Read Southern Kisi Cho̍o̍bū 4 Bible Online

Cho̍o̍bū 4 - Southern Kisi bible

Cho̍o̍bū 4

¹O̍ ko̍ŋ kɔ̍ɔ̍lī, mi̍ Ɛ̄līfa̍a̍sī, Cho̍o̍bū chāa̍ŋ ndɔ̍ fu̍la̍ Tɛ̍māŋ chi̍e̍e̍ wo̍ ō dīmūl Cho̍o̍bū māā,

²Cho̍o̍bū, wānā su̍a̍ā nāa̍ nūm chu̍a̍ a̍ do̍o̍nūŋ tu̍mbe̍ le̍? Kɛ̍ I̍ nɔ̍lā mī me̍i̍ a̍ he̍ī le̍, mɛ̄ɛ̍ mī so̍ō.

³Cho̍o̍bū, wānāā bɔ̄ɔ̍ bɔ̍ɔ̍ mi̍ nyɛ̄ pālāa̍ ō kōmāl nda̍, nu̍m si̍la̍ nda̍ ni̍. Wānāā nda̍ a̍a̍ nɔ̍ lɛ̍ kpāāyā o̍ kpāāyā le̍ wa̍ ma̍ lūēī nda̍ yōōmūa̍ŋ.

⁴Tē wāŋndo̍ ndu̍ o̍o̍ be̍ndu᷄ŋ pɛ̍ mbō de᷄l, nūm nūm o̍o̍ mi̍ŋgī ndu̍ o̍ nɛ̄ī ni̍. Wānāā nda̍ a̍a̍ nɔ̍ lɛ̍ māyōōmū o̍ māyōōmū le̍ wa̍ ma̍ mīŋgī nda̍ sīmī yi̍.

⁵Kɛ̍ nūm nūm mɛ̄ɛ̍ nyɛ̄ pālāa̍ ō kōma̍l nu̍m, vɛ᷅ a̍ nɔ̍la̍ mā bi̍u̍nu̍ŋ te̍? Mɛ̄ɛ̍ la̍ ko̍ma̍l nu̍m, vɛ᷅ ma̍ tāmbū kɔ̄l nu̍a̍ā?

⁶Ā nɔ̄ bɛ̄ɛ̄le̍ŋ le̍ Mɛ̄lɛ̄ka̍, vɛ᷅ a̍ do̍ū ti̍i̍nda᷄ŋndo̍ o̍ ndu̍ ni̍ŋ te̍? Ā chō sa̍kpō Mɛ̄lɛ̄ka̍ o̍ hɔ̄l, a̍ nɔ̍ sɔ᷅ŋ o̍ sɔ̄ŋ te̍, vɛ᷅ a̍ ve᷅ le̍hɔ̍l o̍ nɛ̄ī māā ō chō nu̍m mālā le̍?

⁷Lo̍o̍nu̍ŋ ndɔ̍ Cho̍o̍bū. Ā chē ni᷅ŋ wāna̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wo̍ mbō sɔ̄la̍ dɛ̍nɛ̍ pa̍lāa̍? Ā chē ni᷅ŋ wāna̍ cho̍ sa̍kpō Mɛ̄lɛ̄ka̍ o̍ hɔ̄l lo̍ mbō sɔ̄la̍ tɛ̄ɛ̄mbūūwo̍?

⁸Nyɛ̄ ya̍ I̍ si̍nā wo̍ cho̍ ni̍, wānā o̍ wānā nyɛ̄ ŋ̄ sāŋ ndo̍ ndu̍ ŋ̄ kūā ni̍. Tē a̍ wa̍a̍ yɔ̄ŋ wɔ̄ɔ̍ŋndo̍ pɛ̍, ɔ̄ɔ̄ mā tɔ̄l dɛ̍nɛ̍ wɔ̍ɔ̍ŋndo̍, ndu̍ ŋ̄ kūā ni̍

⁹Wānāā dɛ̍nɛ̍ wɔ̍ɔ̍ŋāā wāā nu̍a̍ā tē Mɛ̄lɛ̄ka̍ yōōmu̍ pɛ̍ fu̍ū ō tɛ̄ɛ̄mbu̍u̍ nda̍ a̍ hūēīyīī ndūɛ̍i̍. Te̍ o̍ dɔ̄ɔ̄nu᷄ŋ tu̍mbe̍ pɛ̍ ō tɛ̄ɛ̄mbu̍u̍ nda̍.

¹⁰Wānāā dɛ̍nɛ̍ wɔ̍ɔ̍ŋnda̍ mā kūŋgu̍li̍a̍ŋ, ndu̍yɛ̍ mā pɛ̄ɛ̄li̍a̍a̍ wāŋnda̍ chōo̍ māā lākpɔ̍kūŋ. Kɛ̍ mī Mɛ̄lɛ̄ka̍ nɔ̄la̍ mbō yīmi̍ nda̍ chīŋndo̍ŋ o̍ lāsōndō, mbō chīi̍ kpāāyāla̍ ndāla̍ŋ.

¹¹O̍ ko̍ŋ, mī kpɔ̍kūŋāā kpāāyāā bɛ̍ndūa̍a̍ ha̍ā ā sɔ̄la̍ pīɔ̍mnda̍ŋ le̍ nyɛ̄ dīāā lēpɛ̄ŋndo̍. Ndu̍yɛ̍ chūāūwāā ndāa̍ kpo̍u̍ mā sɛ̄ŋi̍ŋ.

¹²Pāa̍le̍ pi᷅lɛ̍, mi̍ tu̍ɛ̍ī mi̍ dīōmndo̍ ō wa̍ sūɛ̍i̍ nāa̍ ya̍ chu̍a̍ tōōlō pɔ̍, I̍ wa̍ dīōmndo̍ tūēīyɔ̄ɔ̍ sūɛ̍i̍ ya̍ o̍ lānī yu̍nɛ̍ɛ̍ bɛ̍ndū.

¹³Sūɛ̍i̍ he̍ī o̍ lɔ̄mā sɔ̄la᷄ŋ ni᷄ŋ i̍ yɔ̍nu̍ŋ ya̍ ni̍, lɔ̄mā sɔ̄lāāmā īsīōōŋnda̍ŋ pīla̍ ya̍ I̍ wa̍ sɔ̄llo̍ ni̍, a̍ te̍le̍ŋ wāŋnda̍ ā hīāū nu̍a̍ā o̍ lūa̍a̍ŋ yi᷅kpi̍ wo̍.

¹⁴Mi̍ sīōōŋīī bɛ̄ndūe̍i̍ ī bīī ya̍, mi̍ nyi̍i̍yā kpa̍kpā. Dīāllo̍ŋ kpo̍u̍ mi̍ ŋ̄ kūāndu᷄ŋ ya̍ mi̍si̍mi̍si̍.

¹⁵Mi̍ hūēīye̍ ī kēī ya̍ hɔ̄lla̍ hūl fu᷅. Mi̍ tɔ̍nyɔ̍ŋ ŋ̄ chōŋ ya̍ lēkɔ̄ɔ̍ kpo̍u̍, a̍ sīōōŋīī bɛ̄ndūi̍i̍ bi̍ī ya̍ ve̍.

¹⁶Mi̍ cha̍nu᷄ŋ nyɔ̍ɔ̍ ya̍ o̍ hɔ̄l īsīsi̍. Mi̍ ki̍ndī le̍ mī che᷅ nyɔ̄ɔ̍ ho̍ō, kɛ̍ I̍ bi̍i̍ ndu̍ bīlā le̍. Nyɔ̄ɔ̍ wa̍ le̍nde̍ o̍ me̍i̍yāā do̍ŋ do̍ŋ, mi̍ tu̍ɛ̍ī mi̍ dīōmndo̍ ō nyūnā āā,

¹⁷“Wāna̍ chi̍o̍o̍ ō nɔ̄lā pa̍ mbō wa̍ sa̍kpō mbō hīōū Mɛ̄lɛ̄ka̍? Wāna̍ chi̍o̍o̍ ō nɔ̄lā pa̍ mbō wa̍ ō dīāndāā mbō hīōū wāna̍ to̍o̍si̍a̍a̍ ndu̍ wo̍?

¹⁸Mɛ̄lɛ̄ka̍ bu̍ɛ̍i̍yāā ndūa̍a̍ cho̍ chōo̍ cho̍o̍ wa̍ bɛ̍ɛ̍ ō lāāla̍ŋ a̍ nda̍ le̍. Ki̍i̍la̍a̍ ndūa̍a̍ bɛ̍ɛ̍ kɛ̍sɛ̍ kɛ̍sɛ̍, mbō sāālu̍ŋ bi̍o̍ndɔ᷄ŋnda̍ŋ o̍ nda̍ ni᷄ŋ.

¹⁹Tē Mɛ̄lɛ̄ka̍ ō chūa̍ wɔ̄ pɛ̍ ka̍ŋ le̍nde̍, ɔ̍ɔ̄ ni᷅ŋ nyɛ̄ yōōmāā o̍ to̍o̍si̍a̍a̍ a̍ bā ndɔ̄ɔ̍ wo̍, nyɛ̄ o̍ to̍o̍si̍a̍a̍ a̍ pūūlōo̍ wo̍, ō kāāŋgūa̍a̍ ā nɔ̄lā mā tɛ̄ɛ̄mbu̍u̍ wo̍?

²⁰Wāna̍ chi̍o̍o̍, mbō wa᷄ yōōmū māā dīi̍lɛ᷅ŋ, kɛ̍ lɔ̍ɔ̍pa̍ mī pāa̍le̍ŋ lē de᷄l ō vīŋnu᷄ŋ. Ō ve᷅ kɔ᷅l te̍, mī yōōmū ndɔ̄ɔ̍ ō chūū le̍ fɛ̍ɛ̍ŋ a̍ fɛ̍ɛ̍ŋ.

²¹Ndu̍yɛ̍ wāŋnda̍ ha̍ā mā vī le̍nde̍, ā nɔ᷅ si̍nā pɛ̄ŋgo̍o̍ a̍ Mɛ̄lɛ̄ka̍ o̍kɔ̄ɔ̄ le̍.”