Read Southern Kisi Cho̍o̍bū 5 Bible Online

Cho̍o̍bū 5 - Southern Kisi bible

Cho̍o̍bū 5

¹Cho̍o̍bū, ve̍e̍lu̍ wɔ̍ wa̍nā o̍ wānā lē mbō māla̍ nu̍m, tē wānā cho̍ nu̍m mālā Ki̍i̍la̍nɔ̍ Mɛ̄lɛ̄ka̍ kūɛ̍ɛ̍nɛ̍ ŋ̄ chō yɛ̄ mūli᷄ŋ nāa̍ ndu̍ ndu̍ mā nyu̍na̍ ndu̍ le̍ mālāa̍ mbō ya᷄ŋ lānī?

²Kɔ̄l tūūwo̍ mbō dīī dīɔ̄mndo̍. Nɛ̄īyɔ᷄ŋndo̍ mbō dīī wa᷅na̍ ki̍ndu̍ kɔ̍l te̍ wo̍.

³I̍ che᷅ ni᷅ŋ mi̍ dīɔ̄mndo̍ ō dīī dɛ̍nɛ̍ mi̍ nyɛ̄ o̍ nyɛ̄ wā ō kɛ̄ndɛ̄ a̍ ndu̍. Kɛ̍ o̍ lē pīlɛ̍ ni᷄ŋ kpe̍, mi̍ ha̍ndū nāa̍ ndūāā cha̍lāa̍ sēndi̍o̍o̍ chōo̍.

⁴Le̍ te̍le̍ŋ o̍ te̍le̍ŋ, yōōmūlā chūāūwāā ndūa̍a̍ lā cho̍ lɛ̍ o̍ bā ndā cho̍o̍ yɛ̍lɛ̍kɛ̍lɛ̍ɛ̍ le̍. Ā nɔ̍ lɛ̍ wānā o̍ wāna̍ su̍ŋgū le̍ nda̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ mbō sōō le̍ nda̍ le̍.

⁵Sāŋgā ndɔ̍ o̍ sa̍ŋgā o̍ chīɔ̄ɔ̄ŋ ndɔ̄ɔ̍ŋ ni᷄ŋ ndo̍, wānāā yīa̍a̍ŋ mā chō chōo̍ wa̍ nda̍ di̍ā sa̍ŋgā kōŋ ni̍. Tɔ̄lɔ̄ɔ̄lā pɔ̄mpɔ̍mbɔ̄la̍ lo᷅ bɛ̍ɛ̍ o̍ sāŋgāsāŋga̍la̍ŋ tɛ̄ɛ̄ŋ o̍ chīɔ̄ɔ̄ŋ ndɔ̄ɔ̍ŋ ni᷄ŋ nda̍ŋ, mā dīndi̍ la̍ŋ nūūwāa̍ pa̍ku̍. Wānāā lēhɔ̄llāā bɛ̄ndūa̍a̍ nda̍ di̍a̍ā su᷅ltā ndɔ̄la̍ŋ ni̍.

⁶Nyɛ̄ kīndīlāa̍ ko̍mā ho̍ō wāŋndo̍ wo̍, ō cho̍ wu̍lɔ̄ɔ̄ le̍ o̍ wu᷅l lɛ᷅ŋ te̍. Dɛ̍nɛ̍ pa̍lāā wāŋndo̍ ō sɔ̄lā ho̍ō wo̍, ō cho̍ lɛ᷅ŋ te̍ o̍ fu̍lā le̍.

⁷Wāna̍ chi̍e̍e̍ o̍ wāna̍ chi̍e̍e̍ ve̍lu᷄ŋ o̍ chi̍e̍ēŋndo̍ chōo̍, nyɛ̄ pālāa̍ chō le̍ nūm. Mɛ̄ɛ̍ yīŋnde̍ŋ lē pīɛ̄ndī nu̍a̍ā o̍ lē pīlɛ̍ ni᷄ŋ yɛ̍, le̍nde̍ nyɛ̄ pālāa̍ ō kēlēŋā wa᷅na̍ chi̍o̍o̍ dēlɔ̄ɔ̍ chōo̍ ni̍.

