Read Southern Kisi Sa᷅m 106 Bible Online

Sa᷅m 106 - Southern Kisi bible

Sa᷅m 106

¹Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄. Lā me᷄l Mɛ̍lɛ̄ka̍ Ya̍a̍wɛ̄ɛ̍ ba̍li̍ka̍a̍, kāni̍ fo̍ndōle̍, ō chō wānā kɛ̍ndɛ̄, kāālā ndɔ̍ cho̍ te̍le̍ŋ o̍ te̍le̍ŋ ndo̍, ō chō le̍ fɛ̍ɛ̍ŋ a̍ fɛ̍ɛ̍ŋ.

²Wānā o̍ wānā cho̍ mbō chīi̍ sɔ̄ɔ̍ŋ kɔ̄ndɔ̄fi̍li̍ŋ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ wo̍ŋ chɔ̄m te̍. Wānā o̍ wānā cho̍ mbō sa̍ŋga̍la̍ ndu̍ mɛ̄ɛ̍ kpɛ̍ o̍ nɔ̍ le̍ sāŋgālāa̍ sɔ̄lāa̍ yɛ̍ le̍.

³Wānāa̍ to̍sā sɔ̍ɔ̍ŋ o̍ nɛ̄ī sa̍kpō, le̍ te̍le̍ŋ o̍ te̍le̍ŋ ā chō sa̍kpō Mɛ̄lɛ̄ka̍ o̍ hɔ̄l la̍, ā pɛ̄l tɔ̄nɔ̄ɔ̍.

⁴O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ lo̍o̍nu̍ŋ a̍ ya̍, bōōndi̍i̍ ŋ̄ chā ni̍ŋ wa̍nāā nūmnda̍ nyīnā ve̍, bōōndi̍i̍ ŋ̄ wā ni̍ŋ nda̍ chīīndīa̍a̍ ve̍, ya̍ bɛ̍ɛ̍ yi̍ya̍ŋ ya̍ chōo̍.

⁵Dɛ̍nɛ̍ kɛ̍ndɛ̄ bɛ̄ndū wānāā nu̍m a̍ ŋ̄ hɛ̄li̍ wa̍ ā wā ni̍ŋ le̍ni̍ŋ ndo̍, to̍sa̍ ya̍ bɛ̍ɛ̍ mī de᷅ ndu̍ tɔ̄nɔ̄, o̍ ko̍ŋ, ya̍ bɛ̍ɛ̍ mī dɔ̍ɔ̍nu᷄ŋ nya̍a̍le̍ a̍ wānāā nūmnda̍ lātūlu̍, ndu̍yɛ̍ mī sa̍ŋga̍la̍ nu̍m na̍a̍ wānāā nūm a̍ cho̍ ha̍ā māā nyɛ̄m nu̍m ŋ̄kɛ᷅ wa̍.

⁶Ŋ̄ tōsa̍ yɔ̄ŋ wɔ̄ɔ̍ŋndo̍, mɛ̄ɛ̍ fi̍nyāā nāā ma̍māa̍ ā tōsa̍ yɛ̍, ŋ̄ fāŋa̍ŋ o̍ nɛ̄i̍ Mɛ̄lɛ̄ka̍a̍ chōo̍, ndu̍yɛ̍ mi̍ ŋ̄ tōsā dɛ̍nɛ̍ wɔ̍ɔ̍ŋ bɛ̄ndū bɛ̍ndōo̍.

⁷Bōōndi̍i̍ fi̍nyāā nāā ma̍māa̍ ā wa̍ sīndɛ̄ I̍chi̍pī ve̍, sɔ̄ɔ̍ŋ kɔ̄ndɔ̄fi̍li̍ŋ o̍ tōsa̍ nda̍ tɛ̄ɛ̄ŋ ndo̍ŋ ki̍nɛ̍i̍, ā chūe̍ mu̍ŋ nyɛ̄ o̍ nyɛ̄ le̍. Sɔ̄ɔ̍ŋ kɛ̍ndɛ̄ŋ o̍ tōsa̍l nda̍ ki̍nɛ̍i̍ yo̍ŋ, ma̍ pūɛ̄ɛ̄nu̍ŋ a̍ mu̍ŋ. Mɛ̄ɛ̍ nda̍ fūūlu̍u̍ o̍ Pēē Si̍a̍ŋā Mɛ̄ŋmā Īhɛ᷄llo̍, ma̍ lō o̍ ko̍ŋ ma̍ sīmūl Mɛ̄lɛ̄ka̍ Bɛ̄ndōo̍ Kpo̍u̍.

