Read Southern Kisi Cho̍o̍bū 24 Bible Online

Cho̍o̍bū 24 - Southern Kisi bible

Cho̍o̍bū 24

¹Vɛ᷅, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō mɛ̍ī lɔ̍ɔ̍, mbō hu᷄ŋ ki̍lūl wānāā wɔ̄ɔ̍ŋnda̍ ha̍ā yāmɛ̍i̍, mbō tūsi̍ nda̍ nyɛ̄ pālāa̍ chōo̍ le̍? Vɛ᷅, wānāa̍ dɔ̍ū tīīnda᷄ŋ ndāa̍ o̍ ndu̍ ni᷄ŋ nda̍ ā chi᷅ mbō kīlu̍l wānāā wɔ̄ɔ̍ŋnda̍ ha̍ā yāmɛ̍i̍, mbō tūsi̍ nda̍ nyɛ̄ pālāa̍ chōo̍ le̍?

²Wāŋnda̍ chō pɛ̄ŋgu̍la̍ŋ hīōūwɔ̄ɔ̍ mā lūɛ̄ɛ̄nu᷄ŋ o̍ chīɔ̄ɔ̄ŋ pi̍la̍ŋ ni᷄ŋ. Tē ā chīīmbu̍u̍ chɔ̄lūāā pi̍la̍a̍ pɛ̍, ā kɔ̍ dɔ̍ū o̍ chɔ̄lūāā ndāa̍ chōo̍.

³Tē ā chē vīi̍yo̍ sōfɛ̍li̍a̍a̍ o̍ bā pɛ̍, ā pūu̍ ndu̍ o̍ bā ā kūɛ̄nu᷄ŋ a̍ nda̍. Tē wānāā pīāāndāā ndāa̍ ā vī wa̍ ā bīī nda̍ kūēēla̍ŋ o̍ lābā pɛ̍, mā nɔ̄la̍ ku̍e̍ēla̍ la̍ŋ pāāwā le̍, ā bīī nāūwāā ndāā wa̍a̍, ā wa᷄ nda̍ o̍ bā o̍ lāndo᷄ŋ ni᷄ŋ.

⁴Wānāā tāmbɛ̍i̍ya̍ ā nɔ̍ bɛ̍ɛ̍ di̍o̍o̍ o̍ sūɛ̍i̍ ni᷄ŋ, ā ke᷅ nda̍ di̍ ndāa̍ le̍. Wānāā tāmbɛ̍i̍ya̍ kpo̍u̍ o̍ lɛ̄ŋnde̍ŋ nde᷅ŋ ni᷄ŋ, tē ā chē wāŋnda̍ ha̍ā pɛ̍, vīŋi᷄ŋndo̍ nda̍ vīŋīŋ ni̍, yɔ̄ŋi̍ nda̍ yɔ᷄ŋ nda̍ nyɛ̍.

⁵Mɛ̄ɛ̍ sōfɛ̍li̍a̍a̍ yōndūa̍a̍ ā bālū nu̍a̍ā o̍ po̍llo̍ ni᷄ŋ le̍ nyɛ̄ nda̍ dīā wo̍ yɛ̍, le̍nde̍ wānāā tāmbɛ̍i̍ya̍ ha̍ā ā nūūwā nyɛ᷅ dīa̍a̍ o̍ po̍llo̍ ni᷄ŋ ni̍. Ā nɔ̍ na̍a̍ o̍ nāa̍ che᷅le̍ŋ nda̍ sɔ̄lā nyɛ̍ di̍a̍a̍ le̍ chūāūwāā ndāa̍ le̍.

⁶Chīɔ̄ɔ̄ŋ nda̍ tōsa̍ le̍ wo̍ŋ, lēni᷄ŋ nda̍ kēī nyɛ᷅ dīa̍a̍ nūūwā ni̍. Tē wānāā su̍lāa̍ ā chīi̍ kpe̍le̍la̍ ndāla̍ mākīle̍pīi̍ya̍ŋ kēndī pɛ̍ kpo̍u̍, nda̍ kūɛ̄ nūūwāa̍ kɔ̄ɔ̄lī, le̍ mā pɔ̄mpɔ̍mbɔ̄ ma̍ lo᷅ kɔ̍ɔ̍lī wa̍ŋ.

