Read Southern Kisi Cho̍o̍bū 7 Bible Online

Cho̍o̍bū 7 - Southern Kisi bible

Cho̍o̍bū 7

¹Wāna̍ chi̍o̍o̍ wāa̍ yōōmū ō chō māchūāā mɛ̄ɛ̍ wāŋndo̍ ō wā nu̍a̍ā kpe̍ku̍ ka̍lā ka̍lā bɛ̄ndōo̍ tōsāa̍ yɛ̍. Mɛ̄ɛ̍ nda̍ chūā nu̍a̍ā wāŋndo̍ le̍ wa̍li̍ lēpāla̍a̍ le̍ mā pāāwa̍ ndu̍ yɛ̍, le̍nde̍ wāna̍ chi̍o̍o̍ pālɛ̍i̍ ndūɛ̍i̍ ī chō o̍ chi̍e̍ēŋndo̍ chōo̍ ni̍.

²Mɛ̄ɛ̍ chīɔ̍ɔ̍ ō wā nu̍a̍ā wa̍llo̍ o̍ pāa̍le̍ŋ mbō yēēma̍ pɛ̄ŋgīo̍o̍ o̍ wūndu̍le̍ŋ yɛ̍, le̍nde̍ wāna̍ chi̍o̍o̍ pālɛ̍i̍ ndūɛ̍i̍ ī chō o̍ chi̍e̍ēŋndo̍ chōo̍ ni̍. Mɛ̄ɛ̍ wāna̍ nda̍ chūā ho̍ō le̍ wa̍li̍ lēpāla̍a̍ wo̍ ō wā nu̍a̍ā pāāwā ndɔ̄ɔ̍ chūmndo̍ yɛ̍, le̍nde̍ pālɛ̍i̍ wāna̍ chi̍o̍o̍ ī chō ni̍.

³Pāŋgu̍ŋ Mɛ̄lɛ̄ka̍ ke᷄ ya̍ le̍ wāa̍ yōōmū o̍ chi̍e̍ēŋndo̍ chōo̍ wo̍ŋ, I̍ cho̍ŋnu̍ŋ yo̍o̍mū o̍ pāŋgu̍ŋ mu̍ŋ ni᷄ŋ fo̍ndō fu̍u̍. Īchɔ̄l o̍ īchɔ̄l, nyɛ̄ nɛ̄īyāā bɛ̄ndōo̍ o̍ chō ya̍ chōo̍.

⁴Tē I̍ hi̍ni̍ īchɔ̄l pɛ̍, nyūmnda̍ŋ mī mā bāndu̍ ya̍ o̍ hɔ̄l ha̍a̍a̍. Mī lɔ̍ɔ̍lu̍ mūlū mūlɔ᷄ŋndo̍ pi̍i̍ pi̍i̍ a̍ nyɛ̄ nɛ̄īyāa̍, pāa̍le̍ŋ sīɔ̍ɔ̍ ya̍ i̍ hi̍a̍ū ni᷅ŋ kēlēŋā yēēmā.

⁵Chāa̍ ā lūɛ̄ī ya̍ ni᷅ŋ ma̍ tīū ya̍ kɔ̄ɔ̍le̍ŋ kpo̍u̍. Pāūve̍ ī tīu̍ ya̍ kɔ̄ɔ̍le̍ŋ kpo̍u̍. Dīāllo̍ŋ ŋ̄ būūlu̍u̍ ya̍, mi̍ kūsu̍a̍ŋ mā wā ya̍ tāālīa̍a̍ kɔ̄ɔ̍le̍ŋ kpo̍u̍.

⁶Pālɛ̍i̍ nīi̍ o̍ chi̍e̍ēŋndo̍ chōo̍ ī kēle̍ŋa̍ bɔ̍ɔ̍ chu̍wɔ̄ɔ̍, mɛ̄ɛ̍ wānā lu̍a̍ā kōlāa̍ ō kēlēŋā nu̍a̍ā a̍ bo̍lo̍ ndɔ̄ lu̍a̍ā kōlāa̍ yɛ̍. Ndu̍yɛ̍ ī chūū le̍nde̍, I̍ nɔ̍ nyɛ᷅ o̍ nyɛ̄ ya̍ I̍ wa᷅ le̍hɔ᷅l o̍ nɛ̄ī le̍ ndu̍.

