Read Southern Kisi Cho̍o̍bū 38 Bible Online

Cho̍o̍bū 38 - Southern Kisi bible

Cho̍o̍bū 38

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ Cho̍o̍bū chu̍a̍ o̍ hūēīyīī bɛ̄ndūe̍i̍ ni᷄ŋ, mbo̍ dīmūl Cho̍o̍bū āā,

²Wāna̍ māāvɛ̄ɛ̍nɛ̍ ŋ̄ chō yɛ̄ nūm Cho̍o̍bū, mā si̍ka̍ a̍ tūūlā nīla̍ŋ, mā tūndu᷄ŋ sɔ̍ɔ̍ŋ fo̍ndōŋ wāā nu̍a̍ā sūɛ̍i̍?

³A̍fā, bɛ̍ɛ̍ndi̍a̍ŋ ni̍ko̍ māā wānā pɔ̍nɔ̍, I̍ cho̍ nu̍m nyūūnīāā mā mu̍li̍ ya̍ dīōm.

⁴Cho̍o̍bū, bōōndi̍i̍ ya̍ I̍ wa̍ chīyīī chi̍e̍ēŋndo̍ ho̍ō ō si᷄m chōo̍ ve̍ kīlāa̍ ve̍ a̍ wa̍ lo̍ŋ? Tē ā sīnā i̍sɔ̍ɔ̍ o̍ īsɔ̄ɔ̍ a̍ di̍ o̍kɔ̄ɔ̄ pɛ̍, chɔ̍m ndɔ̍ ya̍.

⁵Ō nɛ̄ɛ̍nɛ̍ kɛ̍ɛ̍si̍a̍a̍ yɛ̄, mɛ̄ɛ̍ kpɛ̍ chi̍e̍ēŋndo̍ ho̍ō ō nɔ̄ mbō wa̍ yɛ̍? I̍ la̍a̍la̍ŋ māā ā sīnā, chɔ̍m ndɔ̍ ya̍. Chɔ̍m ndɔ̍ ya̍ wāna̍ tu̍u̍ chi̍e̍ēŋndo̍ ho̍ō wo̍.

⁶O̍ yɛ̄ɛ̍nɛ̍ cho̍o̍ sūŋgbu̍ma̍ sa̍a̍ chi̍e̍ēŋndo̍ ho̍ō wa̍ŋ mā si᷄m yɛ̍? Ō nɛ̄ɛ̍nɛ̍ ya̍mbū yɛ̄ pōū kpe̍e̍kpe̍i̍ sa̍ā ta̍ŋgūllo̍ wo̍,

⁷a̍ bōōndi̍i̍ lōo̍ŋ īdīi̍yo̍ŋ ŋ̄ wa̍ chōndo̍ŋ dīōm pīlɛ̍, mi̍ ki̍i̍la̍a̍ Mɛ̄lɛ̄ka̍a̍ ā wā dēŋīo̍o̍ a̍ nya̍a̍lo̍o̍ ve̍?

⁸Bōōndi̍i̍ pēe̍ mɛ̄ŋmā īhɛ᷄llo̍ ō pīɔ̍l lɛ̄ŋ mi̍ mɛ̄ŋnda̍ŋ mā chūā fo̍ndāŋ nda̍ŋ nde̍, ō nɛ̄ɛ̍nɛ̍ ki̍nda̍ yɛ̄ ma̍ŋ?

⁹Ya̍ Mɛ̍lɛ̄ka̍ ya̍ ki̍nda̍ ma̍ŋ ni̍, ndu̍yɛ̍ mi̍ pɛ̍ŋgɛ̄lā ha̍la̍ hūmbōo̍ lēchōo̍ mi̍ ku̍mbū ma̍ŋ a̍ nyūmmā kpi᷅ŋgbi̍ ma̍ bɛ̍ndūa̍ŋ.

¹⁰Ndu̍yɛ̍ mi̍ chɔ᷅m pēe̍ mɛ̄ŋmā īhɛ᷄llo̍ nāa̍ o̍ nɔ̍ le̍ wāa̍ wa̍, o̍ ko̍ŋ kɔ̍ɔ̍lī, mi̍ ka̍ndā ma̍ŋ, mā nɔ̍lā mī mā hīōū le̍.

¹¹Mi̍ lo᷅ o̍ ko̍ŋ mi̍ di̍mūl ma̍ŋ a̍a̍, “Na̍ŋu᷄ŋ ŋ̄ nɔ̍ ni̍ mā mɛ̍ɛ̍lu̍, hi̍a̍ū lɛ̄ lāchī le̍. Na̍ŋu᷄ŋ ŋ̄ mɛ̄ɛ̄lū a̍ īkpōku̍ kpo̍ku̍e̍i̍ nu̍m ī bɛ̄ndūe̍i̍ ni̍.”

