Read Southern Kisi Cho̍o̍bū 21 Bible Online

Cho̍o̍bū 21 - Southern Kisi bible

Cho̍o̍bū 21

¹O̍ ko̍ŋ kɔ̍ɔ̍lī, mi̍ Cho̍o̍bū di̍mī māā,

²lā ya᷄ŋ ndɔ̍ ya̍ nīla̍ŋ mī lā tūe̍i̍ nyɛ̄ ya̍ I̍ cho̍ nya̍ dīmūllo̍. Ke̍ŋ hi̍a̍ū ya̍ kɔ̄llo̍ nyɔ̄ɔ̄lū ni᷄ŋ.

³Lā bīu̍ŋ ndɔ̍ mī lā ya̍ŋ ya̍ nīla̍ŋ mī so̍ō. Tē I̍ chi̍i̍ pɛ̍ kpo̍u̍, tē lā wa̍ ni᷅ŋ hīōūwɔ̄ɔ̄ la̍chi̍ a̍ ya̍ māmɔ̄ɔ̍ pɛ̍ lā ma᷄m.

⁴Ŋɔ̄ɔ̄chīa̍ŋ ni̍ ya̍ I̍ cho̍ wo̍, I̍ cho̍ ndu̍ a̍ wāna̍ chi̍e̍e̍ le̍. Ndu̍yɛ̍ I̍ nɔ̍lā mī me̍i̍ le̍.

⁵Lā tōfa̍ wɔ̍ o̍ sūɛ̍i̍ he̍ī ni᷄ŋ a̍ nyɛ̍ yɔ̍nu̍ŋ a̍ ya̍ wo̍, kɔ̄ndɔ̄fi̍llo̍ cho̍ nya̍ bīyɔ̄ɔ̄. Nyɛ̄ o̍ nyɛ̍ yɔ̍nu̍ŋ a̍ ya̍ tē lā chīi̍ yīya᷄ŋ a̍ ndu̍ pɛ̍, ba̍kō bɛ̍ɛ̍ lā nɔ̍lā ni̍ŋ mī lā sōō le̍.

⁶Pɛ̄ŋgu̍ o̍ pɛ̄ŋgu̍ tē I̍ yi̍ya̍ŋ a̍ nyɛ̍ yɔ̍nu̍ŋ a̍ ya̍ wo̍ pɛ̍, sīōōŋīī bɛ̄ndūe̍i̍ bi̍ī ya̍. Tē I̍ yīya᷄ŋ a̍ ndi̍ pɛ̍ kpɛ̍īyo̍ bi̍ī ya̍.

⁷Mɛ̄lɛ̄ka̍ mbō chɛ᷄l mī wānāā dɛ̍nɛ̍ wɔ̄ɔ̍ŋnda̍ ā hīōū lāchī a̍ wāa̍ yōōmū, I̍ si̍nā kpe̍e̍kpe̍i̍ le̍ sa̍bū kōŋ te̍. I̍ si̍nā le̍ sa̍bū o̍ yu̍vi̍a̍a̍ nda̍, ndu̍yɛ̍ mbō tōsa̍ mā sīmnu᷄ŋ wa̍nāā kpāāyā wo̍ le̍.

⁸Mā vēlū chūāūwa̍, mī chūāūwāā kāŋ nda̍ mūli̍ŋ mī nda̍ vēlū ŋ̄chūāū mā lo̍ yōōmū mī chūāā māmāā kāŋ bɛ̍ɛ̍ ā su᷄l.

⁹Le̍ te̍le̍ŋ o̍ te̍le̍ŋ wānāā dɛ̍nɛ̍ wɔ̍ɔ̍ŋnda̍ ha̍ā ā chōŋnu᷄ŋ o̍ lānda̍ lo̍ chi̍ɛ̍ī ni᷅ŋ nyɛ̄ o̍ nyɛ̄ yɔ̍nūŋ a̍ nda̍ le̍. Mɛ̄lɛ̄ka̍ tūsī nda̍ dɛ̍nɛ̍ pa̍lāā chōo̍ le̍.

