Read Southern Kisi Cho̍o̍bū 31 Bible Online

Cho̍o̍bū 31 - Southern Kisi bible

Cho̍o̍bū 31

¹Ya̍ Cho̍o̍bū, ō cho̍ wɔ̍ su̍u̍ndāa̍ na̍a̍ wānā la̍nɔ̍ che᷅le̍ŋ te̍, kɛ̍ mi̍ me̍na᷄ŋ po̍, māā fɛ̍ɛ̍ŋ a̍ fɛ̍ɛ̍ŋ bɛ̍ɛ̍ I̍ to̍fā chu̍ā lāāndōo̍ mī lo̍ o̍ ko̍ŋ mī de̍l kɔ̄l le̍ hīni̍la̍ŋ a̍ ndu̍ le̍.

²Kāni̍ fo̍ndōle̍, wānāa̍ to̍sā sɔ̍ɔ̍ŋ wa̍ā le̍nde̍ wa̍. Mɛ̄lɛ̄ka̍ cho̍ chōo̍ cho̍o̍ wo̍ I̍ si̍nā mɛ̄ɛ̍ o̍ bi̍ī wa̍nāā wāā le̍nde̍ yɛ̍. I̍ si̍nā nyɛ᷅ Mɛ̄lɛ̄ka̍ kpu̍lu̍ŋgūma̍ Bɛ̄ndōo̍ ō tōsā a̍ nda̍ wo̍.

³Wānā o̍ wāna̍ to̍sa̍ dɛ̍nɛ̍ wɔ̍ɔ̍ŋndo̍, nyɛ̄ pālāa̍ Mɛ̄lɛ̄ka̍ hāndū nda̍ chōo̍ ni̍ mbō tɛ̄ɛ̄mbu̍u̍ nda̍.

⁴Kɛ̍ ya̍ Cho̍o̍bū, Mɛ̄lɛ̄ka̍ chō chɔ̄ɔ̍ kēlālā nīla̍ŋ kpo̍u̍. Nɛ̄ī o̍ nɛ̄ī ya̍ I̍ nɛ̍i̍ pɛ̍, ō chō chɔ̄ɔ̍.

⁵I̍ si̍nā māā pāa̍le̍ cho̍ lē pīlɛ̍ mī I̍ to̍sa̍l wa̍nā dɛ̍nɛ̍ wɔ̍ɔ̍ŋ te̍. Pāa̍le̍ŋ lē pi᷅lɛ̍ bɛ̍ɛ̍ I̍ hu̍i̍i̍ wa̍nā le̍.

⁶Le̍la̍ŋ I̍ ye̍e̍ma̍ mī Mɛ̄lɛ̄ka̍ kɔ̄ɔ̄sa̍ a̍ ya̍ o̍ nɛ̄ī sa̍kpōo̍ chōo̍, mbō sīna̍ wa̍la̍ŋ māā I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍.

⁷Ya̍ Cho̍o̍bū tē I̍ fa̍a̍ŋ o̍ nɛ̄i̍ tōnya̍a̍ chōo̍ pɛ̍, ɔ̄ɔ̄ mī lu̍ɛ̍ī lēhɔ̄l o̍ nyɛ̄ o̍ nyɛ̄, o̍ fa̍ŋā ya̍ o̍ nɛ̄i̍ tōnya̍a̍ chōo̍ wo̍, ɔ̄ɔ̄ mī bālā nīla̍ wa̍ o̍ yɔ̄ŋ wɔ̄ɔ̍ŋ ni᷄ŋ,

⁸Mɛ̄ɛ̍ I̍ di̍ā tɔ̄lɔ̄ɔ̄lā nīla̍ŋ tɔ̄nɔ̄ le̍. Nyɛ̄ o̍ nyɛ̄ ya̍ I̍ to̍sa̍ o̍ chīɛ̄ī nīi̍ ni᷄ŋ, wānāā chēle̍ŋnda̍ di̍ā ndu̍ tɔ̄nɔ̄ ni̍.

