Read Southern Kisi Cho̍o̍bū 9 Bible Online

Cho̍o̍bū 9 - Southern Kisi bible

Cho̍o̍bū 9

¹O̍ ko̍ŋ kɔ̍ɔ̍lī, mi̍ Cho̍o̍bū mu̍lī Bi̍li̍dāa̍ dīōm, mbo̍ dīmī māā

²ya̍ bɛ̍ɛ̍ I̍ si̍nā māā nyɛ̄ ŋ̄ chō dīmīo̍o̍ wo̍ tōnya̍ o̍ cho̍ ni̍. Kɛ̍ ō nɛ̄ɛ̍nɛ̍ nɔ̍lā yɛ̍ mā sɔ̄la̍ Mɛ̄lɛ̄ka̍ di̍?

³Ā yɔ᷄ŋ bɛ̍ɛ̍ mī wānā ye̍e̍ma̍ le̍ kɔ̍ɔ̍sɔ̍ɔ̍ a̍ ndu̍, ō nyūūnīāā nu̍m nyūūnīāāla̍ŋ wāa̍ ō pīlɛ̍, ō pīlɛ̍ bɛ̍ɛ̍ kpe̍ ā nɔ̄lā mā mu̍li̍ ndu̍?

⁴Mɛ̄lɛ̄ka̍ chō wāna̍ kɔ̄l kālu̍ bɛ̍ndū, ndu̍yɛ̍ ō chō vɛ̄lɛ̄ wāna̍ kpāāyā bɛ̍ndū. Wānā o̍ wānā nɔ̍lā mā si̍mu̍l ndu̍ le̍.

⁵Mbō dīmu̍l bɛ̍ɛ̍ wānā o̍ wānā le̍, ō nɔ̄lā mbō fa̍a̍ŋi̍a̍a̍ lūāŋūŋ bɛ̄ndo᷄ŋ o̍ fo̍ndāŋndā ndɔ̄la̍ŋ ndu̍yɛ̍ mbō tɛ̄ɛ̄mbu̍u̍ mu̍ŋ a̍ tu̍mbe̍ ndɔ̄ bɛ̍ndōo̍.

⁶Ō nɔ̄lā mbō tōsa̍ mī lɛ̄ŋnde̍ŋ lē nyīīya̍ o̍ fo̍ndā le̍ cho̍ wo̍, ndu̍yɛ̍ mbō tōsa̍ mī sūŋgbu̍ma̍ sa̍a̍ chi̍e̍ēŋndo̍ wa̍ŋ mā hīīlu̍ŋ wo᷅ŋa̍ wo᷅ŋa̍.

⁷Ō nɔ̄lā mbō dīmu̍l pāa̍le̍ŋ māā lē fu̍lā le̍, ndu̍yɛ̍ lē fu̍lā le̍, ndu̍yɛ̍ lōo̍ŋ bɛ̍ɛ̍ mbō tōsa̍ ŋ̄ di̍ndū le̍.

⁸Bōōndi̍i̍ Mɛ̄lɛ̄ka̍ wa̍ ha̍la̍a̍ chōo̍ cho̍o̍ pɛ̍ŋgɛ̄lāa̍ ve̍, ndu̍ pīlɛ̍ kpe̍ pɛ̍ŋgɛ̍la̍ ndu̍ ni̍, wānā o̍ wānā ma̍la̍ ndu̍ le̍. Pēe̍ mɛ̄ŋmā īhɛ᷄l wa̍ kpōku̍ kpo᷅ku̍ bɛ̍ndōo̍ wo̍, mbo̍ nɛ̄ī lēchōo̍, mi̍ nyɛ̄ o̍ nyɛ̄ sīm.

⁹Mbo̍ lō o̍ ko̍ŋ mbo̍ hāndū lōo̍ŋ o̍ ha̍la̍a̍ ni᷄ŋ cho̍o̍ cho̍o̍ a̍ ku̍ndāla̍ŋ le̍nde̍ kpɛ̍ kpɛ̍, mɛ̄ɛ̍ o̍ kɛ̍si̍ ku̍ndāa̍ ho̍ō o̍ ha̍la̍a̍ ni᷄ŋ ba᷅ lūāŋndo̍, mbo̍ kɛ̄sī ku̍ndālā tīɔ̍ɔ̍ŋ nda̍ŋ o̍ ha̍la̍a̍ tɛ̄ɛ̄ŋ, mbo̍ kɛ̄sī ku̍ndāa̍ ō pīlɔ̍ɔ̍ o̍ ha̍la̍a̍ bā tōūwo̍.