¹⁰Nāūwāā ndāa̍ bɛ̍ɛ̍ le̍ te̍le̍ŋ o̍ te̍le̍ŋ yo᷄lta̍ŋ chūa̍a̍ mā kūām, ā vi̍i̍kūū le̍.

¹¹Ndu̍yɛ̍ pɛ̄ŋgu̍ o̍ pɛ̄ŋgu̍ wānāā dɛ̍nɛ̍ wɔ̍ɔ̍ŋnda̍ ha̍ā chūāūwāā ndāa̍ chō a̍ kɔ̄l kɛ̄ndɛ̄, nyāānɔ᷄ŋndo̍ a̍ pīsu̍lta̍ŋ īpu̍lu̍lu̍ pu̍lu̍lu̍e̍i̍, nu̍a̍ā ŋ̄ chāā sāā fɔ̍ŋndu̍a̍a̍ ni̍.

¹²Te̍le̍ŋ o̍ te̍le̍ŋ ā chō a̍ kɔ̄l kɛ̄ndɛ̄, chōndo̍ŋ sōlīo̍o̍ mā yā o̍ nyɛ̄m chāa̍ŋ bɛ̄ŋgu̍.

¹³Mī wānāā dɛ̍nɛ̍ wɔ̍ɔ̍ŋnda̍ ha̍ā ā lo̍ o̍ dɛ̍nɛ̍ kɛ̍ndɔ̄ɔ̍ ni᷄ŋ a̍ kɔ̄lta̍ŋ lā nyūlū ha̍a̍a̍ mbō lo̍ o̍ kōŋ mā vī, mā kūɛ̄ chi̍e̍e̍ pīɔ̍m.

¹⁴Wānāā dɛ̍nɛ̍ wɔ̍ɔ̍ŋnda̍ ha̍ā mā dīmu̍l Mɛ̄lɛ̄ka̍ māā, ma᷅l na̍a̍ o̍ bā nāa̍ chōo̍. Na̍a̍ ŋ̄ cho̍ wa᷅ o̍ sāwāla̍ nu̍mnda̍ lāŋ bɛ̄ŋgu̍ le̍.

¹⁵Mā dīmi̍ āā o̍ nɛ̄ɛ̍nɛ̍ cho̍ yɛ̄ Mɛ̄lɛ̄ka̍ kpu̍lu̍ŋgūma̍a̍, o̍ ye̍e̍ma̍ na̍a̍ ko̍ŋ mī ŋ̄ sōōlu̍u̍ ndu̍ wo̍?

¹⁶Wāŋnda̍ ha̍ā yīya̍ŋ māā dɛ̍nɛ̍ o̍ dɛ̍nɛ̍ kɛ̄ndɛ̄ nda̍ nɔ̄, māā o̍ kpāāya̍ nda̍ nda̍ pi̍la̍a̍ ni᷄ŋ nda̍ sɔ̄la̍ ndu̍ ni̍.

¹⁷Wānāā dɛ̍nɛ̍ wɔ̍ɔ̍ŋnda̍, ā ya̍lā bɛ̍ɛ̍ ko̍ wu̍ mɛ̄ɛ̍ nya̍ yīya̍ŋ yɛ̍ le̍. Ndu̍yɛ̍ dɛ̍nɛ̍ pa̍lāā tu᷅l nda̍ bɛ̍ɛ̍ ko̍ cho̍o̍ lɔ̍ɔ̍ lɔ̍ɔ̍ le̍. Mɛ̄lɛ̄ka̍ do̍o̍nūŋ bɛ̍ɛ̍ ko̍ tu̍mbe̍ a̍ nda̍ mbō tūsi̍ nda̍ nyɛ̄ pālāā chōo̍ le̍.

¹⁸Mɛ̄lɛ̄ka̍ di̍ū nda̍ mbō chīi̍ a̍ nda̍ le̍, ō bēsu̍ nda̍ mɛ̄ɛ̍ hūēīye̍ ī bāsu̍ nu̍a̍ā fu̍e̍ēŋnde̍ yɛ̍ le̍.