⁸Kɛ̍ le̍ mbō tōsa̍ mī wāŋnda̍ hīōū lāchī a̍ dīōlā ndɔ̄la̍ŋ bɛ̄ɛ̄le̍ŋ kīo̍o̍, mbo̍ chīīndīāā nda̍, le̍ mī wāŋnda̍ chē mɛ̄ɛ̍ o̍ cho̍ wāna̍ kpāāyā bɛ̍ndū yɛ̍.

⁹Mbo̍ dīmūl Pēē Si̍a̍ŋā Mɛ̄ŋmā Īhɛ᷄llo̍ le̍ mbō vēla̍, ndu̍yɛ̍ mbo̍ vēlā. Mbo̍ kēēkū a̍ wānāā ndūa̍a̍ o̍ fo̍ndāŋ yīŋgi̍lɛ̍i̍ bɛ̍ndōo̍ o̍ lɛ̄ŋndē vēsɛ̍i̍le̍ŋ chōo̍.

¹⁰Mbo̍ lō o̍ ko̍ŋ, mbo̍ chīīndīāā nda̍ wānāa̍ tu̍l nda̍ yɛ̍le̍ŋ nda̍ o̍ bā. Mbo̍ sōlī nda̍ ya̍a̍mɔ̍ɔ̍wa̍a̍ ndāa̍ o̍ bā.

¹¹Kɛ̍ ya̍a̍mɔ̍ɔ̍wa̍a̍ ndāa̍ nda̍ nda̍, mbo̍ tōsā mi̍ mɛ̄ŋnda̍ŋ mā kūmbū nda̍ kpo̍u̍, ō pīlɛ̍ bɛ̍ɛ̍ fu̍la̍ le̍.

¹²O̍ ko̍ŋ, mi̍ wānāā ndūa̍a̍ ā lāāla᷄ŋ nyɛ᷅ o̍ di̍mu̍l nda̍ wo̍, ndu̍yɛ̍ ma̍ sōlī chōnde̍i̍ le̍ ndu̍ sāŋgālāa̍.

¹³Kɛ̍ ō bēndu̍ bɛ̍ɛ̍ ti᷅ŋ te̍, ma̍ pūɛ̄ɛ̄nu᷄ŋ bɛ̍ɛ̍ nyɛ᷅ o̍ to̍sa̍l nda̍ wo̍, ā nɔ̄la̍ mā chu᷄m ndu̍, mbō dīmu̍l nda̍ nyɛ̄ nda̍ nɔ̄ le̍ tōsāa̍ wo̍ le̍.

¹⁴Mɛ̄ɛ̍ nda̍ fūūlu̍u̍ o̍ lɛ̄ŋndē po̍lte̍ŋ ni᷄ŋ, le̍ pūlu̍le̍ ndāle̍ŋ, ma̍ tɔ̄ɔ̄nda᷄ŋ Mɛ̍lɛ̄ka̍ lo̍ŋ.

¹⁵Mi̍ Mɛ̄lɛ̄ka̍ kē nda̍ nyɛ̄ nda̍ nyūna̍ ndu̍ dīōm le̍ ndu̍ wo̍, kɛ̍ mbo̍ tōsā mi̍ nāālā wɔ̄ɔ̍ŋnda̍ŋ lā dēl nda̍ tɛ̄ɛ̄ŋ.

¹⁶O̍ dɔ̍ɔ̍ŋgɔ̍ nda̍ wa̍ wo̍, ma̍ kāndū Mūu̍sē pāŋālāa̍, nda̍ E̍lɔ̄ŋ, wāna̍ Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ wo̍.

