Read Southern Kisi Cho̍o̍bū 42 Bible Online

Cho̍o̍bū 42 - Southern Kisi bible

Cho̍o̍bū 42

¹O̍ ko̍ŋ kɔ̍ɔ̍lī, mi̍ Cho̍o̍bū di̍mūl Mɛ̄lɛ̄ka̍ Ya̍a̍wɛ̄ɛ̄ āā,

²Ōo̍ Mɛ̄lɛ̄ka̍ Ya̍a̍wɛ̄ɛ̄, I̍ si̍nā māā kpāāyāa̍ kpo̍u̍ nu̍m o̍ bā o̍ cho̍ ni̍. Nyɛ̍ o̍ nyɛ̄ ŋ yēēma̍ le̍ tōsāa̍ pɛ̍ ā nɔ̄lā mā to̍sa̍ ndu̍.

³Nyɛ̄ kōŋ bɛ̍ɛ̍ ŋ̄ nyūna̍ ya̍ ni̍ māā, wāna̍ māāvɛ̄ɛ̍nɛ̍ ŋ̄ chō yɛ̄, nūm Cho̍o̍bū, nu᷄m si̍nā ho̍ō nyɛ̄ o̍ nyɛ̄ le̍ wo̍, mā si̍ka̍ a̍ tūūlā nīla̍ŋ? Ndu̍yɛ̍ māā lē kɛ̄ndɛ̍ī, nyɛ̄ o̍ nyɛ̄ ya̍ I̍ so̍ō, I̍ si̍nā ndu̍ pɛ̄ŋgu̍ le̍ Mɛ̄lɛ̄ka̍. Sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ ya̍ I̍ si̍nā bɛ̍ɛ̍ pɛ̍ŋgu̍ le̍ wo̍ŋ, mu̍ŋ wa̍ ya̍ fūlāa̍ o̍ sōndō ni̍.

⁴Le̍la̍ŋ bɛ̍ɛ̍ ŋ̄ dīmu̍l la̍ ni̍ māā ya̍ I̍ ya̍ŋ nu̍m nīla̍ŋ, mā nyu̍u̍ni̍a̍a̍ ya̍ mī mu̍li̍ nu̍m dīōm.

⁵Pāāndū tūēīyɔ̄ɔ̍ ko̍ni̍ ya̍ i̍i̍ tu̍e̍ī a̍ nūm o̍kɔ̄ɔ̄ ni̍ Mɛ̄lɛ̄ka̍, kɛ̍ I̍ che᷅ ni᷅ŋ nu̍m a̍ hɔ̄ltē nīle̍ŋ pɛ̍ɛ̍ŋ.

⁶Nyɛ̄ o̍ nyɛ̄ ya̍ i̍i̍ di̍mi̍ I̍ di̍mi̍ lɛ̍ le̍. Nyɛ̄ ko̍ŋ ya̍ I̍ cha̍l o̍ chu̍ndo̍o̍ ni᷄ŋ a̍ o̍ pūlta̍ŋ ni᷄ŋ ni̍ le̍ chɔ̄mndo̍ māā I̍ to̍sa̍ yɔ̄ŋ wɔ̄ɔ̍ŋndo̍ a̍ nūm.

⁷Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ sūɛ̍i̍ nāa̍ Cho̍o̍bū chu̍a̍ kpo̍u̍, mbo̍ dīmūl Ɛ̄līfa̍a̍sī, Cho̍o̍bū chāa̍ŋ ndɔ̍ chɛ̍ŋ Tɛ̍māŋ chi̍e̍e̍ wo̍, āā, “Nūm ni̍, chāāŋāā nūm a̍ ŋi̍ɔ̍ɔ̍ŋnda̍ ni̍, I̍ dɔ̍ɔ̍nu᷄ŋ tu̍mbe̍ a̍ nya̍, kāni̍ fo̍ndōle̍, nya̍ ya̍a̍ ki̍nɛ̍i̍ wānā o̍ wānā di̍mi̍ to᷅nya̍ cho̍ a̍ ya̍ o̍kɔ̄ɔ̄ wo̍ le̍. Bu̍ɛ̍ī nūu̍ Cho̍o̍bū ndu̍ pīlɛ̍ kpe̍ nɔ̍la̍ ni̍ mbo̍ dīmī tōnya̍ cho̍ a̍ ya̍ o̍kɔ̄ɔ̄ wo̍.

