Read Southern Kisi Cho̍o̍bū 29 Bible Online

Cho̍o̍bū 29 - Southern Kisi bible

Cho̍o̍bū 29

¹O̍ ko̍ŋ kɔ̍ɔ̍lī, mi̍ Cho̍o̍bū o̍ hi̍a̍ū lāchī a̍ sūɛ̍i̍.

²a̍a̍a̍, mī yōōmū nūu̍ ndu̍ o̍o̍ mi̍i̍ŋgu̍ mɛ̄ɛ̍ o̍ wa̍ o̍ wɔ̄sīla̍ hi̍o̍ū la̍ŋ ni᷄ŋ, bōōndi̍i̍ Mɛ̄lɛ̄ka̍ hɔ̄ltē ndɔ̄le̍ŋ lē wa̍ wɔ̄ ya̍ chōo̍ mbo̍ wā ya̍ māndāa̍ ve̍ yɛ̍.

³A̍ te̍le̍ŋ ko̍ŋ, la̍mbūi̍ Mɛ̄lɛ̄ka̍a̍ ō wa᷄ wɔ̄ ya̍ dīōndɔ̄ɔ̍ chōo̍, mi̍ nyɛ̄ ndɔ̄ wa̍wo̍ŋndo̍ ō wā ya̍ dīōndɔ̄ɔ̍ lāchī mbō chɔ̄m ya̍ nɛ̄īyo̍ o̍ nyūmnda̍ŋ ni᷄ŋ.

⁴A̍ te̍le̍ŋ ko̍ŋ, I̍ wa̍ŋnu̍ŋ o̍ sūllo̍ chōo̍, nāāŋa᷅ŋndo̍ ō wa̍ na̍a̍ tɛ̄ɛ̄ŋ na̍a̍ Mɛ̄lɛ̄ka̍, mbo̍ wā chīɛ̄ī nūu̍ māndāa̍.

⁵Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō wa᷄ a̍ ya̍ la̍tu̍lu̍. Chūāūwāā nīa̍a̍ ā ya̍ ā bālāā sɔ̍.

⁶Mɛ̄ɛ̄mā nāūwa̍ŋ a̍ mɛ̄ɛ̄mā chūīŋnda̍ŋ mā wānu̍ŋ ya̍ o̍ bā wa̍chāko̍ bɛ̍ndū le̍ kōlɔ̄ɔ̍. Chūɛ̄īmā ɔ̄li̍fīi̍ya̍ŋ mā wa̍ tāālīa̍a̍ o̍ pōūta̍ŋ pu̍ū o̍ yɔ̄mīī nīi̍ ɔ̄li̍fīi̍ye̍ bɛ̄ŋgu̍.

⁷Tē wāŋ bɛ̄ndūāā chi̍e̍e̍ya̍ nda̍ a̍a̍ chu̍u̍ŋgi̍āŋ pɛ̍ mī kɔ̍ cha᷅l nda̍ tɛ̄ɛ̄ŋ,

⁸chūāā pīāāndūa̍a̍ chɔ̄ɔ̍ ya̍ hūnɔ̄ɔ̍ mā ma᷄l fo̍ndāa̍, wāŋ bɛ̄ndūa̍a̍ kpo̍u̍ chɔ̄nɔ᷄ŋndo̍ īsīsi̍ le̍ ya̍ bɛ̄ɛ̄le̍ŋ kīo̍o̍.

⁹Wānāā bɛ̄ndūa̍a̍ mā mēi̍ kpi᷅li̍ kpi᷅li̍, wānā o̍ wānā su̍ū ba̍kō le̍.

¹⁰Wānāā tɔ̍ɔ̍wa̍a̍ bɛ̍ndūa̍a̍ kpo̍u̍, nda̍ bɛ̍ɛ̍ mā mēi̍ do̍ŋ do̍ŋ.