⁷O̍o̍ Mɛ̄lɛ̄ka̍, lo̍o̍nu̍ŋ māā yōōmū ya̍ I̍ nɔ̍ ho̍ō wo̍, hūēīyīī kāni̍ fo̍ndō fu̍u̍ ko̍ni̍ o̍ cho̍ ni̍. Le̍ fɛ̍ɛ̍ŋ a̍ fɛ̍ɛ̍ŋ I̍ sɔ̍lā lɛ̍ kɔ̄l nyūlōo̍ o̍ yōōmū nūu̍ ni᷄ŋ te̍.

⁸Su̍ŋ su̍ŋ ko̍ ŋ̄ chō ya̍ chɔ̄ɔ̍ ni̍, kɛ̍ te̍le̍ŋ cho̍ fūūlūū a̍ chi᷅ lɛ̍ ni̍ŋ ya̍ ni̍ŋ le̍. Ā mɛ̄ɛ̄ndāŋ ni̍ŋ le̍ ya̍ a̍ te̍le̍ŋ ko̍ŋ, kɛ̍ I̍ ku̍a̍ŋnūŋ ni᷅ŋ.

⁹Wāna̍ chi̍o̍o̍ tē ō kūɛ̄ ni᷅ŋ chi̍e̍e̍ pīɔ̍m pɛ̍, ō nɔ̍lā lɛ̍ mbō mīīŋgu̍ chi̍e̍ēŋ te̍. Mɛ̄ɛ̍ yu̍mbu̍ yu̍mbo̍o̍ ō fāŋāŋ nu̍a̍ā wānā chi᷅ lɛ̍ ndu̍ le̍, le̍nde̍ i̍ yɔ̍nūŋ a̍ ndu̍ ni̍,

¹⁰ō mi̍i̍ŋgū lɛ̍ o̍ ndu̍lo̍ chi̍ɛ̍ī ni̍ŋ te̍. Wānāa̍ nda̍ chīɛ̄ɛ̄li̍āŋ nda̍ bɛ̍ɛ̍ mā pūɛ̄ɛ̄nu̍ŋ a̍ ndu̍ o̍kɔ̄ɔ̄.

¹¹Le̍la̍ŋ I̍ nɔ̍lā mī me̍i̍ a̍ he̍ī le̍, mɛ̄ɛ̍ mī so̍ō. Kɔ̄l nūu̍ ō tāmbu̍ ō bɔ̄ɔ̍, mɛ̄ɛ̍ mī so̍ō. Mɛ̄ɛ̍ mī ŋɔ̍ɔ̍chi̍a̍ŋ a̍ nyɛ̄ kīndīlāa̍ cho̍ ya̍ chōo̍ wo̍ o̍kɔ̄ɔ̄.

¹²Mɛ̄lɛ̄ka̍, bāā pēe̍ mɛ̄ŋmā īhɛ᷄llo̍, ɔ̄ɔ̄ vīsī bɛ̄ndū pēe̍ mɛ̄ŋmā īhɛ᷄llo̍ ya̍ I̍ cho̍ ni̍, mā ha̍ndu̍ ya̍ hɔ̄lte̍ŋ kɔ̄ɔ̄lī mɛ̄ŋgɛ̄lāa̍ nu̍a̍ā?

¹³Tē I̍ hi̍ni̍ o̍ kpēle̍ nūu̍ chōo̍ pɛ̍ le̍ mī lɔ̍l, ɔ̄ɔ̄ mī hi̍ni̍ sīɛ̄ndi᷄ŋndo̍ le̍ mī pɛ̍ŋgi̍, I̍ wa᷅ yi̍ya᷄ŋndo̍ māā nyɛ̄ nɛ̄īyāa̍ cho̍ ya̍ chōo̍ wo̍ ō chō ti᷄ŋ pɛ̍ŋgī, mī sɔ̍la̍ ti᷄ŋ kɔ̄l nyɔ̄ɔ̄lāa̍.

¹⁴Kɛ̍ lɔ̄mā sɔ̄lāāma̍ to̍sā mī sīōōŋīī bɛ̄ndūe̍i̍ ī bīī ya̍ wa̍ŋ, ma̍ŋ ŋ̄ tōsa̍ ni̍ mī sɔ̍l. Sɔ̄ɔ̍ŋ sīōōŋīī bɛ̄ndūe̍i̍ ī bīī ya̍ le̍ mu̍ŋ ndo̍ŋ, mu̍ŋ ŋ̄ tōsa̍ ni̍ mī che᷅ o̍ yi̍lāŋnda̍ ni᷄ŋ.