¹²Cho̍o̍bū, kāni̍ ŋ̄ chɛ᷄ŋ, nyūmnda̍ŋ mā tōl ni᷅ŋ ma̍ dīmī māā, pāa̍le̍ŋ si̍ɔ̍, mi̍ lē sīa̍?

¹³A̍ to̍sa̍ ni᷅ŋ mi̍ pāa̍le̍ŋ lē sīā le̍ mī nyɛ̄ wa̍wo̍ŋndo̍ tīu̍ o̍ chi̍e̍ēŋndo̍ ni᷄ŋ, mi̍ sīōōŋnde̍ bīī wānāā dɛ̍nɛ̍ wɔ̍ɔ̍ŋnda̍ mā vīŋi̍ŋ?

¹⁴Tē pāa̍le̍ŋ lē sɛ̄ īdīi̍ pɛ̍ nyɛ̄ o̍ nyɛ᷄ wa᷅ o̍ vi̍a̍ŋna᷄ŋ, chɔ̄mnɔ᷄ŋndo̍ o̍ chɔ̍mnūŋ de̍ŋ ni̍, mī nyɛ̄ o̍ nyɛ̄ yɔ̄ŋgu̍ŋ wa̍kpā bɛ̄ndū.

¹⁵Wānāā dɛ̍nɛ̍ wɔ̍ɔ̍ŋnda̍ ā ye̍e̍mā mā chē nyɛ̄ wa̍wo̍ŋndo̍ le̍, kāni̍ fo̍ndōle̍, tē nyɛ̄ wa̍wo̍ŋndo̍ ō wa̍ pɛ̍, ā nɔ̍lā mā tōsa̍ sɔ̄ɔ̍ŋ wɔ̍ɔ̍ŋ nda̍ kɛ̄ɛ̄sīāā wo̍ŋ te̍.

¹⁶Cho̍o̍bū, ā kūɛ̄ ni᷅ŋ nāa̍ Pēe̍ Mɛ̄ŋmā Īhɛ᷄llo̍ ō kāndu̍ŋ nda̍? Ā tōl ni᷅ŋ o̍ nāa̍ yi̍ŋgi̍lɛ̍i̍ya̍a̍ bɛ̍ndūa̍a̍ o̍ pēe̍ mɛ̄ŋmā īhɛ᷄llo̍ bɛ̄ŋgu̍ ma̍ bālū lo̍ŋ?

¹⁷Kāni̍ bɛ̍ɛ̍ wāŋndo̍ chɔ᷄m nu̍m ni᷅ŋ dīōlā wānā ke̍e̍kū le̍ lūɛ̄īyɔ̄ɔ̍ chi̍e̍e̍ pīɔ̍m nda̍ŋ? Ā chē ni᷅ŋ nɛ̄i̍ wānā ke̍ī le̍ tōlɔ̄ɔ̍ o̍ fo̍ndāŋ yīŋgi̍lɛ̍i̍ bɛ̍ndōo̍ wo̍?

¹⁸Ā sīnā mɛ̍ɛ̍ kpɛ̍ chi̍e̍ēŋndo̍ ho̍ō ō chō ō bɛ̄ndū yɛ̍? Chɔ̍m ndɔ̍ ya̍, tē ā sīnā i̍sɔ̍ɔ̍ o̍ īsɔ̄ɔ̍ a̍ mu᷅ŋ o̍kɔ̄ɔ̄ pɛ̍.

¹⁹Ā sīnā na̍a̍ nyɛ̄ wa̍wo̍ŋndo̍ ō chāŋ nda̍? Ā sīnā na̍a̍ nyūmnda̍ŋ mā chō mā kɛ̄sīāā wa̍?

²⁰Ā nɔ̄lā mā chɔ̍m nyɔ̄ɔ̍ŋ mu᷅ŋ nāa̍ ŋ̍ ku̍ā wa̍, ndu̍yɛ̍ mā mi̍ŋgi̍ mu̍ŋ o̍ fo̍ndāŋndāŋ ndɔ̄la̍ŋ?

²¹I̍ la̍a̍la̍ŋ māā ā sīnā mu᷅ŋ kpo̍u̍, kāni̍ lɔ̍ɔ̍pa̍ mi̍ to̍o̍sīāā chi̍e̍ēŋndo̍ ho̍ō I̍ che᷅ māā nūm nūm o̍o̍ wa̍ ni᷅ŋ. Te̍le̍ŋ ya̍ I̍ wa̍ chi̍e̍ēŋndo̍ ho̍ō tōōsīāā wo̍, I̍ la̍a̍la̍ŋ māā a̍ wa̍ lo̍ŋ.

