Read Southern Kisi Cho̍o̍bū 34 Bible Online

Cho̍o̍bū 34 - Southern Kisi bible

Cho̍o̍bū 34

¹O̍ ko̍ŋ kɔ̍ɔ̍lī, mi̍ Ɛ̄li̍hū di̍mūl chāāŋāa̍ Cho̍o̍bū wa̍ māā,

²nya̍ wānāā kɔ̄l kālu̍a̍a̍ bɛ̍ndūa̍a̍ ha̍ā, lā ya᷄ŋ ndɔ̍ ya̍ nīla̍ŋ. Lā tūe̍i̍ yɔ̍ nyɛ᷅ ya̍ I̍ cho̍ dīmī wo̍, nya̍ si̍nā ha̍ā nyɛ̄ o̍ nyɛ̄ wa̍.

³Kāni̍ fo̍ndōle̍, wāna̍ chi̍o̍o̍ le̍ mā si̍na̍ sūɛ̍i̍ pɛ̄ŋgu̍ mɛ̄ɛ̍ mā ya̍ŋ ndi̍ nīla̍ŋ. Le̍nde̍ ko̍ni̍ i̍ cho̍ a̍ nyɛ̄ dīa̍a̍ ni̍, le̍ mā si̍na̍ nyɛ̄ dīāā yēēlɛ̍i̍yo̍ mɛ̄ɛ̍ mā de̍mbi̍ ndu̍.

⁴Ŋ̄ tōfa᷅ŋ ndɔ̄ o̍ sūɛ̍i̍ he̍ī ni᷄ŋ, mī ŋ̄ dīmi̍ tōnya̍ cho̍ lēni᷄ŋ ndo̍. Ŋ̄ kɛ̄ɛ̄si̍āŋ ndɔ̄ a̍ ndi̍ o̍kɔ̄ɔ̄ mī ŋ̄ sīna̍ mɛ̄ɛ̍ i̍ bɛ̍nda̍ le̍ bīyɔ̄ɔ̍ yɛ̍.

⁵Cho̍o̍bū di̍mi̍ māā ō tɛ̄ɛ̄mbu̍u̍ i̍sɔ̍ɔ̍ o̍ īsɔ̄ɔ̍ le̍, kɛ̍ mi̍ Mɛ̄lɛ̄ka̍ kɛ̄ɛ̄ le̍ ndu̍ di̍ ndɔ̄ɔ̍ kīo̍o̍.

⁶Ō dīmi̍ māā Mɛ̄lɛ̄ka̍ kīlu̍l ndu̍ yāmɛ̍ī lāka̍fɛ̄i̍, mbo̍ sīīŋgūū ndu̍ wāna̍ lāchōōwā. Ō tōsa̍ yɔ᷅ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ te̍, mi̍ Mɛ̄lɛ̄ka̍ lō o̍ ko̍ŋ mbo̍ tūsī ndu̍ dɛ̍nɛ̍ pa̍lāa̍ chu̍ū kɔ̍ɔ̍lī le̍ wo̍ chōo̍.

⁷Wāna̍ māāvɛ̄ɛ̍nɛ̍ Cho̍o̍bū cho̍ yɛ̄, o̍ ke᷅ ho̍ō Mɛ̄lɛ̄ka̍ lēbɛ̄ɛ̄ le̍ wo̍ mbō dīmi̍ le̍nde̍?

⁸Cho̍o̍bū cho̍ ni̍, wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍ a̍ nda̍ o̍ na̍āŋa᷅ŋ ni̍. Tē ō chē wānāā dɛ̍nɛ̍ wɔ̍ɔ̍ŋnda̍ pɛ̍ nda̍ o̍ ti̍sā kɔ̍ɔ̍lī ni̍, mā bālu̍ nda̍ nda̍ā.

⁹Kāni̍ fo̍ndōle̍, ō dīmi̍ māā wānā na̍a̍ŋa᷅ŋ bɛ̍ɛ̍ a̍ Mɛ̄lɛ̄ka̍ a̍ sɔ̍lā tɔ̍nɔ̄ o̍ tɔ̄nɔ̄ o̍ ndu̍ ni̍ŋ te̍.

