Read Southern Kisi Sa᷅m 104 Bible Online

Sa᷅m 104 - Southern Kisi bible

Sa᷅m 104

¹I̍ cho̍ Mɛ̄lɛ̄ka̍ Ya̍a̍wɛ̄ɛ̍ sāŋgālā a̍ kɔ̄l nūu̍ kpo̍u̍. O̍o̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, ā chō ō bɛ̄ndū. Kpāāyāa̍, a̍ bɛ̄ɛ̄le̍ŋ lā chō māchūāā nyɛ̄ nūm chu̍ɛ̍i̍na᷄ŋ.

²Nyɛ̄ wa̍wo̍ŋndo̍ ō chō nu̍m ō bālāā si̍lɔ̍, mɛ̄ɛ̍ wāŋndo̍ ō pīndā pīndāŋ nu̍a̍ā kōlāa̍ yɛ̍. Ma̍ lō o̍ ko̍ŋ ma̍ tōōsīāā ha̍la̍a̍ chōo̍ cho̍o̍, mɛ̄ɛ̍ nda̍ tūāndū nu̍a̍ā tɛ̍ndīi̍yo̍ yɛ̍.

³Ndu̍yɛ̍ ma̍ sīmī sūŋgbu̍ma̍ sa̍a̍ fo̍ndā nūm cha̍lāa̍ wa̍ŋ, o̍ mɛ̄ŋma̍ cho̍ o̍ ha̍la̍a̍ ni᷄ŋ nda̍ŋ chōo̍ kpe̍e̍kpe̍i̍. Tē a̍ wa̍ hūnɔ̄ɔ̍ pɛ̍, o̍ yu̍mbu̍ yu̍mbu̍ i̍kpu̍ŋgbāa̍ chōo̍ ŋ̄ chāl ni̍, mɛ̄ɛ̍ wāŋndo̍ ō chāl nu̍a̍ā o̍ nyɛ̄ su̍a̍a̍ ā nāŋndo̍ ni᷄ŋ yɛ̍, mī hūēīye̍ hūŋ a̍ nūm.

⁴Hūēīye̍ chō māchūāā māā ki̍i̍la̍a̍ nu̍m. Yīŋndē wūle̍ wu᷅le̍le̍ŋ, lē chō māchūāā māā bu̍ɛ̍i̍yāā nūm.

⁵Ma̍ lō o̍ ko̍ŋ, ma̍ tōōsīāā chi̍e̍ēŋndo̍ o̍ chīyīī ndūɛ̍i̍ chōo̍, ma̍ sīmī ndu̍ yi̍, ndu̍yɛ̍ wānā o̍ wānā fe̍ŋā ndu̍ o̍ bā kōŋ chōo̍ le̍.

⁶Mɛ̄ŋmā yīŋgi̍lɛ̍i̍ma̍ bɛ̍ndūa̍ŋ, mā wa᷄ mā pɛ̄ŋgɛ̄la᷄ŋ o̍ chi̍e̍ēŋndo̍ chōo̍ kpo̍u̍, mɛ̄ɛ̍ nda̍ pɛ̄ŋgɛ̄lā nu̍a̍ā kōlāa̍ o̍ nyɔ̄ɔ̍ chōo̍ yɛ̍. Ndu̍yɛ̍ mi̍ mɛ̄ŋnda̍ŋ mā kūmbū lūāŋūŋ bɛ̄ndo᷄ŋ kpo̍u̍.

⁷Kɛ̍ mɛ̄ɛ̍ ŋ̄ dēŋu̍l ma̍ŋ, mi̍ mā fāŋa᷄ŋ. Mɛ̄ɛ̍ ma̍ tu̍e̍ī dēŋī ŋ̄ dēŋi̍ wo̍, mi̍ mā kēlēŋā mālɔ̄ɔ̄ chɔ̍chɔ̍.

⁸Mi̍ mā hēl o̍ lūāŋūŋ bɛ̄ndo᷄ŋ chōo̍ ndu̍yɛ̍, mi̍ mā tūāl o̍ dɛ̍ŋgbɛ̍la̍ŋ ni᷄ŋ o̍ pēmbo᷄ŋ tɛ̄ɛ̄ŋ, o̍ fo̍ndāŋ ŋ̄ tōōsi̍a̍a̍ le̍ mī mā wa᷄ lo̍ŋ ndo̍.