⁸Tē ya̍ i̍i̍ wa̍ nūm pɛ̍ Cho̍o̍bū, o̍ Mɛ̄lɛ̄ka̍ lo̍ ya̍ I̍ wa̍ mūli᷄ŋ ni̍. Mɛ̄lɛ̄ka̍ ya̍ I̍ wa̍ sūɛ̍i̍ nīi̍ mālɔ̄ɔ̄ o̍ bā ni̍.

⁹Sɔ̄ɔ̍ŋ kɔ̄ndɔ̄fi̍li̍ŋ Mɛ̄lɛ̄ka̍ tōsā wo̍ŋ, ŋ̄ nɔ̍lā mī sīna̍ mu̍ŋ pɛ̄ŋgu̍ le̍. Sɔ̄ɔ̍ŋ bɛ̍ndūŋ o̍ to̍sā wo̍ŋ, ŋ̄ chu̍ū chɔ̍m te̍.

¹⁰Mbō yɔ᷄ŋ pīɔ̍ɔ̍ o̍ chi̍e̍ēŋndo̍ ni᷄ŋ, mbō pɔ̄ɔ̄li̍a̍a̍ tɔ̄lɔ̄ɔ̄la̍ŋ o̍ chīɔ̍ɔ̍ŋ ni᷄ŋ kpo̍u̍.

¹¹Wānāa̍ tu̍si̍ŋ to̍o̍lō wa̍ mbō hēēlu̍ nda̍ te̍mā. Ndu̍yɛ̍ wānāa̍ cho̍ a̍ kɔ̄ltā tāmbɛ̍i̍la̍ŋ nda̍, mbō tōsa̍ mā dɔ̄ɔ̄nu᷄ŋ nya̍a̍le̍.

¹²Wānāā kāŋgālāa̍ mbō tɛ̄ɛ̄mbu̍u̍ tūūlā ndāla̍ŋ kpo̍u̍, Nyɛ̄ o̍ nyɛ̄ nda̍ tūū le̍ tōsāa̍ ā nɔ̍lā mā tōsa̍ ndu̍ le̍.

¹³Wānāa̍ chu̍a̍nu̍ŋ māā ā chō wānāā kɔ̄l kālu̍a̍a̍ bɛ̍ndū wa̍,

¹⁴īpāla̍ de᷅ŋ mī nyūmnda̍ŋ mā tōl le̍ nda̍. Pāa̍le̍ŋ yɔ̄nɔ᷄ŋndo̍ ko̍ni̍, mā lūɛ̄ī o̍ nyūmnda̍ŋ ni᷄ŋ.

¹⁵Kɛ̍ wānāā tāmbɛ̍i̍ya̍ nda̍ mī Mɛ̄lɛ̄ka̍ pīŋi̍ nda̍, wānāa̍ cho̍ sāŋgāa̍ wāŋnda̍ o̍ bā bɛ̄ŋgu̍ wa̍, nda̍ bɛ̍ɛ̍ mbo̍ pīŋī nda̍.

¹⁶Mbo̍ tōsā mi̍ wānāā tāmbɛ̍i̍ya̍ ā dūāū tīīnda᷄ŋndo̍ o̍ ndu̍ ni̍ŋ, ndu̍yɛ̍ mbo̍ kīnda̍ wānāā dɛ̍nɛ̍ wɔ̍ɔ̍ŋnda̍ sōndōla̍ŋ.

¹⁷Nya̍a̍lo̍o̍ chō le̍ wāna̍ Mɛ̄lɛ̄ka̍ ō mīŋgī ho̍ō o̍ nɛ̄īyo̍. Le̍la̍ŋ tē Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō mīŋgi̍ nu̍m o̍ nɛ̄ī pɛ̍, ta̍mbū kɔ̄l te̍.

¹⁸Mɛ̄lɛ̄ka̍ mbō bōōlu̍u̍ wānā, kɛ̍ mbō yīu̍ pāūvīī kēŋ, mbō yɔ̄ŋu̍l wānā, kɛ̍ mbō chīɔ̍u̍ nu̍m.

¹⁹Te̍le̍ŋnda̍ bɔ̍ɔ̍ bɔ̍ɔ̍, mbō chīīndi̍a̍a̍ nu̍m o̍ kpūndɛ̍la̍ŋ ni᷄ŋ, mɛ̄ɛ̍ mɛ̄ɛ̍ kpūndɛ̍la̍ŋ lā kōma̍l nu̍m.