⁷A̍ bāla̍ŋ o̍ lɔ̄lūla̍ŋ tɛ̄ɛ̄ŋ nda̍ lɔ̄l o̍ hūēīye̍ ni᷄ŋ ni̍, ā nɔ̍ nyɛ᷅ o̍ nyɛ̄ nda̍ hāndūŋ cho̍o̍ le̍.

⁸Mɔ᷄m chu̍chū o̍ pēmbo᷄ŋ chōo̍ wo̍ mbō līīvi̍a̍a̍ nda̍ yɔ̍ yɔ̍. O̍ pōūta̍ŋ nda̍ kūā hōlnɔ᷄ŋndo̍ ni̍, le̍ nāa̍ lɔ̍lāā lēpɛ̄ŋnda̍.

⁹Wānāā dɛ̍nɛ̍ wɔ̍ɔ̍ŋnda̍ ha̍ā, ā chō kēīyo̍ chɛ̄lɛ̄kpi̍a̍a̍ vi̍i̍ya̍a̍ nɔ̍ lɛ̍ ŋ̄fi̍nyā le̍ wa̍ pūūwo̍ kālāa̍ ndāa̍ o̍ lākɔ̄ɔ̄ mā sīīŋgūū nda̍ chīa̍a̍. Tē ā ke᷄ wānāā tāmbɛ̍i̍ya̍ kūēēla̍ŋ pɛ̍, mī wānāā tāmbɛ̍i̍ya̍ nɔ̄la̍ lɛ̍ kūēēla̍ la̍ŋ pāāwā le̍, ā pūu̍ nda̍ chɛ̄lɛ̄kpi̍a̍a̍ ndāa̍ o̍ lābā le̍ nyɛ̄ ndā sɔ̍lā.

¹⁰Wānāā tāmbɛ̍i̍ya̍ kɔ̄ɔ̍le̍ fo̍ndō nda̍ bālū ni̍ le̍ nyɛ̍ nda̍ yīīnūŋ ndo̍. Ā wā wi̍tīi̍ŋ wāŋnda̍ vīlīo̍o̍ mī yīa̍a̍ŋ mā wɔ̄lā wɔ̄līāā nda̍.

¹¹Ā wā chu̍ɛ̍i̍mā ɔ̄li̍fīi̍ya̍ŋ sōlīo̍o̍, ndu̍yɛ̍ mā tōōsīāā mu̍ɛ̍īmā mākīle̍pīi̍ya̍ŋ mī kōlɔ̄ɔ̄ īyēēma̍a̍ ō wā nda̍.

¹²Wānāā nda̍ bōōlu̍u̍ o̍ chi̍o̍o̍ŋ, ma̍ wā pīɔ̍mnda̍ŋ nda̍ ā chō cha᷄ŋnda̍ŋ kpe̍e̍kpe̍i̍ nāa̍ Mɛ̄lɛ̄ka̍ chūā le̍ mālāa̍, kɛ̍ lānī bɛ̍ɛ̍ Mɛ̄lɛ̄ka̍ cho̍ nda̍ yāŋɔ̄ɔ̄ le̍.

¹³Wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍ ā ye̍e̍mā nyɛ᷅ wa̍wo̍ŋndo̍ le̍. Ā chɛ᷅l mā kēla̍ a̍ nyɛ̄ wa̍wo̍ŋndo̍ le̍.

¹⁴Dīmīo̍o̍ nu̍a̍ā mī nyūmnda̍ŋ mā tōl, mī wānāa̍ di̍ū wa᷅ŋnda̍ wa̍ ā chɛ᷄ŋ le̍ kɔ̄la̍ŋ wānāā tāmbɛ̍i̍ya̍a̍ nɔ̍ nyɛ᷅ o̍ bā le̍ wa̍ dēlɔ̄ɔ̍ chōo̍ mā dīū nda̍. Tē nyūmnda̍ŋ mā tōl īchɔ̄l pɛ̍, nda̍ kpo̍u̍ ā sīmnu᷄ŋ vi̍īya̍.

