Read Southern Kisi Cho̍o̍bū 23 Bible Online

Cho̍o̍bū 23 - Southern Kisi bible

Cho̍o̍bū 23

¹O̍ ko̍ŋ kɔ̍ɔ̍lī, mi̍ Cho̍o̍bū di̍mī māā,

²mɛ̄ɛ̍ na̍a̍ ŋ̄ sūāā nu̍a̍ā yɛ̍ bɛ̍ɛ̍, I̍ pɛ̍ŋgi̍ wɔ̍ ŋɔ̍ɔ̍chīa̍ŋndo̍ le̍, kāni̍ fo̍ndōle̍, kɔ̄l nūu̍ tāmbu̍ ō bɔ̄ɔ̍. A̍ kūŋndā nyɛ̄ pālāālā ya̍ I̍ cho̍ la̍ŋ kpo̍u̍, Mɛ̄lɛ̄ka̍ chō wɔ̄ hīōūwɔ̄ɔ̍ lāchī a̍ nya̍ nyɛ̄ pālāa̍ tūsīo̍o̍ chōo̍.

³Kɛ̍ a̍a̍a̍, mī ya̍ i̍i̍ si̍na̍ nāa̍ ya̍ sa̍a̍lūŋ Mɛ̍lɛ̄ka̍ kpe̍e̍kpe̍i̍ ya̍. I̍ wa̍ lākɔ̄ nāa̍ o̍ cho̍ īchāli̍ kpe̍e̍kpe̍i̍ o̍ kpe̍ŋgbe̍i̍ ndɔ̍ kɔ̍ɔ̍sɔ̍ɔ̍ chōo̍ wa̍.

⁴Nyɛ̄ o̍ nyɛ̍ yɔ̍nu̍ŋ a̍ ya̍ I̍ wa̍ ndu̍ lākɔ̄ chɔ̄m tɛ̍ɛ̍, ndu̍yɛ̍ mī ya̍ i̍i̍ chɔ̍m ndu̍ māā I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍.

⁵Mī ya̍ i̍i̍ tu̍e̍ī mɛ̄ɛ̍ o̍ wa̍ ya̍ dīōm mūlī yɛ̍.

⁶Bāā, ko̍ sīmūllo̍ ndu̍ o̍o̍ si̍mūl la̍ ni̍ŋ a̍ kpāāya̍ ndɔ̄ bɛ̍ndōo̍ ni̍? Kɛ̍ I̍ si̍nā māā ō ve̍ ya̍ sīmūl te̍, ō wa̍ nīla̍ŋ yāŋɔ̄ɔ̄ o̍ nyɛ̄ ya̍ I̍ wa̍ ndu̍ dīmūllo̍.

⁷Wāna̍ tōnya̍a̍ ya̍ i̍ cho̍ ni̍, Mɛ̄lɛ̄ka̍ wa̍ nīla̍ŋ yāŋɔ̄ɔ̄ o̍ kɔ̍ɔ̍sɔ̍ ni̍ tōnya̍a̍. Ndu̍yɛ̍ I̍ si̍nā māā yāma̍nɔ̄ nūu̍ Mɛ̄lɛ̄ka̍, ō wa̍ ya̍ di̍ ke᷅ māā I̍ cho̍ wa᷅nā wɔ̍ɔ̍ŋ te̍, ndu̍yɛ̍ mī ndu̍ o̍o̍ ma̍l la̍ le̍ fɛ̍ɛ̍ŋ a̍ fɛ̍ɛ̍ŋ.

⁸Kɛ̍ I̍ nu̍u̍wa̍ Mɛ̄lɛ̄ka̍ fe̍e̍, I̍ se̍e̍lu̍ŋ ndu̍ le̍, mi̍ ku̍ā bā pāa̍le̍ŋ lē chāŋndo̍, I̍ chi̍ ndu̍ lo̍ŋ te̍. Mi̍ ku̍ā bā pāa̍le̍ŋ lē dēl lo̍ I̍ se̍e̍lu̍ŋ ndu̍ lo̍ŋ te̍.

