Read Southern Kisi Cho̍o̍bū 39 Bible Online

Cho̍o̍bū 39 - Southern Kisi bible

Cho̍o̍bū 39

¹Ā sīnā te̍le̍ŋ chūīŋāā ba̍ndi̍la̍a̍ ā kūām o̍ wɔ̄sīo̍o̍ ni᷄ŋ ndo̍? A̍ lo̍ ni᷅ŋ īsīsi̍ mi̍ kīa̍llo̍ kūām nu̍m o̍ hɔ̄l?

²Ā sīnā mɛ̄ɛ̍ vīsīa̍a̍ ha̍ā ā chīī pa̍ŋgo̍ŋ a̍ yo᷄lta̍ŋ yɛ̍? Ā sīnā te̍le̍ŋnda̍ vīsīa̍a̍ ha̍ā ā kūām o̍ wɔ̄sīo̍o̍ ni᷄ŋ nda̍ŋ?

³Vīsīa̍a̍ ha̍ā tē ō pīlɛ̍ wa̍ kōmɔ̄ɔ̍ pɛ̍, ā sīnā te̍le̍ŋ o̍ bi̍a̍mnūŋ lɛ᷅ŋ le̍ kōmɔ̄ɔ̍ wo̍?

⁴Vīsīa̍a̍ ha̍ā tē ā kōm pɛ̍, dīmīo̍o̍ nu̍a̍ā mī chūāūwāā ndāā ka̍ŋ ā kēndū dīāllo̍ŋ, mī nda̍ bɛ̍ɛ̍ a̍ si̍mnu̍ŋ vi̍sīa̍a̍ a̍ bā ndā. O̍ ko̍ŋ, ā mɛ̄i̍ kālāa̍ ndāa̍ lo̍ŋ ā kūɛ̄nu᷄ŋ la̍chi̍, ndu̍yɛ̍ ā mi̍i̍ŋgū lɛ̍ nda̍ o̍ ībūŋ te̍.

⁵Sōfɛ̍li̍a̍a̍ yōndūa̍a̍ ke̍lāŋ ha̍ā, bā nda̍ yēēmā le̍ kɔ᷄ŋnda̍ŋ ndo̍ ko̍ni̍ nda̍ kūānūŋ ni̍ wa̍, ya̍ Mɛ̍lɛ̄ka̍ ma̍l nda̍ o̍ bā ndāa̍ chōo̍ ni̍, ma̍ wā bālɔ᷄ŋ ko̍ŋ le̍nde̍.

⁶Mi̍ lo᷅ o̍ ko̍ŋ mi̍ ke᷅ nda̍ lɛ̄ŋndē po̍lte̍ŋ māā nāa̍ ndāā cha̍lāā, mi̍ kɛ̍sī nda̍ o̍ fo̍ndāŋ bīl vi᷅l ko̍ŋ te̍ wo̍ ma̍ wā lo̍ŋ.

⁷Mā wa̍ la̍nda̍ŋ a̍ wāŋndā chīe̍e̍ya̍, ā tu̍i̍ī lɛ̍ ŋ̄wāŋndā chīe̍e̍ bɔ̍ɔ̍lūū le̍, ā tu̍i̍ī lɛ̍ mī wāŋnda̍ wa̍ nda̍ dēŋūl le̍ nda̍ wa̍li̍ to̍sāl te̍.

⁸Sōfɛ̍li̍a̍a̍ ha̍ā ō pēmbūŋ bɛ̄ndo᷄ŋ chōo̍ nda̍ kūā di̍o̍la̍ŋ ni̍. Lo̍ŋ nda̍ kūā bi᷅l pūīyāā kɛ̄ndɛ̄ kɛ̍ndɔ̄ɔ̍ nūūvīa̍a̍ ni̍.

⁹Cho̍o̍bū, ā nɔ̄lā mā to̍sa̍ mī chīi̍yo̍ tōsa̍l nu̍m wa̍llo̍? Ā nɔ̄lā mā bīī ndu̍ mā kūɛ̄ a̍ ndu̍ nāa̍ ŋ̄ māndā chɔ̍lūāā nūmnda̍ wa̍ mbō lɔ᷄l lo̍ŋ bɛ̍ɛ̍ le̍ nyūmnda̍ŋ mā pīlɛ̍?

¹⁰Ā nɔ̄lā mā bīī vīsīo̍o̍ ho̍ō mā ba̍a̍ ndu̍ yōōle̍ŋ mbō vēēla̍l nu̍m o̍ chīɛ̄ī nūmnde̍ ni᷄ŋ? Ɔ̄ɔ̄, mbō ku᷄ŋ nu̍m bīllo̍ o̍ chīɛ̄ī nūmnde̍ ni᷄ŋ?

¹¹Ā nɔ̄lā mā ti̍i̍nda̍ŋ vi̍sīo̍o̍ ho̍ō le̍ mɛ̄ɛ̍ o̍ cho̍ vīsī kpāāyā yɛ̍, le̍ mbō tōsa̍l nu̍m wa̍llo̍?

¹²Ā nɔ̄lā mā to̍sa̍ mbō vīlu̍l nu̍m ba̍a̍līi̍ŋ nu̍mndo̍ŋ a̍ wi̍tīi̍yo̍ŋ, mbō chūūŋgi̍a̍a̍ tɔ̄lɔ̄ɔ̄ nu᷄m ku̍llo̍ o̍ fo̍ndāŋ ŋ̄ nɛ̄ī tɔ̍lɔ̄ɔ̄ nūmndo̍ wo̍?

¹³So̍ni̍kɔ̄nɔ̄ɔ̍ tɔ̄ɔ̄līa̍a̍ pīla̍ o̍ tɔ̍ɔ̍līāā ku᷅mba᷅ŋndā nɔ̄la̍ŋ lɔ̄ɔ̍ ni̍, kɛ̍ ō nɔ̍lā mbō chɛ᷄ŋ cho̍o̍ mɛ̄ɛ̍ kōwɔ̄ɔ̍ ō chāŋ nu̍a̍ā chōo̍ cho̍o̍ mbō wa̍ bālɔ̄ɔ̍ o̍ hūēīye̍ ni᷄ŋ yɛ̍ le̍.

¹⁴So̍ni̍kɔ̄nɔ̄ɔ̍, tē ō dɔ̄ū pɛ̍, ō hi̍nī o̍ pēltālāŋ chōo̍ le̍, mɛ̄īyo̍ la̍ŋ lɛ̄ŋ ndo̍ŋ, mbō kūɛ̄nu᷄ŋ mī pāa̍le̍ŋ le̍ kōma̍ tu̍u̍lū la̍ŋ mī la̍ŋ pi̍la̍ la̍ fa̍a̍si̍a̍a̍.

¹⁵Ndu̍yɛ̍ būūla᷄ŋ bɛ̍ɛ̍ ve᷅ ndu̍ māā nyɛ̄ chō la̍ŋ kōmā yɔ̄nɔ᷄ŋ, ɔ̄ɔ̄ vīsī chō la̍ŋ kōmā nɛ̄ī mbō pēsi̍ la̍ŋ te̍.

¹⁶Mɛ̄īyo̍ la̍ŋ lɛ̄ŋ ndo̍ŋ mbō tōsa̍ māā ō cho̍ bɛ̍ɛ̍ ndu̍ le̍ dɔ̍ū la̍ŋ te̍. Būūla᷄ŋ ve᷅ ndu̍ bɛ̍ɛ̍ mbō yīya̍ŋ māā sāŋgā fo̍ndōo̍ le̍ o̍ sa̍ŋga̍ŋ te̍.

¹⁷Kāni̍ fo̍ndōle̍, ya̍ Mɛ̍lɛ̄ka̍ I̍ ke̍ ndu̍ kɔ̄l kālu̍ ko̍ŋ te̍. I̍ ke̍ ndu̍ tāāsi̍ o̍ tāāsi̍ sīnāa̍ īsɔ̄ɔ̍ pɛ̍ŋgu̍ le̍.

¹⁸Kɛ̍ tē yōūwo̍ ho̍ō yīŋga̍ a̍ kīlta̍ŋ pɛ̍, wāna̍ cho̍ o̍ so̍o̍ chōo̍ wo̍ bɛ̍ɛ̍ ō si᷅m ndu̍ o̍ hɔ̄l a̍ kīlta̍ŋ te̍.

¹⁹Cho̍o̍bū, nu᷄m ke̍ su̍a̍a̍ kpāāyā bɛ̍ndū nda̍ nɔ̄ ko̍ŋ ndo̍ ni̍? Yīīŋīī vīlɛ̄ī bɛ̄ndūīī kēŋ nda̍ o̍ lākɔ̄ɔ̄ nu̍m to̍o̍si̍a̍a̍ di̍ ni̍?

²⁰Ā nɔ̄lā mā to̍sa̍ mī su̍a̍a̍ ā hūūlu̍ mɛ̄ɛ̍ so̍o̍nu̍a̍a̍ ā hūūlū nu̍a̍ā yɛ̍? A̍ nɔ̄lā mā to̍sa̍ mī so̍o̍ wa̍ kpɔ̄ɔ̄ndāa̍ mī sīōōŋnde̍ bīī wāŋnda̍?

