Read Southern Kisi Cho̍o̍bū 32 Bible Online

Cho̍o̍bū 32 - Southern Kisi bible

Cho̍o̍bū 32

¹Mɛ̄ɛ̍ Cho̍o̍bū chāāŋāā ndūāā ya̍a̍wa̍ ha̍ā ā chē māā Cho̍o̍bū cho̍ hīōūwɔ̄ɔ̍ lāchī a̍ di̍o̍o̍ kēnɔ᷄ŋndo̍ māā ō tɛ̄ɛ̄mbu̍u̍ i̍sɔ̍ɔ̍ o̍ īsɔ̄ɔ̍ le̍, nda̍ bɛ̍ɛ̍ ā sūu̍ lɛ̍ nyɛ̄ o̍ nyɛ̄ nāa̍ ndu̍ chu̍a̍ le̍.

²Po̍ pi᷅lɛ̍ wa̍ nda̍ īsīsi̍ i̍kɛ̍i̍ dīōla̍ŋ āā Ɛ̄li̍hū, fi̍nyā ndɔ̍ dīōla̍ŋ āā Ba̍lu̍a̍kɛ̄, fūlāa̍ o̍ pūlāle̍ Bu̍u̍sīle̍ŋ chōo̍. Bu̍u̍sī ko̍ŋ yɛ̄ o̍ yu̍ŋgu̍ Lu̍āmndo̍ chōo̍ ndu̍ o̍o̍ fu̍la̍ ni̍. Mi̍ pōo̍ ho̍ō dūāūnu᷄ŋ tu̍mbe̍ a̍ Cho̍o̍bū, kāni̍ fo̍ndōle̍, le̍ mɛ̄ɛ̍ Cho̍o̍bū o̍ wa̍ di̍o̍o̍ kēnɔ᷄ŋndo̍ mbō yāālā Mɛ̍lɛ̄ka̍ yɛ̍.

³O̍ ko̍ŋ kɔ̍ɔ̍lī, mbo̍ dūāūnu᷄ŋ vɛ̍lɛ̄ tu̍mbe̍ a̍ chāāŋāa̍ Cho̍o̍bū wa̍, le̍ mɛ̄ɛ̍ nda̍ nɔ̄la̍ Cho̍o̍bū dīōm mūlī, mā chɔ̄m ndu̍ le̍ sa̍bū nda̍ kīlu̍l ndu̍ yāmɛ̍i̍ māā ō wɔ̍u̍ yɛ̍ le̍ wo̍.

⁴Mi̍ Ɛ̄li̍hū lo᷅ nda̍ chūmndo̍ ma̍ chīī sūɛ̍i̍ kpo̍u̍. Kāni̍ fo̍ndōle̍ ndu̍ wa̍ chūāāmbɔ̄ɔ̍ nda̍ chōo̍ ni̍.

⁵Mɛ̄ɛ̍ Ɛ̄li̍hū che᷅ māā chāāŋāa̍ Cho̍o̍bū wa̍ ha̍ā ā nɔ̍lā lɛ̍ mā mūli̍ Cho̍o̍bū dīōm te̍, mbo̍ dūāūnu᷄ŋ tu̍mbe̍ a̍ nda̍.

⁶Mi̍ Ɛ̄li̍hū di̍mūl nda̍ āā, Chūāāmbɔ̄ɔ̍ ya̍ i̍ cho̍ ni̍, ŋ̄ sūla᷅ŋ na̍a̍ nya̍ā le̍. Nyɛ̄ kōŋ sīōōŋnde̍ bīī ya̍, le̍ mī chɔ̍m nya̍ ō pɔ̄mbɔ̄ ya̍ I̍ si̍nā, a̍ sūɛ̍i̍ wa̍ā nu̍a̍ā o̍kɔ̄ɔ̄ wo̍ ni̍.

⁷Mi̍ yi̍ya᷄ŋ māā nya̍ bɛ̄ndūa̍a̍ nya̍ nɔ̍ ni̍ mī lā sōō. Kāni̍ fo̍ndōle̍, māā bɛ̄ndūa̍a̍ chɔ᷅m wa̍nā sɔ̍ɔ̍ŋ kɔ̄l kālo̍ŋ ni̍.

⁸Kɛ̍ I̍ si̍na̍ ni᷅ŋ māā Mɛ̄lɛ̄ka̍ kpu̍lu̍gūma̍ Bɛ̄ndōo̍, nyi̍nā o̍ ke̍ wāna̍ chi̍o̍o̍ mbo̍ wā ndu̍ kɔ̄ɔ̄lī wo̍, māā ndu̍ ke᷅ wa᷅na̍ chi̍o̍o̍ sīnā pɛ̄ŋgo̍o̍ ni̍.

⁹Kɔ̄l kālu̍ cho̍ le̍ īyu̍wa̍ le̍. Wāŋndo̍ si̍nā su̍ɛ̍i̍ pɛ̄ŋgu̍ le̍ mɛ̄ɛ̍ o̍ cho̍ bɛ̄ndōo̍ yɛ̍ le̍.

¹⁰Le̍la̍ŋ lā ya᷄ŋ ndɔ̍ ya̍ nīla̍ŋ, mī chɔ̍m nya̍ nyɛ̄ ya̍ I̍ si̍nā wo̍.

¹¹Nyɛ̄ kōŋ ya̍ I̍ lo̍ nya̍ chūmndo̍ nu̍a̍ā ni̍ mi̍ lā chīī sūɛ̍i̍ kpo̍u̍. Ndu̍yɛ̍ nyɛ̄ o̍ nyɛ̄ nya̍ sōō na̍nu᷄ŋ, I̍ wa̍ nya̍ nīla̍ŋ yāŋɔ̄ɔ̍. Nyɛ̄ o̍ nyɛ̄ nya̍ wa̍ yīya᷄ŋndo̍ mī lā dīmūl Cho̍o̍bū, I̍ wa̍ tūēīyɔ̄ɔ̍, I̍ cha᷅ ko̍ bɛ̍ɛ̍ a̍a̍ nya̍ a̍a̍ di̍mī ni̍ŋ su̍ɛ̍i̍ kɔ̄l kālu̍.

