Read Southern Kisi Cho̍o̍bū 27 Bible Online

Cho̍o̍bū 27 - Southern Kisi bible

Cho̍o̍bū 27

¹O̍ ko̍ŋ kɔ̍ɔ̍lī, mi̍ Cho̍o̍bū o̍ hi̍a̍ū lāchī a̍ sūɛ̍i̍, mbo̍ dīmī āā,

²I̍ me̍na̍ŋ o̍ Mɛ̄lɛ̄ka̍ po̍, Mɛ̄lɛ̄ka̍ nɔ̍ kpāāyāa̍ kpo̍u̍ mbo̍ kɛ̄ɛ̄ le̍ ya̍ di̍ nūu̍ kīo̍o̍, mbo̍ tōsā mi̍ yōōmū nūu̍ ō wā o̍ sāŋgāa̍ ni᷄ŋ ndo̍,

³ha̍a̍a̍ mi̍ wa᷅ yōōmū, mi̍ hūēīyīī Mɛ̄lɛ̄ka̍ dɔ̄ū ya̍ o̍ mīli̍ŋ nde̍, ī wā wɔ̄ ya̍ o̍ mīli̍ŋ,

⁴chōōla̍ŋ lā fu̍lā ya̍ o̍ sōndō le̍, sōndō nūu̍ ō nɔ̍lā mbō dīmi̍ chōōla̍ŋ fɛ̍ɛ̍ŋ a̍ fɛ̍ɛ̍ŋ te̍.

⁵Mɛ̄lɛ̄ka̍ tu̍ɛ̍ī bɛ̍ɛ̍ le̍, le̍ ya̍ mī ke̍ nya̍ di̍. I̍ wu᷅ le̍nde̍, I̍ ya̍a̍lā ya̍ pi̍la̍ māā I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍.

⁶I̍ cho̍ lō o̍ dīōm nūu̍ chōo̍ māā I̍ cho̍ sa̍kpō, nyɛ̄ pɔ̄mbɔ̄ bɛ̍ɛ̍ I̍ fe̍ŋāŋ o̍ dīōm kōŋ chōo̍ le̍. Ha̍a̍a̍ a̍ te̍le̍ŋ ya̍ I̍ cho̍ yōōmū wo̍, kɔ̄l nūu̍ ō chō ya̍ wa̍la̍ŋ a̍ nyɛ̄ ya̍ I̍ cho̍ dīmīo̍o̍ wo̍

⁷Mbɔ̄ māā Mɛ̄lɛ̄ka̍ tūsi̍ ya̍a̍mɔ̍ɔ̍wa̍a̍ nīa̍a̍ nyɛ̄ pālāa̍ chōo̍, mɛ̄ɛ̍ o̍ tu̍sī wa̍nāā dɛ̍nɛ̍ wɔ̍ɔ̍ŋnda̍ nyɛ̄ pālāa̍ chōo̍ yɛ̍ fɔ̍. Wānāa̍ si̍mu̍l la̍ wa̍, mbɔ̄ māā Mɛ̄lɛ̄ka̍ tūsi̍ nda̍ nyɛ̄ pālāa̍ chōo̍, mɛ̄ɛ̍ o̍ tu̍sī wa̍nāa̍ cho̍ sa̍kpō ndu̍ o̍ hɔ̄l te̍ wa̍ nyɛ̄ pālāa̍ chōo̍ yɛ̍ fɔ̍.

⁸Wāna̍ kɛ̍ɛ̍ Mɛ̄lɛ̄ka̍ wo̍, tē Mɛ̄lɛ̄ka̍ chūa̍ yōōmū ndɔ̄ɔ̍ pɛ̍, yɛ̄ɛ̍nɛ̍ wānā ko̍ŋ ō wā yɛ̍ lēhɔ̄l o̍ nɛ̄ī le̍ ndu̍?