¹⁰Wa̍lta̍ kɔ̄ndɔ̄fi̍ltā Mɛ̄lɛ̄ka̍ tōsa̍ la̍ŋ, wānā o̍ wānā nɔ̍la̍ mā si̍na̍ la̍ŋ pɛ̍ŋgu̍ le̍, ndu̍yɛ̍ sɔ̄ɔ̍ŋ ka̍a̍ma᷅ŋ o̍ to̍sā wo̍ŋ, ŋ̄ chu̍ū chɔ᷅m te̍.

¹¹Ō nɔ̄lā mbō kēēku̍ ya̍ īkɛ̄i̍ I̍ de᷅l ndu̍ bɛ̍ɛ̍ hɔ᷅lte̍ŋ te̍, mbō hīōū ya̍ īkɛ̄i̍, kɛ̍ I̍ si̍nā a̍ ndi̍ o̍kɔ̄ɔ̄ le̍.

¹²Nyɛ̄ o̍ nyɛ̄ o̍ ye̍e̍ma̍ pɛ̍ lē chūa̍a̍ ō nɔ̄lā mbō chūa̍, wānā o̍ wānā nɔ̍la̍ mā ku̍u̍na̍ ndu̍ le̍. Wānā o̍ wānā nɔ̍lā bɛ̍ɛ̍ mā nyu̍na̍ ndu̍ āā, “Vɛ᷅ he̍ī tōsāa̍ le̍?”

¹³Tē Mɛ̄lɛ̄ka̍ dɔ̄ɔ̄nu᷄ŋ tu̍mbe̍ pɛ̍, ō pɔ̍lūl kɔ᷅l te̍. Wānāā nda̍ a̍a̍ ma̍lā Lu̍e̍ha̍bī[3] vīsī tɔ̍ɔ̍ma̍ bɛ̄ndōo̍ wa̍ nda̍ bɛ̍ɛ̍ mbo̍ nɔ̄lā mbo̍ yām nda̍.

¹⁴Wānā wa̍ā le̍nde̍ ya̍ I̍ nɔ̍lā ni̍ mī si̍mu̍l a̍ kɔ̍ɔ̍sɔ̍ɔ̍? Kūɛ̍ɛ̍nɛ̍ ya̍ I̍ nɔ̍lā yɛ̍ mī sɔ̍la̍ dīōmndā ya̍ I̍ si̍mu̍l ndu̍ le̍ kɔ̍ɔ̍sɔ̍ɔ̍ a̍ la̍ŋ?

¹⁵Le̍la̍ŋ mi̍ chē bɛ̍ɛ̍ I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ ni̍, kɛ̍ I̍ nɔ̍lā mī mu̍li̍ ndu̍ dīōm te̍. Nyɔ̄ɔ̄lōo̍ ko̍ni̍ ya̍ I̍ cho̍ ndu̍ wa᷅na̍ ki̍lūl la̍ yāmɛ̍i̍ yo̍ ni̍, mbō tūīīnu̍ŋ ya̍ īnyīɛ̍ɛ̍.

¹⁶Ā yɔ᷄ŋ bɛ̍ɛ̍ mī bi̍ī se̍ī ndɔ̄ɔ̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ ndu̍yɛ̍ mbō kūɛ̄, I̍ la̍a̍lāŋ bɛ̍ɛ̍ tē ō yāŋ ya̍ lānī le̍.

¹⁷Ō yɔ᷄ŋ hūēīyīī bɛ̄ndūe̍i̍ mi̍ ī sūāŋ ya̍ sōŋɔ̄ɔ̍ pīla̍. Mi̍ chē bɛ̍ɛ̍ I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍, kɛ̍ hīōūwɔ̄ɔ̍ tu̍ŋ o̍ cho̍ lāchī a̍ ya̍ bōōlūūwo̍ ni̍.

¹⁸Ndu̍yɛ̍ yɔ̄ndī bɛ̍ɛ̍ ō cho̍ ya̍ mālɔ̄ɔ̄ le̍, a̍ ya̍ chīŋa̍la᷅ŋndo̍. Ō tōsa̍ mi̍ sāŋgā bɛ̄ndōo̍ ō tūāl la̍ chōo̍ o̍ yōōmū nūu̍ ni᷄ŋ.

¹⁹Nda̍ a̍a̍ yɔ̍ŋ bɛ̍ɛ̍ mī ndu̍ o̍o̍ wa̍ nyɛ̄ sīmūlāā Mɛ̄lɛ̄ka̍, kpāāya̍ o̍ nɔ̄ wo̍ ō nɛ̄ɛ̍nɛ̍ nɔ̍lā yɛ̍ mbō sīmu̍l ndu̍? Ā yɔ᷄ŋ bɛ̍ɛ̍ mī ndu̍ o̍o̍ wa̍ nyɛ̄ ya̍ i̍i̍ bi̍ī se̍ī ndɔ̄ɔ̍, ō nɛ̄ɛ̍nɛ̍ wa̍ yɛ̄ ndu̍ vēēlū o̍ tōŋgo̍ kɔ̍ɔ̍sɔ̍ ka̍lāa̍ ni᷄ŋ?