¹²Nya̍ ki̍nɛ̍i̍ wānā o̍ wānā nɔ̍la̍ mbō mūli̍ Cho̍o̍bū dīōm te̍. I̍ wa̍ nya̍ nīla̍ŋ yāŋɔ̄ɔ̍ ye̍ke̍ŋ o̍ nyɛ̄ nya̍ wa̍ dīmīo̍o̍ wo̍. Wānā o̍ wānā nɔ̍la̍ mbō chɔ̍m Cho̍o̍bū māā nyɛ̄ o̍ di̍mī wo̍ ō cho̍ o̍ nɛ̄ī le̍ le̍.

¹³Le̍la̍ŋ tē lā kēlū yōŋgā pɛ̍ māā lā nɔ̄ kɔ̄l kālo̍o̍, lā kēlu᷄ŋ ndu̍ fu̍u̍. Mɛ̄lɛ̄ka̍ ndu̍ pīlɛ̍ kpe̍ ki̍lūl ni᷅ŋ Cho̍o̍bū yāmɛ̍i̍ ni̍ mbō chɔ̍m ndu̍ wɔ̄ū le̍ ndɔ̄ le̍ŋ, kɛ̍ nya̍ lā būmba̍.

¹⁴Cho̍o̍bū ve̍ i̍sɔ̍ɔ̍ nāa̍ ya̍ chu̍a̍ le̍, nāa̍ nya̍ chūā o̍ wa̍ sūɛ̍i̍ ni̍. Le̍la̍ŋ I̍ wa̍ ndu̍ bɛ̍ɛ̍ di̍ōm mūlī, I̍ mu̍lī ndu̍ dīōm mɛ̄ɛ̍ nya̍ nya̍ mūli̍ ndu̍ nu̍a̍ā dīōm yɛ̍ le̍.

¹⁵Cho̍o̍bū, chāāŋāā nūmnda̍ būmba̍ le̍ nyɛ̄ nda̍ dīmūl nu̍m ndo̍. Ā nɔ̍ lɛ̍ nyɛ̄ o̍ nyɛ̄ nda̍ dīmī le̍.

¹⁶Nāa̍ nda̍ si᷄m ka̍ŋ nda̍ ā nɔ̍ lɛ̍ nyɛ̄ o̍ nyɛ̄ nda̍ sūāā le̍. Kɛ̍ le̍ mɛ̄ɛ̍ nda̍ nda̍ nɔ̍ lɛ̍ nyɛ̄ dīmīāā le̍ yɛ̍, bāā ya̍ I̍ su̍a̍ā lɛ̄ le̍?

¹⁷Sāko̍, ya̍ bɛ̍ɛ̍ I̍ cho̍ īsɔ̄ɔ̍, mī chɔ̍m nu̍m nyɛ̄ ya̍ I̍ si̍nā wo̍.

¹⁸Sɔ̄ɔ̍ŋ chō ya̍ o̍ sōndō ta̍u̍ le̍ dīmīo̍o̍. Ndu̍yɛ̍ sɔ̄ɔ̍ŋ cho̍ ya̍ o̍ kɔ̄l lo̍ŋ, mɛ̄ɛ̍ mī so̍li̍ŋ mu̍ŋ o̍ sōndō, I̍ nɔ̍lā mī kɛ̍si̍ŋ mu̍ŋ o̍ kɔ̄l te̍.

¹⁹Tē I̍ sɔ̍lā fo̍ndāa̍ mī so̍ō, mī ŋ̄ fūla̍ ya̍ o̍ kɔ̄l te̍, I̍ cho̍ pīɔ̄l, mɛ̄ɛ̍ mūɛ̄īya̍ŋ mā kīndūŋ nu̍a̍ā o̍ bɔ̄lɔ̍ māmūɛ̄īyo̍ ni᷄ŋ mī bɔ̄lɔ̄ɔ̍ pīɔ̍l fa̍sū yɛ̍.

²⁰Le̍la̍ŋ mɛ̄ɛ̍ mī so̍ō, ko̍ŋ to̍sā ni̍ mī sɔ̍la̍ fo̍ndā. Nyɛ᷄ cho̍ ya̍ o̍ kɔ̄llo̍ mɛ̄ɛ̍ mī so̍li̍ŋ ndu̍ o̍ sōndō.

²¹Ndu̍yɛ̍ nya̍ ki̍nɛ̍i̍ I̍ cho̍ wānā o̍ wānā la̍si̍si̍ kɔ̍ɔ̍lī le̍, kɛ̄lɛ̄ŋgāā ni᷅ŋ te̍, mī li̍sa̍ bɛ̍ɛ̍ o̍ pi᷅lɛ̍ le̍ īsɔ̄ɔ̍ cha̍ā.

²²Tē I̍ to̍sa̍ ke̍ŋ pɛ̍, dɛ̍nɛ̍ pa̍lāa̍ Mɛ̄lɛ̄ka̍ tūsī ya̍ chōo̍ ni̍, mbō chīi̍ a̍ ya̍. Ndu̍yɛ̍ I̍ si̍nā bɛ̍ɛ̍ pɛ̍ɛ̍ŋ, mɛ̄ɛ̍ nda̍ līsā wa᷅na̍ chi̍o̍o̍ mā hēēlu̍ ndu̍ a̍ sōndō yɛ̍ le̍.