⁹Ya̍ Cho̍o̍bū, mī lu̍ɛ̍ī la̍nɔ̍ɔ̍ chāa̍ŋ nī le̍hɔ᷅l, mī cha̍l chāa̍ŋ nī ko̍ŋ mɛ̄ŋgɛ̄lāa̍ le̍ tē ndu̍ fa̍ŋa̍ŋ ndɔ̍ɔ̍ pɛ̍, ya̍ I̍ kɔ̍ lu̍ɛ̍ī o̍ ndu̍ lo̍ chi̍ɛ̍ī ni̍ŋ a̍ la̍a̍ ndɔ̄ tē I̍ to̍sa̍ ko̍ŋ pɛ̍,

¹⁰ya̍ bɛ̍ɛ̍ wānā pɔ̍nɔ̍ che᷅le̍ŋ ō pūu̍ ya̍ la̍a̍ nūu̍ o̍ bā. Wānā pɔ̍nɔ̍ che᷅le̍ŋ hīni̍ a̍ la̍a̍ nūu̍.

¹¹Wānā o̍ wāna̍ to̍sa̍ ī wāā le̍nde̍ pɛ̍, yɔ̄ŋ wɔ̄ɔ̍ŋ bɛ̍ndōo̍ pīla̍ o̍ to̍sā ko̍ŋ ni̍. Wānā wa̍ā le̍nde̍ wānāa̍ kɔ̍ɔ̍sā a̍ wāŋnda̍ wa̍ ā nɔ̄ mā tūsi̍ ndu̍ nyɛ̄ pālāa̍ chōo̍.

¹²Sūūndāa̍ na̍a̍ wānā la̍nɔ̍ na̍a̍ ŋ̄ cyo̍ o̍ nɔ̄ ni̍ŋ te̍ wo̍, I̍ che᷅ ndi̍ māchāā mɛ̄ɛ̍ chīɛ̄ī nūu̍ sāā nu̍a̍ā o̍ yīŋ, ya̍ ni̍, a̍ nyɛ̄m nūu̍ŋ kpo̍u̍ mī ŋ̄ ŋūɛ̄, yɛ̍.

¹³Bu̍ɛ̍i̍ya̍a̍ wa̍ ya̍ o̍ bā ki̍nɛ̍i̍ ya̍, ā pīāāndūa̍a̍ ni̍, ā lāāndūa̍a̍ ni̍, tē ō pīlɛ̍ ndu̍ o̍o̍ ŋɔ̍ɔ̍cha̍ŋ a̍ ya̍ pɛ̍ māā I̍ cho̍ ndu̍ chāā bīyɔ̄ɔ̄ le̍, mɛ̄ɛ̍ mī ya̍ i̍i̍ chāa̍ ndu̍ bīyɔ̄ɔ̄ ni̍.

¹⁴Tē ya̍ i̍i̍ kɛ̍ɛ̍ nda̍ chāā bīyɔ̄ɔ̄ pɛ̍, mī Mɛ̄lɛ̄ka̍ ndu̍ o̍o̍ hu̍ŋ kɔ̍ɔ̍sā fɛ̍lɛ̍ŋ a̍ ya̍, vɛ̄ɛ̍nɛ̍ ya̍ I̍ wa̍ yɛ̍ ndu̍ dīmūl? Tē ndu̍ o̍o̍ hu̍ŋ nyu̍nā ya̍ fɛ̍ɛ̍ŋ a̍ nda̍ o̍kɔ̄ɔ̄ pɛ̍, vɛ̄ɛ̍nɛ̍ ya̍ I̍ wa̍ yɛ̄ ndu̍ dīōm mūlī?

¹⁵Bu̍ɛ̍i̍yāā nīāā ka̍ŋ bɛ̍ɛ̍ŋ Mɛ̄lɛ̄ka̍ to̍o̍si̍a̍a̍ nda̍ ni̍, mɛ̄ɛ̍ o̍ to̍o̍si̍a̍a̍ ya̍ yɛ̍. Mɛ̄lɛ̄ka̍ pīlɔ̍ɔ̍ kpe̍ to̍o̍si̍a̍a̍ na̍a̍ vēllāa̍ vēllē ni̍.

¹⁶Ya̍ Cho̍o̍bū, pāa̍le̍ ve̍ le̍ pi᷅lɛ̍, mī wānā ta̍mbɛ̍i̍yo̍ yēēma̍ ya̍ nyɛ̄ o̍ bā mī kɛ̍ɛ̍ ndu̍ kē le̍. Pāa̍le̍ ve̍ le̍ pi᷅lɛ̍ mī wānāā pīāāndāā ndāa̍ ā vī wa̍ ō pīlɛ̍ kōma̍l la̍ le̍ mālāa̍, mī ma̍l ndu̍ bālā fo̍ndō le̍.

