Read Southern Kisi Cho̍o̍bū 8 Bible Online

Cho̍o̍bū 8 - Southern Kisi bible

Cho̍o̍bū 8

¹O̍ ko̍ŋ kɔ̍ɔ̍lī, mi̍ Bi̍li̍dāā, Cho̍o̍bū chāa̍ŋ ndɔ̍ fu̍la̍ Su̍a̍ā wo̍ ō dīmūl Cho̍o̍bū, māā,

²Cho̍o̍bū, ā chō wɔ̄ hīōūwɔ̄ɔ̍ lāchī kɛ᷅ a̍ sɔ̄ɔ̍ŋ nu̍m ŋ̄ chō mu᷅ŋ ndo̍ŋ? Nyɛ̄ o̍ nyɛ᷄ cho̍ nu̍m fūlāa̍ o̍ sōndō, ō chō māchūāā mɛ̄ɛ̍ hūēīye̍ ī chō nu̍a̍ā yɛ̍.

³Mɛ̄lɛ̄ka̍ cho̍ wa᷅na̍ mu̍li̍ tōnya̍a̍ bāla̍ŋ a̍ mākɔ̄ɔ̄ mbō tōsa̍ lāka̍fā le̍. Mɛ̄lɛ̄ka̍ nɔ̍ kpa̍a̍yāa̍ kpo̍u̍ wo̍ ō mɛ̍ī i̍ cho̍ o̍ nɛ̄i̍ sa̍kpō ve̍ tōsāa̍ mbo̍ tōsa̍ ka̍fāla̍ŋ te̍.

⁴Ō wā ni̍ŋ yɔ᷅ŋ wɔ̄ɔ̍ŋndo̍ chūāā nūmnda̍ ā tōsa̍ ni̍, mi̍ Mɛ̄lɛ̄ka̍ tūsī nda̍ nyɛ̄ pālāa̍ chōo̍ le̍ nyɛ̄ nda̍ tōsa̍ wo̍.

⁵Le̍la̍ŋ nyu̍na̍ Mɛ̍lɛ̄ka̍ nɔ̍ kpāāyāa̍ kpo̍u̍ wo̍ dīōm le̍ mbō māla̍ nu̍m, ndu̍yɛ̍ mā nyɔ̍ɔ̍lu̍ ndu̍ le̍ mbō tūīīnu̍ŋ nu̍m īnyīɛ̍ɛ̍.

⁶Tē a̍ wa̍ Mɛ̄lɛ̄ka̍ o̍ hɔ̄l pɛ̍ sa̍kpō, mā nɔ̍ sɔ᷅ŋ o̍ sɔ̄ŋ o̍ yōōmū nūmndo̍ ni᷄ŋ te̍, Mɛ̄lɛ̄ka̍ ō wā ni̍ŋ yo̍o̍mū nūmndo̍ māndāa̍ le̍ te̍le̍ŋ o̍ te̍le̍ŋ ndu̍yɛ̍ mbō fānda̍ nu̍m, ko̍ŋ cho̍ ni̍, mbō tōsa̍ mī chīɛ̄ī nūmndo̍ ō mīīŋgu̍ ō kɛ̄ndɛ̄ māā pāāndū.

⁷Mɛ̄lɛ̄ka̍ chō tōsa̍ mā su̍l mbō hīōū bɛ̍ɛ̍ mɛ̄ɛ̍ nūm o̍o̍ su̍l o̍ tāse̍la̍ ndɔ̄ɔ̍ yɛ̍. Sūl nūm o̍o̍ su̍l o̍ tāse̍la̍ ndɔ̄ɔ̍ wo̍, wānā tu̍ū ndu̍ bɛ̍ɛ̍ a̍ sūl ŋ̄ sūl ni̍ŋ ndo̍ le̍.