²²Cho̍o̍bū, ā lūɛ̄ī ni᷅ŋ nāa̍ ya̍ I̍ kɛ̍sī mɔ̍m ŋ̍kpu̍ŋgbāa̍ wa̍? Ā chē ni᷅ŋ nāa̍ lōōŋ kpu̍ŋgbāŋ bɛ̄ndo᷄ŋ ŋ̄ chō ŋ̄ kɛ̄sīāā wa̍?

²³Nyɛ̄m mu᷅ŋ ki̍nɛ̍i̍ le̍ wāŋnda̍ nyɛ̄ pālāa̍ tūsīo̍o̍ chōo̍ ndu̍yɛ̍ a̍ le̍ te̍le̍ŋ wāŋnda̍ wā chɔ̄ūla̍ŋ ndo̍ ya̍ I̍ kɛ̍si̍ mu̍ŋ lo̍ŋ ni̍.

²⁴Cho̍o̍bū, ā sīnā nāa̍ nyɛ̄ ŋūāla̍lɛ̍ī ŋūāla̍lɛ̍īyo̍ ō chāŋ nda̍? Hūēīyīi̍ cha᷅ŋ he̍ī bā pāa̍le̍ŋ lē chāŋndo̍ ve̍, ā sīnā nāa̍ i̍ cho̍ ī kɛ̄sīāā wa̍?

²⁵Ā nɔ̄lā mā chɔ̍m ya̍ wāna̍ bɛ̍ɛ̍ndi̍a̍a̍ nɛ̄īyo̍ le̍ pīɔ̍ɔ̍ wo̍? Ō nɛ̄ɛ̍nɛ̍ chɔ̍m yɛ̍ ta᷅ŋnde̍ŋ, nāa̍ le̍ nɔ̍ le̍ kēi̍la̍ŋ nda̍?

²⁶Ō nɛ̄ɛ̍nɛ̍ yɔ᷅ŋ yɛ̍ pīɔ̍ɔ̍ o̍ po̍li̍ ve̍sɛ̍i̍ bɛ̍ndōo̍ ni᷄ŋ nāa̍ wāna̍ chi̍e̍e̍ ve᷅ bɛ̍ɛ̍ le̍ wa̍?

²⁷Lɛ̄ŋndē vēsɛ̍i̍le̍ bɛ̍ndūle̍ŋ bīl ve᷅ ho̍ō le̍ le̍ŋ, ō nɛ̄ɛ̍nɛ̍ pɔ̍ɔ̍līāā yɛ̍ le̍ŋ, mbō tōsa̍ mī bīllo̍ vīl lo̍?

²⁸Ā chē ni᷅ŋ pīɔ̍ɔ̍ a̍ fi̍nyāa̍? Mɔ᷄m chu̍ chū ho̍ō wo̍, chɔ̍m ndɔ̍ ya̍ fi̍nyā ve̍lū ndu̍ wo̍.

²⁹Chɔ̍m ndɔ̍ ya̍ kāla̍ ve̍lū mɛ̄ŋmā ŋ̄kpūŋgba᷄ŋ ndo̍. Mɔ᷄m chu̍ chu̍ ho̍ō lɛ̄ŋ o̍ fo̍ndāŋ īhūēī bɛ̄ndōo̍, mbō sīmnu᷄ŋ mɛ̍ŋmā ŋ̄kpūŋgba᷄ŋ ndo̍ ā chē ni᷅ŋ ndu̍ a̍ kālāa̍?

³⁰Ō nɛ̄ɛ̍nɛ̍ to̍sā yɛ̍ mī mɛ̄ŋnda̍ŋ mā līīma̍ŋ kpu̍ŋgbɛ̄i̍ mī mā kēndū pe᷅ŋ? Nɛ̄ɛ̍nɛ̍ to̍sā yɛ̍, mī mɛ̄ŋnda̍ŋ o̍ pēe̍ mɛ̄ŋmā īhɛ᷄llo̍ mā līīma̍ŋ mī mā kēndū māā pōū?

³¹Cho̍o̍bū, lōōŋ ku̍nda᷄ŋ cho̍ o̍ ha̍la̍a̍ tɛ̄ɛ̄ŋ bāa̍ pīlɔ̍ɔ̍ wo̍ŋ, ā nɔ̄lā mā yi̍i̍ mu̍ŋ nāa̍ pi᷅lɛ̍? Ā nɔ̄lā mā ti̍mbi̍ yōōle̍ sa̍a̍ lōōŋ ku̍ndāla̍ŋ ŋ̄ pīlɔ̍ŋ bāa̍ pīlɔ̍ɔ̍ wo̍ŋ?