⁹Ma̍ lō o̍ ko̍ŋ, ma̍ hēndūl ma̍ŋ pɛ̄ŋgu̍la̍ŋ chɛ̍chɛ̍, ko̍ŋ to̍sā ni̍, mā ku̍mbū lɛ̍ chi̍e̍ēŋndo̍ kpo̍u̍ le̍.

¹⁰Ma̍ tōsā mi̍ pēēla̍ŋ lā būlī lɛ̄ŋ o̍ dɛ̍ŋgbɛ̍la̍ŋ ni᷄ŋ o̍ pēmbo᷄ŋ tɛ̄ɛ̄ŋ, mi̍ mā wā hīōūwɔ̄ɔ̍ o̍ pēmbo᷄ŋ tɛ̄ɛ̄ŋ.

¹¹Mi̍ mā sīmnu᷄ŋ pe̍ēla̍ ko̍lāāla̍ŋ le̍ vīsīāā yōndūa̍a̍. Lo̍ŋ sōfɛ̍li̍a̍a̍ yōndūa̍a̍ ā kūā bo̍lōla̍ŋ pɔ̄ɔ̄līa̍a̍ ni̍.

¹²Yōūwa̍ bɛ̍ɛ̍, o̍ pēēla̍ la̍ŋ kɔ̄ŋgɔ̍ nda̍ tōōsīāā wa̍a̍ŋīī ndɛ̄i̍ ni̍. Yɔ̄mīi̍ cho̍ o̍ pēēla̍ la̍ŋ kɔ̄ŋgɔ̍ ve̍, lēchōo̍ nda̍ chāl ni̍ mā sōlī cho̍ndo̍ŋ.

¹³Mā lo̍ ɛ̄chɛ̍nɛ̄ pɔ̍, mā yɔ̍ŋ pīɔ̍ɔ̍ o̍ pēmbo᷄ŋ chōo̍, ndu̍yɛ̍ mā tōsa̍ mī nyɛ̄ dīa̍a̍ wa᷄ o̍ chi̍e̍ēŋndo̍ ni᷄ŋ ta̍u̍ ta̍u̍.

¹⁴Mā to̍sa̍ mī bīllo̍ pūi̍ le̍ mī chɔ̄ūlūa̍a̍ ā dē. Ndu̍yɛ̍ mā to̍sa̍ mī wāŋnda̍ tōsa̍ chīɔ̄ɔ̄ŋ ndāa̍ŋ, mī tɔ̄lɔ̄ɔ̄la̍ŋ lā na᷄ŋ, mā sɔ̄la̍ nyɛ̄ dīa̍a̍.

¹⁵Ndu̍yɛ̍ mā tōōsi̍a̍a̍ mūɛ̄īmā mākīle̍pīi̍ya̍ŋ a̍ kōmɔ̄ɔ̄lā tɔ̄lɔ̄ɔ̄lā ndāla̍ŋ ndu̍yɛ̍ mā na᷄ŋ kɔ̄l. Mā tōōsi̍a̍a̍ vɛ̄lɛ̄ chūɛ̄īmā ɔ̄li̍fīi̍mā nda̍ sūūnūŋ, le̍ mā nīŋgi̍la̍ wa̍ŋ, ndu̍yɛ̍ mā sɔ̄la̍ nyɛ̄ dīāā nda̍ dīā mā sɔ̄la̍ dīāllūŋ kāla᷄ŋ ndo̍.

¹⁶Yɔ̄mīī si̍dāāve̍ Le̍ba̍nɔ̄ŋ, Mɛ̄lɛ̄ka̍ Ya̍a̍wɛ̄ɛ̄ yɔ̄mīī ndūɛ̍i̍ o̍ tɔ᷅l le̍ bɛ̍ɛ̍, mī ī wā mɛ̄ŋnda̍ŋ sɔ̄lāa̍ ta̍u̍ le̍ te̍le̍ŋ o̍ te̍le̍ŋ, le̍ pɔ̄ɔ̄līa̍a̍.

¹⁷Lo̍ŋ yōūwa̍ ā tāŋgūl wa̍a̍ŋīī ndɛ̄i̍ ni̍. O̍ yɔ̄mīi̍ pa̍īŋnde̍ chōo̍ yōūwāā yɔ̄ɔ̄yāa̍ ā tāŋgūl wa̍a̍ŋīī ndɛ̄i̍ ni̍.