¹⁷Kɛ̄lɛ̄ŋgāā ni᷅ŋ te̍, mī ya̍ i̍i̍ wa̍ nyɛ̄ dīa̍a̍ dīo̍o̍, mī vīi̍ya̍a̍ nɔ̍ lɛ̍ ŋ̄fi̍nyā le̍ wa̍ ā wa̍ ya̍ īkɛ̄i̍ a̍ yīa̍a̍ŋ.

¹⁸Kāni̍ ya̍ I̍ chɛ̍ŋ, ya̍ wa̍ fi̍nyāa̍ le̍ vīi̍ya̍a̍ ni̍, ā wāŋ lāāndūāā nda̍ a̍a̍ nɔ̍ lɛ̍ ŋ̄pīāāndū le̍ wa̍.

¹⁹Tē ya̍ i̍i̍ che᷅ wānā ta̍mbɛ̍i̍yo̍ pɛ̍, mī fɛ̍li̍o̍o̍ ndu̍ o̍o̍ bi̍ī ndu̍ bīyɔ̄ɔ̄ bɛ̄ndōo̍, nyɛ̄lā nda̍ tōōsīāā a̍ yīīŋīī sāa̍ nīa̍a̍, wānā wo̍u̍nu̍ŋ pɛ̍ hāŋgu̍llo̍ he᷄l nu̍m nyɛ̄ kɛ̄ndɛ̄ kɛ̍ndɛ̄la̍ŋ, la̍ŋ ya̍ i̍i̍ ke᷅ ndu̍ ni̍, mbō me᷄l la̍ ba̍li̍ka̍a̍.

²¹Ya̍ Cho̍o̍bū, mi̍ chē bɛ̍ɛ̍ wānāā nda̍ a̍a̍ kɔ̍ɔ̍sā a̍ wāŋnda̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ nda̍ ā wa̍ ya̍ kɔ̄ɔ̄lī o̍ īsɔ̄ɔ̍ o̍ īsɔ̄ɔ̍ ni᷄ŋ, wāna̍ a̍a̍ kɔ̍ bɛ̍ɛ̍ a̍ sūɛ̍i̍ nī lo̍ŋ, a̍ sɔ̍lā ya̍ di̍ le̍, kɛ̍ pāa̍le̍ cho̍ lēpīlɛ̍, I̍ to̍sa̍l vi̍i̍yo̍ dɛ̍nɛ̍ wɔ̍ɔ̍ŋ mī bi̍ī ndu̍ bīyɔ̄ɔ̄ wɔ̄ɔ̍ŋ te̍.

²²Tē I̍ to̍sā ke̍ŋ a̍ wa̍nā o̍ wānā pɛ̍, bāla̍ŋ lā yōmi̍ ya̍ mī lā fāŋa̍ŋ ya̍ o̍ kēēnda᷅ŋnda̍ŋ.

²³Ya̍ i̍i̍ to̍sā ke̍ŋ te̍. Kāni̍ fo̍ndōle̍, sīōōŋnde̍ wa̍ ya̍ māā tē I̍ to̍sa̍ ke̍ŋ pɛ̍, Mɛ̄lɛ̄ka̍ tūsi̍ ya̍ nyɛ̄ pālāa̍ chōo̍.

²⁴Mi̍ chē bɛ̍ɛ̍ mi̍ ya̍ i̍i̍ su᷅l sūllo̍ pīla̍, kɛ̍ ya̍ i̍i̍ do̍u̍ ti̍i̍nda᷄ŋ o̍ sūl kōŋ ni᷄ŋ te̍.

²⁵Ya̍ i̍i̍ nɔ̍ nyɔ̄ɔ̍ŋ ta̍u̍ ta̍u̍, kɛ̍ ō cho̍ mu̍ŋ te̍ ya̍ i̍i̍ ti̍i̍nda̍ŋ le̍ ya̍ kɔ̄l nyūlū kē le̍.

²⁶Mi̍ chē bɛ̍ɛ̍ pāa̍le̍ dīōndɔ̄ɔ̍ pīla̍ le̍ de̍ndū ni̍, kɛ̍ pāa̍le̍ cho̍ lē pīlɛ̍ I̍ de̍l kɔ̍l le̍ le̍ŋ sōōlu̍u̍ le̍. Pāŋge̍i̍ nāŋɔ̄ɔ̍ pīla̍ i̍ na̍ŋ ni̍, kɛ̍ I̍ si̍m mī so̍o̍o̍lu̍u̍ ndi̍ le̍.