¹⁰Le̍la̍ŋ lā ya᷄ŋ ya̍ nīla̍ŋ nya̍ wānāā kɔ̄l kālu̍a̍a̍ bɛ̍ndūa̍a̍ ha̍ā. I̍ di̍mūl lɔ̍ nya̍, Mɛ̄lɛ̄ka̍ kpu̍lu̍ŋgūma̍ Bɛ̄ndōo̍ ō cho̍ wa᷅na̍ lāka̍fā le̍. Ō cho̍ wa᷅na̍ dɛ̍nɛ̍ wɔ̍ɔ̍ŋ te̍.

¹¹Nyɛ̄ o̍ nyɛ̄ wāna̍ chi̍o̍o̍ tōsa̍ o̍ chi̍e̍ēŋndo̍ chōo̍ pɛ̍, mɛ̄ɛ̍ mbō sɔ̄la̍ pāāwā kōŋ. Ndu̍yɛ̍ mɛ̄ɛ̍ kūɛ̍ɛ̍la̍ ndɔ̄la̍ŋ lā wā yɛ̍ le̍nde̍ Mɛ̄lɛ̄ka̍ pāāwā ndu̍ ni̍.

¹²Lā yi̍ya᷄ŋ māā Mɛ̄lɛ̄ka̍ wāna̍ dɛ̍nɛ̍ wɔ̍ɔ̍ŋ te̍ o̍ cho̍ le̍. Mɛ̄lɛ̄ka̍ kpu̍lu̍ŋgūma̍ bɛ̄ndōo̍ cho̍ wa᷅na̍ lāka̍fā le̍.

¹³Ō nɛ̄ɛ̍nɛ̍ si̍i̍ŋgu̍u̍ yɛ̄ Mɛ̄lɛ̄ka̍ māsāa̍ le̍ chi̍e̍ēŋndo̍ ho̍ō kpo̍u̍? Ō nɛ̄ɛ̍ kɛ̍si̍ yɛ̄ ndu̍ chi̍e̍ēŋndo̍ ho̍ō kpo̍u̍ bo᷅lle̍ŋ?

¹⁴Nyɛ̄ o̍ nyɛ̄ yōōmāa̍ cho̍ o̍ chi̍e̍ēŋndo̍ chōo̍ kɔ̍ bīya᷅ŋ a̍ wāŋndā chi̍e̍e̍ya̍, Mɛ̄lɛ̄ka̍ nɔ̍ yōōmūlā ndāla̍ŋ ni̍. Tē ō pūu̍ dɔ̍ɔ̍ hūēīyīī ndūɛ̄ī ke̍ŋ pɛ̍,

¹⁵nda̍ kpo̍u̍ wūo̍o̍ nda̍ wū o̍ lē pīlɛ̍ ni̍ŋ ni̍, mī wāna̍ chi̍o̍o̍ mīīŋgu̍ o̍ pūūlōo̍ ni᷄ŋ nāa̍ o̍ chɛ̍ŋ nda̍.

¹⁶Le̍la̍ŋ tē ā nɔ̄ tāāsi̍ pɛ̍ Cho̍o̍bū, mɛ̄ɛ̍ me̍i̍ yɔ̍ kpi᷅li̍, mā ya̍ŋ ya̍ nīla̍ŋ.

¹⁷Cho̍o̍bū, ā nɔ̄ o̍ kɔ̄l, tē Mɛ̄lɛ̄ka̍ ndu̍ o̍o̍ ve̍ wa᷅na̍ di̍mi̍ tōnya̍ le̍, ndu̍ o̍o̍ wa̍ māsāa̍ ŋ̄wāŋndā chīe̍e̍ cho̍o̍? A̍ ye̍e̍ma̍ mā pɛ̍ɛ̍sa̍ Mɛ̄lɛ̄ka̍ tōnya̍a̍, o̍ nɔ̍ kpāāyāa̍ kpo̍u̍ wo̍ māā ō sēndu̍ le̍?