⁸Le̍la̍ŋ lā bīi̍ na̍ūwa̍ ā ŋɔ᷄mmɛ̍ū, a̍ sāa̍ fɔ̍ŋndu̍a̍a̍ ā ŋɔ᷄mmɛ̍ū, mī lā kūɛ̄ nāa̍ bu̍ɛ̍ī nūu̍ Cho̍o̍bū chu̍a̍, mī lā kɔ̍ so̍lī sa̍lā lūāmāa̍ o̍ ya̍ lo̍. Tē lā chīi̍ pɛ̍ kpo̍u̍ bu̍ɛ̍ī nūu̍ Cho̍o̍bū cho̍ pīɛ̄ī le̍ nya̍, ndu̍yɛ̍ I̍ cho̍ pīɛ̄īlē ndɔ̄le̍ŋ tūēīyɔ̄ɔ̄, mī ma̍l nya̍ le̍ nyɛ̄ nya̍ tōsa̍ wo̍, I̍ tu̍sī lɛ̍ nya̍ nyɛ̄ pālāā chōo̍ mɛ̄ɛ̍ nya̍ a̍a̍ nɔ̍ le̍ ndu̍ sɔ̄lāa̍ yɛ̍ le̍. Bu̍ɛ̍ī nūu̍ Cho̍o̍bū ndu̍ pīlɛ̍ kpe̍ di̍mi̍ tōnya̍ cho̍ a̍ ya̍ o̍kɔ̄ɔ̄ wo̍ ni̍, kɛ̍ nya̍ ki̍nɛ̍i̍ wānā pi᷅lɛ̍ bɛ̍ɛ̍ di̍mi̍ to᷅nya̍ kōŋ te̍.”

⁹O̍ ko̍ŋ, Ɛ̄līfa̍a̍sī ni̍, Bi̍li̍dāā ni̍, So̍fāā ni̍, ma̍ tōsā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ yɛ̍. Ndu̍yɛ̍ mɛ̄ɛ̍ Cho̍o̍bū pi̍ɛ̍i̍ le̍ nda̍ mi̍ Mɛ̄lɛ̄ka̍ mūlī pīɛ̄īlē ndɔ̄le̍ŋ.

¹⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ mi̍ŋgī vɛ̄lɛ̄ Cho̍o̍bū nɛ̄ŋī, mi̍ Cho̍o̍bū su᷅l mbo̍ hīāū sūl pāāndōo̍. Nyɛ̄ o̍ nyɛ̄ Cho̍o̍bū ndu̍ o̍o̍ nɔ̍, mi̍ Mɛ̄lɛ̄ka̍ Ya̍a̍wɛ̄ɛ̄ mi̍ŋgī mu̍ŋ sālā tīɔ̍ɔ̍ŋ ti̍ɔ̍ɔ̍ŋ tu᷅.

¹¹O̍ ko̍ŋ kɔ̍ɔ̍lī, pɔ̄mbūa̍a̍ Cho̍o̍bū wa̍ ni̍, bɛ̄ndāā ndūa̍a̍ ni̍, a̍ yēmāa̍ ndūa̍a̍, a̍ wānāā nda̍ a̍a̍ si̍īni̍āŋ pa̍a̍ndū nda̍ nda̍ā wa̍, ma̍ kūā Cho̍o̍bū yīlɔ̄ɔ̄. Ndu̍yɛ̍ mi̍ Cho̍o̍bū bɛ̍ɛ̍ndīāā nyɛ̄ dīāā kɔ̄l kɛ̄ndɔ̄ɔ̍, ma̍ dīā nda̍ nda̍ā lātūlu̍. O̍ ko̍ŋ kɔ̍ɔ̍lī, ma̍ yīl ndu̍ yīlɔ̄ɔ̄ dɛ̍nɛ̍ pa̍lāa̍, ma̍ nyɔ̄ɔ̄lū ndu̍ kɔ̄llo̍ ni᷄ŋ le̍ nyɛ̄ o̍ nyɛ̄ pālāā Mɛ̄lɛ̄ka̍ Ya̍a̍wɛ̄ɛ̄ o̍ ha̍ndu̍ ndu̍ chōo̍. Nda̍ kpo̍u̍ mi̍ wānā o̍ wānā bi̍ī nyɛ̄ sɔ̄lāā pɔ̄mbɔ̄ a̍ kēlɛ̄i̍ īko̍o̍līi̍ye̍ ma̍ kē Cho̍o̍bū.