²⁷A̍ nāŋɔ̄ɔ̄ nyɔ̄ɔ̍ŋ mu᷅ŋ ŋ̄ na᷄ŋ ndo̍ kpo̍u̍, ŋ̄ nɔ̄la̍ mī ŋ̄ fāŋa̍ ya̍ kɔ̄llo̍ o̍ Mɛ̄lɛ̄ka̍ lo̍, mī tu̍ndu᷄ŋ mu̍ŋ sōōlūū sɔ̍ɔ̍ sɔ̍ɔ̍ le̍. Pāa̍le̍ cho̍ lē pīlɛ̍, I̍ tu̍ndu̍ŋ mī so̍o̍lu̍u̍ nyɔ̄ɔ̍ mu᷅ŋ ō pīlɛ̍ bɛ̍ɛ̍ le̍.

²⁸Kāni̍ fo̍ndōle̍, I̍ si̍nā māā yɔ̄ŋ wɔ̄ɔ̍ŋndo̍ ke̍ŋ cho̍ a̍ Mɛ̄lɛ̄ka̍ ni̍. Tē ya̍ i̍i̍ to̍sa̍ ke̍ŋ pɛ̍, mɛ̄ɛ̍ kīɔ̍ɔ̍ ya̍ i̍i̍ kɛ̍ɛ̄ ko̍ŋ Mɛ̍lɛ̄ka̍ ni̍. Ndu̍yɛ̍ yɔ̄ŋ wɔ̄ɔ̍ŋ wāā le̍nde̍, wānāa̍ kɔ̍ɔ̍sā a̍ wāŋnda̍ wa̍ ā nɔ̄ mā tūsi̍ wāna̍ nyɛ̄ pālāa̍ chōo̍ le̍ ndu̍.

²⁹Wānāā nda̍ a̍a̍ tu̍l la̍ yɛ̄le̍ŋ nda̍, ya̍ i̍i̍ chɔ̍ bɛ̍ɛ̍ mī nyɛ̄ pālāa̍ ndu̍ o̍o̍ to᷅l nda̍ chōo̍, ya̍ i̍i̍ do̍o̍nūŋ nya̍a̍le̍ le̍ la̍ŋ te̍. Ya̍ i̍i̍ chɔ̍ bɛ̍ɛ̍ mī sāŋgāa̍ ndu̍ o̍o̍ to᷅l nda̍ cho̍o̍, ya̍ i̍i̍ me᷅m nda̍ le̍.

³⁰Ndu̍yɛ̍ ya̍ i̍i̍ pi̍ɛ̍ī Mɛ̄lɛ̄ka̍ le̍ mbō tūsi̍ nda̍ nyɛ̄ pālāā chōo̍ le̍, kāni̍ fo̍ndōle̍, tē ya̍ i̍i̍ to̍sa̍ ke̍ŋ pɛ̍, mɛ̄ɛ̍ ya̍ i̍i̍ to̍sa̍ yɔ̄ŋ wɔ̄ɔ̍ŋndo̍.

³¹Wānāa̍ wa̍ ya̍ o̍ bā chīɛ̄ī ni̍ŋ nda̍ bɛ̍ɛ̍ ā sīnā, māā wānā o̍ wāna̍ ndu̍ o̍o̍ kɔ̍ o̍ ya̍ lo̍ chi̍ɛ̍ī ni̍ŋ, mɛ̄ɛ̍ mī ndu̍ o̍o̍ de᷅ nyɛ̄ dīa̍a̍ mbō hīni̍ kɔ̄l.

³²Le̍ te̍le̍ŋ o̍ te̍le̍ŋ, chīɛ̄ī nūu̍ wa̍ ō kūmbīāā le̍ wānāā kēlāa̍. Ya̍ i̍i̍ nu̍ē mi̍āllo̍ mī ndu̍ o̍o̍ lɔ̍l o̍ bɛ̄ɛ̄le̍.

³³Tē ya̍ i̍i̍ to̍sa̍ yɔ̄ŋ wɔ̄ɔ̍ŋndo̍ pɛ̍, chɔ̄ɔ̄mūūwo̍ ya̍ i̍i̍ chɔ̍ɔ̍mūū ndu̍ ni̍. Ya̍ i̍i̍ vi᷅ŋ yɔ᷅ŋ wɔ̄ɔ̍ŋndo̍ mɛ̄ɛ̍ ya̍ I̍ cha᷅ wa᷅ŋnda̍ ā pūm yɔ̄ŋ wɔ̄ɔ̍ŋndo̍ vīōŋɔ̄ɔ̍ yɛ̍ le̍.