¹⁸Chūīŋāā yōndūa̍a̍ bɛ̍ɛ̍, o̍ lūāŋūŋ bɛ̄ndo᷄ŋ chōo̍ nda̍ kūā di̍o̍la̍ŋ ni̍. Chūīŋāā ba̍ndi̍la̍a̍, o̍ pōūta̍ŋ tɛ̄ɛ̄ŋ nda̍ vīŋīŋ ni̍.

¹⁹Ma̍ lō o̍ ko̍ŋ ma̍ tōōsīāā pāŋge̍i̍, le̍ yɛ̍ yi̍ɔ̍ɔ̍ chɔ̄mndo̍ sīālte̍ŋ tɛ̄ɛ̄ŋ a̍ wɔ̄ɔ̄le̍ŋ. Ndu̍yɛ̍ pāa̍le̍ŋ bɛ̍ɛ̍ lē sīnā te̍le̍ŋ le̍ de᷅l lo̍.

²⁰Ma̍ tōōsīāā nyūmnda̍ŋ le̍ mī mā tōl īchɔ̄l. Ndu̍yɛ̍ tē mā tōl dɔ̍ɔ̍ pɛ̍, vīsīa̍a̍ yōndūa̍a̍ ā fūla̍ dīo̍la̍ŋ.

²¹Kpɔ̍kūŋāā fɔ̍ŋndu̍a̍a̍, ā wā pɛ̍ɛ̍līa̍a̍ le̍ vi̍sīa̍a̍ bīyɔ̄ɔ̍, ndu̍yɛ̍ mā fūlā nyɛ̍ dīāā Mɛ̄lɛ̄ka̍ tōōsi̍a̍a̍ le̍ nda̍ wo̍ nūūwāa̍.

²²Tē pāa̍le̍ lē sɛ̄ dɔ̍ɔ̍ pɛ̍, ā mīīŋgu̍ŋ, ā kɔ᷄ hi̍ni᷄ŋ o̍ bɛ̄mɛ̍lta̍ ndāla̍ŋ.

²³O̍ ko̍ŋ, mi̍ wāŋnda̍ chi̍e̍e̍ya̍ nda̍ kūɛ̄ wa̍lta̍ ndāla̍ŋ, mā lo̍ wa̍lta̍ŋ ha̍a̍a̍ mī pāa̍le̍ŋ lē de᷄l.

²⁴O̍o̍ Mɛ̄lɛ̄ka̍ Ya̍a̍wɛ̄ɛ̄, wa̍lta̍ ŋ̄ tōsa̍ la̍ŋ lā chō lā bɔ̄ɔ̍. A̍ kɔ̄l kālu̍ nu̍mndo̍ ŋ̄ lo̍ o̍ ko̍ŋ ni̍, ma̍ tōōsīāā nyɔ̄ɔ̍ŋ mu᷅ŋ kpo̍u̍. Ma̍ lō o̍ ko̍ŋ ma̍ pēī chi̍e̍ēŋndo̍ cha̍ a̍ nyāā yōōmāā.

²⁵To̍fa̍ wɔ̍ mɛ̄ɛ̍ pēe̍ mɛ̄ŋmā īhɛ᷄llo̍ ō tōŋgū, ndu̍yɛ̍ mbo̍ bāndū yɛ̍. Nyāā yōōmāa̍ ā su̍u̍ o̍ su̍u̍, ō pɔ̄mbɔ̄ ni̍, ō bɛ̄ndū ni̍, ā chō lēni᷄ŋ.

²⁶Lēcho̍ō dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ lā bālū ni̍. Līvīa̍a̍tāŋ[95] vīsī bɛ̄ndu̍ ŋ̄ tōōsi̍a̍a̍ le̍ mbō wa᷄ pīsu̍lta̍ŋ lēni᷄ŋ ndo̍ bɛ̍ɛ̍ ō chō lēni᷄ŋ.

²⁷Nyāā yōōmāa̍ ha̍ā kpo̍u̍, nūm nda̍ tīīnda̍ŋ ni̍, le̍ nda̍ nyɛ̄ dīa̍a̍ kīo̍o̍ a̍ te̍le̍ŋnda̍ nda̍ yēēmā nyɛ̍ dīa̍a̍ la̍ŋ.

²⁸Ndu̍yɛ̍ mā si̍ɛ̍ndi̍ bāa̍, mā ke̍ nda̍ nyɛ̄ dīāā nda̍ nɔ̄ le̍ dīo̍o̍ wo̍, mā dē. Mā si̍ɛ̍ndi̍ bāa̍ mā ke̍ nda̍ nyɛ̄ dīa̍a̍ mā hīni̍ kɔ̄l.

