Read Southern Kisi Cho̍o̍bū 22 Bible Online

Cho̍o̍bū 22 - Southern Kisi bible

Cho̍o̍bū 22

¹O̍ ko̍ŋ kɔ̍ɔ̍lī, mi̍ Ɛ̄līfa̍a̍sī, Cho̍o̍bū chāa̍ŋ ndɔ̍ fu̍la̍ Tɛ̍māŋ chi̍e̍e̍ wo̍, ō dīmūl Cho̍o̍bū māā, Cho̍o̍bū tɔ̄nɔ̍ yɛ̄ɛ̍nɛ̍ Mɛ̄lɛ̄ka̍ sɔ̄lā yɛ̍ o̍ wāna̍ chi̍o̍o̍ ni᷄ŋ? Tɔ̄nɔ̄ o̍ tɔ̄nɔ̄ Mɛ̄lɛ̄ka̍ nɔ̍ o̍ wāna̍ chi̍o̍o̍ ni᷄ŋ te̍. Wāŋndo̍ wa̍ bɛ̍ɛ̍ wa᷅na̍ kɔ̄l kālu̍, kɔ̄l kālu̍, ndɔ̄ ko̍ŋ nɔ̍lā mbō māla̍ Mɛ̄lɛ̄ka̍ le̍, ndu̍ pi̍la̍ ko̍ni̍ o̍ ma̍lā ni̍.

³Ā yɔ᷄ŋ bɛ̍ɛ̍ mā wa̍ wānā kɛ̍ndɛ̄, Mɛ̄lɛ̄ka̍ kpu̍lu̍ŋgūma̍ bɛ̄ndōo̍ sɔ̍lā tɔ̍nɔ̄ o̍ tɔ̄nɔ̄ o̍ ke̍ŋ ni̍ŋ te̍. Ki̍ndi̍ ki̍ndi̍ bɛ̍ɛ̍ mā wa̍ ndu̍ o̍ hɔ̄l sa̍kpō, mālā o̍ mālā sa̍kpōyɛ̍ī nūm i̍ ke̍ŋ ī ma̍lā ndu̍ le̍.

⁴Cho̍o̍bū, yi̍ya᷄ŋ nu̍a̍ā māā le̍ mɛ̄ɛ̍ ŋ̄ dɔ̄ū tīīnda᷄ŋ nu̍mndo̍ o̍ Mɛ̄lɛ̄ka̍ ni᷄ŋ yɛ̍, nyɛ̄ ko̍ŋ te̍ Mɛ̄lɛ̄ka̍ tūsi̍ nu̍m nyɛ̄ pālāa̍ ho̍ō chōo̍, le̍ mbō tōfa̍ tīīnda᷄ŋ ŋ̄ dɔ̄ū o̍ ndu̍ ni̍ŋ ndo̍ le̍ŋ.

⁵Le̍ yɔ̄ŋ wɔ̄ɔ̍ŋ bɛ̄ndū ŋ̄ tōsa̍ wo̍ Mɛ̄lɛ̄ka̍ tūsi̍ nu̍m nyɛ̄ pālāa̍ ho̍ō chōo̍ ni̍, kāni̍ fo̍ndōle̍, dɛ̍nɛ̍ wɔ̍ɔ̍ŋ ŋ̄ tōsa̍ wo̍ ō chō ō bɔ̄ɔ̍.

⁶Tē pɔ̄mbūāā nūmnda̍ nda̍ a̍a̍ bi̍ī nu̍m kūēēla̍ŋ o̍ bā pɛ̍ mā nɔ̄la̍ŋ la̍ŋ pāāwā le̍, yūŋgāa̍ nūm o̍o̍ yu̍ŋgā nda̍ ni̍ mā mɛ̍i̍ nda̍ fo̍ndō fu̍u̍.

⁷Kōlɔ̄ɔ̍ ndu̍ o̍o̍ bi̍i̍ bɛ̍ɛ̍ wa᷅ŋndo̍ mbō pīɛ̍i̍ nu̍m mɛ̄ŋnda̍ŋ, a̍ kɛ̍ ndu̍ le̍. Nūm o̍o̍ cho̍ bɛ̍ɛ̍ wa᷅ŋndo̍ a̍ yīa̍a̍ŋ a̍ kɛ̍ ndu̍ nyɛ̄ dīāā le̍.

