Read Southern Kisi Sa᷅m 105 Bible Online

Sa᷅m 105 - Southern Kisi bible

Sa᷅m 105

¹O̍o̍ wāŋnda̍, lā me᷄l Mɛ̄lɛ̄ka̍ Ya̍a̍wɛ̄ɛ̄ ba̍li̍ka̍, mī lā pɛ̄l ndu̍ dīōla̍ŋ, lā chɔ᷄m a̍ nyɛ̄ o̍ to̍sa̍ wo̍ wāŋndā chīe̍e̍ya̍ tɛ̍ɛ̄ŋ.

²Lā sōli̍ chōndu̍ŋ sa̍ŋgālā ndu̍ wo̍ŋ, lā chɔ᷄m a̍ wa̍lta̍ kɔ̄ndɔ̄fi̍ltā o̍ to̍sa̍ la̍ŋ.

³Lā na᷄ŋ kɔ᷅l le̍ mɛ̄ɛ̍ na̍a̍ ŋ̄ chō mīāl ndɔ̄ yɛ̍. Wānāa̍ so̍o̍lūū Mɛ̄lɛ̄ka̍ Ya̍a̍wɛ̄ɛ̄ wa̍ kpo̍u̍, lā dɔ̄ɔ̄nu̍ŋ nya̍a̍le̍.

⁴Lā tōfa̍ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ le̍ mbō ke̍ nya̍ dīāllūŋ kāla᷄ŋ. Lā sōōlu̍u̍ ndu̍ le̍ te̍le̍ŋ o̍ te̍le̍ŋ.

⁵Nya̍ fu̍la̍ o̍ pūlāle̍ E̍bīlāha᷅m nde̍ŋ chōo̍, ndu̍yɛ̍ mi̍ lā wā bu̍ɛ̍i̍yāā ndūa̍a̍ wa̍, nya̍ yu̍ŋgu̍ Che̍kɔ̍pū wo̍, wāna̍ ndɔ̍ o̍ hɛ̍li̍ wo̍, lā lōōnu̍ŋ a̍ wa̍lta̍ kɔ̄ndɔ̄fi̍ltā Mɛ̄lɛ̄ka̍ tōsa̍ la̍ŋ, ndu̍yɛ̍ a̍ ka̍a̍ma̍ālā ndɔ̄la̍ŋ, ndu̍yɛ̍ a̍ yāma᷅ŋ o̍ ki̍lu̍l ya̍a̍mɔ̍ɔ̍wa̍ mbō tūsī nda̍ nyɛ̄ pālāa̍ chōo̍ wo̍ŋ.

⁶

⁷Ndu̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ni̍. Ndu̍ nɔ̍ kpāāyāa̍ chi̍e̍ēŋndo̍ chōo̍ kpo̍u̍ ni̍.

⁸Kpe̍ma̍ ndɔ̍ o̍ yi̍i̍ a̍ na̍a̍ wo̍, ō pu̍ɛ̍ɛ̍nūŋ a̍ kpe̍ma̍ ko̍ŋ te̍, ndu̍ yɔ̍nūŋ ni̍ māā, būŋgāŋ ndɔ̄ɔ̍ŋ o̍ chūe̍l na̍a̍ a̍ yu̍ŋgu̍la̍ nāāla̍ŋ lēpūlā kɛ᷅ wo̍ŋ.

⁹Kpe̍ma̍a̍ ho̍ō o̍ yi̍i̍ a̍ E̍bīlāha᷅m ni̍, ndu̍yɛ̍ mbo̍ chūēl Āa̍se̍ būŋgɛ̄i̍ ī kālā ka̍lā.

¹⁰Ndu̍yɛ̍ mbo̍ sīīŋgūū kpe̍ma̍ ko̍ŋ sāwāa̍, mbo̍ kē Che̍kɔ̍pū sāwā ko̍ŋ, mbo̍ sīmnu᷄ŋ kpe̍ma̍ fɛ̍ɛ̍ŋ a̍ fɛ̍ɛ̍ŋndo̍ le̍ wāŋnda̍ I̍sɔ̄lūɛ̄ī.

¹¹Mbo̍ dīmī āā, “I̍ cho̍ nya̍ lɛ̄ŋndē Ke̍nāŋnde̍ŋ kē, mī lē wa᷄ nyɛ̄m nya̍ ŋ̄kɛ᷅.”

¹²A̍ te̍le̍ŋ ko̍ŋ, I̍sɔ̄lūɛ̍i̍ya̍ ā ve᷄ bɛ̍ɛ̍ a̍ bɔ̍ɔ̍ le̍. Ku̍ndā pɔ̄mbu̍i̍i̍ni̍i̍ nda̍ wa̍ ni̍, ndu̍yɛ̍ mīālla̍ nda̍ wa᷄ o̍ lɛ̄ŋndē lēŋ ni᷄ŋ ni̍.

¹³Ā wa᷄ bālɔ̄ɔ̍, ā chɛ᷄ŋ pɛ̍ lɛ᷅ŋnde̍ŋ nde᷅ŋ ā kūɛ̄ lɛ̄ŋnde̍ŋ nde᷅ŋ, ā chɛ᷄ŋ o̍ māsāle̍ŋ nde᷅ŋ bɛ̄ŋgu̍ pɛ̍, ā kūɛ̄ o̍ le᷅ŋ bɛ̄ŋgu̍.

¹⁴Kɛ̍ a̍ bālɔ̄ɔ̄ nda̍ wa̍ ko̍ŋ ndo̍ kpo̍u̍, Mɛ̄lɛ̄ka̍ chɛ᷄l mī wānā o̍ wānā tu̍si̍ nda̍ nyɛ̄ pālāā chōo̍ le̍. Le̍ sa̍bū ndāa̍, mbo̍ sīlā māsāā bɛ̍ndūa̍a̍ āā,

¹⁵“Wānā o̍ wānā pi̍lā wānāā ni̍a̍a̍ ya̍ I̍ hɛ̍li̍ wa̍ bāa̍ le̍. Wānā o̍ wānā yɔ᷅ŋ wānāa̍ su̍a̍ā le̍ Mɛ̍lɛ̄ka̍ wa̍ nyɛ̄ o̍ nyɛ̄ le̍.”

¹⁶Mi̍ Mɛ̄lɛ̄ka̍ tōsā mi̍ yīmā bɛ̄ndūa̍ŋ mā dēl o̍ lɛ̄ŋndē ndāle̍ŋ ni᷄ŋ, ndu̍yɛ̍ mbo̍ tōsā mi̍ nyɛ̄ dīa̍a̍ chūū nda̍ o̍ lābā kpo̍u̍.

¹⁷Kɛ̍ mbo̍ vīām wāŋndo̍ nda̍ lāchī I̍chi̍pī, ndu̍ yɔ̍nūŋ māā Chōo̍sɛ̍ ni̍, ō nda̍ a̍a̍ pi̍si̍ māā chɛ̄ wo̍.

¹⁸Mi̍ wānāa̍ pe̍ndū Chōo̍sɛ̍ wa̍ ā ba᷄ŋ ndu̍ o̍ kpi̍ɔ̍ɔ̍, ndu̍yɛ̍ ma̍ bāā ndu̍ chīli̍ŋnde̍ o̍ lābo̍lō.

¹⁹Chōo̍sɛ̍ wa̍ o̍ bīyɔ̄ɔ̍ ni᷄ŋ mi̍ Mɛ̄lɛ̄ka̍ tɔ̄ɔ̄nda᷄ŋ ndu̍, ha̍a̍a̍ mi̍ nyɛ̄ o̍ di̍mi̍ māā ō chō yɔ̄nɔ᷄ŋndo̍ ō chīŋā lāsōndō.

²⁰Mi̍ māsā bɛ̍ndōo̍ I̍chi̍pī o̍ di̍mī ma̍ kɔ̍ so̍lī Chōo̍sɛ̍, nāa̍ o̍ wa̍ o̍ chīɛ̄ī mānyūmndo̍ ni᷄ŋ nda̍, ndu̍yɛ̍ mbo̍ māl ndu̍. Māsā bɛ̍ndōo̍ I̍chi̍pī, o̍ wa̍ wānāā bɔ̄ɔ̍ bɔ̍ɔ̍ chi᷅la̍ŋndo̍, mbo̍ tōsā mi̍ Chōo̍sɛ̍ sɔ̄lā mālɔ̄ɔ̍.

²¹Mi̍ Chōo̍sɛ̍ sīmnu᷄ŋ wa̍nā bɛ̍ndōo̍, o̍ māsāle̍ Māsāa̍ I̍chi̍pī le̍ŋ bɛ̄ŋgu̍. Mi̍ māsā bɛ̍ndōo̍ I̍chi̍pī o̍ si̍i̍ŋgūū ndu̍ wānā bɛ̍ndōo̍ le̍ lɛ̄ŋndē I̍chi̍pīle̍ŋ kpo̍u̍,

²²le̍ mī Chōo̍sɛ̍ ō nɔ̄ kpāāyāa̍ wānāa̍ wa̍ wa̍llo̍ māsā bɛ̍ndōo̍ o̍ bā bɛ̄ŋgu̍ wa̍ chōo̍, mbō chɔ᷄m nda̍ nyɛ̄ nda̍ nɔ̄ le̍ tōsāa̍ wo̍, ndu̍yɛ̍ mbō pɛ̄ɛ̄ku̍ wānāā bɛ̄ndūa̍a̍ wa̍ wa̍llo̍ māsā bɛ̍ndōo̍ I̍chi̍pī o̍ bā bɛ̄ŋgu̍ wa̍ sɔ̄ɔ̍ŋ kɔ̄l kālo̍ŋ.

²³O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā tūūsū I̍chi̍pī, mi̍ yu̍ŋgu̍ Che̍kɔ̍pū wo̍ ho̍ō ā kɔ᷄ cha᷅l o̍ lɛ̄ŋndē lēŋ ni᷄ŋ māā wānāā lēkāa̍, le̍ŋ le̍ yɔ̍nūŋ māā lɛ̄ŋndē I̍chi̍pīle̍ŋ ni̍.

²⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ wānāā ndūa̍a̍ ā kūī ta̍u̍ ta̍u̍. Ndu̍yɛ̍, ma̍ sɔ̄lā kpāāyāa̍ ma̍ hīāū ya̍a̍mɔ̍ɔ̍wa̍a̍ ndāa̍.

²⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ tōsā mi̍ wāŋnda̍ I̍chi̍pī a̍ tu᷅l wānāā ndūa̍a̍ lēyɛ̄, ndu̍yɛ̍ ma̍ tōsāl bu̍ɛ̍i̍yāā ndūa̍a̍ ha̍ā kāŋgālāa̍.

²⁶Mi̍ Mɛ̄lɛ̄ka̍ sōlī bu̍ɛ̍ī ndɔ̄ɔ̍ Mūu̍sē, a̍ E̍lɔ̄ŋ, wāna̍ o̍ hɛ̍li̍ wo̍, mbo̍ vīām nda̍ I̍chi̍pī.

²⁷Ma̍ kɔ᷄ to̍sā sɔ̄ɔ̍ŋ lākpālūŋ Mɛ̄lɛ̄ka̍ dīmu̍l nda̍ wo̍ŋ, ndu̍yɛ̍ a̍ ka̍a̍ma̍ālā ndɔ̄la̍ŋ, I̍chi̍pī lo̍ŋ.

²⁸Mi̍ Mɛ̄lɛ̄ka̍ tōsā mi̍ nyūmmā bɛ̄ndūa̍ŋ mā tūāl o̍ lɛ̄ŋndē I̍chi̍pīle̍ŋ ni᷄ŋ kpo̍u̍. Kɛ̍ a̍ ko̍ŋ kpo̍u̍, wāŋnda̍ I̍chi̍pī a̍ chɛ᷅l mā tōsa̍ nyɛ̄ o̍ di̍mi̍ wo̍ le̍.