⁸Cho̍o̍bū, yāndi̍i̍ nyu̍na̍ wɔ̍ wa᷅ŋnda̍ a̍ sɔ̄ɔ̍ŋ māsīndɔ᷄ŋ o̍kɔ̄ɔ̄. Nyu̍u̍ni̍a̍a̍ wɔ̍ mā si̍na̍ a̍ sɔ̄ɔ̍ŋ fi̍nyāā ma̍māa̍ ā pɛ̄ɛ̄ku̍ wo̍ŋ o̍kɔ̄ɔ̄.

⁹Kāni̍ na̍a̍ na̍a̍, sɔ̍ŋgɔ̍ chi̍ɛ̍i̍ ko̍ni̍ nda̍ vēlū na̍a̍ ni̍, ŋ̄ si̍nā wɔ̍ nyɛ̄ o̍ nyɛ̄ le̍. Ndu̍yɛ̍ pālɛ̍i̍ nɛ̄i̍ o̍ chi̍e̍ēŋndo̍ chōo̍ mɛ̄ɛ̍ wūndu̍le̍ŋ lē kēlēŋā nu̍a̍ā lōo̍ yɛ̍, le̍nde̍ i̍ ke̍lēŋā chu̍wɔ̄ɔ̍ ni̍.

¹⁰Kɛ̍ tē a̍ nyu̍na̍ wāŋ bɛ̄ndūāā māsīndīa̍a̍ pɛ̍, ā chō nu̍m pɛ̄ɛ̄kū, mā chɔ᷄m nu̍m nyɛ̄ nda̍ nda̍ sīnā wo̍. Ā chō nu̍m dīmūl, māā nyɛ̄ ya̍ I̍ cho̍ nu̍m ho̍ō hūnɔ̄ɔ̄ dīmūl lo̍, tōnya̍ o̍ cho̍ ni̍.

¹¹Bīl vīlɛ̄i̍ wa᷅ ho̍ō o̍ fo̍ndāŋ māmɛ̄ŋndo̍ wo̍, tē ō wa̍ o̍ kɔ̄ŋgɔ̍ pɛ̍ nāa̍ mɛ̄ŋmā cho̍ le̍ wa̍, ō bāndū pa̍? Ō be̍ndū le̍. Bi᷄l wa᷅ ho̍ō o̍ fo̍ndāŋ māmɛ̄ŋndo̍ wo̍, tē ō ve̍ o̍ fo̍ndāŋ māmɛ̄ŋndo̍ le̍, o̍ ni᷅ŋ te̍.

¹²Bīl wāā le̍nde̍ dīmīo̍o̍ nu̍a̍ā mī mɛ̄ŋnda̍ŋ mā vēla̍, ndu̍ wa᷅ bi᷅l tāso̍o̍ le̍ vēsāa̍ ni̍. Te̍le̍ŋ nda̍ kīālū ndu̍ wo̍ ō fu̍u̍lūū le̍, ā yɔ᷄ŋ bɛ̍ɛ̍ mbō sōli̍ pe̍e̍ŋge̍la̍ŋ sɛ̄nɛ̄ī, dīmīo̍o̍ nu̍a̍ā mī mɛ̄ŋnda̍ŋ mā vēla̍ mbō vēsa̍ŋ.

¹³Le̍nde̍ ko̍ni̍ i̍ yɔ̍nūŋ a̍ wānāa̍ kɛ̍ɛ̍ Mɛ̄lɛ̄ka̍ wa̍ ni̍. Le̍nde̍ wānāa̍ kɛ̍ɛ̍ Mɛ̄lɛ̄ka̍ wa̍ ā kēlēŋā wu̍o̍o̍ o̍ lēpīlɛ̍ ni᷄ŋ ni̍, ndu̍yɛ̍ ā wū le̍nde̍ ā nɔ᷅ nyɛ̍ o̍ nyɛ̄ nda̍ wā le̍hɔ̍l o̍ nɛ̄ī le̍ ndu̍ le̍.