²¹Tē su̍a̍a̍ wa̍ kɔ̄la̍ŋ o̍ chɔ̄ūwo̍ pɛ̍ mā bɛ̄ɛ̄ndi̍a̍ŋ le̍ kīlta̍ŋ, tē wānā che᷅ nda̍ lɛ̄ŋnde̍ŋ wūsūŋīa̍a̍ pɛ̍ āā wāa̍ wāŋnda̍ chō ni̍. Tē ā ma̍l le̍ kɔ̄la̍ŋ o̍ chɔ̄ūwo̍ pɛ̍, ā lō ko̍ mā chɛ᷄ŋ chōo̍ a̍ kīlta̍ nda̍ wā a̍ kpāāyā bɛ̍ndōo̍ la̍ŋ.

²²Chīŋūa̍ŋ tu̍ŋ wānā tu̍ɛ̍ī i̍wo᷅ku̍ wo᷅ku̍e̍i̍ pūa̍a̍ o̍ lākɔ̄ɔ̄ o̍ bɔ̄lɔ̄la̍ŋ ni᷄ŋ ni̍. Ba̍lta̍ŋ lā wā īŋūāla̍lɛ̍ī ŋūāla̍lɛ̍īye̍ o̍ pāa̍le̍ŋ. Ndu̍yɛ̍ sīōōŋīī bɛ̍ɛ̍ ve᷅ su̍a̍a̍ ha̍ā le̍. Mɛ̄ɛ̍ mɛ̄ɛ̍ sɔ̍ŋgɔ̄ɔ̍ tūūlu̍, ā mu̍līŋ te̍.

²⁴Ā wā hu̍u̍lōo̍ īpu̍lu̍lu̍ pu̍lu̍lu̍e̍i̍ kpe̍e̍kpe̍i̍. Tē bu̍lu̍ chɔ̄ūwo̍ sōō ni᷅ŋ pɛ̍, ā si᷅m ndɛ̍ le̍, lāūwo̍ tu̍ŋ nda̍ wā ni᷅ŋ īkpe̍lu̍ kpe̍lu̍e̍i̍ ni̍.

²⁵Tē ā tūēī bu̍lu̍ chɔ̄ūwo̍ pɛ̍, ā lō nu̍a̍ā mā sōō ba̍kō a̍ īhɛ̄ū hɛ̄ū nda̍ wā ve̍. Chɔ̄ūwo̍ lō la̍nda̍ŋ mā tūēī ndu̍ pɔ̍ɔ̍ chūŋ ō lō la̍nda̍ŋ mā tūēī wānāa̍ cho̍ so̍vɛ̄i̍ya̍ bōlle̍ wa̍ dēŋīo̍o̍.

²⁶Cho̍o̍bū, nu᷄m ke᷅ ko̍ya᷄ŋndo̍ tāāsi̍ o̍ cha᷅ŋ cho̍o̍ cho̍o̍ mbō kūɛ̄nu᷄ŋ ba᷅ tōūwo̍ wo̍ ni̍?

²⁷Nu᷄m di̍mūl ko᷅wɔ̍ɔ̍ le̍ hēlɔ̄ɔ̍ chōo̍ cho̍o̍ o̍ ha̍la̍a̍ ni᷄ŋ ni̍? Nu᷄m vi̍ām nda̍ wāa̍ŋnde̍ tāŋgūllo̍ o̍ pēmbūŋ vīlɛ̄ŋ bɛ̄ndo᷄ŋ chōo̍ ni̍?

²⁸Kōwɔ̍ɔ̍ mbō tāŋgu̍l wāa̍ŋndē ndɔ̄le̍ŋ o̍ pōūtā vīlɛ̄īla̍ŋ chōo̍ pɔ̍, nāa̍ nyɛ̄ o̍ nyɛ̄ yɔ̍nūŋ a̍ ndu̍ le̍ wa̍.

²⁹Lo̍ŋ o̍ wa᷅ ni̍ mbō mɛ̄ɛ̄ndīāŋ kɔ̍ɔ̍lī kɔ̄ɔ̄lī, le̍ nāa̍ o̍ cho̍ vīsī vīlɛ̍i̍yo̍ chɔ̄ wa̍.

³⁰Ndu̍yɛ̍ dīmīo̍o̍ nu̍a̍ā mā chē vīsī vīlɛ̍i̍yo̍, nda̍ kpo̍u̍ mā kōōndi̍āŋ mā kūɛ̄ lo̍ŋ. Chūāūwāā ndūa̍a̍ kōo̍ma̍ vīsī vīlɛ̍i̍yo̍ nda̍ kōl ni̍.