Read Southern Kisi Sa᷅m 103 Bible Online

Sa᷅m 103 - Southern Kisi bible

Sa᷅m 103

¹[94] I̍ cho̍ Mɛ̄lɛ̄ka̍ Ya̍a̍wɛ̄ɛ̍ sāŋgālā a̍ kɔ̄l nūu̍ kpo̍u̍, ndu̍yɛ̍ a̍ yīya᷄ŋ nūu̍ kpo̍u̍. I̍ cho̍ dīōlā ndɔ̄la̍ kāsī la̍ŋ sāŋgālā.

²I̍ cho̍ Mɛ̄lɛ̄ka̍ Ya̍a̍wɛ̄ɛ̍ sāŋgālā a̍ kɔ̄l nūu̍ kpo̍u̍. Ndu̍yɛ̍ I̍ pu̍ɛ̍ɛ̍nūŋ ni̍ŋ a̍ kɛ̄ndɛ̄i̍ ndūɛ̍i̍ le̍.

³Ō ma᷄l na̍a̍ le̍ yɔ̄ŋndā nāāla̍ wɔ̍ɔ̍ŋnda̍ŋ, ndu̍yɛ̍ mbo̍ sīŋgī nāā o̍ nāa̍ wa̍ na̍a̍ o̍ ŋ̄dīāl.

⁴Ō to̍sa̍ mi̍ ŋ̄ fūlā pīɔ̍mndo̍ o̍ bā, ndu̍yɛ̍ mbo̍ chɔ̄m na̍a̍ kāālā ndɔ̍ cho̍ le̍ te̍le̍ŋ a̍ te̍le̍ŋ ndo̍, mbo̍ tūīīnu᷄ŋ na̍a̍ īnyīɛ̍ɛ̍.

⁵Ō tōsa̍ mi̍ ŋ̄ hīnī kɔ̄l mɛ̍ɛ̄ a̍ nyɛ̄m kɛ̄ndɛ̄ŋ o̍ ke̍ na̍a̍ wo̍ŋ, le̍ mī ŋ̄ wa̍ māā chūāā pīāāndū le̍ te̍le̍ŋ o̍ te̍le̍ŋ, ndu̍yɛ̍ mī ŋ̄ nɔ̍ dīāllūŋ kāla᷄ŋ mɛ̄ɛ̍ kōwɔ̍ɔ̍ ō wā nu̍a̍ā yɛ̍.

⁶Wānāā nda̍ chō nyɛ̄ pālāa̍ tūsīo̍o̍ chōo̍ wa̍, Mɛ̍lɛ̄ka̍ Ya̍a̍wɛ̄ɛ̍ su̍ŋgū le̍ nda̍ ni̍, mbō tōsa̍ mā sɔ̄la̍ di̍la̍ ndāla̍ŋ.

⁷Nyɛ̄ o̍ nyɛ̄ ndu̍ o̍o̍ kɛ̍ɛ̍si̍a̍a̍ le̍ tōsāa̍, mbo̍ chɔ̄m Mūu̍sē kpo̍u̍. Mbo̍ tōsā mi̍ wāŋnda̍ I̍sɔ̄lūɛ̄ī a̍ cha᷅ kpāāya̍ ndɔ̄ bɛ̍ndōo̍.

⁸Mɛ̍lɛ̄ka̍ Ya̍a̍wɛ̄ɛ̄ o̍ cho̍ wāna̍ īnyīɛ̍ɛ̍, ndu̍yɛ̍ mbo̍ wā wāna̍ īkɛ̄ndɛ̄. Ō cho̍ wa᷅na̍ dɔ̍ɔ̍nu᷄ŋ tu̍mbe̍ chɔ̍ chɔ̍ le̍, ndu̍yɛ̍ ō chō wāna̍ ka̍a̍la̍ ŋ̄wāŋndā chīe̍e̍ le̍ te̍le̍ŋ o̍ te̍le̍ŋ.

⁹Ō cho̍ wa᷅na̍ chɔ̍m wānā ŋ̍sɔ̍ɔ̍ŋ cho̍o̍ le̍ te̍le̍ŋ o̍ te̍le̍ŋ te̍. Ndu̍yɛ̍ ō cho̍ wa᷅na̍ dɔ̍ɔ̍nu᷄ŋ tu̍mbe̍ a̍ wānā mbō wa᷄ a̍ tu̍mbe̍ ko̍ŋ le̍ fɛ̍ɛ̍ŋ a̍ fɛ̍ɛ̍ŋ te̍.

¹⁰Mbō tūsi̍ na̍a̍ nyɛ̄ pālāa̍ chōo̍ le̍ yɔ̄ŋndā nāāla̍ wɔ̍ɔ̍ŋnda̍ŋ, ndu̍yɛ̍ a̍ sɔ̄ɔ̍ŋ wɔ̍ɔ̍ŋ na̍a̍ ŋ̄ tōsā wo̍, kɛ̍ nyɛ̄ pālāā kōŋ ō fu̍u̍lūū a̍ yɔ̄ŋ wɔ̄ɔ̍ŋ na̍a̍ ŋ̄ tōsā wo̍ le̍.

¹¹Mɛ̄ɛ̍ ha̍la̍a̍ ō chō nu̍a̍ā la̍nda̍ŋ a̍ chi̍e̍ēŋndo̍ yɛ̍, le̍nde̍ kāāla̍ Mɛ̄lɛ̄ka̍ cho̍ le̍ te̍le̍ŋ o̍ te̍le̍ŋ ndo̍, ō chō ō bɛ̄ndū le̍ wānāa̍ so̍o̍lūū ndu̍ wa̍ ni̍.

