Read Southern Kisi Cho̍o̍bū 30 Bible Online

Cho̍o̍bū 30 - Southern Kisi bible

Cho̍o̍bū 30

¹Kɛ̍ su̍ŋ su̍ŋ ni᷅ŋ, wānāā na̍a̍ ŋ̄ sūla᷅ŋ bɛ̍ɛ̍ le̍ wa̍ nda̍ cho̍ ni᷅ŋ hāū ya̍ māmɔ̄ɔ̍ ni̍. Wānāā fi̍nyāā ndāa̍ wānu̍ŋ fo̍ndō fu̍u̍, ya̍ i̍i̍ chɛ᷅l nda̍ bɛ̍ɛ̍ mī nda̍ a̍a̍ to̍sa̍ wa̍llo̍ nda̍ tūŋāā nīāā ma̍ndāā lāsāa̍ le̍ wa̍ nda̍ si̍i̍ŋgu̍u̍ ya̍ ni᷅ŋ nyɛ̄ māmāā ni̍.

²Wāŋnda̍ ha̍ā nda̍ a̍a̍ nɔ̍ ma̍yo̍o̍mū o̍ māyōōmū le̍ ya̍ wa̍li̍ to̍sa̍l te̍. Ndu̍yɛ̍ nda̍ a̍a̍ yɔ̍ŋ bɛ̍ɛ̍ mī nda̍ a̍a̍ wa̍ wānāā tōsāl la̍ wa̍li̍, tɔ̄nɔ̄ o̍ tɔ̄nɔ̄ ya̍ i̍i̍ sɔ̍lā o̍ nda̍ ni᷄ŋ te̍.

³Ā wa̍ ā tāmbɛ̍i̍, ndu̍yɛ̍ yīa̍a̍ŋ ma̍a̍ chi̍i̍ nda̍ ni᷅ŋ sɔ̄ɔ̄sīāā kpo̍u̍. Pūūndu̍ŋ vēsɛ̍i̍ wa̍ o̍ po̍llo̍ ni᷄ŋ ndo̍ŋ, mu̍ŋ nda̍ a̍a̍ kēī chɔ̍ɔ̍vīāā i̍chɔ᷅l ni̍ mā sūām.

⁴Yɔ̄mīī wu᷅l o̍ po̍llo̍ ni᷄ŋ nde̍ pēi̍ ndūɛ̍i̍ nda̍ a̍a̍ ke̍e̍ndūū ni̍ mā dīā. Yɔ̄m bu̍lɔ̄m ndo̍, pūūndu̍ŋ ndɔ̄ɔ̍ŋ ye̍e̍la̍ bɛ̍ɛ̍ le̍ wo̍ŋ, mu̍ŋ wa̍ nyɛ̄ ndā di̍a̍a̍ ni̍.

⁵Wāŋnda̍ nda̍ a̍a̍ chɛ᷅l nda̍ bɛ̍ɛ̍ mā cha᷄l nda̍ tɛ̄ɛ̄ŋ te̍. Tē nda̍ a̍a̍ che᷅ nda̍ pɛ̍, mɛ̄ɛ̍ nda̍ yāā nu̍a̍ā vīīnɔ̄ɔ̍ yɛ̍, le̍nde̍ nda̍ a̍a̍ ya̍ā nda̍ ni̍, mā tōū nda̍.

⁶Kpōlōŋ kpo̍lōnda̍ŋ lēni᷄ŋ nda̍ a̍a̍ lɔ᷅l ni̍. O̍ so̍o̍ŋnda̍ŋ ni᷄ŋ lɛ᷅ŋ a̍ o̍ būūlūla̍ cho̍ o̍ pōūta̍ŋ tɛ̄ɛ̄ŋ nda̍ŋ lēni᷄ŋ nda̍ a̍a̍ ku̍ā lu̍a̍a̍ŋ ni̍.