²⁰Mi̍ chē bɛ̍ɛ̍ I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍, kɛ̍ sōndō ni̍ ya̍ pi̍la̍a̍ kɛ̍sɛ̍ kɛ̍sɛ̍ wa̍ ya̍ yāmɛ̍i̍ kīlūl ni̍ māā I̍ nɔ̍ di̍ le̍. Mi̍ chē bɛ̍ɛ̍ I̍ nɔ̍ sɔ᷅ŋ o̍ sɔ̄ŋ o̍ yōōmū nūu̍ ni᷄ŋ te̍, kɛ̍ ō wa᷄ ya̍ yāmɛ̍i̍ kīlūl māā I̍ wɔ̍u̍.

²¹Mi̍ chē bɛ̍ɛ̍ I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍, kɛ̍ I̍ bu̍u̍la̍ŋ ndɛ̍ a̍ yōōmū nūu̍ le̍. I̍ tu᷅l ni᷅ŋ yōōmū nūu̍ lēyɛ̄.

²²Mɛ̄lɛ̄ka̍ ndu̍ ndu̍ bīyɔ̄ɔ̄ pīlɔ̍ɔ̍ kpe̍ o̍ bi̍ī wa᷅na̍ chi̍o̍o̍ ni̍. Wānāa̍ nɔ̍ sɔ᷅ŋ o̍ sɔ̄ŋ o̍ yōōmūlā ndāla̍ŋ ni᷄ŋ te̍ wa̍ ni̍, wānāā dɛ̍nɛ̍ wɔ̍ɔ̍ŋnda̍ ni̍, mbō tɛ̄ɛ̄mbu̍u̍ nda̍ kpo̍u̍.

²³Ā yɔ᷄ŋ bɛ̍ɛ̍ mī dɛ̍nɛ̍ pa̍lāa̍ ō kōma̍l wāna̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wo̍ mbō vī o̍ lēpīlɛ̍ ni᷄ŋ, māmɔ̄ɔ̍ ko̍ni̍ Mɛ̄lɛ̄ka̍ mām ndu̍ ni̍.

²⁴Mɛ̄lɛ̄ka̍ bīī mbo̍ māl wānāā dɛ̍nɛ̍ wɔ̍ɔ̍ŋnda̍ chi̍e̍ēŋndo̍ o̍ bā. Ō sūūmi̍a̍a̍ māsāa̍ kɔ̍ɔ̍sā a̍ wāŋnda̍ wa̍, ā nɔ̍lā lɛ̍ mā dīmi̍ tōnya̍ o̍ tōnya̍ le̍. Ō fūla̍ o̍ Mɛ̄lɛ̄ka̍ kɔ̄ɔ̄lī, wāna̍ o̍ wānā che̍le̍ŋ ō nɔ̍lā mbō tōsa̍ he̍ī le̍.

²⁵Pālɛ̍i̍ nīi̍ ī kēle̍ŋa̍ bɔ̄ɔ̍ chu̍wɔ̄ɔ̍ o̍ chi̍e̍ēŋndo̍ chōo̍. Ndu̍yɛ̍ ī chūū le̍nde̍, kɔ̄l kɛ̄ndɛ̄ o̍ kɔ̄l kɛ̄ndɛ̄ I̍ sɔ̍la̍ o̍ yōōmū nūu̍ ni᷄ŋ te̍.

²⁶Mɛ̄ɛ̍ dɛ̄ndɛ̄la̍ pɔ̍mbɔ̄la̍ ku̍ā la᷅ŋ o̍ mɛ̄ŋnda̍ŋ chōo̍ la̍ŋ lā nyāānūŋ nu̍a̍ā nyāānɔ᷄ŋ bɛ̍ndōo̍ yɛ̍, ɔ̄ɔ̄ mɛ̄ɛ̍ kōwɔ̍ɔ̍ ō kēlēŋā nu̍a̍ā tōlɔ̄ɔ̍ le̍ nyɔ̄ɔ̍ chūa̍a̍ yɛ̍, le̍nde̍ pālɛ̍i̍ nīi̍ ī kēle̍ŋa̍ chūwɔ̄ɔ̍ ni̍

²⁷Tē I̍ di̍mi̍ pɛ̍ a̍a̍ I̍ pɛ̍ŋgī wɔ̍ a̍ ŋɔ̄ɔ̄chīa̍ŋndo̍, mī pu̍ɛ̍ɛ̍nu̍ŋ a̍ sāŋga̍ cho̍ ya̍ chōo̍ wo̍, mī ki̍ndi̍ le̍ mī sɔ̍la̍ kɔ̄l kɛ̄ndɔ̄ɔ̍,