⁹Mi̍ ku̍ā vɛ̄lɛ̄ nāa̍ o̍ wa̍ wa̍llo̍ bā lūāŋndo̍ wa̍, I̍ chi̍ ndu̍ lo̍ŋ te̍. Mi̍ ku̍ā nāa̍ o̍ ku̍ɛ̄ bā tōūwo̍ wa̍ I̍ se̍e̍lu̍ŋ ndu̍ vɛ̄lɛ̄ lo̍ŋ te̍.

¹⁰Kɛ̍ ndu̍yɛ̍, Mɛ̄lɛ̄ka̍ sīnā nɛ̍i̍ ya̍ I̍ cho̍ chōo̍ wo̍. Ō sīnā māā ā yɔ̍ŋ bɛ̍ɛ̍ mbō tɔ̄ɔ̄nda̍ŋ ya̍, sāālɔ᷄ŋndo̍ o̍ sa̍a̍lūŋ ya̍ ō dīāndāā ndu̍ o̍ hɔ̄l ni̍.

¹¹Nɛ̄i̍ ndɔ̍ o̍ chɔ̍m ya̍ wo̍, lēchōo̍ sa̍na̍a̍ ya̍ I̍ cho̍ kɔ̄la̍ŋ ni̍. Ndu̍yɛ̍ I̍ cho̍ sa̍kpō o̍ nɛ̄i̍ ndɔ̄ ko̍ŋ chōo̍, I̍ me̍l ndu̍ le̍.

¹²Nyɛ̄ o̍ nyɛ̄ o̍ di̍mu̍l la̍ le̍ tōsāa̍, I̍ me̍l ndu̍ lɛ̄ŋ te̍, I̍ cho̍ ndu̍ tōsāa̍ le̍ te̍le̍ŋ o̍ te̍le̍ŋ. Ndu̍yɛ̍ nyɛ̄ o̍ nyɛ̄ o̍ di̍mu̍l lā, ō chō ya̍ o̍ kɔ̄l kpo̍u̍.

¹³Mɛ̄lɛ̄ka̍ cho̍ wa᷅na̍ ma̍ŋga̍la̍ŋ te̍. Nyɛ̄ o̍ ye̍e̍mā le̍ tōsāa̍ wo̍, ndu̍ o̍ to̍sā ni̍, wānā nɔ̍lā ndu̍ kɔ̄llo̍ mūlī le̍. Kɛ̄lɛ̄ŋgāā ni᷅ŋ te̍, mā ku̍u̍na̍ ndu̍ nyɛ̄ o̍ nɔ̍ le̍ tōsāa̍ wo̍ tōsāa̍.

¹⁴Nyɛ̄ o̍ nyɛ̄ Mɛ̄lɛ̄ka̍ tūu̍ le̍ tōsāa̍ a̍ ya̍, ō chō ndu̍ tōsā kpo̍u̍. Ndu̍yɛ̍ ō nɔ̄ tūūlā wāā le̍nde̍ o̍ kɔ̄l ta̍u̍ a̍ ya̍.

¹⁵Le̍la̍ŋ sīōōŋnde̍ bīī ya̍ a̍ ndu̍. Tē I̍ yi̍ya̍ŋ a̍ ndu̍ o̍kɔ̄ɔ̄ pɛ̍, sīōōŋnde̍ bi̍ī ya̍ ni̍.

¹⁶Mɛ̄lɛ̄ka̍ tōsa̍ mi̍ sīōōŋnde̍ bīī ya̍ a̍ ndu̍. Mɛ̄lɛ̄ka̍ kpu̍lu̍ŋgūma̍ Bɛ̄ndōo̍ ō pēi̍ ya̍ a̍ sīōōŋīī bɛ̄ndūe̍i̍. Ō cho̍ le̍ nyūmmā ba̍lu̍ ya̍ wa̍ŋ te̍ sīōōŋnde̍ bīi̍ ya̍ le̍, sīōōŋīi̍ Mɛ̄lɛ̄kɛ̍i̍ bi̍ī ya̍ ni̍. Mi̍ chē bɛ̍ɛ̍ mi̍ nyūmmā tīŋgīsi̍ma̍ bɛ̍ndūa̍ŋ mā bālū ya̍, pɛ̍ɛ̍ŋ bɛ̍ɛ̍ I̍ nɔ̍lā mī che᷅ le̍, kɛ̍ ō cho̍ le̍ ma̍ŋ te̍ sīōōŋnde̍ bīī ya̍ le̍.