¹¹Tē wāŋnda̍ nda̍ a̍a̍ tu̍e̍ī ya̍ sūɛ̍i̍ pɛ̍, ndu̍yɛ̍ mā chē ya̍, nda̍ kpo̍u̍ chāndɔ̄ɔ̄la̍ŋ ya̍, ndu̍yɛ̍ mā dīmi̍ sɔ̄ɔ̍ŋ kɛ̍ndɔ᷄ŋ a̍ ya̍ o̍kɔ̄ɔ̄.

¹²Tē wānāā tāmbɛ̍i̍ya̍ nda̍ a̍a̍ ŋɔ̍ɔ̍cha̍ŋ nāa̍ ya̍ chu̍a̍ pɛ̍ le̍ nda̍ mālāa̍, mālāa̍ ya̍ i̍i̍ ma̍lā nda̍ ni̍ mī pi̍ŋi̍ nda̍. Vīi̍ya̍a̍ nda̍ a̍a̍ nɔ̍ lɛ̍ ŋ̄fi̍nyā le̍ wa̍, ā nda̍ a̍a̍ nɔ̍ wa̍nā o̍ wānā ma̍lāā le̍ wa̍, ya̍ ya̍ i̍i̍ ma̍lā nda̍ ni̍.

¹³Wānāā sāŋgāa̍ ndu̍ o̍o̍ tu̍āl cho̍o̍ mā hīŋ le̍ pīɔ̍mndo̍ sɔ̄lāa̍ wa̍, sa̍lāla̍ŋ nda̍ a̍a̍ du̍a̍ū ya̍ ni̍, a̍ mālā ya̍ i̍i̍ ma̍lā nda̍ wo̍. Wāŋ lāāndūāā pīāāndūāā ndāa̍ ā vī ā nɔ̍ lɛ̍ ŋ̄pīāāndū le̍ wa̍, mī ya̍ i̍i̍ to̍sa̍ mā dɔ̄ɔ̄nu᷄ŋ nya̍a̍le̍.

¹⁴Tōnya̍a̍ ō wa̍ ni᷅ŋ māwāā māā nyɛ̄ nī chu̍ɛ̍i̍ya᷄ŋ. Sa̍kpōyɛ̍i̍ ndi̍ wa̍ ni᷅ŋ māwāā māā dōma̍ ni̍, a̍ mɔ̍si̍l nī vi̍lɛ̄ī.

¹⁵Wānāā sūmɛ̍i̍ya̍, ya̍ wa̍ hɔ̄ltā ndāla̍ŋ ni̍, ndu̍yɛ̍ mi̍ wa᷅ pēlo᷄ŋ le̍ wānāā bɛ̄vɛ̍i̍ya̍.

¹⁶Wānāā tāmbɛ̍i̍ya̍, ya̍ wa̍ fi̍nyāa̍ le̍ nda̍ ni̍. Wānāā lēkāa̍wa̍, ya̍ wa̍ wāna̍ su̍ŋgū le̍ nda̍ wo̍ ni̍.

¹⁷Wānāā dɛ̍nɛ̍ wɔ̍ɔ̍ŋnda̍ mi̍ tɛ̍ɛ̍mbūū kpāāya̍ ndāa̍, ndu̍yɛ̍ mi̍ so̍li̍ nda̍ wānāā nda̍ wa̍ nyɛ̄ pālāa̍ tūsīo̍o̍ chōo̍ wa̍ o̍ bā.

¹⁸Mi̍ yi̍ya᷄ŋ māā I̍ vi̍a̍ū ni̍ŋ bɔ̍ɔ̍ yo̍o̍mū, ndu̍yɛ̍ māā I̍ wu᷅ ni̍ŋ o̍ kɔ̄l nyūlū ni᷄ŋ o̍ ya̍lo̍ chi̍ɛ̍ī ni̍ŋ.

¹⁹I̍ wa̍ māwāā mɛ̄ɛ̍ yɔ̄mndo̍ ō wā nu̍a̍ā te̍le̍ŋ o̍ te̍le̍ŋ pūūndu᷅ŋ ndɔ̄ɔ̍ŋ ŋ̄ wā mɛ᷅ŋnda̍ŋ sɔ̄lāa̍, ndu̍yɛ̍ mī mɔ᷄mndo̍ ō wa̍ chūchɔ̄ɔ̍ o̍ lɛ̄ūwūŋ ndɔ̄ɔ̍ŋ chōo̍ yɛ̍.