⁸Le̍ mɛ̄ɛ̍ nūm o̍o̍ nɔ̍ kpāāyāa̍ yɛ̍, ma̍ chūā lɛ̄ŋnde̍ŋ kpo̍u̍ mi̍ lē sīmnu᷄ŋ lɛ᷅ŋndē nūm.

⁹Wānāā pīāāndāā ndāa̍ ā vī wa̍ nda̍ a̍a̍ ko̍ma̍l nu̍m bɛ̍ɛ̍ le̍ nda̍ mālāa̍ a̍ ma̍lā nda̍ le̍, mālɔ̄ɔ̍ nda̍ bālā fo̍ndō mā mīīŋgu̍. O̍ ko̍ŋ kɔ̍ɔ̍lī, vīi̍ya̍a̍ nɔ̍ lɛ̍ ŋ̄ fi̍nyā le̍ wa̍ ma̍ tūsī nda̍ nyɛ̄ pālāa̍ chōo̍.

¹⁰Kɛ̍ ndu̍yɛ̍, so̍o̍ŋnda̍ ŋ̄kpa̍līla̍ŋ lā chō nu̍m ni᷅ŋ lā bālāā kpɔ̍kɔ̍su̍, le̍ mā bēndu᷄ŋ mā de̍l lēni᷄ŋ. Kpūndɛ̍ bɛ̄ndōo̍ kōma̍l nu̍m o̍ lēpīlɛ̍ ni᷄ŋ kpe̍ Cho̍o̍bū.

¹¹Nyɛ̄ nūm wa̍wo̍ŋ ndo̍ sīmnu᷄ŋ nyu᷅mnda̍ŋ, a̍ nɔ̍lā lɛ̍ mā chē le̍. A̍ lo̍ o̍ mɛ̄ŋmā hūna᷄ŋ ni᷅ŋ Cho̍o̍bū.

¹²Le̍ mɛ̄ɛ̍ Mɛ̄lɛ̄ka̍ chō chōo̍ cho̍o̍ pɔ̍ɔ̍li̍ yɛ̍, lo̍o̍ŋ cho̍ chōo̍ cho̍o̍ pɔ̍ wo̍ŋ bɛ̍ɛ̍, mi̍ ŋ̄ wā la̍nda̍ŋ a̍ ndu̍ yɛ̍,

¹³le̍la̍ŋ ŋ̄ dīmi̍ ni̍, āā, “Mɛ̄lɛ̄ka̍ si̍nā nyɛ̍ o̍ nyɛ̍ cho̍ yɔ̄nɔ᷄ŋndo̍ le̍. Ō nɔ̍lā mbō kɔ̄ɔ̄sa̍ a̍ wānā le̍, kāni̍ fo̍ndōle̍, yu̍mbu̍ yu̍mbu̍ bɛ̍ndōo̍ chō ndu̍ o̍ hɔ̄l ō cho̍ chɔ̍ lɛ̄ŋ na̍nu᷄ŋ te̍.”

¹⁴Nāa̍ ha̍la̍a̍ bɔ̄ŋa̍ a̍ lɛ̄ŋnde̍ŋ nda̍ lo̍ŋ pɔ̍ o̍ cho̍ bālɔ̄ɔ̄ ni̍, ndu̍yɛ̍ yu̍mbu̍ yu̍mbo̍o̍ chō ndu̍ ō bālāā sɔ̍, ō nɔ̍lā mbō chē le̍.

¹⁵Cho̍o̍bū bāā a̍ ye̍e̍ma̍ mā tōl ka̍ālā pāāndūlā wānāā dɛ̍nɛ̍ wɔ̍ɔ̍ŋ nda̍ nda̍ a̍a̍ to̍sā la̍ŋ kɔ̄ɔ̄lī?