¹⁹Lā dīmi̍ māā wānāā dɛ̍nɛ̍ wɔ̍ɔ̍ŋnda̍ ha̍ā, nyɛ̄ o̍ nyɛ̄ wɔ̄ɔ̍ŋ nda̍ chō tōsāa̍ māā chūāūwāā ndāa̍ Mɛ̄lɛ̄ka̍ chō hūnɔ̄ɔ̄ dɛ̍nɛ̍ pa̍lāā kōŋ tūsī chōo̍ ni̍. Kɛ̍ ndu̍yɛ̍, tē wāŋndo̍ tōsa̍ yɔ̄ŋ wɔ̄ɔ̍ŋndo̍ pɛ̍, ō bɛ̄ndā mā tūsi̍ ndu̍ pi̍la̍ dɛ̍nɛ̍ pa̍lāa̍ chōo̍, mbō sīna̍ māā le̍ yɔ̄ŋ wɔ̄ɔ̍ŋ o̍ to̍sa̍ wo̍ dɛ̍nɛ̍ pa̍lāa̍ ō tōl ndu̍ chōo̍ ni̍.

²⁰Tē wāŋndo̍ tōsa̍ yɔ̄ŋ wɔ̄ɔ̍ŋndo̍ pɛ̍, ndu̍ pi̍la̍ sɔ̍la̍ nyɛ᷅ pālāa̍ le̍ nyɛ̍ o̍ tōsa̍ wo̍. Mɛ̄lɛ̄ka̍ kpu̍lu̍ŋgūma̍ Bɛ̄ndōo̍ ndu̍ pi̍la̍ ō dɔ̄ɔ̄nu᷄ŋ tu̍mbe̍ a̍ wānā ko̍ŋ.

²¹Kāni̍ fo̍ndōle̍, tē wāŋndo̍ vī pɛ̍, ō nɔ̍ lɛ̍ būūla᷄ŋ o̍ būūla᷄ŋ a̍ yūŋgu̍ ndɔ̍ o̍ mɛ̍i̍yo̍ le̍, ī wɔ̄ɔ̍ŋ yɔ̄nu̍ŋ ni᷅ŋ nda̍ ī kɛ̄ndɛ̄ī yɔ̄nu̍ŋ nda̍, ō ve᷅ lɛ̍ kpe̍ku̍ ndɔ̄ le̍.

²²Wānā o̍ wānā cho̍ mbō pɛ̄ɛ̄ku̍ Mɛ̄lɛ̄ka̍ kɔ̄l kālo̍o̍ le̍. Wānāa̍ nɔ̍ bɛ̍ɛ̍ kpa̍a̍yāla̍ bɛ̄ndūla̍ŋ nda̍, Mɛ̄lɛ̄ka̍ kɔ̍ɔ̍sā a̍ nda̍ ni̍.

²³Wāŋnda̍ ā pūm mā wānu̍ŋ te̍le̍ŋ o̍ te̍le̍ŋ ŋ̄ chɔ̍ nda̍, dīāllūŋ ndāa̍ŋ wānūŋ ni̍ŋgīli̍, ā ne̍ē le̍. Ndu̍yɛ̍ lɔ̍ɔ̍ lɔ̍ɔ̍ ŋ̄ chɔ̍ nda̍, ā chōŋnu᷄ŋ o̍ dīāllūŋ ndāa̍ŋ ni᷄ŋ nyɛ̍ kɛ̄ndɛ̄ kɛ̍ndɛ̄. Nyɛ̄ o̍ nyɛ̄ bi̍ī nda̍ īsīōōŋ te̍. Mā lo̍ o̍ kɔ̄l nyūlōo̍ ni᷄ŋ ha̍a̍a̍ mā vī le̍nde̍.

²⁵Kɛ̍ mī wāŋnda̍ ā pūm ā wa̍, te̍le̍ŋ o̍ te̍le̍ŋ ā chō o̍ nyɛ̄ pālāa̍ ni᷄ŋ, mā lo̍ lē ni᷄ŋ ha̍a̍a̍ mā vī, pāa̍le̍ pi᷅lɛ̍ bɛ̍ɛ̍ ā sɔ̍lā kɔ᷅l kɛ̄ndɔ̄ɔ̍ o̍ yōōmūlā ndāla̍ŋ ni᷄ŋ te̍.