⁷Mɛ̄ɛ̍ vīsīa̍a̍ chāŋ nu̍a̍ā yōndōlā bɛ̄ndūla̍ŋ ni᷄ŋ yɛ̍, le̍nde̍ nda̍ a̍a̍ cha᷅ŋ yo̍ndōla̍ŋ ni᷄ŋ ni̍. Mā dīīnu᷄ŋ ku̍ndāla̍ŋ o̍ bɔ̄ɔ̄la̍ŋ bɛ̄ŋgu̍.

⁸Wānāā fo̍ndūa̍a̍ fu̍u̍ wāŋnda̍ ha̍ā ā wa̍ ni̍. Wāŋnda̍ nda̍ a̍a̍ si̍nā bɛ̍ɛ̍ a̍ nda̍ o̍kɔ̄ɔ̄ le̍. Nda̍ kpo̍u̍ ma̍ tūāū nda̍ ma̍ sōlī nda̍ o̍ lɛ̄ŋnde̍ŋ nde᷅ŋ ni᷄ŋ.

⁹Wānāā kāŋ chūāā ndāa̍ ā sīmūl la̍ ni᷅ŋ nu̍a̍ā ni̍, mā kēlā a̍ ya̍ o̍ lāsōndō māā chōndu̍. Nda̍ si̍i̍ŋgūū ya̍ ni᷅ŋ ha̍ū nyɛ̍ māmāā ni̍.

¹⁰Ā bīī ma̍ kīālu᷄ŋ ya̍ yīī, ā ye̍e̍mā lɛ̍ bɛ̍ɛ̍ mā chē ya̍ le̍. Ā chi̍ lɛ̍ ya̍ bɛ̍ɛ̍ māā hɔ̍ɔ̍ le̍ ya̍ I̍ cho̍ le̍. Ya̍ o̍ hɔ̄l kpe̍e̍kpe̍i̍ nda̍ hūŋ ni᷅ŋ lɔ̄lūa̍ŋ tūfɔ̄ɔ̍ ni̍, le̍ ya̍ bɛ̄ɛ̄la̍ŋ tɛ̄ɛ̄mbūūwo̍.

¹¹Le̍ mɛ̄ɛ̍ Mɛ̄lɛ̄ka̍ sōli̍ ya̍ yōōmūa̍ŋ I̍ nɔ̍lā lɛ̍ mī ma̍la̍ ya̍ pi̍la̍ le̍ yɛ̍, nyɛ̄ kōŋ nda̍ hu᷄ŋ si̍mūl la̍ ni̍, mā tōsā nyɛ̍ nda̍ yēēmā le̍ tōsāa̍ a̍ ya̍ wo̍.

¹²Ā bīī ma̍ yīīna᷅ŋ ku̍ndāa̍ be̍le̍ŋ, ma̍ hu᷄ŋ chi᷅ŋa̍la̍ŋ ya̍, ma̍ tōsā mi̍ nya̍a̍nu᷄ŋ. Nda̍ kpo̍u̍ ma̍ kōōndi̍āŋ ma̍ hu᷄ŋ ba̍lū ya̍ kpɔ̍kɔ̍su̍ ma̍ sīmūl la̍.

¹³Ā sɔ̄ɔ̄ŋgu̍u̍ ma̍ kīālū ya̍ nɛ̄īyo̍ lāchī, I̍ nɔ̍ lɛ̍ mɛ̄ɛ̍ mɛ̄ɛ̍ ya̍ I̍ hi̍a̍lūŋ te̍. Ā chō kīndī kīndīo̍o̍ kpe̍e̍kpe̍i̍ le̍ ya̍ tɛ̄ɛ̄mbūūwo̍. Ndu̍yɛ̍ wānā o̍ wānā cho̍ mbō kpāa̍ nda̍ le̍.

¹⁴Mɛ̄ɛ̍ so̍vɛ̄i̍ya̍ pīāl nu̍a̍ā sāāsa̍ ba̍lu̍ chi̍e̍e̍ ya̍a̍mɔ̍ɔ̍wa̍a̍ ndāa̍ wo̍ mā chīŋa̍la᷅ŋ nda̍ yɛ̍, le̍nde̍ nda̍ hu᷄ŋ chīŋa̍la᷅ŋ ya̍ ni̍.