¹⁸Mɛ̄lɛ̄ka̍ nɔ̄ kpāāyāa̍ mbō pɛ̄ɛ̄sa̍ māsāā bɛ̍ndūa̍a̍ māā wānāā fo̍ndō fu̍u̍ nda̍ chō ni̍. Ō nɔ̄ kpāāyāa̍ mbō dīmu̍l wānāā tɔ̍ɔ̍wa̍ māā wānāā dɛ̍nɛ̍ wɔ̍ɔ̍ŋnda̍ nda̍ chō ni̍.

¹⁹Mɛ̄lɛ̄ka̍ cho̍ wāna̍ chɔ̍m yɛ̍ yɛ̍ ŋ̍wa᷅ŋ tɛ̄ɛ̄ŋ te̍. Ō ke᷅ wa̍nā su̍lāa̍ bɛ̄ɛ̄le̍ŋ mbō hīōū wānā ta̍mbɛ̍i̍yo̍ le̍. Kāni̍ fo̍ndōle̍, nda̍ kpo̍u̍ ndu̍ to̍o̍si̍a̍a̍ nda̍ ni̍.

²⁰Nda̍ kpo̍u̍ tē Mɛ̄lɛ̄ka̍ dīmi̍ le̍ nda̍ sōŋɔ̄ɔ̍ pɛ̍, sōŋɔ̄ɔ̍ nda̍ o̍ lē pīlɛ̍ ni᷄ŋ mbō chīi̍ a̍ nda̍. O̍ nyūmmā pīli̍a̍ŋ bɛ̄ŋgu̍, mī pīɔ̍mndo̍ kōma̍l nda̍ mbō chīi̍ nda̍ pa̍ku̍. Wānāā kpāāyāā bɛ̍ndūa̍a̍ mī Mɛ̄lɛ̄ka̍ chīi̍ a̍ nda̍ o̍ bɛ̍ɛ̍ŋ bɛ̍ɛ̍ŋ ni̍ŋ.

²¹Le̍la̍ŋ bā o̍ bā wāna̍ chi̍o̍o̍ ō kɔ̍, hɔ̄lte̍ Mɛ̄lɛ̄ka̍ le̍ŋ lē chō ndu̍ kɔ̄ɔ̄lī.

²²Mɛ̄ɛ̍ mɛ̄ɛ̍ nyūmnda̍ŋ mā pīīmi̍a̍a̍ mī mā wa̍ ti̍ŋgīsi̍, wāna̍ dɛ̍nɛ̍ wɔ̍ɔ̍ŋndo̍ nɔ̍lā mbō vēŋnu᷄ŋ le̍ni̍ŋ mī Mɛ̄lɛ̄ka̍ kɛ̄ɛ̍ ndu̍ chɔ̄ le̍.

²³I̍ chi̍ le̍ sa̍bū o̍ sa̍bū Mɛ̄lɛ̄ka̍ ō kē vɛ̍lɛ̄ wāna̍ chi̍o̍o̍ lɔ̍ɔ̍, le̍ mbō hu᷄ŋ si᷅m Mɛ̄lɛ̄ka̍ lāchī mī Mɛ̄lɛ̄ka̍ kīlu̍l ndu̍ yāmɛ̍i̍ yo̍ le̍.

²⁴Wānāa̍ cho̍ bɛ̍ɛ̍ wa̍nāā kpāāyāā bɛ̍ndūa̍a̍ wa̍, Mɛ̄lɛ̄ka̍ mbō tɛ̄ɛ̄mbu̍u̍ nda̍ ō kɔ̍ɔ̍sā a̍ nda̍ mbō sīna̍ nyɛ̄ nda̍ tɛ̄ɛ̄mbu̍u̍ wo̍ le̍. Ō nɔ̄lā mbō tɛ̄ɛ̄mbu̍u̍ nda̍ mbō mīŋgi̍ wānāā chēle̍ŋ o̍ fo̍ndālā ndāla̍ŋ.