²⁰Le̍ te̍le̍ŋ o̍ te̍le̍ŋ wāŋnda̍ ā wa᷄ ya̍ chāndɔ̄ɔ̄la̍ŋ, kpāāya̍ nūu̍ ndu̍ o̍o̍ fe̍ŋāŋ le̍cho̍o̍ le̍, le̍ te̍le̍ŋ o̍ te̍le̍ŋ ō wa᷄ chɔ̄ɔ̄lɔ᷄ŋndo̍ lēchōo̍.

²¹Tē ya̍ i̍i̍ ku̍mbi̍ sōndōo̍ pɛ̍ mī ya̍ i̍i̍ wa̍ wāŋnda̍ sīlāa̍, nda̍ kpo̍u̍ mēīyo̍ do̍ŋ do̍ŋ le̍ tūēī dīōmndā ya̍ I̍ cho̍ dīmī la̍ŋ, mēīyo̍ do̍ŋ do̍ŋ, mā yāŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄ o̍ sīlāālā ya̍ I̍ cho̍ nda̍ la̍ŋ.

²²Ndu̍yɛ̍ tē ya̍ i̍i̍ chi̍i̍ sūɛ̍i̍ pɛ̍ kpo̍u̍, wānā o̍ wānā che᷅le̍ŋ ndu̍ o̍o̍ su̍ū lɛ̍ le̍. Dīōmndā nīla̍ŋ lūɛ̄īyɔ̄ɔ̍ wāŋnda̍ o̍ lānī vi̍li̍ vi̍li̍, mɛ̄ɛ̍ mɛ̄ŋmā pīɔ̄ɔ̄ wa̍ŋ mā chō nu̍a̍ā yɛ̍.

²³Mɛ̄ɛ̍ wāŋnda̍ ā yēēmā nu̍a̍ā pīɔ̍ɔ̍ a̍ te̍le̍ŋ wɔ̄ɔ̄lē kālā ka̍lā le̍ŋ yɛ̍, le̍nde̍ wāŋnda̍ nda̍ a̍a̍ ye̍e̍mā le̍ mī ya̍ a̍a̍ so̍ō nāa̍ nda̍ chūā ni̍.

²⁴Tē ya̍ i̍i̍ ma̍m nāa̍ wāŋnda̍ chūā pɛ̍, nda̍ a̍a̍ ku̍ē le̍ lāāla᷄ŋ māā ya̍ le̍ ma̍m nāa̍ nda̍ chūā le̍. Mɛ̄ɛ̍ mɛ̄ɛ̍ wāŋndo̍ ndu̍ o̍o̍ ta̍mbu̍ kɔ᷅l, tē ya̍ i̍i̍ to̍fa̍ ndu̍ hɔ̄lla̍ pɛ̍, kɔ̄llo̍ ndu̍ o̍o̍ na᷅ŋ ni̍.

²⁵I̍ wa̍ māwāā wāŋnda̍ chōo̍ māā māsā, ya̍ ya̍ i̍i̍ di̍mūl nda̍ nyɛ̄ nda̍ a̍a̍ to̍sā wo̍ ni̍. Mɛ̄ɛ̍ māsā bɛ̍ndōo̍ ō wā nu̍a̍ā so̍vɛ̄i̍ya̍a̍ ndūa̍a̍ chōo̍ yɛ̍, le̍nde̍ ya̍ I̍ wa̍ nda̍ tɛ̄ɛ̄ŋ ni̍. I̍ wa̍ māwāā nda̍ tɛ̄ɛ̄ŋ mɛ̄ɛ̍ wāna̍ nyɔ̍ɔ̍lū ho̍ō wāŋnda̍ kɔ̄lta̍ŋ a̍ te̍le̍ŋ nyɛ̄ pālāa̍ wo̍ ō chō nu̍a̍ā yɛ̍.