¹⁵Sīōōŋīī bɛ̄ndūe̍i̍ bīī ya̍. Bɛ̄ɛ̄le̍ nīle̍ŋ lē chūū lē kūɛ̄nu᷄ŋ mɛ̄ɛ̍ hūēīye̍ ī kūānūŋ nu̍a̍ā a̍ nyɔ̄ɔ̍ yɛ̍. Ndu̍yɛ̍ dɛ̍nɛ̍ nī kɛ̍ndɔ̄ɔ̍ ō hīōūnu᷄ŋ, mɛ̄ɛ̍ yu̍mbu̍ yu̍mbo̍o̍ ō hīāūnūŋ yɛ̍.

¹⁶I̍ si̍nā ni᷅ŋ māā yōōmū nūu̍ fūūlu̍u̍ o̍ mɛ̄ɛ̄lu̍la̍ŋ. Nyɛ̄ nɛ̄īyāa̍ cho̍ ya̍ chōo̍ wo̍ ō nɔ̍ pɛ̍ŋgī o̍ pɛ̄ŋgī le̍, hīōūwɔ̄ɔ̍ lāchī tu̍ŋ.

¹⁷Īchɔ̄l pi̍i̍ pi̍i̍ pāāla̍ŋ lā chō ya̍ nyūmu̍llo̍ lēni᷄ŋ. Nyɛ̄ nɛ̄īyāa̍ cho̍ ya̍ o̍ ŋ̄dīāllo̍ ō nɔ̍ pɛ̍ŋgī le̍.

¹⁸Mɛ̄lɛ̄ka̍ sāa̍ ya̍ mbo̍ sīmbū ya̍ dōmāa̍ o̍ lābo̍lō. Ō sāa̍ ya̍ mbo̍ tūī tūī ya̍ nyɛ̄la̍ŋ lēkɔ̄ɔ̍.

¹⁹Mbo̍ vīɔ̄l la̍ lɛ̄ŋ o̍ lōōlīo̍o̍ ni᷄ŋ. I̍ cho̍ŋnu̍ŋ ni᷅ŋ fo̍ndō fu̍u̍ mɛ̄ɛ̍ chu̍ndo̍o̍ ō chō nu̍a̍ā yɛ̍, mɛ̄ɛ̍ pūlta̍ŋ lā chō nu̍a̍ā yɛ̍.

²⁰O̍o̍ Mɛ̄lɛ̄ka̍ nūu̍, I̍ cho̍ cha᷄ŋndo̍ nāa̍ nūm chu̍a̍, kɛ̍ a̍ mu̍lī ya̍ dīōm te̍? I̍ si̍m nu̍m o̍ hɔ̄l mi̍ wa᷅ nu̍m pīɛ̄īyo̍, kɛ̍ a̍ ye᷅ŋ ya̍ lānī le̍?

²¹Mɛ̄lɛ̄ka̍, a̍ si̍i̍ŋgu̍u̍ ya̍ wānā tu̍sīāā nyɛ̄ pālāā chōo̍. A̍ si̍mu̍l la̍ a̍ kpāāyā nu̍m bɛ̄ndōo̍ ma̍ tūsī ya̍ nyɛ̄ pālāa̍ chōo̍.

²²A̍ chu̍a̍ ya̍ māchūāā ma̍ vīāū ya̍ mɛ̄ɛ̍ hūēīye̍ chūā nu̍a̍ā nyɔ̄ɔ̍ mī ī kūɛ̄nu᷄ŋ a̍ ndu̍ yɛ̍. Mɛ̄ɛ̍ hūēīyīī bɛ̄ndūe̍i̍ ī chūā nu̍a̍ā nyɔ̄ɔ̍ mī ī wa̍ hīŋnɔ᷄ŋndo̍ a̍ ndu̍ yɛ̍, le̍nde̍ ŋ̄ chō ya̍ hīŋndo̍ ni̍.

²³I̍ si̍nā māā ā chō ni᷅ŋ hūnɔ̄ɔ̍ kɔ̄la̍ŋ a̍ ya̍ o̍ wāŋ vīlɛ̍i̍ya̍ lo̍ chi̍e̍e̍, nāa̍ wānā o̍ wānā nɔ̍ le̍ kɔ̄la̍ŋ nda̍.