⁹Wānā wa̍ā le̍nde̍, tē dɛ̍nɛ̍ pa̍lāa̍ ō tōl ndu̍ chōo̍ pɛ̍ mbō kōŋu̍l nāa̍ Mɛ̄lɛ̄ka̍ chūā le̍ mālāa̍, Mɛ̄lɛ̄ka̍ yāŋ ndu̍ pa̍ la̍ni̍?

¹⁰Wānā wa̍ā le̍nde̍, kɔ᷅l kɛ̄ndɛ̄ wāŋnda̍ sɔ̄lā o̍ Mɛ̄lɛ̄ka̍ nɔ̍ kpa̍a̍yāa̍ kpo̍u̍ wo̍ sōōlūūwo̍ ni᷄ŋ ndo̍, ō nɔ̄lā pa̍ mbō sɔ̍lā ndu̍ le̍? Ō nɔ̄lā pa̍ mbō nyūna̍ Mɛ̄lɛ̄ka̍ dīōm le̍ te̍le̍ŋ o̍ te̍le̍ŋ?

¹¹I̍ cho̍ nya̍ pɛ̄ɛ̄kū, a̍ kpāāya̍ Mɛ̄lɛ̄ka̍a̍ o̍kɔ̄ɔ̄, ndu̍yɛ̍ mī tɛ̍ɛ̍si̍a̍l nya̍ nyɛ̄ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō kɛ̄ɛ̄si̍a̍a̍ le̍ tōsāa̍ wo̍.

¹²Nya̍ kpo̍u̍ lā chē ni᷅ŋ sɔ̄ɔ̍ŋ mu᷅ŋ. Ɔ̍ɔ̄ le̍ sa̍bū nya̍ kpo̍u̍, nya̍ hūŋ ya̍ sɔ̄ɔ̍ŋ ŋ̄dīɔ̄m wāā nu̍a̍ā dīmūllo̍ wo̍?

¹³Wa̍nāā dɛ̍nɛ̍ wɔ̍ɔ̍ŋnda̍, nda̍ yɔ̍nūŋ ni̍ māā wānāa̍ ha̍ndū wa᷅ŋnda̍ nyɛ̄ pālāa̍ chōo̍ wa̍, nyɛ̄ pālāā Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō tūsī nda̍ chōo̍ wo̍ ndu̍ cho̍ ho̍ō ni̍.

¹⁴Wāŋnda̍ ha̍ā mā vēlū chūāūwa̍ ta̍u̍ ta̍u̍, kɛ̍ chūāūwāā ndāā ka̍ŋ, a̍ mɔ̄ɔ̄ŋ fāŋndo̍ŋ nda̍ dīū nda̍ ni̍. Chūāūwāā ndāa̍ ā sɔ̍lā nyɛ̍ dīāā lētūu̍ le̍ dīo̍ le̍.

¹⁵A̍ lo᷅ yo̍o̍mū wa̍, nāāla̍ŋ la̍ si̍o̍ū nda̍ dīū ni̍. Ndu̍yɛ̍ wānāā dɛ̍nɛ̍ wɔ̍ɔ̍ŋāā kāŋ lāāndāā ndāa̍ nda̍ mɛ̄ī ya̍, ā nɔ̍lā mā cha᷄ŋ chūāūwāā ndāā ka̍ŋ te̍.

¹⁶Wānāā dɛ̍nɛ̍ wɔ̍ɔ̍ŋnda̍ mā chūūŋgi̍a̍a̍ nyɛ̄ sɔ̄lāa̍ mbō wa̍ ha̍ā ā chi̍ī ndu̍ chɔ᷅m te̍. O̍ ko̍ŋ kɔ̍ɔ̍lī, mā nɔ̄ nyɛ̄ chūɛ̄ɛ̄na᷄ŋndo̍ ta̍u̍ ta̍u̍.