¹⁴Wāŋnda̍ ha̍ā tīīnda᷄ŋ ndāa̍ kpo̍u̍, ō chō māchūāā mɛ̄ɛ̍ kɛ̍īyo̍ ō chō nu̍a̍ā ō nɛ̍ī ki̍o̍lū le̍ yɛ̍. Mɛ̄ɛ̍ kɔ̄mi̍i̍ so̍o̍ŋtɛ̍ndɛ̄i̍ ī chō nu̍a̍ā ī nɛ̍ī ki̍o̍lū le̍ yɛ̍, le̍nde̍ nyɛ̍ nda̍ dūāū ti̍i̍nda᷄ŋ ndāa̍ o̍ ndu̍ ni̍ŋ ndo̍ ō chō ni̍.

¹⁵Mā tīīnda̍ŋ chīɛ̄īlā ndāla̍ŋ le̍ nda̍ māndāa̍, kɛ̍ lā nɔ̍lā mī lā mānda̍ nda̍ le̍. Mā bīī chīɛ̄īlā ndāla̍ la̍ŋ nyɛ̄ kɛ̄ndɛ̄ kɛ̍ndɛ̄, kɛ̍ lā si᷅m te̍.

¹⁶Wānāā dɛ̍nɛ̍ wɔ̍ɔ̍ŋnda̍, mā yɔ̄nu̍ŋ mɛ̄ɛ̍ tɔ̄lɔ̄ɔ̄lā nda̍ wā la᷅ŋ pɔ̄ɔ̄līa̍a̍ īdīi̍ o̍ dīi̍ la̍ŋ lā wā nu̍a̍ā, le̍ te̍le̍ŋ o̍ te̍le̍ŋ lā wā pu̍īyo̍ tɛ̍ɛ̍ tɛ̍ɛ̍ o̍ kpe̍lo̍o̍ ni᷄ŋ yɛ̍.

¹⁷Tɔ̄lɔ̄ɔ̄la̍ŋ nda᷅ŋ mī pūūndu̍ŋ ndɔ̄ɔ̍ŋ ŋ̄ tōl lɛ̄ŋ, mī ŋ̄ kɔ̍ pi̍ndā pīnda᷄ŋ po̍ūta̍ŋ, mī ŋ̄ bīīla᷅ŋ a̍ pōūta̍ŋ kpi̍ŋ.

¹⁸Kɛ̍ dīmīo̍o̍ nu̍a̍ā mā sūŋgū la̍ŋ, wānā si̍nā lɛ̍ bɛ̍ɛ̍ māā tɔ̄lɔ̄ɔ̄lā wa̍ o̍ fo̍ndā kōŋ te̍.

¹⁹Nu̍a̍ā ko̍ni̍ kɔ̄l kɛ̄ndɛ̄ wānāā dɛ̍nɛ̍ wɔ̍ɔ̍ŋnda̍ ō mɛ̄ɛ̄lū ni̍. Ndu̍yɛ̍ dīmīo̍o̍ nu̍a̍ā mā fāŋa̍ŋ, mī wānāā chēle̍ŋ ā kōma̍ chu̍ā fo̍ndāŋndā ndāla̍ŋ.

²⁰Cho̍o̍bū wānā o̍ wāna̍ cho̍ wānā sa̍kpōo̍ Mɛ̄lɛ̄ka̍ o̍ hɔ̄l, Mɛ̄lɛ̄ka̍ me᷅l ndu̍ le̍. Ndu̍yɛ̍ wānā o̍ wāna̍ cho̍ wāna̍ dɛ̍nɛ̍ wɔ̍ɔ̍ŋ, Mɛ̄lɛ̄ka̍ ma̍lā ndu̍ le̍.

²¹Mɛ̄lɛ̄ka̍ chō vɛ̄lɛ̄ tōsā mā ma̍m, ndu̍yɛ̍ mā dɔ̄ɔ̄nu᷄ŋ nya̍a̍le̍.

²²Wānāa̍ to̍l nu̍m yɛ̄le̍ŋ nda̍, si̍ɔ̍mbu̍la̍ŋ lā chō nda̍ hūnɔ̄ɔ̄ bīyɔ̄ɔ̄. Ndu̍yɛ̍ wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍, nāa̍ ndāā cha̍lāa̍ ā chō hūnɔ̄ɔ̄ wā ā tɛ̄ɛ̄mbāā.