Read Southern Kisi Cho̍o̍bū 40 Bible Online

Cho̍o̍bū 40 - Southern Kisi bible

Cho̍o̍bū 40

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ nāa̍ Cho̍o̍bū chu̍a̍, mbo̍ dīmūl ndu̍ āā,

²“Cho̍o̍bū, nu̍m si̍mūl ya̍ Mɛ̍lɛ̄ka̍ kpu̍lu̍ŋgūma̍ bɛ̄ndōo̍ ni̍, mā nu̍u̍wa̍ bīōndɔ᷄ŋnda̍ŋ o̍ ya̍ ni̍ŋ? Tē ā nɔ̄lā pɛ̍ mā kɔ̍ɔ̍sa̍ a̍ ya̍ Mɛ̍lɛ̄ka̍, mɛ̄ɛ̍ mu̍li̍ wɔ̍ nyu̍u̍nīāālā ya̍ I̍ cho̍ nu̍m nda̍ŋ.”

³O̍ ko̍ŋ, mi̍ Cho̍o̍bū di̍mūl Mɛ̄lɛ̄ka̍ Ya̍a̍wɛ̄ɛ̄ āā,

⁴“Ōo̍ Mɛ̄lɛ̄ka̍, I̍ cho̍ nyɛ᷅ o̍ nyɛ̄ nu̍m o̍ hɔ̄l te̍. I̍ nɔ̍lā mī mu̍li̍ nyūūnīāālā nūmnda̍ŋ te̍ Mɛ̄lɛ̄ka̍. Ndu̍yɛ̍ ba̍kō bɛ̍ɛ̍ a̍ tu̍i̍ī lɛ̍ ya̍ mī so̍ō le̍.

⁵Nyɛ̄ ya̍ I̍ so̍ō wo̍ ō chō ō bɔ̄ɔ̍. Nyɛ̄ o̍ nyɛ̄ cho̍ lɛ̍ ya̍ o̍ sōndō mī so̍ō le̍.”

⁶O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ Cho̍o̍bū chu̍a̍ o̍ hūēīyīī bɛ̄ndūe̍i̍ ni᷄ŋ, mbo̍ dīmūl ndu̍ māā,

⁷bɛ̍ɛ̍ndi̍a̍ŋ ni̍ko̍ māā wānā pɔ̍nɔ̍, mu̍li̍ nyūūnīāālā ya̍ I̍ cho̍ nu̍m nda̍ŋ.

⁸Cho̍o̍bū, a̍ ye̍e̍ma̍ mā pɛ̍ɛ̍sa̍ ya̍ māā I̍ se̍ndu̍ le̍? A̍ ye̍e̍ma̍ mā ya̍a̍la̍ ya̍ māā I̍ nɔ̍ di̍ le̍, nu̍m nɔ̍ di̍ ni̍?

⁹Ā nɔ̄ kpāāyāa̍ māā ya̍ Mɛ̄lɛ̄ka̍? Ā nɔ̄lā mā de̍ŋi̍ māā lēta᷅ŋ, mɛ̄ɛ̍ ya̍ Mɛ̍lɛ̍ka̍ dēŋī yɛ̍?

¹⁰To̍sa̍ wɔ̍ i̍sɔ̍ɔ̍ mɛ̄ɛ̍ wāna̍ nɔ̍ kpāāyāa̍ mbo̍ nɔ̄ tɔ̍ɔ̍ wo̍ ō tōsā i̍sɔ̍ɔ̍ yɛ̍. To̍sa̍ wɔ̍ i̍sɔ̍ɔ̍ i̍ chɔ᷅m māā ā chō wānā bɛ̍ndū, ndu̍yɛ̍ mi̍ wāŋnda̍ kpo̍u̍ a̍ wa᷅ nu̍m bɛ̄ɛ̄le̍ŋ kīo̍o̍ ve̍.

¹¹Dɔ̍ɔ̍nu̍ŋ ndɔ̍ tu̍mbe̍ a̍ wānāa̍ chu̍a̍ŋnu̍ŋ ha̍ā nda̍ pi̍la̍ ā bɛ̄ndū wa̍, mā tu̍si̍ nda̍ tōōlō.

¹²Tu̍si̍ wɔ̍ wa̍nāā yōŋgāā bɛ̍ndūa̍a̍ tōōlō, ndu̍yɛ̍ wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍ mā tɛ̍ɛ̍mbu̍u̍ nda̍.

¹³Di̍u̍ wɔ̍ nda̍ kpo̍u̍, mā chɔ̍ nda̍ nāa̍ nda̍ nɔ̍lā lɛ̍ mā fūla̍ fɛ̍ɛ̍ŋ a̍ fɛ̍ɛ̍ŋ te̍ wa̍.

¹⁴Tē a̍ nɔ̍la̍ pɛ̍ mā to̍sa̍ mu᷅ŋ kpo̍u̍, ya̍ Mɛ̍lɛ̄ka̍ pīla̍ fɛ̍lɛ̍ŋ cho̍ nu̍m sāŋgālā māā ā chō wāna̍ kpāāyā, ndu̍yɛ̍ mī chɛ̍l māā dīāllūŋ nūm ka̍la᷄ŋ to̍sa̍ ni̍ ma̍ yām.

¹⁵Cho̍o̍bū, yi̍ya̍ŋ ndɔ̍ a̍ mālōo̍, vīsīo̍o̍ ho̍ō bɛ̍ɛ̍ ya̍ Mɛ̍lɛ̄ka̍ to̍o̍si̍a̍a̍ nu̍m ndo̍ ko̍ni̍ to̍o̍si̍a̍a̍ ndu̍ ni̍. Ndu̍yɛ̍ ndu̍ bɛ̍ɛ̍ bīllo̍ o̍ di̍ā ni̍ mɛ̄ɛ̍ nāūwo̍ dīā nu̍a̍ā bīllo̍ yɛ̍.

¹⁶Kɛ̍ vīsīo̍o̍ ho̍ō ō chō vīsī tɔ̍ɔ̍ma̍ bɛ̄ndū. Kpāāya̍ cho̍ ndu̍ o̍ ŋ̄dīāllo̍ ō chō ō bɔ̄ɔ̍.

¹⁷Tē ō sīmi̍ lōmnde̍ŋ pɛ̍, kālo̍o̍ wānā cha᷅ ko̍ āā yɔ̄m kālā ka̍lā bɛ̄ndōo̍ ni̍. Vīsīŋ cho̍ ndu̍ o̍ pēlo̍ŋ ndo̍ŋ ŋ̄ kālā kpo᷅ke̍ bɛ̍ndū.

¹⁸Pāālā ndɔ̄la̍ŋ wānā cha᷅ ko̍ āā būlɔ̍ŋsīi̍ye̍ ni̍. Pēlūŋ ndɔ̍ŋ kālo̍o̍ wānā cha᷅ ko̍ āā chīli̍ŋnde̍ ni̍.

¹⁹Vīsī o̍ vīsī kpāāyā cho̍ o̍ chi̍e̍ēŋndo̍ chōo̍, mī wānā tu̍u̍ ndu̍ a̍ vīsīo̍o̍ ho̍ō le̍. Ndu̍yɛ̍ ya̍ wa᷅na̍ to̍o̍si̍a̍a̍ ndu̍ wo̍, ya̍ pīlɛ̍ kpe̍ nɔ̍lā ni̍ mī di̍ī ndu̍ a̍ mūɛ̍i̍.

²⁰Vīsīo̍o̍ ho̍ō o̍ pēmbūŋ bɛ̄ndo᷄ŋ chōo̍, nāa̍ vīsīa̍a̍ pīsūl la̍ lo̍ŋ o̍ ku̍ā di̍o̍la̍ŋ ni̍.

²¹Bɔ̄ɔ̄la̍ ŋ̄yɔ̄la̍ŋ lēbɛ̄ŋgu̍ o̍ ku̍ā hi̍ni̍la̍ŋ ni̍. Bīl vīlɛ̄i̍ wa᷅ ho̍ō o̍ hūŋ māmɛ̄ŋndo̍ ni᷄ŋ ndo̍ lēni᷄ŋ o̍ vi̍a̍ŋnūŋ ni̍.

²²Bɔ̄ɔ̄lā ŋ̄yɔ̄lā bɛ̄ndūla̍ŋ a̍ yɔ̄mīi̍ wa᷅ he̍ī o̍ pēēla̍ pɔ̍mbɔ̄la̍ŋ kɔ̄ŋgɔ̍ ve̍, lēbɛ̄ŋgu̍ o̍ ku̍ā lu̍a̍a̍ŋ ni̍.

²³Mɛ̄ɛ̍ mɛ̄ɛ̍ mɛ̄ŋnda̍ŋ mā wa᷄ īkpōku̍ kpo̍ku̍e̍i̍ ndu̍ chōo̍, sīōōŋīī bi̍ī ndu̍ le̍. Chɔ̍ɔ̍dāŋ nda̍ŋ mā wa̍ bɛ̍ɛ̍ ndu̍ hɔ̄lla̍ lɔ̄ɔ̍ ō sa̍a̍lāŋ te̍.

²⁴Wānā o̍ wānā nɔ̍lā mā bīī vīsīo̍o̍ lē, ā yɔ᷄ŋ bɛ̍ɛ̍ ma̍ ye̍ŋ ndu̍ yāŋɔ̄ɔ̄le̍ŋ, ō he̍ī le̍.