¹⁷Kɛ̍ wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, nda̍ chu̍ɛ̍ɛ̍nu̍ŋ nyɛ᷅ chūɛ̄ɛ̄na᷄ŋ ko̍ŋ ni̍. Wānāa̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wa̍, nda̍ pi̍ɔ̍u̍wa᷅ŋ nyɛ᷅ sɔ̄lāā nda̍ chūūŋgi̍a̍a̍ ko̍ŋ ndo̍ ni̍.

¹⁸Chīɛ̄īlā wānāā dɛ̍nɛ̍ wɔ̍ɔ̍ŋnda̍ ha̍ā ā tāŋgūl ta̍ŋ, mɛ̄ɛ̍ kɔ̄mi̍i̍ so̍o̍ŋtɛ̍ndɛ̄i̍ ī chō nu̍a̍ā ī nɛ̍ī ki̍o̍lū le̍ yɛ̍, le̍nde̍ chīɛ̄īlā lāŋ lā nɛ̍ī i̍ta̍mbu̍ le̍ ni̍. Mɛ̄ɛ̍ tɛ̍ndɛ̄i̍la̍ wānāā mɛ̄ŋgɛ̄lāa̍ ā lɔ̄l le̍ni̍ŋ nda̍ŋ lā wā nu̍a̍ā yɛ̍, le̍nde̍ chīɛ̄īlā ndāla̍ la̍ŋ lā chō ni̍.

¹⁹Ā wā o̍ sūl ndāa̍ chōo̍ le̍nde̍, kɛ̍ o̍ nyūmnda̍ŋ mā pīlɛ̍ bɛ̄ŋgu̍ tē ā hīni̍ pɛ̍, mɛ̄ɛ̄lu̍la̍ŋ la̍ wa᷅ la̍ŋ ni̍. Tē ā tēndū ni᷅ŋ īdīi̍ pɛ̍, sūl o̍ sūl nda̍ a̍a̍ nɔ̍, ā de᷅l lɛ̍ ndu̍ hɔ̄lte̍ŋ te̍.

²⁰O̍ ko̍ŋ, mī sīōōŋīī bɛ̄ndūe̍i̍ ī bīī nda̍ o̍ lēpīlɛ̍ ni᷄ŋ mɛ̄ɛ̍ mɛ̄ŋmā hūna᷄ŋ mā hūŋ nu̍a̍ā o̍ lēpīlɛ̍ ni᷄ŋ yɛ̍. Ndu̍yɛ̍ mī hūēīyīī kpāāyɛ̄ī bɛ̄ndūi̍i̍ hu᷅ŋ i̍chɔ᷅l le̍, ī hīōū a̍ nda̍.

²¹Hūēīyīi̍ cha᷅ŋ ba᷅ pāa̍le̍ŋ lē chāŋndo̍ ve̍, mī ī hu᷄ŋ chu̍ā nda̍ mī hīōū a̍ nda̍. Mī hūēīyīī kēŋ ī hu᷄ŋ so̍lī nda̍ o̍ lā nda̍lo̍ chi̍ɛ̍ī ni̍ŋ, mī ī hīōū a̍ nda̍.

²²Ā wā ni̍ŋ ki̍ndī kīndīo̍o̍ le̍ mā nyāānu̍ŋ hu̍e̍i̍yīī kēŋ, kɛ̍ īnyīɛ̍ɛ̍ bɛ̍ɛ̍ ī tu̍i̍i̍nūŋ ni̍ŋ nda̍ le̍, ī wā ni̍ŋ nda̍ kīndɔ̄ɔ̍ kpe̍e̍kpe̍i̍.

²³Ā wā ni̍ŋ nya̍a̍nɔ᷄ŋndo̍, mī hūēīyīī kēŋ ī wa̍ nda̍ īfūkū fūkūe̍i̍ kɔ̄ɔ̄lī kpe̍e̍kpe̍i̍, ī wā ni̍ŋ nda̍ sīōōŋīī bɛ̄ndūe̍i̍ lūēīyo̍ le̍ nda̍ tɛ̄ɛ̄mbūūwo̍.