Read Southern Kisi Cho̍o̍bū 6 Bible Online

Cho̍o̍bū 6 - Southern Kisi bible

Cho̍o̍bū 6

¹Mi̍ Cho̍o̍bū o̍ mu̍lī māā,

²nyɛ̄ pālāa̍ cho̍ ya̍ chōo̍ ki̍nɛ̍i̍ yo̍, tē ndu̍ o̍o̍ wa̍ nyɛ̄ hāndāā o̍ sēke̍lēi̍ cho̍o̍ pɛ̍ le̍ lūsu̍l ndɔ̄ɔ̍ sīnāa̍, sāŋgā o̍ sāŋga̍ cho̍ ya̍ chōo̍ mī wāna̍ a̍a̍ nɔ̍la̍ ndu̍ lāndɔ̄ɔ̄ o̍ sēke̍lēi̍ le̍ lūsu̍l ndɔ̄ɔ̍ sīnāa̍,

³ō lūsu̍l ō hīōū si̍o̍ōŋnde̍ o̍ pēe̍ mɛ̄ŋmā īhɛ᷄llo̍. Nyɛ̄ kōŋ nya̍ tūɛ̄ī ya̍ sūɛ̍i̍ nu̍a̍ā ni̍ māā dīɔ̄m, dīōm o̍ dīōm ko̍ o̍ fu̍la̍ ya̍ o̍ sōndō.

⁴Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō vīī vi̍i̍ ya̍ a̍ chīŋɔ̍ma̍ ndūa̍ŋ, mi̍ mā lūɛ̄ī ya̍ o̍ ŋ̄dīāl. Yi̍ndɔ̄mā chīŋɔ̍ma̍ ndūa̍ŋ mā tīu̍ ya̍ o̍ ŋ̄dīāl kpo̍u̍. Mɛ̄lɛ̄ka̍ pēi̍ ya̍ a̍ sīōōŋīī ndūɛ̄ī bɛ̍ndūe̍i̍.

⁵Sōfɛ̍lɔ̍ɔ̍ ve᷅ bi᷅llo̍ dīo̍o̍ mbō cha᷄ŋ a̍ yīa̍a̍ŋ te̍. Nāūwo̍ ve᷅ di̍o̍la̍ŋ mbō cha᷄ŋ le̍ nyɛ̄ dīāā lēpɛ̄ŋndo̍ le̍.

⁶Nyɛ̄ dīāā pa᷄ŋndo̍, tē a̍ do̍u̍ ndu̍ hɛ᷄lle̍ le̍ ō yēēlā nu̍m pa̍ o̍ sōndo̍? Pēltē sɔ̄ɔ̍le̍ ya̍u̍wāāle̍ŋ, nyɛ̄ hūmbū kōŋ lēni᷄ŋ, ō yēēlā nu̍m o̍ sōndo̍?

⁷Nyɛ̄ dīāā wāā le̍nde̍, yēēmɛ̍i̍ ndɔ̄ bi̍ī ya̍ bɛ̍ɛ̍ le̍. Mɛ̄ɛ̍ wāŋndo̍ ō wā nu̍a̍ā a̍ nāa̍ mī nyɛ̄ dīa̍a̍ ō fūla̍ ndu̍ chūŋ wɔ̄ɔ̍ŋndo̍ o̍ mīli̍ŋ yɛ̍, le̍nde̍ o̍ fu̍lā ya̍ chūŋ o̍ mīli̍ŋ ni̍.

⁸A̍a̍a̍, mī Mɛ̄lɛ̄ka̍ ndu̍ o̍o̍ mu̍li̍ ya̍ dīōm, mī Mɛ̄lɛ̄ka̍ ndu̍ o̍o̍ to̍sa̍l la̍ nyɛ̄ ya̍ I̍ nyu̍na̍ ndu̍ dīōm le̍ ndu̍ wo̍.

⁹Ko̍ŋ cho̍ ni̍, mī Mɛ̄lɛ̄ka̍ ndu̍ o̍o̍ chu̍a̍ yōōmū nūu̍, mī Mɛ̄lɛ̄ka̍ ndu̍ o̍o̍ chu̍a̍ bā ndɔ̄ɔ̍ mī ndu̍ o̍o̍ ke̍lū yōōmū nūu̍ kpa̍li̍,

¹⁰ya̍ i̍i̍ na᷅ŋ ni̍ŋ bɔ̍ɔ̍ kɔ᷅l. Tē ya̍ i̍i̍ si̍na̍ pɛ̍ māā ndu̍ o̍o̍ to̍sāl la̍ ni̍ŋ ke̍ŋ, mi̍ chē bɛ̍ɛ̍ mī nyɛ̄ nɛ̄īyāā bɛ̄ndōo̍ ō wā ya̍ chōo̍, kɛ̍ I̍ wa̍ hūūlū a̍ nya̍a̍lo̍o̍, kāni̍ fo̍ndōle̍, I̍ si̍nā māā kāni̍ bɛ̍ɛ̍, I̍ so̍li̍ wɔ̍ Mɛ̍lɛ̄ka̍ kāsīo̍o̍ dīōm mī kɛ̍ɛ̍ nyɛ̄ o̍ di̍mu̍l la̍ wo̍ tōsāa̍ le̍.