²⁰A̍ te̍le̍ŋ yīmā bɛ̄ndūa̍ŋ mbō chīīndi̍a̍a̍ nu̍m, ndu̍yɛ̍ a̍ te̍le̍ŋ chɔ̄ūwo̍, mbō mānda̍ nu̍m ya̍a̍mɔ̍ɔ̍wa̍ di̍ī nu̍m te̍.

²¹Mbō mānda̍ nu̍m, wāna̍ di̍mī di̍ōmndā wɔ̄ɔ̍ŋnda̍ŋ a̍ nūm ndo̍ ō nɔ̍lā nu̍m te̍. Ā yɔ᷄ŋ bɛ̍ɛ̍ mī sɔ̍ŋgɔ̍la̍ŋ lā wa̍, mā wa̍ nyɔ̄ɔ̍ŋ tɛ̄ɛ̄mbūūwo̍, sīōōŋīī bi̍ī nu̍m te̍.

²²Sɔ̍ŋgɔ̄la̍ŋ lā wa̍ bɛ̍ɛ̍, mī wāŋnda̍ wa̍ nyɔ̄ɔ̍ŋ tɛ̄ɛ̄mbūūwo̍, ndu̍yɛ̍ mī yīmā bɛ̄ndūa̍ŋ mā wa̍, pɛ̄ɛ̄sāa̍ ŋ̄ pɛ̄ɛ̄sā mu̍ŋ kpo̍u̍ ni̍. Ndu̍yɛ̍ vīsīāā bīyāa̍ bɛ̍ɛ̍, sīōōŋīī bi̍ī nu̍m le̍ nda̍ le̍.

²³Pōūta̍ cho̍ bɛ̍ɛ̍ o̍ chīɛ̄ī nūmnde̍ ni᷄ŋ nda̍ŋ, ō pīlɛ̍ bɛ̍ɛ̍ ō nɔ̍lā mbō yɔ̄ŋu̍l nu̍m o̍ wa̍llo̍ ni᷄ŋ te̍. Ndu̍yɛ̍ vīsīāā yōndūa̍a̍ bɛ̍ɛ̍, mā wa̍ a̍ kɔ̄l nyūlū a̍ nūm.

²⁴Ā wānu̍ŋ ni̍ŋ o̍ tɛ̍ndīi̍ nu̍mndo̍ ni᷄ŋ o̍ ma̍ndāā yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ nu̍m te̍. Ā mɛ̄ɛ̄ndāŋ ni̍ŋ chɔ̍lūāā nūmnda̍, mā wa̍ ā chīŋāā sɔ̍dɔ̍, ō pīlɛ̍ bɛ̍ɛ̍ fe̍ŋāŋ ni̍ŋ le̍cho̍ō le̍.

²⁵Wānāa̍ fu̍lā ni̍ŋ o̍ pūlālē nūmnde̍ŋ chōo̍ wa̍, ā wā ni̍ŋ ta̍u̍ ta̍u̍. Chūāūwāā nūmnda̍ ā wā ni̍ŋ ha̍a̍a̍, mɛ̄ɛ̍ bīllo̍ ō chō nu̍a̍ā ō tīūwāā lɛ̄ŋ yɛ̍, le̍nde̍ nda̍ wā ni̍ŋ ni̍.

²⁶Mɛ̄ɛ̍ wi̍tīi̍yo̍ŋ ŋ̄ vēsā nu̍a̍ā nyɛ̄ kɛ̄ndɛ̄ kɛ̍ndɛ̄, mī ŋ̄ fūūlu̍u̍ te̍le̍ŋ ku̍a̍u̍wāā yɛ̍, le̍nde̍ ŋ̄ yūwā ni̍ŋ ku̍ndɛ̄ī ni̍ ma̍lāŋ ŋ̄ wū.

²⁷Cho̍o̍bū, ŋ̄ mɛ̄ɛ̄ndi̍a̍ŋ o̍ sɔ̄ɔ̍ŋ mu᷅ŋ ni᷅ŋ nyɛ᷅ kɛ̄ndɛ̄ kɛ̍ndɛ̄. Ŋ̄ chē māā tōnya̍ ŋ̍ cho̍ ni̍, le̍la̍ŋ nūm pi̍la̍ yi̍ya̍ŋ a̍ mu̍ŋ o̍kɔ̄ɔ̄, ŋ̄ chō mālāa̍ le̍ nūm.