²⁵Kāni̍ fo̍ndōle̍, Mɛ̄lɛ̄ka̍ sīnā wa̍lta̍ ndāla̍ŋ mɛ̄ɛ̍ nda̍ chō tu᷅. O̍ nyūmnda̍ŋ mā pīlɛ̍ bɛ̄ŋgu̍, mī Mɛ̄lɛ̄ka̍ chīi̍ kpāāyāla̍ ndāla̍ŋ, ndu̍yɛ̍ mbō tɛ̄ɛ̄mbu̍u̍ nda̍ kpo̍u̍.

²⁶Le̍ yɔ̄ŋndā ndāla̍ wɔ̍ɔ̍ŋnda̍ŋ, mī Mɛ̄lɛ̄ka̍ tūsi̍ nda̍ nyɛ̄ pālāa̍ chōo̍ mī wāŋnda̍ kpo̍u̍ a̍ che᷅.

²⁷Kāni̍ fo̍ndōle̍, le̍ mɛ̄ɛ̍ nda̍ kɛ̄ɛ̍ le̍ hīōūwɔ̄ɔ̍ lāchī a̍ tīīnda᷄ŋnda̍ ndāla̍ŋ dɔ̄wɔ̄ɔ̍ o̍ ndu̍ ni̍ŋ, ma̍ kɛ̄ɛ̄ le̍ nyɛ̄ o̍ di̍mu̍l nda̍ wo̍ tōsāa̍ yɛ̍.

²⁸Wānāā tāmbɛ̍i̍ya̍a̍ nda̍ wa̍ nyɛ̄ pālāa̍ tūsīo̍o̍ chōo̍ wa̍ cha᷄ŋ nda̍ wa̍ nāa̍ Mɛ̄lɛ̄ka̍ chūā wo̍ mbo̍ fūūlūū chōo̍ cho̍o̍ di̍. Pīɛ̄īlē nda̍ wa̍ le̍ŋ mi̍ lē kōmāl Mɛ̄lɛ̄ka̍ chōo̍ cho̍o̍.

²⁹Ā yɔ᷄ŋ bɛ̍ɛ̍ kpe̍e̍kpe̍i̍ mī Mɛ̄lɛ̄ka̍ dīmi̍ māā ō cho̍ nyɛ᷅ o̍ nyɛ̄ tōsā le̍, mbō chālnu᷄ŋ, ō nɛ̄ɛ̍nɛ̍ ke᷅ yɛ̍ ndu̍ īsɔ̄ɔ̍? Tē Mɛ̄lɛ̄ka̍ vi᷄ŋ lēlɛ̄ŋ o̍ lēlɛ̄ŋ hɔ̍lāā ndūa̍a̍ pɛ̍, ō kēndū mī lɛ̄ŋndē lēŋ lē chē ndu̍ hɔ̄lla̍.

³⁰Ndu̍yɛ̍ tē ke̍ŋ i̍ yɔ̍nu̍ŋ pɛ̍, lɛ̄ŋndē lēŋ lē nɔ̍lā mī lē kɛ̄ɛ̄lu̍ wānāā dɛ̍nɛ̍ wɔ̍ɔ̍ŋnda̍ wāa̍ nda̍ chōo̍ ma̍sāa̍ le̍, ā nɔ̍lā mā tōsa̍ wānāā dɛ̍nɛ̍ wɔ̍ɔ̍ŋnda̍ ā tu̍sī nda̍ nyɛ̄ pālāa̍ chōo̍ le̍ le̍.

³¹Cho̍o̍bū, a̍ chɔ̍ɔ̍mu̍u̍ ni᷅ŋ yɔ̄ŋ nūm wɔ̍ɔ̍ŋndo̍ nāa̍ Mɛ̄lɛ̄ka̍ chūā, ma̍ chūā ībūŋgā māā fɛ̍ɛ̍ŋ a̍ fɛ̍ɛ̍ŋ a̍ to̍sā lɛ̍ nyɛ̄ ŋ̄ tōsa̍ wo̍ le̍?