¹¹I̍ nɔ̍ lɛ̍ lēyōōmū o̍ lēyōōmū mī hi̍o̍ū lāchī a̍ wāa̍ yōōmū le̍. Ō yɛ̄ɛ̍nɛ̍ ya̍ I̍ nɔ̍ yɛ̄ vɛ̄lɛ̄ lēhɔ̄l o̍ nɛ̄ī le̍ ndu̍ mī hi̍o̍ū lāchī a̍ wāa̍ yōōmū?

¹²Bāā pōūwo̍ dīāllūŋ nūu̍ŋ ŋ̄ chō ni̍ māā I̍ si̍nāŋ nyɛ᷅ nɛ̄īyāā le̍? Bāā būlɔ̍ŋsīi̍ye̍ dīāllūŋ nūu̍ŋ ŋ̄ chō nī?

¹³I̍ nɔ̍ lɛ̍ kpāāyā o̍ kpāāyā mī nɔ̍la̍ ya̍ pi̍la̍ mālā le̍. Ndu̍yɛ̍ wānā o̍ wānā cho̍ mbō māla̍ ya̍ le̍.

¹⁴Wānā o̍ wāna̍ che᷅ chāa̍ŋ nu̍m o̍ nyɛ̄ pālāā wāā nu̍a̍ā ni᷄ŋ pɛ̍ ma̍ ma̍la̍ ndu̍, mɛ̄ɛ̍ wānā ko̍ŋ a̍ nɔ̍ i̍si̍o̍o̍ŋ le̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ le̍.

¹⁵Nya̍ chāāŋāā nīa̍a̍ lā hūi̍ ya̍ ko̍, mɛ̄ɛ̍ pēēla̍ pɔ̍mbɔ̄la̍ŋ lā nɔ̄ nu̍a̍ā wāŋnda̍ hūīyo̍ a̍ wɔ̄ɔ̄le̍ŋ yɛ̍.

¹⁶Pēēla̍ŋ nda᷅ŋ a̍ sīālte̍ŋ, mɛ̄ŋmā ndūa̍a̍ŋ tē mā nyūlu̍l pɛ̍ te̍i̍, mī mā sīmnu᷄l lu̍e̍ī kpu̍ŋgbɛ̄i̍, mi̍ mɔ᷄m i̍kpu̍ŋgbāa̍ kūmbū ma̍ kpu̍.

¹⁷Kɛ̍ a̍ te̍le̍ŋ hāŋgu̍llo̍, mī pēēla̍ŋ nda᷅ŋ lā lo᷄ pɛ̍, tē hāŋgu̍l bɛ̄ndōo̍ ō hīŋ ndɔ̍ɔ̍ pɛ̍, lā vēla̍ sɛ̍ɛ̍ŋ.

¹⁸Mī wānāā lēyākūa̍a̍ ba̍lū o̍ sōfɛ̍li̍a̍a̍ chōo̍ wa̍ ā lo̍ mɛ̄ŋnda̍ŋ ma᷅ŋ nūūvīa̍a̍ mā lāāsi̍a̍ŋ, mā lo̍ bālɔ̄ɔ̍ o̍ lɛ̄ŋndē po̍lte̍ŋ ni᷄ŋ mā vī.

¹⁹Wānāā lēyākūa̍a̍ ba̍lū o̍ sōfɛ̍li̍a̍a̍ chōo̍ wa̍ mā fūla̍ Tɛ̍mā mā hīŋ mɛ̄ŋnda̍ŋ ma᷅ŋ nūūvīa̍a̍. Mī ha̍ā fūla̍ Si̍ɛ̍bā mā hīŋ, ā wā yi̍ya᷄ŋndo̍ māā ā chō mɛ̄ŋnda̍ŋ sāālɔ᷄ŋ.

²⁰Wānāā lēyākūa̍a̍ ha̍ā mā hīŋ a̍ kɔ̍l kōŋ kpe̍e̍kpe̍i̍, māā ā chō hūnɔ̄ɔ̄ mɛ̄ŋnda̍ŋ sāālɔ᷄ŋ, kɛ̍ tē ā hīŋ pɛ̍ ā se̍e̍lūŋ nyɛ᷅ o̍ nyɛ̄ le̍, o̍ ko̍ŋ, mā tāmbu̍ lākɔ̄l, mī kɔ̄lta̍ŋ lā lāāsi̍a̍ŋ nda̍.