¹⁵Wānāā sūūndɛ̍i̍ ya̍ bɛ̍ɛ̍, nyūmnda̍ŋ ko̍ni̍ nda̍ chāl chu᷅mndo̍ ni̍. Tē nyūmnda̍ŋ mā tōl pɛ̍ mī ō pīlɛ̍ wa̍ kɔ̄la̍ŋ, ō hāndu̍ nyɔ̍ɔ̍ o̍ hɔ̄l yɔ̄ŋi̍ wāŋnda̍ chɔ̍ ndu̍ hɔ̄lla̍.

¹⁶Dīmīo̍o̍ nu̍a̍ā mī nyūmnda̍ŋ mā tōl īchɔ̄l, mī vīīya̍ pāa̍le̍ ndāle̍ŋ lē sɛ̄ le̍ chīɛ̄īlā pi̍la̍la̍ŋ kēīyo̍ pēsīo̍o̍. Kɛ̍ tē pāa̍le̍ŋ lē sɛ̄ ndɔ̍ɔ̍ pɛ̍, ā kɔ̍ hi̍ni᷄ŋ kpɛ̍ kpɛ̍ o̍ lā nda̍lo̍ chi̍ɛ̍īla̍ŋ ni᷄ŋ. Ā ye̍e̍mā mā chē nyɛ̄ wa̍wo̍ŋndo̍ le̍.

¹⁷Nda̍ nda̍ chē ni᷅ŋ māchāā nyūmnda̍ŋ mɛ̄ɛ̍ pāa̍le̍ŋ lē sīā nu̍a̍ā īdīi̍ yɛ̍. Sīōōŋ o̍ sīōōŋīī bi̍ī lɛ̍ nda̍, le̍ sɔ̄ɔ̍ŋ ŋ̄sīo̍o̍ŋ yɔ̍nūŋ i̍chɔ̍llo̍ŋ te̍.

¹⁸So̍fāā, mi̍ tu̍ɛ̍ī ma̍ dīmī māā wānāā dɛ̍nɛ̍ wɔ̍ɔ̍ŋnda̍ Mɛ̄lɛ̄ka̍ chō nda̍ hūnɔ̄ɔ̄ bāsɔ̄ɔ̄ o̍ chi̍e̍ēŋndo̍ chōo̍, mɛ̄ɛ̍ mɛ̄ŋmā hūna᷄ŋ mā bāsū nu̍a̍ā nyɔ̄ɔ̍ŋ mī mā kūɛ̄nu᷄ŋ a̍ mu̍ŋ yɛ̍. Ndu̍yɛ̍ māā Mɛ̄lɛ̄ka̍ chīi̍ ni᷅ŋ bɛ̍ɛ̍ na̍a̍ ndāā cha̍lāa̍ me̍nā. Ā sɔ̍lā lɛ̍ wānā o̍ wānā ku̍ēl nda̍ wa̍llo̍ o̍ kpe̍le̍la̍ ndāla̍ yɔ̄mīī kīle̍pīi̍ye̍ ni᷄ŋ te̍.

¹⁹O̍ ko̍ŋ kɔ̍ɔ̍lī, ma̍ dīmī māā mɛ̄ɛ̍ mɔ᷄mndo̍ ō lō nu̍a̍ā a̍ te̍le̍ŋ hāŋgu̍llo̍ yɛ̍, māā le̍nde̍ wānāā yɔ̄ŋ wɔ̄ɔ̍ŋnda̍ ā lō ni̍ŋ o̍ lē pīlɛ̍ ni᷄ŋ ni̍.