²⁶Kɛ̍ ndu̍yɛ̍ wāŋnda̍ ha̍ā kpo̍u̍ tē ā vī pɛ̍, o̍ pūūlōo̍ bɛ̄ŋgu̍ nda̍ chɔ̄ nda̍ kpo̍u̍ ni̍, mī dōndo̍po᷅lla̍ dē dīāllūŋ ndāa̍ŋ

²⁷I̍ si̍nā nyɛ᷅ ŋ̄ yīya̍ŋ a̍ ya̍ wo̍. Tūū o̍ tūū wɔ̄ɔ̍ŋ ŋ̄ tūu̍ a̍ ya̍ I̍ si̍nā.

²⁸Ā chō wāŋnda̍ nyūnāa̍ māā, wānā dɛ̍nɛ̍ wɔ̍ɔ̍ŋ wa̍ ho̍ō wāŋnda̍ lāchī wo̍, ɔ̍ɔ̄ chīɛ̄ī ndɔ̍ o̍ wa̍ lēni᷄ŋ ndo̍?

²⁹Kɛ̍ ndu̍yɛ̍ lā nyūna̍ wɔ̍ wānāā kēlāa̍, ā chō nya̍ mūlīo̍o̍ kē ō nya̍ lāāla̍ŋ ndo̍.

³⁰Wānāā kēlāa̍ ha̍ā dīmi̍ māā Mɛ̄lɛ̄ka̍ mbō dɔ̄ɔ̄nu᷄ŋ tu̍mbe̍ a̍ wāŋnda̍ mbō tūsi̍ nda̍ nyɛ̄ pālāa̍ chōo̍, kɛ̍ wānāā dɛ̍nɛ̍ wɔ̍ɔ̍ŋ nda̍ nda̍, nyɛ̄ o̍ nyɛ̄ yɔ̍nūŋ a̍ nda̍ le̍, mbō pīŋi̍ nda̍.

³¹Wānā o̍ wānā cho̍ mbō si᷄m wāna̍ yɔ̄ŋ wɔ̄ɔ̍ŋndo̍ o̍ hɔ̄l, mbō sōō a̍ sɔ̄ɔ̍ŋ wɔ̍ɔ̍ŋ o̍ cho̍ tōsāa̍ wo̍ŋ o̍kɔ̄ɔ̄ le̍. Ndu̍yɛ̍ wānā o̍ wānā cho̍ mbō tūsi̍ ndu̍ nyɛ̄ pālāa̍ chōo̍, le̍ yɔ̄ŋ ndɔ̄ wɔ̍ɔ̍ŋndo̍ le̍.

³²Tē wāna̍ yɔ̄ŋ wɔ̄ɔ̍ŋndo̍ vī pɛ̍ mā wa̍ kɔ̄la̍ŋ a̍ ndu̍ le̍ ndu̍ chɔ̄ɔ̍, wānāa̍ li̍i̍lā ndu̍ wa̍ ā wā sɛ̍lɛ̍, ha̍ā si᷄m la̍chi̍ pɛ̍ ha̍ā si᷄m kɔ̄ɔ̄lī. Ā chīi̍ ndu̍ chɔ̄ pɛ̍ kpo̍u̍ ā kɛ̄si̍ wāŋnda̍ o̍ sɛ̄i̍ ndɔ̄ɔ̍ īkɛ̄i̍ le̍ mā wa̍ mɛ̄ŋgɛ̄lāa̍, pūūlu̍ sɛ̄i̍ kpe̍e̍kpe̍i̍ nda̍ wā ndu̍ mīŋgīo̍o̍ chōo̍, ā mi̍ŋgī ndu̍ a̍ ka̍la̍ŋ te̍, yɔ̄ŋi̍ o̍ ki̍ndi̍la̍ ndu̍.

³⁴Vɛ̄ɛ̍nɛ̍ ŋ̄ nyɔ̄ɔ̄lū yɛ̍ ya̍ kɔ̄llo̍ ni᷄ŋ a̍ ya̍ sɔ̄ɔ̍ŋ ŋ̄dīɔ̄mndo̍ŋ dīmūllo̍? Nyɛ̄ o̍ nyɛ̄ ŋ̄ chō ya̍ dīmūllo̍, chōōla̍ŋ ko̍ ō cho̍ ni̍.