³²A̍ nyu̍na̍ ni᷅ŋ Mɛ̄lɛ̄ka̍ le̍ mbō chɔ᷄m nu̍m yɔ̄ŋ wɔ̄ɔ̍ŋ ŋ̄ tōsa̍ kɛ̍ a̍ si̍na̍ māā yɔ̄ŋ wɔ̄ɔ̍ŋ te̍ wo̍? Tē a̍ nyu̍na̍ yɛ̄ ndu̍ pɛ̍ mbō chɔ᷄m nu̍m, a̍ chɛ̍l ma̍ māl yɔ̄ŋ wɔ̄ɔ̍ŋ o̍ chɔ̍m ko̍ŋ ndo̍?

³³Cho̍o̍bū, tē a̍ kɛ̍ɛ̍ le̍ nyɛ̄ Mɛ̄lɛ̄ka̍ dīmu̍l nu̍m ndo̍ tōsāa̍ pɛ̍, vɛ̄ɛ̍nɛ̍ ŋ̄ nyūnā yɛ̍ Mɛ̄lɛ̄ka̍ le̍ nyɛ̄ mbō tōsa̍l nu̍m ndu̍? Nūm pi̍la̍ yi̍ya̍ŋ ndɔ̍ mā kēlū yāmɛ̍ī kēŋ. Wānā o̍ wānā che᷅le̍ŋ ki̍lūl nu̍m yāmɛ̍i̍ kēŋ te̍ nūm pi̍la̍ so̍o̍ wɔ̍.

³⁴Wānā o̍ wa᷅na̍ cho̍ wāna̍ kɔ̄l kālu̍, tē ō tūēī nyɛ̄ ya̍ I̍ cho̍ nu̍m ho̍ō dīmūllo̍ wo̍ pɛ̍, chɛ̄la᷅ŋndo̍ o̍ chɛ᷅la᷅ŋ a̍ ya̍ ni̍.

³⁵Dīmīo̍o̍ o̍ di̍mī ni̍ māā nyɛ̄ ŋ̄ chō dīmīo̍o̍ wo̍ Cho̍o̍bū, a̍ cho̍ ndu̍ sīnā pɛ̄ŋgu̍ le̍, kɔ̄l kālu̍ o̍ kɔ̄l kālu̍ wānā se̍e̍lūŋ le̍ni̍ŋ te̍.

³⁶Ya̍ i̍i̍ ye̍e̍ma̍ bɔ̄ɔ̍ mī nda̍ a̍a̍ kɔ̍ɔ̍sa̍ a̍ Cho̍o̍bū, mī nda̍ a̍a̍ di̍ndi̍ kɔ̍ɔ̍sɔ̍ɔ̍ a̍ ndu̍ tɛ̍ɛ̍, kāni̍ fo̍ndōle̍, wānā o̍ wāna̍ ya̍ŋ nīla̍ŋ o̍ kɔ̍ɔ̍sɔ̍ ndɔ̄ɔ̍ pɛ̍, dīmīo̍o̍ ŋ̄ dīmī ni̍ māā wāna̍ dɛ̍nɛ̍ wɔ̍ɔ̍ŋndo̍ kpe̍e̍kpe̍i̍ Cho̍o̍bū cho̍ ni̍.

³⁷Ō cho̍ wɔ̍ yɔ᷅ŋ wɔ̄ɔ̍ŋ Cho̍o̍bū to̍sa̍ wo̍ le̍, kɛ̍ sīmūllo̍ kpe̍e̍kpe̍i̍ o̍ si̍mu̍l vɛ̄lɛ̄ ho̍ō Mɛ̄lɛ̄ka̍ ni̍, mbo̍ wā ndu̍ māmɔ̄ɔ̍ na̍a̍ kpo̍u̍ o̍ hɔ̄l.