²¹Lā hūi̍ ya̍ ko̍ mɛ̄ɛ̍ pēēla̍ŋ nda᷅ŋ lā hūī nu̍a̍ā wāŋnda̍ yɛ̍. Lā chē nyɛ̄ pālāa̍ cho̍ ya̍ chōo̍ wo̍, mi̍ sīōōŋnde̍ mīīŋgū nya̍ bīyɔ̄ɔ̍.

²²Bāā nyūnāa̍ ya̍ I̍ nyu̍na̍ nya̍ ni̍ le̍ mī lā chūu̍ ya̍ kēla̍ŋ? Ɔ̄ɔ̄ bāā dīmūllo̍ ya̍ I̍ di̍mu̍l nya̍ ni̍ le̍ mī lā chūa̍ nyɛ̄ o̍ sūltā nyāla̍ŋ chōo̍ mī kɔ̍ lu̍ɛ̍ī lūɛ̄īyɔ̄ɔ̄ ni᷄ŋ ndo̍ le̍ ya̍?

²³Ɔ̄ɔ̄ bāā dīmūllo̍ ya̍ I̍ di̍mu̍l nya̍ ni̍ le̍ mī lā chīīndi̍a̍a̍ ya̍ ya̍a̍mɔ̍ɔ̍wa̍a̍ nīa̍a̍ o̍ ba̍, ɔ̄ɔ̄ le̍ mī lā yɔ̄ŋgu̍ nyɛ̄ le̍ ya̍ bāŋāa̍ wānāa̍ cho̍ ya̍ nyɛ̄ pālāa̍ tūsīo̍o̍ chōo̍ wa̍ o̍ ba̍?

²⁴A̍wā, mɛ̄ɛ̍ lā pɛ̄ɛ̄ku̍ ya̍, I̍ ya᷅ŋ ndɔ̍ nya̍ nīla̍ŋ. Lā chɔ᷄m ya̍ bīōndɔ᷄ŋnda̍ nīla̍ŋ.

²⁵Dīōmndā tōnya̍la̍ŋ a̍ kpāāyā la̍ hu᷅ŋ ni̍ le̍ mālāa̍. Kɛ̍ nya̍ nya̍ dīōmndā nya̍ chō ya̍ dīmūllo̍ la̍ŋ ki̍nɛ̍i̍, lā cho̍ di̍ōmnda̍ mi̍ŋgi̍ wānā o̍ nɛ̄ī le̍.

²⁶Lā chūa̍ ya̍ māā wāna̍ nɔ̍ lɛ̍ tīīnda᷄ŋ o̍ tīīnda᷄ŋ te̍ wo̍ ya̍ I̍ cho̍ ni̍, ndu̍yɛ̍ māā nyɛ̄ o̍ nyɛ̄ ya̍ I̍ cho̍ dīmīo̍o̍ hūēīye̍ ko̍ni̍ o̍ cho̍ ni̍. Lā nɔ̄ o̍ kɔ̄l lā nɔ̄lā mī lā mīŋgi̍ wānā wa̍ā le̍nde̍ o̍ nɛ̄i̍?

²⁷Nya̍ lā bīī kɔ᷅llo̍ mī lā wūu̍ kōo̍ŋ nya̍ wāŋnda̍ le̍ wāna̍ ku̍ā a̍ vīi̍ nɔ̍ fi̍nyā le̍ wo̍. Lā bīī kɔ᷅llo̍ mī lā pīsi̍ chāa̍ŋ nyā le̍ nyɛ̄ sɔ̄lāa̍.

²⁸Kɛ̍ yāndi̍i̍ lā tōfa̍ wɔ̍ ya̍ hɔ̄lla̍ chi̍ŋ, I̍ cho̍ wa᷅na̍ di̍mi̍ lāchōōwā le̍.

²⁹Le̍la̍ŋ I̍ cho̍ nya̍ nyɔ̄ɔ̄lōo̍ mī lā mūli̍ŋ, mī lā pɛ̄ŋgi̍ ka̍fālā wāā nu̍a̍ā tōsāa̍ a̍ ya̍. Lā mūli̍ŋ mī lā chɛ᷄l ndi̍ māā I̍ to̍sa̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍.

³⁰Lā tūēī ni᷅ŋ mī chōōla̍ŋ lā fūlā ya̍ o̍ sōndo̍? Lā nɔ̄ o̍ kɔ̄l, I̍ nɔ̍lā mī si̍na̍ nyɛ᷄ cho̍ dɛ̍nɛ̍ pa̍lāa̍ wo̍ le̍?