³²Ā nɔ̄lā mā wa̍ wa̍llo̍ a̍ lōo̍ŋ, mī ŋ̄ wa̍ fūlāa̍ a̍ te̍le̍ŋnda̍ ŋ̄ nɔ̍ le̍ fūlāa̍ la̍ŋ? Ā nɔ̄lā mā to̍sa̍ wa̍llo̍ a̍ lōōŋ, ku̍ndā cho̍ bā lūāŋndo̍ wo̍ŋ?

³³Nyɛ᷅m cho̍ o̍ ha̍la̍a̍ ni᷄ŋ ndo̍ŋ, ā sīnā sa̍wāla̍ ŋ̄ cho̍ lēbɛ̄ŋgu̍ la̍ŋ? Ā nɔ̄lā mā ke̍ nyɔ̄ɔ̍ŋ o̍ chi̍e̍ēŋndo̍ chōo̍ sa̍wāla̍ wa̍ā le̍nde̍ mī lā tūsi̍ŋ le̍bɛ̍ŋgu̍?

³⁴Ā nɔ̄lā mā di̍mu̍l ha̍la̍ hūmbōo̍ mbō yɔ᷄ŋ pīɔ̍ɔ̍, mī pīɔ̍ɔ̍ bālu̍ nu̍m kpo̍u̍?

³⁵Ā nɔ̄lā mā vēm nyɛ̄ ŋūāla̍lɛ̍ī lēta᷅ŋndo̍ mbō kūɛ̄ īnɛ̍, mbō mīīŋgu̍ nu̍m o̍ ībūŋ mbō hu᷄ŋ nyu̍nā nu̍m le̍ nāa̍ ŋ̄ yēēma̍ ndu̍ vɛ̄lɛ̄ mbō kūɛ̄ wa̍?

³⁶Ō nɛ̄ɛ̍nɛ̍ chɔ̍m yɛ̄ ha̍la̍ hūmbōo̍ mɛ̄ɛ̍ o̍ yɔ̍ŋgū pi̍ɔ̍ɔ̍ yɛ̍? Ō nɛ̄ɛ̍nɛ̍ chɔ̍m yɛ̄ mɔ᷄mndo̍ mɛ̄ɛ̍ ō chu̍chū yɛ̍?

³⁷Nɛ̄ɛ̍nɛ̍ nɔ̍ yɛ̄ kɔ̄l kālo̍o̍ mbō chɔ᷄m ha̍la̍ hūmbōo̍ mɛ̄ɛ̍ o̍ cho̍ bōllē pīlɛ̍ yɛ̍? Ō nɛ̄ɛ̍nɛ̍ nɔ̍lā yɛ̍ mbō mūli̍ ha̍la̍ hūmbōo̍ mbō tāla̍ pīɔ̍ɔ̍ lɛ̄ŋ,

³⁸mī chu̍ndo̍o̍ bīīla᷅ŋ na̍a̍ pi᷅lɛ̍ mbō kēndū pe᷅ŋ?

³⁹Tē tāmbi̍llo̍ wa̍ a̍ yīa̍a̍ŋ pɛ̍ ā nɔ̄lā mā ke̍ ndu̍ nyɛ̄ o̍ di̍ā wo̍? Tāmbi̍līāā fɔ̍ŋndu̍a̍a̍ tē yīa̍a̍ŋ mā wa̍ nda̍ nɛ̄īyo̍ pɛ̍,

⁴⁰mā wa̍ īhīni̍ o̍ būūlūla̍ ndāla̍ŋ ni᷄ŋ, ɔ̄ɔ̄ mā wa̍ īhīni̍ mɛ̍ŋgɛ̄lāa̍ le̍ vīsī nda̍ chō chɔ̄ mā de᷄l ndu̍ chōo̍ wo̍, ā nɔ̄lā mā ke̍ nda̍ nyɛ̄ nda̍ dīā mā hīni̍ kɔ̄l lo̍?

⁴¹Yōūwāā bɛ̄ndūāā tīŋīa̍a̍ ba̍lū ha̍ā wa̍, tē yīa̍a̍ŋ mā wa̍ nda̍ nɛ̄īyo̍ pɛ̍, mā wa̍ bālɔ̄ɔ̍ le̍ nyɛ̄ nda̍ dīā wo̍, mī chūāūwāā ndāa̍ wa̍ cha᷄ŋndo̍ o̍ ya̍ lo̍, ō nɛ̄ɛ̍nɛ̍ ke᷅ yɛ̍ nda̍ nyɛ̄ dīa̍a̍?