²⁹Mbo̍ tōsā mi̍ pēēla̍ŋ I̍chi̍pī la̍ si̍mnu᷄ŋ ko̍o̍wa̍ŋ kpo̍so̍ŋ, ndu̍yɛ̍ sūūwa̍ o̍ pēēla̍ŋ I̍chi̍pī kpo̍u̍ ma̍ wū.

³⁰O̍ ko̍ŋ kɔ̍ɔ̍lī, mi̍ sɔ̄lla̍ ā chūā lɛ̄ŋndē I̍chi̍pīle̍ŋ kpo̍u̍, o̍ chīɛ̄ī lēmāsāa̍ ni᷄ŋ bɛ̍ɛ̍ ma̍ tīū kpo̍u̍.

³¹Mi̍ Mɛ̄lɛ̄ka̍ tōsā mi̍ pēŋgi̍a̍a̍, a̍ nyāā kīsīa̍a̍ ā chūā lɛ̄ŋndē I̍chi̍pīle̍ŋ kpo̍u̍.

³²Mbo̍ tōsā mi̍ lōōŋ kpu̍ŋgbāŋ bɛ̄ndo᷄ŋ ŋ̄ dēlī o̍ lɛ̄ŋndē I̍chi̍pīle̍ŋ ni᷄ŋ kpo̍u̍, lātūlu̍ a̍ ta᷅ŋnda̍ŋ.

³³Mi̍ lōōŋ kpu̍ŋgbāŋ mu᷅ŋ a̍ ta᷅ŋmā māŋ mā tɛ̄ɛ̄mbūū yɔ̄mīī ndɛ̄i̍ mākīle̍pīi̍ye̍ kpo̍u̍, a̍ yɔ̄mīī ndɛ̄i̍ māfi̍kīi̍ye̍, ndu̍yɛ̍ a̍ yɔ̄m o̍ yɔ᷄m wa̍ o̍ lɛ̄ŋndē I̍chi̍pīle̍ŋ ni᷄ŋ.

³⁴O̍ ko̍ŋ kɔ̍ɔ̍lī, mbo̍ tōsā mi̍ so̍o̍nu̍a̍a̍ ā hūŋ, ma̍ tīū o̍ lɛ̄ŋndē I̍chi̍pīle̍ŋ ni᷄ŋ kpo̍u̍, ā wa̍ ha̍a̍a̍ nda̍ a̍a̍ chu̍ū chɔ᷅m te̍.

³⁵Yɔ̄m o̍ yɔ̄m pūīyāa̍ wa̍ o̍ lɛ̄ŋndē I̍chi̍pīle̍ŋ ni᷄ŋ, a̍ tɔ̄lɔ̄ɔ̄ o̍ tɔ̄lɔ̄ɔ̍ wa̍ o̍ chīɔ̍ɔ̍ŋ ni᷄ŋ, mi̍ so̍o̍nu̍a̍a̍ ha̍ā ā dīā la̍ŋ kpo̍u̍.

³⁶O̍ ko̍ŋ kɔ̍ɔ̍lī, mbo̍ dīū chūāūwāā pīāāndūāā tāsi̍a̍a̍ ve̍lu᷄ŋ I̍chi̍pī wa̍ kpo̍u̍. Po̍ tāse̍ o̍ po̍ tāse̍ ve̍lu᷄ŋ o̍ yu̍ŋgu̍ o̍ yu̍ŋgu̍ cho̍o̍, mbo̍ dīū nda̍ kpo̍u̍.

