Read Southern Kisi Cho̍o̍bū 41 Bible Online

Cho̍o̍bū 41 - Southern Kisi bible

Cho̍o̍bū 41

¹Cho̍o̍bū, ā nɔ̄lā mā chu̍a̍ Līvīa̍a̍tāŋ,[5] vīsī bɛ̄ndū pīo̍o̍ o̍ do̍li̍ŋnde̍? Ā nɔ̄lā mā yi̍i̍ vīsīo̍o̍ ho̍ō sōndōo̍ a̍ yōōle̍ŋ?

²Ā bīī vīsīo̍o̍ ho̍ō mā bu̍li̍ ndu̍ kpɛ̄i̍ mi᷄ŋnde̍ mā ba̍a̍ ndu̍ yōōle̍ŋ? Ā bīī ndu̍ mā ba̍a̍ ndu̍ do̍li̍ŋnde̍ o̍ tāāyōo̍?

³Ā bīī vi̍sīo̍o̍ ho̍ō mbō nyɔ̄ɔ̄lu̍ nu̍m, mbō sōō sɔ̄ɔ̍ŋ kɛ̍ndɔ᷄ŋ nāa̍ nūm chu̍a̍ le̍ mā tūīīnu̍ŋ ndu̍ īnyīɛ̍ɛ̍ mā ma̍l ndu̍?

⁴Vīsīo̍o̍ ho̍ō nɔ̄lā mbō tōsa̍ chɛ̄la᷅ŋndo̍ a̍ nūm le̍ mbō wa̍ bu̍ɛ̍ī nu̍m wa̍li̍ le̍ fɛ̍ɛ̍ŋ a̍ fɛ̍ɛ̍?

⁵Ā nɔ̄lā mā pi̍su̍l a̍ vīsīo̍o̍ ho̍ō mɛ̄ɛ̍ chūāāmbūa̍a̍ pīsūl nu̍a̍ā a̍ yōū chūa̍a̍ yɛ̍? Ā nɔ̄lā mā ba̍a̍ ndu̍ yōōle̍ŋ mā ba̍lu̍ a̍ ndu̍ bu̍ɛ̍i̍yāā nūm a̍ la̍a̍ndūa̍a̍ o̍ hɔ̄l?

⁶A̍ ko̍ma̍l ni᷅ŋ wānāā yɔ̄ɔ̄yāa̍ vīsīo̍o̍ ho̍ō pīsīo̍o̍? A̍ ko̍ma̍l ni᷅ŋ wānāā pīsīāā ŋ̄vīsīa̍a̍ ma̍ wā vīsīŋ ndɔ̄ɔ̍ŋ kīlī kīlīo̍o̍ le̍ pīsīo̍o̍?

⁷Ā nɔ̄lā mā vi̍i̍ vi̍i̍ vīsīo̍o̍ ho̍ō a̍ ba̍lta̍ yɔ̍ɔ̍yāāla̍ŋ mā dīī ndu̍, ɔ̄ɔ̄ mā chūkū ndu̍ bōlle̍ŋ a̍ chīŋɔ̍le̍ŋ?

⁸Ō cho̍ wɔ̍ sɔ̍ɔ̍ŋ kpo̍u̍ le̍, bāa̍ bɛ̍ɛ̍ yɔ̍ɔ̍ wɔ̍ mā pi̍la̍ŋ ndu̍, tē ō yīŋga̍ a̍ nūm pɛ̍, a̍ de᷅l lɛ̍ bɛ̍ɛ̍ kɔ᷅l le̍ ī wāā le̍nde̍ to̍sā le̍.

⁹Tē wānā che᷅ vīsīo̍o̍ ho̍ō pɛ̍ nyɔ᷅, sīōōŋnde̍ bi̍ī nu̍m ni̍, kɔ̄l de᷅l nu̍m bɛ̍ɛ̍ le̍ ndu̍ sīmūl te̍.

¹⁰Tē vīsīo̍o̍ ho̍ō dɔ̄ɔ̄nu᷄ŋ tu̍mbe̍ pɛ̍ mbō kūŋgu̍la̍ŋ, wānā o̍ wānā nɔ̍lā mbō si᷄m ndu̍ o̍ hɔ̄l te̍.

¹¹Ō nɛ̄ɛ̍nɛ̍ si̍mūl lɛ̍ ndu̍ mī wānā ko̍ŋ ō lo̍ yōōmū? Wānā o̍ wānā cho̍ o̍ chi̍e̍ēŋndo̍ chōo̍ mā nɔ̍la̍ mā si̍mu̍l vīsīo̍o̍ ho̍ō le̍.

¹²I̍ chɔ᷅m ndɔ̍ nu̍m a̍ vīsīo̍o̍ ho̍ō o̍kɔ̄ɔ̄ mɛ̄ɛ̍ o̍ cho̍ vīsī tɔ̍ɔ̍ma̍ bɛ̄ndū, ndu̍yɛ̍ mbo̍ wā vīsī kpāāyā yɛ̍.

¹³Vīsīo̍o̍ ho̍ō kōōŋgo̍ ndɔ̄ɔ̍ wānā o̍ wānā nɔ̍lā ndu̍ pīɔ̄lɔ̄ɔ̄ le̍. Wānā cho̍ mbō nɔ̍lā kōōŋgo̍ ndɔ̄ ko̍ŋ būlī le̍.

¹⁴Wānā o̍ wānā cho̍ mbō nɔ̄la̍ vīsīo̍o̍ ho̍ō sōndōo̍ kānyā le̍. Chīŋu᷄ŋ cho̍ ndu̍ o̍ sōndō wo̍ŋ, tē wānā che᷅ mu̍ŋ pɛ̍ sīōōŋnde̍ bi̍ī nu̍m ni̍.

¹⁵Kēēŋgēla̍ cho̍ ndu̍ o̍ kɔ̄ɔ̄ la̍ŋ kālo̍o̍ wānā cha᷅ ko̍ āā pōūwo̍ ni̍, ndu̍yɛ̍ lā bīīla᷅ŋ kpi̍ŋ kpi̍ŋ.

¹⁶Ō pīlɛ̍ bɛ̍ɛ̍ cho̍ o̍ ma̍lāā chāa̍ŋ ndɔ̍, mī hūēīyīī lūɛ̄ī bɛ̍ɛ̍ le̍.

¹⁷Lā bīīla᷅ŋ kpi̍ŋ kpi̍ŋ, wānā nɔ̍lā mā ya̍wa̍ bɛ̍ɛ̍ o̍ pi᷅lɛ̍ le̍.

¹⁸Vīsīo̍o̍ ho̍ō, tē ō kpīsi̍ŋa̍ pɛ̍, tɛ̄ɛ̄ŋgūlā yīŋnde̍ŋ fūlāa̍ ndu̍ o̍ tɛ̄ɛ̄ŋgūlā mi᷄ŋnda̍ŋ. Hɔ̄ltā ndɔ̄la̍ŋ dīūwɔ̄ɔ̍ wānā che᷅ pɛ̍ āā dɛ̄ŋgūlta̍ŋ ni̍.

¹⁹Tē ō kānya̍ sōndōo̍ pɛ̍, yīŋnde̍ŋ kīōlōo̍ ndu̍ o̍ sōndō, mī lē sɛ̄ŋi̍ŋ mɛ̄ɛ̍ yīŋnde̍ŋ lē wā nu̍a̍ā sānde̍i̍, mī tɛ̍ŋgɛ̍ tɛ̍ŋgɛ̍la̍ŋ lā hūūlū yɛ̍.

²⁰Mɛ̄ɛ̍ nda̍ wā nu̍a̍ā bīl nyāma̍lɛ̍i̍yo̍ lōmɔ̄ɔ̍ mī ku᷄mnde̍ wa̍ ītūkpā tūkpɛ̄i̍ yɛ̍, le̍nde̍ ku᷄mnde̍ fūlā ndu̍ o̍ lāmīli̍ŋ ni̍.

²¹Tē ō yōōmu̍ pɛ̍ fu̍ū yīŋnde̍ŋ sānde̍i̍ wu᷅m, yīŋnde̍ŋ kīōlōo̍, ndu̍yɛ̍ hūēīyīī ndūɛ̍i̍ kpāāyāa̍ pīla̍ i̍ nɔ̍ ni̍.

²²Kɛ̄si̍i̍ ndūɛ̍i̍ wāŋnda̍ chɔ̄ɔ̍ ndi̍ nyɔ᷅, mī sīōōŋnde̍ bi̍ī nda̍.

²³Dīāllūŋ ndɔ̄ɔ̍ŋ ŋ̄ kālā kpo᷅ke̍ bɛ̍ndū. Vīsīŋ ndɔ̄ɔ̍ŋ ī pīlɛ̍ bɛ̍ɛ̍ cho̍ i̍ma̍lāā chāa̍ŋ ndɔ̍ le̍.

²⁴Kɔ̄l ndɔ̄ɔ̍ ō kālā kpo᷅ke̍, kālo̍o̍ wānā cha᷅ ko̍ āā pōūwo̍ ni̍.

²⁵Tē ō yīŋga̍ pɛ̍, wānāā kpāāyāā bɛ̍ndūa̍a̍ kpo̍u̍ sīōōŋnde̍ bīyɔ̄ɔ̍ nda̍, dīāllo̍ŋ mī ŋ̄ kpɛ̄li̍ nda̍ tu᷅.