³⁴Ya̍ i̍i̍ me̍ī mī ya̍ i̍i̍ kɛ̍ɛ̍ yɔ̄ŋ nī wɔ̍ɔ̍ŋndo̍ chɔ̄ɔ̄mūū le̍ sōndōlā wāŋndā chīe̍e̍ya̍ le̍. Sīōōŋīī ndi̍ i̍i̍ bi̍ī ya̍ mī ve̍ŋnu᷄ŋ chi̍ɛ̍ī ni̍ŋ māā tē I̍ fu̍la̍ o̍ bɛ̍ɛ̄ pɛ̍ wāŋnda̍ chō ya̍ chɔ̄ mā pɛ̄ɛ̄sa̍ ya̍ le̍.

³⁵A̍a̍a̍, mī ya̍ i̍i̍ sɔ̄la̍ wānāa̍ ya᷅ŋ ya̍ nīla̍ŋ nda̍. I̍ ye̍e̍ma̍ mī Mɛ̄lɛ̄ka̍ kpu̍lu̍ŋgūma̍ Bɛ̄ndōo̍ ō tūēī nyɛ̄ ya̍ I̍ cho̍ dīmīo̍o̍ wo̍ mbō mūli̍ ya̍ dīōm. I̍ si̍nā māā nyɛ̄ o̍ nyɛ̄ ya̍ I̍ cho̍ dīmīo̍o̍ tōnyā o̍ cho̍ ni̍. Sɔ̄ɔ̍ŋ o̍ cho̍ ya̍ mu᷅ŋ hāndɔ̄ɔ̍ chōo̍ ki̍nɛ̍i̍ yo̍ŋ, ya̍ i̍i̍ ye̍e̍ma̍ bɔ̄ɔ̍ mī ndu̍ o̍o̍ po̍o̍nyi̍a̍a̍ mu̍ŋ o̍ yāu̍ cho̍o̍.

³⁶Tē ya̍ i̍i̍ sɔ̍la̍ yāu̍ wa̍ā le̍nde̍ pɛ̍, I̍ wa̍ ndu̍ chūā mī ya̍ i̍i̍ ho̍lnu̍ŋ ndu̍ o̍ chōŋgu̍ le̍ mī wānā o̍ wānā che᷅. I̍ wa̍ ndu̍ hāndɔ᷄ŋ o̍ lēbōl māā mɔ̍si̍l, mī ya̍ i̍i̍ ba̍lu̍ a̍ ndu̍.

³⁷Nyɛ̄ o̍ nyɛ̄ ya̍ I̍ to̍sa̍ o̍ yōōmū nūu̍ ni᷄ŋ, I̍ wa̍ īsīsi̍ Mɛ̍lɛ̄ka̍ o̍ hɔ̄l de̍ŋ mī ya̍ i̍i̍ chɔ̍m ndu̍ kpo̍u̍. Ndu̍yɛ̍ sīōōŋīī bɛ̍ɛ̍ ve̍ ya̍ wā le̍ ndu̍ si᷄mnda̍ŋ o̍ hɔ̄l te̍.

³⁸Ya̍ Cho̍o̍bū, chīɛ̄ī ya̍ I̍ nɔ̍ he̍ī ye̍, tē ō wa̍ hīɔ̄lɔ̄ɔ̄ pɛ̍ ya̍ I̍ hɛ̍lū ndi̍ a̍ lēdīɔ̄ɔ̄mū, mī pu̍u̍ ndi̍ wānā o̍ wānā o̍ bā,

³⁹mī ya̍ I̍ di̍ā tɔ̍lɔ̄ɔ̄lā lāŋ mī wānāā ŋ̄ chīɛ̄ī wa̍ nda̍ bīī mɔ̍nɛ̍i̍ a̍ yīa̍a̍ŋ,

⁴⁰tē I̍ wa̍a̍ wi̍tīi̍yo̍ŋ o̍ chīɛ̄ī kēŋ ni᷄ŋ pɛ̍, wi̍tīi̍ŋ mu̍ŋ sīmnu̍ŋ bi᷅l ŋ̄ yɔ̄ɔ̍. Tē I̍ wa̍a̍ ba̍a̍līi̍yo̍ŋ lo̍ŋ pɛ̍, bīl chēle̍ŋ wu̍l ni̍. O̍ ko̍ŋ, mi̍ Cho̍o̍bū mɛ̍ɛ̍lū a̍ sūɛ̍i̍.