¹⁵Pīɔ̍mndo̍ ndu̍ ya̍ I̍ hi̍a̍ū ye̍e̍mā a̍ wāa̍ yōōmū mī dīāllūŋ nu᷄ŋ ŋ̄ wa̍ o̍ sāŋgā wāā nu̍a̍ā ni᷄ŋ. Māā wāŋndo̍ ō sāa̍ ya̍ ko̍ bo̍lōla̍ŋ mbō dīī ya̍ o̍ fōōfōo̍ chōo̍.

¹⁶I̍ sa̍ŋga̍ a̍ yōōmōo̍. I̍ ye̍e̍ma̍ lɛ̍ mī wa̍ yōōmū fɛ̍ɛ̍ŋ a̍ fɛ̍ɛ̍ŋ te̍. Le̍la̍ŋ ma̍l ni᷅ŋ. Yōōmū nūu̍ nyɛ̄ fo̍ndō fu̍u̍ o̍ cho̍ ni̍.

¹⁷Vɛ̄ɛ̍nɛ̍ wa᷅na̍ chi̍o̍o̍ ō chō yɛ̍ mā ha̍ndu̍ ndu̍ hɔ̄lte̍ŋ kɔ̄ɔ̄lī nu̍a̍ā kpɛ̍? Vɛ᷅ mā ha̍ndu̍ wāna̍ chi̍o̍o̍ hɔ̄lte̍ŋ kɔ̄ɔ̄lī nu̍a̍ā?

¹⁸Īdīi̍ o̍ īdīi̍ mɛ̄ɛ̍ mā mɛ̍ɛ̍nda̍ŋ ndu̍, ndu̍yɛ̍ mā ke̍ ndu̍ tōfāa̍ pɛ̄ŋgu̍ o̍ pɛ̄ŋgu̍.

¹⁹A̍ fe̍ŋā ya̍ ni᷅ŋ bɛ̍ɛ̍ ti̍ŋ hɔ̄lte̍ŋ kɔ̄ɔ̄lī nyɛ̄ pɔ̄mbɔ̄, ɔ̄ɔ̄ mā ma̍l la̍ ni᷅ŋ bɛ̍ɛ̍ ti̍ŋ yɔ̄ndī mī me᷅l lēlɔ̄lū le̍?

²⁰Tē ō wa̍ pɛ̍ māā yɔ̄ŋ wɔ̄ɔ̍ŋndo̍ ya̍ I̍ to̍sa̍ a̍ nūm ni̍, yɔ̄ŋ wɔ̄ɔ̍ŋ su̍u̍ yɛ̄ɛ̍nɛ̍ ya̍ I̍ to̍sa̍ yɛ̍ a̍ nūm Mɛ̄lɛ̄ka̍, nūm wāna̍ ha̍ndū ho̍ō wāna̍ chi̍o̍o̍ hɔ̄lte̍ŋ kɔ̄ɔ̄lī mɛ̄ŋgɛ̄lāa̍ wo̍? Vɛ᷅ ma̍ sīīŋgūū ya̍ wānā tu̍sīāā nyɛ̄ pālāā chōo̍ le̍ te̍le̍ŋ o̍ te̍le̍ŋ? Wōlɔ̄ɔ̄lā lūsu̍lɛ̍i̍la̍ māāvɛ̄ɛ̄ ya̍ I̍ si̍mnu᷄ŋ yɛ̍ nāa̍ nūm chu̍a̍?

²¹Mɛ̄ɛ̍ a̍ nɔ̍lā mā ma̍l la̍ le̍ yɔ̄ŋ nī wɔ̍ɔ̍ŋndo̍ le̍? A̍ me̍lnūŋ ya̍ le̍ nyɛ̄ ya̍ I̍ to̍sa̍ wo̍ le̍? Ō bēndu̍ lɛ̍ a̍ te̍le̍ŋ te̍ mī hu̍ŋ kɔ᷅ o̍ pūūlōo̍ bɛ̄ŋgu̍. Ā mɛ̄ɛ̄ndāŋ ni̍ŋ le̍ ya̍ kɛ̍ a̍ se̍e̍lūŋ ya̍ ni̍ŋ te̍, I̍ ku̍a̍ŋnūŋ ni᷅ŋ.