²⁶Ā lɔ̄wa̍ ndu̍ bɛ̍ɛ̍ a̍ īmɔ̄ɔ̄ mūɛ̍i̍ lu̍e̍ī le̍. Ā vi̍ɔ̍ ndu̍ bɛ̍ɛ̍ a̍ ba̍l, kɛ̄lɛ̄ŋgāā a̍ lēchīŋɔ̍, ɔ̄ɔ̄ a̍ nyɛ̄ o̍ nyɛ̄ chēle̍ŋ, bōlīo̍o̍ bɛ̍ɛ̍ ā bo̍lī ndu̍ le̍.

²⁷Nyɛ̄ o̍ nyɛ̍ cho̍ ō tōōsīāā a̍ chīli̍ŋnde̍ ŋ̄ cho̍ nyɛ᷅ o̍ a̍ ndu̍ le̍. Ā chā bɛ̍ɛ̍ ko̍ būlɔ̍ŋsīi̍ye̍ āā yɔ̄m sīōvɛ̍i̍yo̍ ni̍.

²⁸Ā wa̍ ndu̍ bɛ̍ɛ̍ vi̍i̍ vīīyo̍ a̍ chīŋūa̍ŋ ō nye̍e̍nūŋ te̍. Yālāā nda̍ wā ndu̍ vīī vīīyo̍ a̍ pōūtā fa̍āŋnda̍la̍ŋ te̍, ō chā ko̍ bɛ̍ɛ̍ āā pēī ve̍sɛ̍i̍ye̍ cho̍ ndu̍ chīɛ̄ɛ̄lɔ᷄ŋndo̍ chōo̍ ni̍.

²⁹Tē lɔ̄ɔ̍ nda̍ wa̍ ndu̍ a̍ yɔ̄mīī bīŋgīe̍i̍ ni̍, ō tūɛ̄īnūŋ ko̍ bɛ̍ɛ̍ āā fu̍e̍ēŋnde̍ nda̍ chō ndu̍ chūchɔ̄ɔ̍ chōo̍ ni̍. Tē ō chē pɛ̍ mā wa̍ ndu̍ vīī vīīyo̍ a̍ ba̍lta̍ŋ, māmɔ̄ɔ̍ o̍ ma᷅m ni̍.

³⁰Kēēŋgēla̍ cho̍ ndu̍ o̍ dēmbōo̍ lēbɛ̄ŋgu̍la̍ŋ, lā sɛ̄ɛ̄mbīāā si̍o̍mbu̍ si̍o̍mbu̍. Tē ō wa̍ sāsɔ᷄ŋndo̍ o̍ lōōlīo̍o̍ ni᷄ŋ pɛ̍, kɔ̄la̍ŋ a̍ lōōlīo̍o̍ tɛ̄ɛ̄ndīa̍a̍ mɛ̄ɛ̍ nāūwa̍ ā kūā nu̍a̍ā ā wāa̍ yɛ̍.

³¹Tē ō wa̍ kɔ̄la̍ŋ o̍ mɛ̄ŋmā īhɛ᷄lla̍ŋ bɛ̄ŋgu̍ pɛ̍, mɛ̄ŋnda̍ŋ kɔ̄la̍ŋ a̍ kālāŋīa̍ŋndo̍ kpu̍ūye̍, mī mā hūūlū mɛ̄ɛ̍ chūɛ̄īya̍ŋ mā wā ŋo̍lɔ̄ɔ̍ nu̍a̍ā mī mā hūūlū pe̍su̍ pe̍su̍ yɛ̍.

³²Hīīyo̍ mbō kīnda᷅ŋ ndu̍ a̍ mākɔ̄ɔ̄ tu̍a̍ŋ bɛ̍ndū, mī nyɔ̄ɔ̍ dēndū ndu̍ a̍ mākɔ̄ɔ̄ fo̍.

³³O̍ chi̍e̍ēŋndo̍ chōo̍ kpo̍u̍, nyɛ̄ o̍ nyɛ̄ yōōmāā cho̍ mī wānā tu̍u̍ ndu̍ a̍ vīsīo̍o̍ ho̍ō le̍. Ndu̍yɛ̍ ō cho̍ nyɛ᷅ yōōmāa̍ nɔ̍ īsīōōŋ te̍ o̍ cho̍ le̍.

³⁴Nyāā yōōmāā tūa̍a̍ kpo̍u̍, ō chi̍nūŋ nda̍ o̍ hɔ̄l nyɛ̄ o̍ nyɛ̄ le̍. Ndu̍ cho̍ māsāa̍ le̍ nyāā yōōmāā tūa̍a̍ kpo̍u̍ ni̍.