍, a̍ te̍le̍ŋ ko̍ŋ Mɛ̄lɛ̄ka̍ chō tu̍mbe̍ dɔ̍ɔ̍nɔ᷄ŋ a̍ ndu̍ ni̍ mbō tūsi̍ ndu̍ nyɛ̄ pālāa̍ chōo̍.

²⁴Ō nyāānūŋ ni̍ŋ yɔ̄ŋi̍ nda̍ yɔ̄ŋu̍l ndu̍ a̍ wōlɔ̄ɔ̄lā chɔ̄ūlā īchi̍li̍ŋnda̍ŋ, mī chīŋɔ̍le̍ ībūlɔ̍ŋsīi̍le̍ŋ lē kɔ̍ bi̍ī ndu̍.

²⁵Ā chō ndu̍ vīɔ̄ a̍ chīŋɔ̍le̍ŋ mī lē kɔ̍ fu̍lā lēkɔ̍ɔ̍lī. Chīŋɔ̍le̍ nɔ̍ bōlle̍ŋ ŋɛ̍lɛ̄ŋgi̍ ŋɛ̍lɛ̄ŋgi̍ le̍ŋ nde̍ŋ lē chō dīūwɔ̄ɔ̄ yɔ̍ɔ̄ a̍ kōo̍ma̍ ndūa̍ŋ. Sīōōŋīī bɛ̄ndūe̍i̍ ī chō ndu̍ bīyɔ̄ɔ̄.

²⁶Nyɛ̄ o̍ nyɛ̄ o̍ chu̍u̍ŋgi̍a̍a̍ ō chō hūnɔ̄ɔ̄ hīōūwɔ̄ɔ̄ kpo̍u̍ o̍ nyūmnda̍ŋ ni᷄ŋ. Yīŋndē wāna̍ chi̍e̍e̍ o̍ mɛ̍ndūl ni̍ŋ te̍ le̍ŋ lē chō ndu̍ hūnɔ̄ɔ̄ lōmɔ̄ɔ̄ mī lē tɛ̄ɛ̄mbu̍u̍ ndu̍, lātūlu̍ a̍ nyɛ̄ o̍ nyɛ̍ lo᷅ ni̍ŋ o̍ ndu̍lo̍ chi̍ɛ̍ī ni̍ŋ.

²⁷Nyɛ᷄m cho̍ o̍ ha̍la̍a̍ ni᷄ŋ cho̍o̍ cho̍o̍ wo̍ŋ, ŋ̄ chō hūnɔ̄ɔ̄ chɔ̄m a̍ ndu̍ o̍kɔ̄ɔ̄ māā ō chō wāna̍ yɔ̄ŋ wɔ̄ɔ̍ŋ. Chi̍e̍ēŋndo̍ bɛ̍ɛ̍, ō chō hūnɔ̄ɔ̄ se̍īle̍ŋ tɛ̄ndā a̍ ndu̍ o̍kɔ̄ɔ̄ māā ō wɔ̄u̍.

²⁸Pāa̍le̍ Mɛ̄lɛ̄ka̍ dūāūnūŋ ni̍ŋ tu̍mbe̍ a̍ ndu̍ le̍ŋ, nyɛ̄m ndɔ̄ɔ̍ŋ kpo̍u̍ ŋ̄ chō hūnɔ̄ɔ̄, hīōūwɔ̄ɔ̄ mɛ̄ɛ̍ tīndi̍le̍ŋ lē hīāū nu̍a̍ā a̍ nyɔ̄ɔ̍ yɛ̍.

²⁹Wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍, nu̍a̍ā Mɛ̄lɛ̄ka̍ ō bīī ni̍ŋ nda̍ ni̍. Nyɛ̄ Mɛ̄lɛ̄ka̍ ō kɛ̄ɛ̄si̍a̍a̍ le̍ nda̍ wo̍, ndu̍ wa᷅ ni̍ŋ ko̍ŋ ni̍.