²⁸a̍ te̍le̍ŋ ko̍ŋ bɛ̍ɛ̍ sīōōŋīī bɛ̄ndūe̍i̍ ī chɔ̄ɔ̄lū ya̍ bīyɔ̄ɔ̄ ni̍ a̍ sāŋga̍ cho̍ ya̍ chōo̍ wo̍. Kāni̍ fo̍ndōle̍, I̍ si̍nā māā mɛ̄ɛ̍ mɛ̄ɛ̍ ya̍ I̍ to̍sa̍, yāmɛ̍i̍ ŋ̄ kīlūl la̍ ni̍ māā I̍ wɔ̍u̍.

²⁹I̍ si̍nā māā a̍ chi̍i̍ ya̍ ni᷅ŋ yāmɛ̍i̍ kīlūl māā I̍ wɔ̍u̍. Le̍ yɛ̄ɛ̍nɛ̍ ya̍ I̍ ku̍ā yɛ̍ vɛ̄lɛ̄ ya̍ pi̍la̍ sāāŋgīa̍a̍ le̍ chɔ̄mndo̍ māā I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍?

³⁰Ā yɔ᷄ŋ bɛ̍ɛ̍ mī pu̍lu᷄ŋ fo̍, ndu̍yɛ̍ mī pu̍lū bālā nīla̍ŋ fo̍ fo̍ a̍ si̍ɔ̍ɔ̍, le̍ mī si̍mu᷄ŋ o̍ di̍a̍ndāā

³¹nyīndɔ̄ɔ̍ ŋ̄ nyīndū ya̍ o̍ so̍o̍ŋ nɔ̍ɔ̍lɛ̍i̍yo̍ ni᷄ŋ ni̍ mī si̍mnu᷄ŋ vɛ̍lɛ̄ ō nɔ̄ɔ̄lɛ̍i̍. Nyɛ̄la̍ wa᷅ ya̍ lēkɔ̄ɔ̍ la̍ŋ bɛ̍ɛ̍ kɛ̍sɛ̍ kɛ̍sɛ̍, lā ye̍e̍mā mī lā wa᷄ ya̍ lēkɔ̄ɔ̍ le̍.

³²Tē Mɛ̄lɛ̄ka̍ ndu̍ o̍o̍ wa̍ wāna̍ chi̍e̍e̍ pɛ̍ mɛ̄ɛ̍ ya̍ I̍ cho̍ nu̍a̍ā yɛ̍, I̍ wa̍ ndu̍ dīōm mūlī, ŋ̄ wa᷄ lākɔ̄ o̍ tōŋgo̍ kɔ̍ɔ̍sɔ̍ɔ̍ ni᷄ŋ na̍a̍ ndu̍ mī na̍a̍ ŋ̍ kɔ̍ kɔ̍ɔ̍sā.

³³Tē ya̍ i̍i̍ sɔ̍la̍ wāna̍ ndu̍ o̍o̍ lu̍ɛ̍ī na̍a̍ tɛ̄ɛ̄ŋ na̍a̍ Mɛ̄lɛ̄ka̍ wo̍, mī ndu̍ o̍o̍ bɛ̍ɛ̍ndi̍a̍a̍ na̍a̍ tɛ̄ɛ̄ŋ pɛ̍, ya̍ i̍i̍ hi̍nī bɔ̍ɔ̍ kɔ᷅l, kɛ̄ wānā bɛ̍ɛ̍ cho̍ le̍.

³⁴Wānā ko̍ŋ ō wa᷄ tōsā mī Mɛ̄lɛ̄ka̍ ndu̍ o̍o̍ pɛ̍ŋgi̍ a̍ ya̍ ni᷅ŋ lɔ̄ɔ̍, ndu̍yɛ̍ mī ndu̍ o̍o̍ to̍sa̍ sīōōŋīī bɛ̄ndūīī ndi̍ i̍i̍ ve᷅ lɛ̍ ya̍ māā Mɛ̄lɛ̄ka̍ chō ya̍ nyɛ̄ pālāā tūsī chōo̍ le̍.

³⁵O̍ ko̍ŋ, ya̍ i̍i̍ nɔ̍lā mī ya̍ i̍i̍ so̍ō nāa̍ Mɛ̄lɛ̄ka̍ chūā sīōōŋīī ndi̍ i̍i̍ ve᷅ ya̍ le̍. Kɛ̍ su̍ŋ su̍ŋ I̍ nɔ̍lā mī so̍ō le̍, kāni̍ fo̍ndōle̍, I̍ cho̍ o̍ ya̍ pi̍la̍ ni̍ŋ te̍.