²⁹Tē a̍ mu̍lu̍l dɔ̍ɔ̍ nda̍ kɔ̄ɔ̍ pɛ̍, sīōōŋīī bɛ̄ndūe̍i̍ bīī nda̍. Tē a̍ so̍li̍ dɔ̍ɔ̍ hūēīyīī ŋ̄ ke̍ nda̍ le̍ wāa̍ yōōmū ve̍ pɛ̍, ā vīŋnu᷄ŋ bɛ̍ɛ̍, ā mīīŋgu̍ o̍ pūūlu̍ nda̍ fūla̍ ni᷄ŋ ndo̍.

³⁰Tē a̍ yɔ̍ŋ vɛ̄lɛ̄ hūēīyīī nūm i̍i̍ yɔ̍ŋgū yo̍o̍mōo̍ ve̍ pɛ̍, nyāā yōōmāā chēle̍ŋ ā mīīŋgu̍ vɛ̄lɛ̄ o̍ fōōfo̍ ndāa̍. Mā to̍sa̍ vɛ̄lɛ̄ mī nyāā yōōmāā sɛ̄nɛ̄īya̍ ā mīīŋgu̍ o̍ chi̍e̍ēŋndo̍ chōo̍.

³¹Mbɔ̄ māā kpāāya̍ Mɛ̄lɛ̄ka̍ Ya̍a̍wɛ̄ɛ̄ wo̍ ō lo̍ le̍cho̍ō le̍ fɛ̍ɛ̍ŋ a̍ fɛ̍ɛ̍ŋ fɔ̍. Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ wa̍ a̍ kɔ̄l kɛ̄ndɔ̄ɔ̍ le̍ te̍le̍ŋ o̍ te̍le̍ŋ a̍ wa̍lta̍ ndɔ̄la̍ o̍ to̍sa̍ la̍ŋ fɔ̍.

³²Tē Mɛ̄lɛ̄ka̍ Ya̍a̍wɛ̄ɛ̄ o̍ to̍fa̍ chi̍e̍ēŋndo̍ pɛ̍, lɛ̄ŋnde̍ŋ kpo̍u̍ lē hīīlu̍ŋ. Tē ō pīla̍ŋ lu̍a̍ŋūŋ bɛ̄ndo᷄ŋ pɛ̍, ku᷄mnde̍ fūla̍.

³³I̍ cho̍ hīōūwɔ̄ɔ̄ lāchī a̍ chōndo̍ŋ sōlīo̍o̍ le̍ Mɛ̄lɛ̄ka̍ Ya̍a̍wɛ̄ɛ̍ sāŋgālāa̍, ha̍a̍a̍ a̍ yōōmū nūu̍ mɛ̄ɛ̄lu̍la̍ŋ. I̍ cho̍ hīōūwɔ̄ɔ̄ lāchī a̍ Mɛ̄lɛ̄ka̍ nūu̍ sāŋgālāa̍ o̍ chōndo̍ŋ ni᷄ŋ, ha̍a̍a̍ a̍ mɛ̄ɛ̄lu̍la̍ yōōmū nūu̍.

³⁴Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ hi̍ni̍ kɔ̍l a̍ dīōmnda̍ ya̍ I̍ di̍mī o̍ chōnde̍i̍ ni᷄ŋ nda̍ŋ fɔ̍. Mɛ̄lɛ̄ka̍ Ya̍a̍wɛ̄ɛ̄, ndu̍ to̍sā ni̍ mī dɔ̍ɔ̍nu᷄ŋ nya̍a̍le̍.

³⁵Mbɔ̄ māā wānāā dɛ̍nɛ̍ wɔ̍ɔ̍ŋnda̍ ā wa̍ a̍ fa̍ŋāā ba̍ū o̍ chi̍e̍ēŋndo̍ ho̍ō ni᷄ŋ fɔ̍. Mbɔ̄ māā wānāā yɔ̄ŋ wɔ̄ɔ̍ŋnda̍ ā wa᷅ lɛ̍ o̍ chi̍e̍ēŋndo̍ chōo̍ le̍ fɔ̍. I̍ cho̍ Mɛ̄lɛ̄ka̍ Ya̍a̍wɛ̄ɛ̍ sāŋgālā a̍ kɔ̄l nūu̍ kpo̍u̍. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄.