Read Southern Kisi Cho̍o̍bū 28 Bible Online

Cho̍o̍bū 28 - Southern Kisi bible

Cho̍o̍bū 28

¹Wāŋnda̍ nɔ̄ nāa̍ nda̍ kūā ka̍ni̍ŋ hu̍mbo᷄ŋ tōūwɔ̄ɔ̍ wa̍, ā nɔ̄ nāa̍ nda̍ kūā ko̍o̍līi̍yo̍ŋ dīndīo̍o̍ wa̍.

²Chīli̍ŋndo̍ŋ bɛ̍ɛ̍ lɛ̄ŋ wānāā tūāūwāa̍ ā sōlī mu̍ŋ ni̍. Ka̍pāa̍ bɛ̍ɛ̍, o̍ pōū tēēŋgīa̍a̍ ni᷄ŋ nda̍ sōlī ndi̍ ni̍.

³Wānāā tūāūwāa̍ mā tōl o̍ lɛ̄ŋnde̍ŋ bɛ̄ŋgu̍ ndi̍ o̍ nyūmmā bɛ̄ndūa̍a̍ŋ ni᷄ŋ a̍ tōūwɔ̄ɔ̍. Mā tōl o̍ lɛ̄ŋnde̍ŋ bɛ̄ŋgu̍ di̍ nu̍u̍wāa̍, le̍ pōūtā nda̍ tōōsīāā chi̍li̍ŋndo̍ŋ nda̍ŋ.

⁴Mā kūmbi̍ nɛ̄īyo̍ wo̍ŋgbo̍ŋ o̍ lɛ̄ŋnde̍ŋ bɛ̄ŋgu̍ di̍, nāa̍ wāna̍ chi̍e̍e̍ o̍ che᷅l bɛ̍ɛ̍ le̍ wa̍. Nāa̍ wānāā kēlāa̍ ā nɔ̍lā bɛ̍ɛ̍ mā fūūlu̍u̍ le̍ wa̍, mā tōl lo̍ŋ ndi̍, tē ā wa̍ tōlɔ̄ɔ̍ pɛ̍, ā tōl o̍ yōōle̍ŋ, tē ā wa̍ hēlɔ̄ɔ̍ pɛ̍, ā he᷄l o̍ yōōle̍ŋ.

⁵Lɛ̄ŋnde̍ŋ, lēchōo̍ na̍a̍ ŋ̄ tōsā chi̍ɔ̍ɔ̍ŋ ni̍ mī ŋ̄ sɔ̄la̍ nyɛ̄ dīa̍a̍. Kɛ̍ lēbɛ̄ŋgu̍, hāŋgu̍l cho̍ lo̍ŋ ndo̍ wānā cha᷅ ko̍ bɛ̍ɛ̍ āā yīŋndē bɛ̄ndūle̍ŋ le̍ cho̍ sānde̍i̍ lo̍ŋ ni̍.

⁶O̍ pōūta̍ŋ tɛ̄ɛ̄ŋ wāŋnda̍ ā sāālūŋ po̍ūtā ba̍ā kālālā sāfa̍lūɛ̄la̍ŋ ni̍, ndu̍yɛ̍ mā sāālu̍ŋ ko̍o̍līi̍yo̍ŋ o̍ pūūlōo̍ ni᷄ŋ.

⁷Nāa̍ wānāā tūāūwāa̍ ā kūā nyɔ̍ɔ̍ŋ mu᷅ŋ tōūwɔ̄ɔ̍ o̍ lɛ̄ŋnde̍ŋ bɛ̄ŋgu̍ wa̍, yōūwāa̍ ba̍lū cho̍o̍ cho̍o̍ wa̍ bɛ̍ɛ̍, a̍ yi̍bɛ̍i̍ya̍, ā nɔ̍lā mā kēēku̍ lo̍ŋ te̍

⁸Vīsīāā yōndūa̍a̍ bɛ̍ɛ̍ ā nɔ̍lā mā fūūlu̍u̍ lo̍ŋ te̍, kpɔ̍kūŋnda̍ bɛ̍ɛ̍ ā fu̍u̍lūū lo̍ŋ te̍.

⁹Wānāā tūāūwāa̍ mā chīŋa̍la᷅ŋ po̍ū kālā ka̍lāa̍, mā lo᷄ tōūwɔ̄ɔ̍ mā tōl o̍ pēmbo᷄ŋ bɛ̄ŋgu̍ di̍.

¹⁰Mā lo᷄ tōūwɔ̄ɔ̍ mā kūmbi̍ nɛ̄īyo̍ o̍ pōūwo̍ ni᷄ŋ, ko̍ŋ kpo̍u̍ ā wā kɔ᷅la̍ŋ a̍ pōūta̍ŋ yāāsi̍a̍a̍ le̍ pōūtā ba̍ā kālāla̍ŋ.

¹¹Mā nɔ̄la̍ mā kānda̍ pēēla̍ pɔ̍mbɔ̄la̍ŋ, yɔ̄ŋi̍ mɛ̄ŋnda̍ŋ mā hīo̍u̍ nāa̍ nda̍ wā to̍u̍wɔ̄ɔ̍ wa̍. Nyɛ᷄m wa᷅ ŋ̍ vi̍a̍ŋna᷄ŋndo̍ŋ, mā nɔ̄la̍ mā sōli̍ mu̍ŋ kpe̍nde̍ke̍le̍ mī wāŋnda̍ chē.

¹²Kɛ̍ kɔ̄l kālo̍o̍ yɛ̄, kūɛ̍ɛ̍nɛ̍ wānā sa̍a̍lūŋ yɛ̍ ndu̍? Kūɛ̍ɛ̍nɛ̍ wānā sa̍a̍lūŋ yɛ̍ sīnā pɛ̄ŋgo̍o̍?

¹³Wānā o̍ wānā nɔ̍lā mā si̍na̍ ba̍ā kɔ̄l kālo̍o̍ le̍. Ndu̍yɛ̍ wānā nɔ̍lā mā sa̍a̍lu̍ŋ ndu̍ wāŋndā chīe̍e̍ya̍ tɛ̄ɛ̄ŋ te̍.

¹⁴O̍ fo̍ndāŋ yīŋgi̍lɛ̍i̍ bɛ̍ndōo̍ o̍ pēe̍ mɛ̄ŋmā īhɛ᷄llo̍ bɛ̄ŋgu̍ bɛ̍ɛ̍, wānā nɔ̍lā mā sa̍a̍lu̍ŋ ndu̍ lo̍ŋ te̍.

¹⁵Nyɛ̄ sɔ̄lāā o̍ nyɛ̄ sɔ̄lāā cho̍ mbō pēndū kɔ̄l kālo̍o̍ le̍, ka̍ni̍i̍ hu̍mbū ni̍, ka̍ni̍i̍ si̍a̍ŋā ni̍.

¹⁶Wānā nɔ̍lā bɛ̍ɛ̍ mā tu̍u̍ ba̍ā ndɔ̄ɔ̍ a̍ ko̍o̍līi̍ŋ kɛ̍ndɛ̄ kɛ̍ndɔ᷄ŋ ndu̍yɛ̍ a̍ pōūtā ba̍ā kālā ka̍lāla̍ŋ te̍.

¹⁷Wānā tu̍ū ndu̍ bɛ̍ɛ̍ a̍ ko̍o̍līi̍ye̍, kɛ̄lɛ̄ŋgāā a̍ pōūtā ba̍ā kālālā ŋɛ̄lɛ̄ŋgi̍ ŋɛ̍lɛ̄ŋgi̍la̍ŋ la̍ŋ te̍. Nyɛ᷄m cho̍ ŋ̄ tōōsīāā a̍ ko̍o̍līi̍ŋ kɛ̍ndɛ̄ kɛ̍ndɔ᷄ŋ ndo̍ŋ bɛ̍ɛ̍ ŋ̄ nɔ̍lā mī pēndū ndu̍ le̍.

¹⁸Kɔ̄l kālo̍o̍ ō nɔ̄ ba̍a̍ ō hīōū pōūtā ba̍ā kālāla̍ŋ, ko̍lūā, a̍ ka̍lu̍a̍sītā. Ō nɔ̄ ba̍a̍ ō hīōū pōūtā ba̍ā kālāla̍ŋ, pi̍ɛ̍ɛ̄l.

¹⁹Wānā tu̍ū ndu̍ bɛ̍ɛ̍ ba̍a̍ a̍ pōūtā ba̍ā kālālā to̍pa̍sī la̍ŋ, pōūta̍ŋ Īto̍o̍pīāā le̍. Ko̍o̍līi̍ di̍a̍ndɛ̄ī bɛ̄ndūe̍i̍ bɛ̍ɛ̍ ī nɔ̍lā mī ī pēndū kɔ̄l kālo̍o̍ le̍.

²⁰Kūɛ̍ɛ̍nɛ̍ wānā sɔ̍lā yɛ̍ ni᷅ŋ kɔ̄l kālo̍o̍? Kūɛ̍ɛ̍nɛ̍ wānā sa̍a̍lūŋ yɛ̍ ni᷅ŋ sīnā pɛ̄ŋgo̍o̍?

²¹Nāa̍ kɔ̄l kālo̍o̍ ō chō ō vīāŋāā wa̍, nyɛ̄ o̍ nyɛ̄ yōōmāā ō nɔ̍lā mbō de᷄l ndu̍ hɔ̄lte̍ŋ te̍. Yōūwāa̍ ba̍lū o̍ ha̍la̍a̍ ni᷄ŋ cho̍o̍ cho̍o̍ wa̍ bɛ̍ɛ̍ ā nɔ̍lā mā de᷄l ndu̍ hɔ̄lte̍ŋ te̍.

²²Wānāa̍ cho̍ chi̍e̍e̍ pīɔ̍m nda̍ bɛ̍ɛ̍ tē wānā nyu̍na̍ nda̍ pɛ̍, nu̍a̍ā nda̍ dīmūl nu̍m ni̍ māā nda̍ bɛ̍ɛ̍ tɔ̍ɔ̍ ko̍ni̍ nda̍ tūēī ndu̍.

²³Mɛ̄lɛ̄ka̍ ndu̍ pīlɛ̍ kpe̍ si̍nā nāa̍ wānā sa̍a̍lūŋ kɔ̍l kālo̍o̍ wa̍ ni̍. Ndu̍ pīlɛ̍ kpe̍ si̍nā nāa̍ o̍ cho̍ wa̍ ni̍.

²⁴Kāni̍ fo̍ndōle̍, ndu̍ ō chā ba᷅ o̍ bā fe̍e̍e̍ o̍ chi̍e̍ēŋndo̍ ni᷄ŋ. Nyɛ̄ o̍ nyɛ̄ cho̍ o̍ chi̍e̍ēŋndo̍ ni᷄ŋ, ō chō ndu̍ chɔ̄ɔ̍ kpo̍u̍.

²⁵Mɛ̄ɛ̍ Mɛ̄lɛ̄ka̍ kɛ̄ɛ̄si̍a̍a̍ mɛ̄ɛ̍ kpɛ̍ hūēīye̍ ī nɔ̄ mī ī nɔ̄ kpa̍a̍yāa̍ yɛ̍, ndu̍yɛ̍ mbo̍ kɛ̄ɛ̄sīāā mɛ̄ɛ̍ kpɛ̍ pēe̍ mɛ̄ŋmā īhɛ᷄llo̍ ō nɔ̄ le̍ wāa̍ yɛ̍,

²⁶mbo̍ kē pīɔ̍ɔ̍ sāwāla̍ o̍ nɔ̍ mbō wa̍ bɛ̄ŋgu̍ la̍ŋ kpɛ̍ kpɛ̍, o̍ ko̍ŋ kɔ̍ɔ̍lī, mbo̍ chɔ̄m nyɛ̄ ŋūāla̍lɛ̍ī ŋūāla̍lɛ̍īyo̍ nɛ̄īla̍ o̍ ke̍e̍kū o̍ ha̍la̍a̍ ni᷄ŋ cho̍o̍ cho̍o̍ la̍ŋ,

²⁷a̍ te̍le̍ŋ ko̍ŋ Mɛ̄lɛ̄ka̍ mɛ̄ɛ̄nda̍ŋ ni̍, mbo̍ chā māā kɔ̄l kālo̍o̍ ō chō nyɛ̄ kpe̍e̍kpe̍i̍, o̍ ko̍ŋ, mbo̍ tōsā mi̍ kɔ̄l kālo̍o̍ ō wā. Ndu̍yɛ̍ mbo̍ fūlā kɔ̄ɔ̄lī, mbo̍ chā māā ō bɛ̄nda̍.

²⁸Mi̍ Mɛ̄lɛ̄ka̍ lō o̍ ko̍ŋ mbo̍ dīmūl wāna̍ chi̍o̍o̍ āā, “Wāna̍ o̍ wāna̍ nɔ̍ sīōōŋīi̍ ya̍ Mɛ̍lɛ̄kɛ̍i̍ pɛ̍, mɛ̄ɛ̍ wānā ko̍ŋ ō chīi̍ kɔ̄l kālo̍o̍ sɔ̄lā. Wānā o̍ wāna̍ kɛ̍ɛ̍ le̍ bāla̍ŋ wōūwo̍ o̍ yɔ̄ŋ wɔ̄ɔ̍ŋndo̍ tōsāa̍ ni᷄ŋ pɛ̍, mɛ̄ɛ̄ wānā ko̍ŋ ō nɔ̄ sīnā pɛ̄ŋgo̍o̍.”