¹⁶Wānāā dɛ̍nɛ̍ wɔ̍ɔ̍ŋnda̍ ha̍ā, le̍ ka̍ālā ndāla̍ la̍ŋ, te̍le̍ŋ nda̍ a̍a̍ nɔ̍ le̍ wūo̍o̍ wo̍ fūūlu̍u̍ le̍, mi̍ Mɛ̄lɛ̄ka̍ bāsū nda̍ mɛ̄ɛ̍ mɛ̄ŋmā hūna᷄ŋ mā bāsū nu̍a̍ā chīɛ̄īla̍ŋ mī mā hīōūnu᷄ŋ a̍ la̍ŋ yɛ̍.

¹⁷Wāŋnda̍ ha̍ā nda̍ a̍a̍ kɛ̍ɛ̍ Mɛ̄lɛ̄ka̍ ni̍, ndu̍yɛ̍ ma̍ dīmī māā Mɛ̄lɛ̄ka̍ nɔ̍lā mbō yɔ᷄ŋ nda̍ nyɛ̄ o̍ nyɛ̄ le̍.

¹⁸Ndu̍yɛ̍ Mɛ̄lɛ̄ka̍ ndu̍ o̍o̍ pe̍i̍ chīɛ̄īlā ndāla̍ŋ a̍ nyɛ̄m kɛ̄ndɔ᷄ŋ ni̍. Kɛ̍ tūūlā wānāā yɔ̄ŋ wɔ̄ɔ̍ŋnda̍ ā nɔ̄ la̍ŋ I̍ si̍nā la̍ŋ pɛ̄ŋgu̍ le̍.

¹⁹Wānāa̍ cho̍ Mɛ̄lɛ̄ka̍ o̍ hɔ̄l sa̍kpō wa̍, tē ā chē pɛ̍ mī Mɛ̄lɛ̄ka̍ tūsi̍ wānāā dɛ̍nɛ̍ wɔ̍ɔ̍ŋnda̍ nyɛ̄ pālāa̍ chōo̍, nyɔ̄ɔ̍ pīla̍ hɛ̍nāŋ nda̍ ni̍, mā ma᷄m nda̍ mā dīmi̍ māā,

²⁰mbɔ̄ lēkɛ̍ndɛ̍ī Mɛ̄lɛ̄ka̍ tɛ̄ɛ̄mbu̍u̍ ya̍a̍mɔ̍ɔ̍wa̍a̍ nāa̍. Nyɛ̄ o̍ nyɛ̄ nda̍ mɛ̄i̍ mu̍ŋ kpo̍u̍ ŋ̄ chūū ŋɔ̄.

²¹Le̍la̍ŋ to̍sa̍ chɛ̄la᷅ŋndo̍ a̍ Mɛ̄lɛ̄ka̍ Cho̍o̍bū, mī kɔ̄l nyūlōo̍ mīīŋgu̍ nya̍ tɛ̄ɛ̄ŋ nya̍ ndu̍. Ko̍ŋ to̍sā ni̍ mī Mɛ̄lɛ̄ka̍ māla̍ nu̍m mbō nɛ̄ŋi̍ nu̍m kɔ̄l. Ndu̍yɛ̍, tē a̍ to̍sa̍ he̍ī pɛ̍, Mɛ̄lɛ̄ka̍ chō nu̍m sa̍lā dɔ̄wɔ̄ɔ̄.

²²Ya̍ŋ ni᷅la̍ŋ o̍ sālālā o̍ cho̍ nu̍m nda̍ŋ, ndu̍yɛ̍, ma̍ kɛ̍si᷄ŋ di̍ōmndā ndɔ̄la̍ŋ o̍ kɔ̄l.

²³Tē a̍ mi̍ŋgi̍ kɔ̄l nūmndo̍ o̍ Mɛ̄lɛ̄ka̍ kpu̍lu̍ŋgūma̍ bɛ̄ndōo̍ lo̍ pɛ̍, mā tu̍si̍ŋ o̍ dīōm ndɔ̄ɔ̍ bɛ̄ŋgu̍, ō chō nu̍m vɛ̄lɛ̄ mālā mā mi̍i̍ŋgu̍ mɛ̄ɛ̍ ŋ̄ wa̍ yɛ̍. Le̍la̍ŋ So̍li̍ yɔ᷅ŋ wɔ̄ɔ̍ŋndo̍ o̍ nūmndo̍ chi̍ɛ̍ī ni̍ŋ.