¹²Mɛ̄ɛ̍ bā pāa̍le̍ŋ lē chāŋndo̍ ō chō nu̍a̍ā la̍nda̍ŋ a̍ bā le̍ de᷅llo̍ yɛ̍, le̍nde̍ Mɛ̄lɛ̄ka̍ fāŋa̍ yɔ̄ŋndā nāāla̍ wɔ̍ɔ̍ŋnda̍ŋ na̍a̍ kūēē ni̍, mbo̍ kūɛ̄ a̍ la̍ŋ pɔ̍ɔ̍li̍.

¹³Mɛ̄ɛ̍ fi̍nyāa̍ ō wā nu̍a̍ā wāna̍ īkɛ̄ndɛ̄ o̍ chūāūwāā ndūa̍a̍ lo̍ yɛ̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ wāna̍ īkɛ̄ndɛ̄ nāa̍ wānāa̍ so̍o̍lūū ndu̍ wa̍ chūā ni̍.

¹⁴Kāni̍ fo̍ndōle̍, Mɛ̄lɛ̄ka̍ sīnā mɛ̄ɛ̍ o̍ to̍o̍si̍a̍a̍ na̍a̍ yɛ̍, ō sīnā māā a̍ pūūlōo̍ o̍ to̍o̍si̍a̍a̍ na̍a̍ ni̍.

¹⁵Na̍a̍ ŋ̄wāŋndā chīe̍e̍, ŋ̄ chō māchūāā mɛ̄ɛ̍ bīllo̍ ō chō nu̍a̍ā yɛ̍. Mɛ̄ɛ̍ pe̍e̍ŋge̍la̍ŋ lā pɛ̄ɛ̄ŋgā nu̍a̍ā mī lā wa̍ nāŋɔ̄ɔ̍ yōndōo̍ ni᷄ŋ yɛ̍, le̍nde̍ na̍a̍ ŋ̄ chō ni̍.

¹⁶Kɛ̍ dīmīo̍o̍ nu̍a̍ā mī hūēīye̍ ī hɔ᷄ŋ, mī pe̍e̍ŋge̍la̍ŋ nda᷅ŋ lā kēēndu̍ŋ. Wānā si̍nā lɛ̍ bɛ̍ɛ̍ māā lāpe̍e̍ŋge̍ la̍ wa̍ lo̍ŋ te̍.

¹⁷Kɛ̍ wānāa̍ nɔ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ wa̍, kāālāa̍ Mɛ̄lɛ̄ka̍ Ya̍a̍wɛ̄ɛ̄ cho̍ te̍le̍ŋ o̍ te̍le̍ŋ ndo̍, ndu̍ o̍ ka̍a̍lā nda̍ le̍ fɛ̍ɛ̍ŋ a̍ fɛ̍ɛ̍ŋ ni̍. Ndu̍yɛ̍ wānāā chu̍ā sa̍wāla̍ ndɔ̄la̍ŋ mā tōsā nyɛ᷅ o̍ di̍mūl nda̍ wo̍ wa̍, wānāā kāŋ chūāūwāā nda̍ vēlū wa̍ chūāūwāā ndāa̍ bɛ̍ɛ̍, dɛ̍nɛ̍ kɛ̍ndɔ̄ɔ̍ Mɛ̄lɛ̄ka̍ tōsāl nda̍ ni̍.

¹⁹Mɛ̄lɛ̄ka̍ Ya̍a̍wɛ̄ɛ̄ o̍ to̍o̍si̍a̍a̍ kpe̍ŋgbe̍i̍ ndɔ̍ lēmāsāa̍ chōo̍ cho̍o̍. Ndu̍yɛ̍ ndu̍ cho̍ māsāa̍ le̍ chi̍e̍ēŋndo̍ kpo̍u̍ ni̍.

²⁰Nya̍ ki̍i̍la̍a̍ Mɛ̄lɛ̄ka̍ Ya̍a̍wɛ̄ɛ̄ wa̍ lā sāŋga̍la̍ ndu̍, nya̍ ki̍i̍la̍a̍ kpāāyāā bɛ̍ndūa̍a̍ to̍sā nyɛ᷅ Mɛ̄lɛ̄ka̍ hɛ̄na̍ŋndo̍, ndu̍yɛ̍ mī lā tūɛ̄ī ndu̍ dīōm nda̍.

²¹Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄, nya̍ wānāā kpāāyāā bɛ̍ndūa̍a̍ cho̍ o̍ ha̍la̍a̍ ni᷄ŋ nda̍, nya̍ bu̍ɛ̍īyāā ndūa̍a̍ to̍sā nyɛ᷅ o̍ hɛ̄na̍ŋndo̍ wa̍.

²²Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄, nya̍ nyɛ̄ o̍ nyɛ̄ yōōmāā o̍ to̍o̍si̍a̍a̍ a̍ ba̍lā ndɔ̄la̍ŋ, mi̍ lā wā o̍ fo̍ndāŋndā o̍ cho̍ māsāa̍ chōo̍ la̍ŋ. I̍ cho̍ Mɛ̄lɛ̄ka̍ Ya̍a̍wɛ̄ɛ̍ sāŋgālā a̍ kɔ̄l nūu̍ kpo̍u̍.