²⁴Wāna̍ cho̍ ho̍ō o̍ nyɛ̄ pālāā bɛ̄ndōo̍ ni᷄ŋ, mbo̍ wā cha᷄ŋndo̍ le̍ wāna̍ ma̍lā ndu̍ wo̍, wānā o̍ wānā bi̍ī lɛ̍ kɔ̄llo̍ mbō yɔ᷄ŋ wānā wa̍ā le̍nde̍ nyɛ᷅ le̍.

²⁵Ya̍ Cho̍o̍bū, tē ya̍ i̍i̍ che᷅ wāŋndo̍ o̍ sāŋgāa̍ ni᷄ŋ pɛ̍, cha᷄ŋndo̍ le̍ ya̍ i̍i̍ cha᷅ŋ le̍ ndu̍ le̍? Tē ya̍ i̍i̍ che᷅ wānāā tāmbɛ̍i̍ya̍ pɛ̍, nyīɛ̍ɛ̍ye̍ le̍ ndi̍ i̍i̍ bi̍ī ya̍ le̍ nda̍ le̍?

²⁶I̍ wa̍ yīya᷄ŋndo̍ māā dɛ̍nɛ̍ kɛ̍ndɔ̄ɔ̍ chō ya̍ lāchī, kɛ̍ mɛ̄ɛ̄māā dɛ̍nɛ̍ pa̍lāa̍ cha᷄l la̍ chūm. I̍ wa̍ lē hɔ̄l o̍ nɛ̄ī le̍ kɔ̄l kɛ̄ndɔ̄ɔ̍ sɔ̄lāa̍, mi̍ kɔ̄l tāmbɛ̍i̍yo̍ mīīŋgū ya̍ kōmāl.

²⁷Kɔ̄l nūu̍ chō o̍ sāŋgāa̍ ni̍ŋ bɔ̍ɔ̍. I̍ nɔ̍ lɛ̍ kɔ̄l hīnīāā o̍ kɔ̄l hīnīāā le̍. Pālɛ̍i̍ nyɛ̄ pālɛ̄ī bɛ̄ndūe̍i̍ ī kōma̍l la̍ o̍ yōōmū nūu̍ ni᷄ŋ.

²⁸Kɔ̄l nūu̍ tāmbu̍ ō bɔ̄ɔ̍. Ndu̍yɛ̍ I̍ nɔ̍ wa̍nā o̍ wāna̍ nyɔ̍ɔ̍lū ya̍ kɔ̄llo̍ le̍. I̍ kɔ̍ bɛ̍ɛ̍ nāa̍ wāŋnda̍ chūūŋgi̍āŋ nda̍ mī nyu̍na̍ nda̍ le̍ mālāa̍, wānā o̍ wānā ye᷅ŋ ya̍ lānī le̍.

²⁹Mɛ̄ɛ̍ vīsīa̍a̍, ɔ̄ɔ̄ yōūwāā bɛ̄ndūa̍a̍ ā chāŋ nu̍a̍ā yōndōlā bɛ̄ndūla̍ŋ ni᷄ŋ yo̍lo̍lɛ̄ yɛ̍, le̍nde̍ ya̍ I̍ cho̍ cha᷄ŋ kɔ̄l tāmbɛ̍i̍yo̍ ni̍.

³⁰Kɔ̄ɔ̍le̍ŋ lē pīīmi̍a̍a̍ ya̍ mi̍ le̍ yūūnda᷄ŋ yu̍le̍e̍. Dīāllo̍ŋ ya̍ ŋ̄ ŋūālɛ̍i̍ chi̍, a̍ nyɛ̄ nɛ̄īyāa̍ cho̍ ya̍ o̍ ŋ̄dīāllo̍.

³¹Chōndu̍ŋ kɔ̄l kɛ̄ndɛ̄ŋ ya̍ i̍i̍ so̍lī pāāndū wo̍ŋ, ŋ̄ sīmnu᷄ŋ ni᷅ŋ chōndu̍ŋ bīīsi̍.