Read Southern Kisi Cho̍o̍bū 26 Bible Online

Cho̍o̍bū 26 - Southern Kisi bible

Cho̍o̍bū 26

¹O̍ ko̍ŋ kɔ̍ɔ̍lī, mi̍ Cho̍o̍bū o̍ mu̍lī Bi̍li̍dāā dīōm mbo̍ dīmūl ndu̍ māā,

²tē nu̍a̍ā ŋ̄ mālā wa᷅na̍ nɔ̍ lɛ̍ kpāāyā o̍ kpāāyā le̍ wo̍ ni̍, mɛ̄ɛ̍ ā chāā bɔ̍ɔ̍! Wāna̍ cho̍ ni᷅ŋ ō yɔ̄kpɛ̍i̍ ō nɔ̍ lɛ̍ māyōōmū o̍ māyōōmū le̍ wo̍, tē nu̍a̍ā ŋ̄ chīīndīāā yo̍o̍mū ndɔ̄ɔ̍ ni̍ mɛ̄ɛ̍ ā chāā bɔ̍ɔ̍!

³Mbɔ̄ ba̍li̍ka̍, le̍ ya̍ wa᷅na̍ nɔ̍ ho̍ō kɔ̄l kālu̍ le̍ wo̍ sīlālā kɛ̄ndɛ̄ kɛ̍ndɛ̄ lā wāā nu̍a̍ā. Ba̍li̍ka̍ a̍ ya̍ tāāsi̍lā wāā nu̍a̍ā chɔ̄mndo̍.

⁴Ō nɛ̄ɛ̍nɛ̍ pɛ̍ɛ̍ku̍ yɛ̄ nu̍m sɔ̄ɔ̍ŋ ŋ̄ dīmu̍l la̍ mu᷅ŋ ki̍nɛ̍i̍ yo̍ŋ? Ō nɛ̄ɛ̍nɛ̍ dɔ̍ū yɛ̄ nu̍m dīōmnda̍ŋ nda᷅ŋ o̍ sōndō?

⁵Wānāa̍ vi᷅ ma̍ wā chi̍e̍e̍ pīɔ̍m o̍ mɛ̄ŋnda̍ŋ bɛ̄ŋgu̍ wa̍, nyi̍nāā ndāa̍ ā chō nyīīyāa̍ kpa᷅kpā

⁶Nyɛ̄ o̍ nyɛ̍ cho̍ chi̍e̍e̍ pīɔ̍m mbō wa̍ ō vīāŋna᷄ŋ Mɛ̍lɛ̄ka̍ o̍ hɔ̄l te̍. Ō chō chɔ̄ɔ̍ nyɛ̄ o̍ nyɛ̍ cho̍ lo̍ŋ.

⁷Nāa̍ nyɛ̄ o̍ nyɛ̄ ō ve̍ le̍ wa̍, mbo̍ lō o̍ ko̍ŋ mbo̍ pɛ̄ŋgɛ̄lā ha̍la̍ cho̍ bā lūāŋndo̍ wo̍, o̍ ko̍ŋ kɔ̍ɔ̍lī, mbo̍ lāndū chi̍e̍ēŋndo̍ nāa̍ nyɛ̄ o̍ nyɛ̄ cho̍ le̍ sāā le̍ wa̍.

⁸Mɛ̄ŋma̍ cho̍ o̍ ha̍la̍a̍ ni̍ŋ chōo̍ cho̍o̍ wa̍ŋ, mbō nɔ̄la̍ mbō sīmbū ma̍ŋ o̍ yu̍mbu̍ yu̍mbo̍o̍ ni᷄ŋ, mbō tōsa̍ yu̍mbu̍ yu̍mbu̍ ko̍ŋ ō sɛ̍ɛ̍sā a̍ lūsu̍l mɛ̄ŋmā māŋ te̍.

⁹Mbo̍ lō o̍ ko̍ŋ mbo̍ pɛ̄ŋgɛ̄lā yu̍mbu̍ yu̍mbo̍o̍ lēchōo̍ mbo̍ kūmbū ndu̍ kpo̍u̍.

¹⁰Mbo̍ lō o̍ mbo̍ pīɔ̄ū nyɛ̄ wa̍wo̍ŋndo̍ tɛ̄ɛ̄ŋ a̍ nyūmnda̍ŋ, mbo̍ hāndū nda̍ pɛ̄ŋgu̍la̍ŋ tɛ̄ɛ̄ŋ o̍ pēe̍ mɛ̄ŋmā īhɛ᷄llo̍ chōo̍.

¹¹Tē Mɛ̄lɛ̄ka̍ kɔ̄ŋgɔ̍la̍ŋ su᷅ŋgbu̍ma̍ sa̍a̍ chi̍e̍ēŋndo̍ ho̍ō wa̍ŋ le̍ ma̍ŋ tɛ̄ɛ̄mbūūwo̍ pɛ̍, ma̍ŋ kpo̍u̍ mī mā nyīīya̍ kpa᷅kpā a̍ sīōōŋnde̍.

¹²A̍ kpāāya̍ ndɔ̄ bɛ̍ndōo̍, mbo̍ nɔ̄lā mbo̍ yām pēe̍ mɛ̄ŋmā īhɛ᷄llo̍. A̍ kɔ̄l kālu̍ ndɔ̄ bɛ̍ndōo̍ mbo̍ nɔ̄lā mbo̍ dīī Lu̍e̍ha̍bī vīsī tɔ̍ɔ̍ma̍ bɛ̄ndōo̍ o̍ pēe̍ mɛ̄ŋmā īhɛ᷄llo̍.

¹³Mɛ̄ɛ̍ o̍ yo̍o̍mu̍ fu̍ū, mi̍ hūēīyīī ndūɛ̍i̍ ke̍ŋ ī tōsā mi̍ ha̍la̍a̍ dīāndū wa̍ke̍e̍. Kɛ̄ū bɛ̄ndū pēe̍ wa̍ nyāānɔ᷄ŋndo̍ wo̍, mbo̍ nɔ̄lā mbo̍ dīī ndu̍ a̍ bā.

¹⁴Ndu̍yɛ̍ sɔ̄ɔ̍ŋ Mɛ̄lɛ̄ka̍ tōsā wo̍ŋ, ŋ̄ hīōū bɛ̍ɛ̍ mu᷅ŋ, ŋ̄ pɔ̄mbɔ᷄ŋ cho̍ mu᷅ŋ ni̍. Nyɛ̄ pɔ̄mbɔ̄ ko̍ni̍ bɛ̍ɛ̍ na̍a̍ ŋ̄ tūēī a̍ a̍ sɔ̄ɔ̍ŋ bɛ̍ndūŋ o̍ to̍sā wo̍ŋ o̍kɔ̄ɔ̄ ni̍. Ō nɛ̄ɛ̍nɛ̍ nɔ̍lā yɛ̍ mbō sīna̍ mɛ̄ɛ̍ kpɛ̍ Mɛ̄lɛ̄ka̍ chō ō bɛ̄ndū yɛ̍? Wānā ko̍ŋ cho̍ le̍.