Read Southern Kisi Cho̍o̍bū 35 Bible Online

Cho̍o̍bū 35 - Southern Kisi bible

Cho̍o̍bū 35

¹O̍ ko̍ŋ kɔ̍ɔ̍lī, mi̍ Ɛ̄li̍hū hi̍a̍ū lāchī a̍ sūɛ̍i̍ mbo̍ dīmūl Cho̍o̍bū ma̍a̍,

²Cho̍o̍bū, a̍ la̍a̍la̍ŋ māā nyɛ̄ ŋ̄ dīmi̍ ko̍ŋ ndo̍ chō o̍ nɛ̄i̍? Ō cho̍ o̍ nɛ̄ī le̍. A̍ nɔ̍lā mā ke̍ŋnu̍ŋ di̍, mā chu̍a̍ nūm pi̍la̍ ō dīāndāā Mɛ̄lɛ̄ka̍ o̍ hɔ̄l te̍.

³Ma̍ lō o̍ ko̍ŋ ma̍ nyūnā Mɛ̄lɛ̄ka̍ āā, “Tɔ̄nɔ̍ yɛ̄ɛ̍nɛ̍ ya̍ I̍ nɔ̍ yɛ̍? I̍ to̍sa̍ yɔ᷅ŋ wɔ̄ɔ̍ŋ I̍ to̍sā yɔ̄ŋ wɔ̄ɔ̍ŋ te̍, I̍ nɔ̍ tɔ̍nɔ̄ o̍ tɔ̄nɔ̄ le̍.”

⁴Kɛ̍ ndu̍yɛ̍ nūm ni̍, chāāŋāā nūmnda̍ ni̍, I̍ cho̍ nya̍ dīōm mūlī.

⁵Chu̍a̍ wɔ̍ hɔ᷅lla̍ Cho̍o̍bū mā nu̍a̍ ha̍la̍a̍ chōo̍ cho̍o̍. To̍fa̍ wɔ̍ ha̍la̍ hūmbōo̍ mā chē mɛ̄ɛ̍ o̍ cho̍ chōo̍ cho̍o̍ pɔ̍ yɛ̍.

⁶Ā nɔ̄ o̍ kɔ̄l tē a̍ to̍sa̍ yɔ̄ŋ wɔ̄ɔ̍ŋndo̍ pɛ̍, yɔ̄ŋ wɔ̄ɔ̍ŋ kōŋ ō nɔ̄lā mbō yɔ᷄ŋ Mɛ̄lɛ̄ka̍ nyɛ̍? Mɛ̄lɛ̄ka̍ ndu̍ mɛ̄ɛ̍ mɛ̄ɛ̍ ŋ̄ tōsa̍ yɔ᷅ŋndā wɔ̄ɔ̍ŋnda̍ŋ, yɔ̄ŋndā nūmnda̍ wɔ̍ɔ̍ŋndā lāŋ lā nɔ̍lā mī lā tōsa̍ nyɛ̄ o̍ nyɛ̄ a̍ Mɛ̄lɛ̄ka̍ le̍.

⁷Ā yɔ᷄ŋ bɛ̍ɛ̍ mā wa̍ wāna̍ sa̍kpō, sa̍kpōyɛ̍ī nūm ke̍ŋ ī nɔ̍lā mī ī māla̍ Mɛ̄lɛ̄ka̍ le̍. Mɛ̄lɛ̄ka̍ yēēma̍ nyɛ᷅ o̍ nyɛ̄ nu̍m o̍ bā le̍.

⁸Tē a̍ to̍sa̍ dɛ̍nɛ̍ wɔ̍ɔ̍ŋndo̍ pɛ̍, chāa̍ŋ nūm wa᷅na̍ chi̍o̍o̍ ko̍ni̍ ŋ̄ tūsī sa̍ŋgāa̍ chōo̍ ni̍. Yālāā ŋ̄ tōsā o̍ kɛ̍ndɔ̄ɔ̍, ndu̍ ko̍ni̍ ŋ̄ mālā vɛ̍lɛ̄ ni̍.

⁹Tē dɛ̍nɛ̍ pa̍lāa̍ tōl wāŋnda̍ chōo̍ pɛ̍, nāa̍ chāa̍ŋāā ndāā wa᷅ŋndā chīe̍e̍ya̍ chūā nda̍ chāŋ le̍ mālāa̍ ni̍, chāa̍ŋāā ndāā wa᷅ŋndā chīe̍e̍ya̍ nda̍ nyɔ̄ɔ̄lū ni̍, le̍ mā pīŋi̍ nda̍ mā sōli̍ nda̍ wānāā kpāāyāā bɛ̍ndu̍a̍a̍ o̍ bā.

¹⁰Kɛ̍ ō pīlɛ̍ bɛ̍ɛ̍ nɔ̍lā mbō mūli̍ŋ nāa̍ Mɛ̄lɛ̄ka̍ chūā o̍ to̍o̍si̍a̍a̍ ndu̍ wo̍ le̍. Ō pīlɛ̍ bɛ̍ɛ̍ nyu̍nā Mɛ̄lɛ̄ka̍, o̍ nyɔ̍ɔ̍lū wa̍nāā dɛ̍nɛ̍ pa̍lāa̍ kɔ̄lta̍ŋ ndo̍ mbō māla̍ ndu̍ le̍.

¹¹Mɛ̄lɛ̄ka̍ ke̍ wāna̍ chi̍o̍o̍ kɔ̄l kālo̍o̍, mbo̍ hīāū vīsīāā yōndūa̍a̍ a̍ yōūwa̍, ō pīlɛ̍ bɛ̍ɛ̍ nɔ̍lā mbō mūli̍ŋ nāa̍ Mɛ̄lɛ̄ka̍ kōŋ chu̍a̍ mbō nyūna̍ ndu̍ dīōm te̍.

¹²Ndu̍yɛ̍ mɛ̄ɛ̍ mɛ̄ɛ̍ nda̍ wa̍ cha̍ŋndo̍ le̍ mālāa̍, Mɛ̄lɛ̄ka̍ mu̍lī nda̍ dīōm te̍. Kāni̍ fo̍ndōle̍, le̍ yōŋgāla̍ ndāla̍ŋ, ndu̍yɛ̍ a̍ le̍ yɔ̄ŋndā ndāla̍ wɔ̍ɔ̍ŋnda̍ŋ.

¹³Cha᷄ŋ ndāa̍ bɔ̄ɔ̄lūū fo̍ndōo̍ ko̍ni̍ Mɛ̄lɛ̄ka̍ wā ndu̍ tūēīnɔ᷄ŋndo̍ o̍ lānī ni̍. Mɛ̄lɛ̄ka̍ kpu̍lu̍ŋgūma̍ bɛ̄ndōo̍ ō to̍fā nda̍ bɛ̍ɛ̍ le̍, kɛ̄lɛ̄ŋgāā ni᷅ŋ te̍, mbō ya᷄ŋ nda̍ bɛ̍ɛ̍ la̍ni̍.

¹⁴Tē ō wa̍ yɛ̄ le̍nde̍ pɛ̍ Cho̍o̍bū, vɛ̄ɛ̍nɛ̍ Mɛ̄lɛ̄ka̍ tūɛ̄ī yɛ̍ ni̍ŋ nu̍m dīōm, tē a̍ di̍mi̍ pɛ̍, māā a̍ chi᷅ ndu̍ a̍ lēhɔ̄l te̍? A̍ di̍mi̍ māā Mɛ̄lɛ̄ka̍ ŋ̄ dɔ̄ū sūɛ̍i̍ nu̍mnde̍ lāchī ni̍, ma̍ chāl ndu̍ chūm le̍ mbō hu᷄ŋ ki̍o̍lū yāmɛ̍i̍.

¹⁵Mi̍ tu̍ɛ̍ī nu̍m ma̍ dīmī māā ā yɔ᷄ŋ bɛ̍ɛ̍ mī wāŋndo̍ tōsa̍ yɔ̄ŋ wɔ̄ɔ̍ŋndo̍, māā Mɛ̄lɛ̄ka̍ tu̍sī ndu̍ nyɛ̄ pālāā chōo̍ le̍. Kāni̍ fo̍ndōle̍, māā Mɛ̄lɛ̄ka̍ sa̍a̍lāŋ a̍ yɔ̄ŋ wɔ̄ɔ̍ŋndo̍ le̍.

¹⁶Nyɛ̄ o̍ nyɛ̄ ŋ̄ chō dīmīo̍o̍ Cho̍o̍bū, nyɛ̄ fo̍ndōo̍ fu̍u̍ ko̍ni̍ o̍ cho̍ ni̍, kɔ̄l kālu̍ o̍ kɔ̄l kālu̍ cho̍ le̍ni̍ŋ te̍.