²⁰Ndu̍yɛ̍ māā kālāa̍ ndāa̍ ve̍lū nda̍ kpe̍e̍kpe̍i̍ ya̍ bɛ̍ɛ̍, ā chō hūnɔ̄ɔ̄ pūɛ̄ɛ̄nɔ᷄ŋ a̍ nda̍ o̍kɔ̄ɔ̄, fɛ̍ɛ̍ŋ a̍ fɛ̍ɛ̍ bɛ̍ɛ̍ ā yi̍yāŋ ndɛ̍ a̍ nda̍ le̍. Ndu̍yɛ̍ māā dōndo̍po᷅lla̍ chō hūnɔ̄ɔ̄ dīāllūŋ ndāa̍ŋ dīo̍, mā tɛ̄ɛ̄mbu̍u̍ mu̍ŋ, mɛ̄ɛ̍ kāŋgūa̍a̍ dīā nu̍a̍ā yɔ̄mndo̍ mbō sīmnu᷄ŋ pu̍u̍lōo̍ yɛ̍.

²¹Ō cho̍ fu̍u̍le̍ ke̍ŋ i̍ cho̍ hūnɔ̄ɔ̄ yɔ̄nɔ᷄ŋ a̍ nda̍ le̍. Le̍ mɛ̄ɛ̍ nda̍ chō wāŋ lāāndūa̍a̍ vi̍lu̍ ŋ̍chu̍a̍ū le̍ wa̍ sāŋgāa̍ tūsīo̍o̍ chōo̍, mā bīī vi̍i̍ya̍a̍ nɔ̍ ŋ̍pi̍a̍a̍ndū le̍ wa̍ bīyɔ̄ɔ̄ wɔ̄ɔ̍ŋndo̍ yɛ̍.

²²Kɛ̍ ndu̍yɛ̍ mi̍ chē bɛ̍ɛ̍ ma̍ wā wānāā kpāāyāā bɛ̍ndū, Mɛ̄lɛ̄ka̍ nɔ̄ kpāāyāa̍ mbō tɛ̄ɛ̄mbu̍u̍ nda̍ kpo̍u̍. Tē Mɛ̄lɛ̄ka̍ chɛ᷄ŋ a̍ nda̍ pɛ̍, nda̍ kpo̍u̍ wūo̍o̍ nda̍ wū ni̍.

²³Mi̍ chē bɛ̍ɛ̍ te̍le̍ŋnda̍ŋ lā pūm mī Mɛ̄lɛ̄ka̍ hāndu̍ nda̍ bāa̍ chōo̍, mā wa̍ a̍ kɔ̄ltā nyūlū nyɛ̄ o̍ nyɛ̄ yɔ̍nūŋ a̍ nda̍ le̍, kɛ̍ ndu̍yɛ̍ hɔ̄ltē ndɔ̄le̍ŋ lē wa̍ nda̍ kɔ̄ɔ̄lī, le̍ mbō chē mɛ̄ɛ̍ nda̍ chō bālɔ̄ɔ̍ yɛ̍.

²⁴Wāŋnda̍ ha̍ā mā sīmnu᷄ŋ wa̍nāā kpāāyāā bɛ̍ndu̍, kɛ̍ le̍ te̍le̍ŋ bi̍ŋgī ko̍ni̍ kpāāyāā ndāa̍ ō wā ni̍. Ō be̍ndū ti᷅ŋ te̍ mī kpāāya̍ ndāa̍ mɛ̄ɛ̄lu̍, mā yɔ̍nu̍ŋ mɛ̄ɛ̍ bīl pūīyāa̍ dēl nu̍a̍ā lɛ̄ŋ mbō vēsa̍ŋ yɛ̍. Ō ku̍ē te̍le̍ŋ vi̍lɛ̄ī le̍ mbō kēlū nda̍ o̍ chi̍e̍ēŋndo̍ chōo̍.

²⁵Tē I̍ wa̍ lāchōō dīmī pɛ̍, wāŋndo̍ fūla̍ ya̍ kɔ̄ɔ̄lī. Nyɛ̄ o̍ nyɛ̄ ya̍ i̍ cho̍ dīmīo̍o̍, tē ō ve̍ o̍ nɛ̄ī le̍, lā dīmi̍ kpe̍nde̍ke̍le̍ āā ō cho̍ o̍ nɛ̄ī le̍.