²⁴Ko̍o̍līi̍ŋ nu̍mndo̍ŋ kpo̍u̍ chu̍a̍ mu̍ŋ mā vīōū mu̍ŋ. Chu̍a̍ ko̍o̍līi̍ŋ nu̍m kɛ̄ndɛ̄ŋ bɛ̄ndo᷄ŋ mā vīōū mu̍ŋ o̍ kpōlōŋ kpo̍lōŋ ndā bɛ̄ndūla̍ŋ ni᷄ŋ fa̍ko̍lo̍.

²⁵O̍ ko̍ŋ kɔ̍ɔ̍lī, mā si̍i̍ŋgu̍u̍ Mɛ̄lɛ̄ka̍ kpu̍lu̍ŋgūma̍ bɛ̄ndōo̍ māā ko̍o̍līi̍ŋ nu̍m. Chu̍a̍ Mɛ̍lɛ̄ka̍ mbō wa̍ nāa̍ nūm chu̍a̍, mɛ̄ɛ̍ ka̍ni̍ŋ hu̍mbūŋ ku̍ndā bɛ̄ndo᷄ŋ ŋ̄ wā nu̍a̍ā yɛ̍.

²⁶Ko̍ŋ to̍sā ni̍ mī Mɛ̄lɛ̄ka̍ kpu̍lu̍ŋgūma̍ bɛ̄ndōo̍ ō nɛ̄ŋi̍ nu̍m kɔ̄ ta̍u̍. Ndu̍yɛ̍ tē a̍ to̍sa̍ ke̍ŋ pɛ̍, ā chūā ni̍ŋ hɔ᷅lla̍ chōo̍ mā nu̍a̍ Mɛ̄lɛ̄ka̍ si̍ɔ̍mbu̍la̍ bi̍ī nu̍m te̍.

²⁷Ā pīɛ̄ī ni̍ŋ Mɛ̍lɛ̄ka̍, ndu̍yɛ̍ mī Mɛ̄lɛ̄ka̍ tūēī nu̍m dīōm mbō mūli̍ pīɛ̄īlē nūm nūmnde̍ŋ. Ībūŋgā o̍ ībūŋgā ŋ̄ chūa̍ nāa̍ ndu̍ chu̍a̍ mā pe̍e̍lu̍ mu̍ŋ, mā to̍sa̍ nyɛ̄ ŋ̄ chūe̍l ndu̍ būŋga᷄ŋ ndo̍.

²⁸Nyɛ̄ o̍ nyɛ̄ ŋ̄ kɛ̄ɛ̄sīāā ni̍ŋ le̍ to̍sāa̍, ā nɔ̄lā ni̍ŋ mā to̍sa̍ ndu̍ mbō na᷄ŋ. Ndu̍yɛ̍ bā o̍ bā ŋ̄ kɔ̍, nyɛ̄ wa̍wo̍ŋndo̍ wā ni̍ŋ nu̍m lāchī.

²⁹Kāni̍ fo̍ndōle̍, Mɛ̄lɛ̄ka̍ ndu̍ ndu̍ wānā o̍ wāna̍ cho̍ wāna̍ yōŋgā, tūsīo̍o̍ o̍ tu̍sī nda̍ tōōlō ni̍. Kɛ̍ wānāa̍ tu̍si̍ŋ nda̍ nda̍, chīīndīa̍a̍ o̍ chi̍i̍ndīāā nda̍ ni̍.

³⁰Le̍la̍ŋ tē a̍ so̍li̍ bāla̍ŋ o̍ yɔ̄ŋ wɔ̄ɔ̍ŋndo̍ ni᷄ŋ pɛ̍, Mɛ̄lɛ̄ka̍ cho̍ nu̍m chīīndīāā. Kāni̍ fo̍ndōle̍, wānāa̍ cho̍ŋnu̍ŋ ha̍ā, ā to̍sā yɔ̍ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ te̍ le̍ wa̍, chīīndīa̍a̍ Mɛ̄lɛ̄ka̍ chīīndīāā nda̍ ni̍.