¹²Mi̍ Mɛ̄lɛ̄ka̍ Ya̍a̍wɛ̄ɛ̄ o̍ mɛ̍ɛ̍lū Cho̍o̍bū sa̍lā dɔ̄wɔ̄ɔ̄, mi̍ Cho̍o̍bū su᷅l mbo̍ hīāū sūl pāāndōo̍. Mi̍ Cho̍o̍bū sɔ̍lā ni᷅ŋ sāa̍ wāa̍la̍ŋ tɔ̍ a̍ lā hīɔ̍ɔ̍lu̍ (14,000), a̍ nyɔ̍mi̍a̍a̍ wāa̍la̍ŋ lā ŋɔ᷄mpu᷅m (6,000), a̍ nāūwa̍ wāa̍la̍ŋ lā tīɔ̍ɔ̍ŋ (2,000), a̍ sōfɛ̍li̍a̍a̍ la̍a̍ndūa̍a̍ wāa̍ ō pīlɛ̍ (1,000).

¹³Mbo̍ sɔ̄lā vɛ̄lɛ̄ chūāūwa̍ ŋ̄wāŋ tɔ̍, pūa̍a̍ ā ŋɔ᷄mmɛ̍ū a̍ wāŋ lāāndūa̍a̍ ā yāa̍.

¹⁴Chūā ndɔ̍ tāso̍o̍ mbo̍ kē ndu̍ dīōla̍ŋ āā Chɛ̄mi̍māā, ō dīi̍ŋ ndɔ̄ɔ̍ āā Kɛ̄si̍yā, ō yāa̍ ndɔ̄ɔ̍ āā Kɛ̄lūɛ̄ŋ Ha̍pɔ̍kī.

¹⁵O̍ lɛ̄ŋndē lēŋ ni᷄ŋ ki̍nɛ̍i̍, wānā la̍nɔ̍ o̍ wānā la̍nɔ̍ ve̍ lo̍ŋ mī ndu̍ o̍o̍ si̍i̍ma᷅ŋ na̍ŋɔ̄ɔ̍ a̍ chūāūwāā ndūāā la̍a̍ndūāā kāŋ te̍. Ndu̍yɛ̍ nda̍ bɛ̍ɛ̍, mi̍ Cho̍o̍bū fi̍nyā ndā ke᷅ nda̍ nyɛ̄ ki̍ɔ̍ɔ̍ŋ kpɛ̍ kpɛ̍ mɛ̄ɛ̍ o̍ ke̍ yēmāa̍ ndāa̍ yɛ̍.

¹⁶O̍ ko̍ŋ kɔ̍ɔ̍lī, mi̍ Cho̍o̍bū chi̍ī vɛ̄lɛ̄ wɔ̄sīla̍ŋ kɛ̄mɛ̄ a̍ be̍le̍-hi̍ɔ̍ɔ̍lu̍ (40) ma̍lāŋ o̍ wu᷅. Ō lo̍ yōōmū mbo̍ chā chūāā ndūāā ma̍māā ku̍ndāla̍ŋ lā yāa̍ ku̍ndā tāso̍o̍, a̍ ku̍ndā dīi̍ŋ ndɔ̄ɔ̍ a̍ ō yāa̍ ndɔ̄ɔ̍.

¹⁷O̍ ko̍ŋ kɔ̍ɔ̍lī, mi̍ Cho̍o̍bū o̍ wu᷅, ō wa̍ ni᷅ŋ ō yūvɛ̍i̍ ku̍ndɛ̍ɛ̄ bɛ̄ndū.