³⁷O̍ mɛ̄ɛ̄lu̍la̍ŋ kpɔ̍ŋ, mbo̍ sōlī I̍sɔ̄lūɛ̍i̍ya̍ o̍ lɛ̄ŋndē I̍chi̍pīle̍ŋ ni᷄ŋ, a̍ bāla̍ŋ lā pīāā cha̍ cha̍ a̍ ko̍o̍līi̍yo̍ŋ, ndu̍yɛ̍ a̍ ka̍ni̍ŋ hu̍mbo᷄ŋ. Ndu̍yɛ̍ nda̍ kpo̍u̍ ā wānu̍ŋ kɛ̍ndi̍a̍a̍, ma̍ wā a̍ dīāllūŋ kālā.

³⁸Mi̍ mālɔ̄ɔ̄ wāŋnda̍ I̍sɔ̄lūɛ̄ī a̍ ma̍l lo̍, tōsā mi̍ wāŋnda̍ I̍chi̍pī a̍ na᷅ŋ lākɔ̄l ta̍u̍, kāni̍ fo̍ndōle̍, sīōōŋnde̍ wa᷄ nda̍ ni᷅ŋ ta̍u̍ ta̍u̍ a̍ I̍sɔ̄lūɛ̍i̍ya̍.

³⁹Mi̍ Mɛ̄lɛ̄ka̍ hāndū wānāā ndūa̍a̍ yu̍mbu̍ yu̍mbu̍ īkpūŋgbāa̍ chōo̍, le̍ nda̍ nɛ̄īyo̍ chɔ̄mndo̍ īpāla̍. Mbo̍ yɔ̄ŋgū pa̍ŋgēle̍ lēyīŋndo̍, le̍ nda̍ nyɛ̄ wa̍wo̍ŋndo̍ kīo̍o̍ īchɔ̄l.

⁴⁰Mɛ̄ɛ̍ nda̍ nyūna̍ ndu̍ dīōm le̍ mbō ke̍ nda̍ nyɛ̄ māhīlōo̍, mbo̍ kē nda̍ wɔ̄lla̍, ndu̍yɛ̍ mbo̍ kē nda̍ nyɛ̄ dīa̍a̍ fūlāa̍ ɛ̄chɛ̍nɛ̄ ma̍ hīnī lākɔ̄l.

⁴¹Mbo̍ kūmbī pōūwo̍, mi̍ mɛ̄ŋnda̍ŋ mā fūlā o̍ pōūwo̍ ni᷄ŋ, mi̍ mā kūā kōŋgi̍o̍o̍ o̍ lɛ̄ŋndē po̍lte̍ŋ ni᷄ŋ mɛ̄ɛ̍ pīo̍o̍ ō hīāū nu̍a̍ā yɛ̍.

⁴²Mbo̍ lōōnu᷄ŋ bu̍ŋgɛ̄ī ndūɛ̍i̍ o̍ chūe̍l bu̍ɛ̍ī ndɔ̄ɔ̍ E̍bīlāha᷅m ī kālā ka̍lā ve̍.

⁴³Mbo̍ sōlī wānāā ndūa̍a̍ o̍ hɛ̍li̍ wa̍ I̍chi̍pī, ndu̍yɛ̍ ma̍ fūlā a̍ chōndo̍ŋ sōlīo̍o̍ a̍ nya̍a̍lo̍o̍.

⁴⁴Mbo̍ kē nda̍ lɛ̄ŋndē kāa̍la̍ che᷅le̍ŋ māā nyɛ̄ ndā, ndu̍yɛ̍ mbo̍ kē nda̍ chīɔ̄ɔ̄ŋ wānāā chēle̍ŋnda̍ ā tōsa̍ wo̍ŋ māā nyɛ̄ ndā.

⁴⁵Le̍ sa̍bū o̍ to̍sa̍ mu᷅ŋ kpo̍u̍ wo̍ cho̍ ni̍, māā le̍ mī wāŋnda̍ I̍sɔ̄lūɛ̄ī a̍ to̍sa̍ nyɛ̄ o̍ nyɛ̄ sāwāla̍ ndɔ̄la̍ŋ lā dīmi̍. Ndu̍yɛ̍ a̍ nyɛ̄ o̍ nyɛ̄ o̍ di̍mu̍l nda̍ le̍ tōsāa̍. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄.