Read Southern Kisi Cho̍o̍bū 37 Bible Online

Cho̍o̍bū 37 - Southern Kisi bible

Cho̍o̍bū 37

¹Tē I̍ tu̍e̍ī ta᷅ŋnda̍ŋ dēŋīo̍o̍ pɛ̍, kɔ̄llo̍ mbō lāāsi̍a̍ŋ ya̍ ni᷄ŋ kpo̍u̍, mbō yɔ̄nu̍ŋ ya̍ pa᷅m pām bɛ̄ndū a̍ sīōōŋnde̍.

²Tē Mɛ̄lɛ̄ka̍ wa̍ sūɛ̍i̍ pɛ̍, nya̍ kpo̍u̍ lā ya᷄ŋ ndɔ̍ ni᷅la̍ŋ. Tē ō wa̍ sūɛ̍i̍ pɛ̍ mɛ̄ɛ̍ ta᷅ŋmā bɛ̄ndūa̍ŋ mā dēŋī nu̍a̍ā yɛ̍, le̍nde̍ dīōm ndɔ̄ɔ̍ dēŋī ni̍.

³Mbō tōsa̍ mī nyɛ̄ ŋūāla̍lɛ̍ī ŋūāla̍lɛ̍īyo̍ tīu̍ o̍ ha̍la̍a̍ ni᷄ŋ, a̍ o̍ chi̍e̍ēŋndo̍ chōo̍ kpo̍u̍.

⁴Ndu̍yɛ̍ dīmīo̍o̍ nu̍a̍ā mī wānā che᷅ nyɛ̄ ŋūāla̍lɛ̍ī kōŋ, ō be̍ndū ti᷅ŋ te̍, mā tūēī mī Mɛ̄lɛ̄ka̍ dēŋi̍ a̍ dīōm bɛ̄ndōo̍, ō chu̍ē te̍le̍ŋ vi̍lɛ̄ī le̍, mā tūēī dīōm ndɔ̄ɔ̍ dēŋīo̍o̍ mɛ̄ɛ̍ ta᷅ŋmā mā dēŋī nu̍a̍ā yɛ̍. Ko̍ŋ kpo̍u̍ nyɔ̄ɔ̍ wā ki̍o̍lōo̍ īŋūāla̍lɛ̍ī ŋūāla̍lɛ̍īye̍.

⁵Tē Mɛ̄lɛ̄ka̍ wa̍ dēŋīo̍o̍ pɛ̍, wānā tu̍ɛ̍ī ko̍ bɛ̍ɛ̍ āā ta᷅ŋnda̍ŋ ma̍ cho̍ dēŋīo̍o̍ ni̍. Ndu̍yɛ̍ tē wānā tu̍e̍ī ndu̍ dēŋīo̍o̍ pɛ̍, kɔ̄ndɔ̄fi̍llo̍ bi̍ī nu̍m ni̍. Sɔ̄ɔ̍ŋ kɔ̄ndɔ̄fi̍li̍ŋ bɛ̄ndo᷄ŋ, ŋ wānā nɔ̍lā mā si̍na̍ pɛ̄ŋgu̍ le̍ wo̍ŋ mu̍ŋ Mɛ̄lɛ̄ka̍ tōsā ni̍.

⁶Mbō dīmu̍l mɔ᷄mndo̍ māā, chu̍ chu̍, mbō chū chū, mbō dīmu̍l vɛ̄lɛ̄ pīɔ̍ɔ̍ māā, si̍a̍, mbō sīa̍.

⁷Te̍le̍ŋnda̍ŋ lā pūm, mbō yɔ᷄ŋ pīɔ̍ɔ̍ mbō tɛ̄ɛ̄mbu̍u̍ wāŋnda̍ wa̍lta̍ŋ o̍ bā kpo̍u̍, mbō chɔ᷄m nda̍ māā wāna̍ wa̍lta̍ kɔ̄ndɔ̄fi̍llo̍ o̍ cho̍ ni̍.

⁸Vīsīāā yōndūa̍a̍ kpo̍u̍ mbō tōsa̍ mā nyāānu̍ŋ o̍ fo̍ndāŋndā ndāla̍ŋ, mā kɔ̍ vi̍ŋi᷄ŋ.

⁹Mbō tōsa̍ mī hūēīyīī bɛ̄ndūe̍i̍ fūla̍ bā tōūwo̍ mī ī hɔ᷄ŋ hɔ̄ŋndo̍ pīla̍, o̍ ko̍ŋ kɔ̍ɔ̍lī, mī hūēīyīī vi̍li̍ vi̍li̍i̍ bɛ̍ndūe̍i̍ ndi̍ i̍ chɛ̍ŋ ba᷅ lūāŋndo̍ mī ī tīu̍ kpo̍u̍.

¹⁰Tē Mɛ̄lɛ̄ka̍ yōōmu̍ pɛ̍ fu̍ū, hūēīyīī ndūɛ̍i̍ mī ī tōsa̍ mī mɛ̄ŋnda̍ŋ mā līīma̍ŋ, mī mā sīmnu᷄ŋ kpu̍ŋgbɛ̄i̍.

¹¹Mɛ̄lɛ̄ka̍ mbō chūūŋgi̍a̍a̍ mɛ̄ŋnda̍ŋ o̍ ha̍la̍ hūmbōo̍ ni᷄ŋ cho̍o̍ cho̍o̍. Mbō tōsa̍ mī nyɛ̄ ŋūāla̍lɛ̍ī ŋūāla̍lɛ̍īyo̍ tīu̍ o̍ ha̍la̍ hūmbū kōŋ ni᷄ŋ kpo̍u̍.

¹²Ndu̍yɛ̍ ha̍la̍ hūmbū kōŋ bā o̍ bā Mɛ̄lɛ̄ka̍ yēēma̍ ndu̍ pɛ̍ mbō kūɛ̄ lo̍ŋ o̍ ku̍ā ni̍, mbō bālu̍ o̍ chi̍e̍ēŋndo̍ ni᷄ŋ kpo̍u̍.

¹³Te̍le̍ŋnda̍ŋ lā pūm le̍ lɛ̄ŋnde̍ŋ pɔ̄ɔ̄līa̍a̍ Mɛ̄lɛ̄ka̍ yɔ̄ŋ pi̍ɔ̍ɔ̍ ni̍, lē pūm yɛ̍ le̍ wāŋnda̍ nyɛ̄ pālāa̍ tūsīo̍o̍ chōo̍, lē pūm vɛ̍lɛ̄ le̍ wāŋnda̍ chɔ̄mndo̍ māā ō kāāla̍ nda̍.

¹⁴Cho̍o̍bū, me̍i̍ yɔ̍ ti̍ŋ mā ya̍ŋ ya̍ nīla̍ŋ. Me̍i̍ yɔ̍ŋ ti̍ŋ mā yi̍ya̍ŋ a̍ wa̍lta̍ kɔ̄ndɔ̄fi̍ltā Mɛ̄lɛ̄ka̍ tōsā la̍ŋ.

¹⁵Cho̍o̍bū, ā sīnā mɛ̄ɛ̍ Mɛ̄lɛ̄ka̍ lōōkū to̍sā mī ha̍la̍ hūmbōo̍, ō tīū cho̍o̍ cho̍o̍ yɛ̍? Ā sīnā mɛ̄ɛ̍ o̍ lo̍o̍kū to̍sā mī nyɛ̄ ŋūāla̍lɛ̍ī ŋūāla̍lɛ̍īyo̍ ō wa̍ kīōlōo̍ o̍ ha̍la̍a̍ ni᷄ŋ yɛ̍?

¹⁶Ā sīnā mɛ̄ɛ̍ Mɛ̄lɛ̄ka̍ lōōku̍ ha̍la̍ hūmbōo̍ ho̍ō lāndɔ̄ɔ̄ chōo̍ cho̍o̍ yɛ̍? Cho̍o̍bū, Mɛ̄lɛ̄ka̍ chō wāna̍ kɔ̄l kālu̍ bɛ̍ndu̍, a̍ nɔ̍lā mā si̍na̍ wa̍lta̍ ndɔ̄la̍ kɔ̄ndɔ̄fi̍lta̍ŋ pɛ̄ŋgu̍ le̍.

¹⁷Hūēīyīī tūūve̍ bɛ̍ɛ̍ fu̍la̍ bā tōūwo̍ ni̍, hāŋgu̍llo̍ lō mbō dīī nu̍m.

¹⁸Cho̍o̍bū, ā nɔ̄ kpāāyāa̍ māā Mɛ̄lɛ̄ka̍? Nūm o̍o̍ nɔ̍lā mī nūm o̍o̍ ma̍la̍ Mɛ̄lɛ̄ka̍ ha̍la̍a̍ tōōsīa̍a̍? Ā nɔ̄lā mā to̍sa̍ mī ha̍la̍a̍ ho̍ō dēndū māā tōfa̍ŋ?

¹⁹Chɔ̍m ndɔ̍ na̍a̍ nyɛ̄ na̍a̍ ŋ̄ dīmūl Mɛ̄lɛ̄ka̍ o̍ he̍ī ni᷄ŋ kpe̍e̍kpe̍i̍yo̍ Cho̍o̍bū. Kɔ̄l kālu̍ o̍ kɔ̄l kālu̍ ŋ̄ nɔ̍ le̍. Ŋ̄ si̍nā nyɛ᷅ o̍ nyɛ̄ na̍a̍ ŋ̄ dīmūl Mɛ̍lɛ̄ka̍ le̍.

²⁰I̍ nɔ̍lā bɛ̍ɛ̍ mī bi̍ī kɔ̄llo̍ mī di̍mu̍l Mɛ̄lɛ̄ka̍ ma̍a̍, I̍ ye̍e̍ma̍ mī so̍ō nāa̍ nūm chu̍a̍ le̍. Tē I̍ to̍sa̍ ke̍ŋ pɛ̍, mɛ̄ɛ̍ ya̍ pi̍la̍ nu̍u̍wā pi̍ɔ̍m ko̍ŋ ni̍.

²¹Tē hūēīye̍ fāŋa̍ ha̍la̍ hūmbōo̍ ho̍ō o̍ pāa̍le̍ŋ chōo̍ pɛ̍ fa̍ū, mī lē wa̍ īyēlēŋgi̍ ye̍lēŋgi̍e̍i̍, ō nɛ̄ɛ̍nɛ̍ bi̍ī yɛ̍ kɔ̄llo̍ mbō si᷄m mbō nūa̍ le̍ŋ?

²²Mɛ̄lɛ̄ka̍ fūla̍ bā lūāŋndo̍ mbo̍ wā hūnɔ̄ɔ̍ a̍ dīōndɔ̄ɔ̍ bɛ̄ndōo̍, wānā che᷅ ndu̍ hūnɔ̄ɔ̍ a̍ dīōndɔ̄ɔ̍ pɛ̍ āā ko̍o̍līi̍ye̍ ni̍. Sīōōŋnde̍ bīī na̍a̍ kpo̍u̍ a̍ īyēlēŋgi̍ ye̍lēŋgi̍i̍ bɛ̍ndūīī o̍ cho̍ ve̍.

²³Ŋ̄ nɔ̍lā mī ŋ̄ sɔ̄ɔ̄ŋgu̍u̍ Mɛ̄lɛ̄ka̍ kpu̍lu̍ŋgūma̍ Bɛ̄ndōo̍ īkɛ̄i̍ le̍, kāni̍ fo̍ndōle̍, ō chō wāna̍ kpāāyā bɛ̍ndū, ō chō wānā sa̍kpō, ō cho̍ wa᷅na̍ to̍sa̍l wānā la̍ka̍fā le̍.

²⁴Nyɛ̄ ko̍ŋ to̍sa̍ ni̍ mi̍ wāŋnda̍ kpo̍u̍ a̍ wa᷅ ndu̍ bɛ̄ɛ̄le̍ŋ kīo̍o̍. Wānāa̍ chu̍a̍nu̍ŋ māā wānāā kɔ̄l kālu̍a̍a̍ nda̍ chō ni̍ wa̍, Mɛ̄lɛ̄ka̍ to̍fā nda̍ bɛ̍ɛ̍ le̍.