¹⁷Mi̍ lɛ̄ŋnde̍ŋ lē kūmbi᷄ŋ, mi̍ lē kūmbū Do̍tāŋ, ndu̍yɛ̍ mi̍ lē kūmbū vɛ̄lɛ̄ A̍bi̍lūām nda̍ yu̍ŋgu̍ ndɔ̄ɔ̍.

¹⁸Mi̍ Mɛ̄lɛ̄ka̍ yɔ̄ŋ yīŋnde̍ŋ mi̍ lē fūlā chōo̍ cho̍o̍ mi̍ lē hu᷄ŋ lo᷅m wānāa̍ wa̍ nda̍ kɔ̄ɔ̄lī wa̍, wānāā dɛ̍nɛ̍ wɔ̍ɔ̍ŋāā kāŋ ki̍nɛ̍i̍, mi̍ yīŋnde̍ŋ lē tɛ̄ɛ̄mbūū nda̍.

¹⁹O̍ ko̍ŋ kɔ̍ɔ̍lī, mɛ̄ɛ̍ nda̍ fūūlu̍u̍ o̍ Pēmbīī Sa̍a̍nāīve̍, ma̍ tēēŋgīāā ko̍o̍līi̍ye̍, ma̍ tūūlā nāū fɔ̍ŋndɔ̍ɔ̍, ma̍ sōōlūū ndu̍ māā mɛ̄lɛ̄ka̍ ndā.

²⁰Bɛ̄ɛ̄le̍ nda̍ a̍a̍ nɔ̍ le̍ Mɛ̄lɛ̄ka̍ kīo̍o̍ le̍ŋ, ma̍ mīīŋgū nāū tōōyē nda̍ tūūla̍ wo̍ bɛ̍ɛ̍le̍ le̍ŋ kīo̍o̍, chɔ̄lu̍ di̍ā bi᷅llo̍ wo̍.

²¹Ma̍ pūɛ̄ɛ̄nu᷄ŋ a̍ Mɛ̄lɛ̄ka̍ chi̍i̍ndi̍a̍a̍ nda̍ wo̍, o̍ to̍sa̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndo᷄ŋ I̍chi̍pī wo̍.

²²Sɔ̄ɔ̍ŋ kɔ̄ndɔ̄fi̍li̍ŋ Mɛ̍lɛ̄ka̍ tōsa̍ lo̍ŋ ndo̍ŋ, ŋ̄ wa᷄ ŋ̄ bɔ̄ɔ̍. Sɔ̄ɔ̍ŋ ŋ̄sīōōŋ o̍ to̍sa̍ o̍ Pēē Si̍a̍ŋā Mɛ̄ŋmā Īhɛ᷄llo̍ wo̍ŋ, ŋ̄ wa᷄ ŋ̄ bɔ̄ɔ̍.

²³O̍ ko̍ŋ, mi̍ Mɛ̄lɛ̄ka̍ yēēmā le̍ nda̍ tɛ̄ɛ̄mbūūwo̍. Kɛ̍ mi̍ Mūu̍sē, Mɛ̄lɛ̄ka̍ bu̍ɛ̍ī ndɔ̍ o̍ hɛ̍li̍ wo̍ ō lūɛ̄ī nda̍ tɛ̄ɛ̄ŋ. Mbo̍ nyɔ̄ɔ̄lū Mɛ̄lɛ̄ka̍ le̍ mbō pɔ̄lu̍l kɔ̄llo̍, ō tɛ̍ɛ̍mbūū nda̍ le̍.

²⁴Ma̍ kɛ̄ɛ̄ le̍ lūɛ̄īyɔ̄ɔ̍ o̍ lɛ̄ŋndē kɛ̄ndɛ̄lē Mɛ̄lɛ̄ka̍ wa᷄ nda̍ kīo̍o̍ le̍ŋ ni᷄ŋ. Kāni̍ fo̍ndōle̍, ma̍ kɛ̄ɛ̄ le̍ lāāla᷄ŋndo̍ a̍ būŋgɛ̄ī o̍ chu̍e̍l nda̍ ve̍.

²⁵Ma̍ chāl ŋɔ̄ɔ̄chīa̍ŋnda̍ŋ o̍ tɛ̍ndīi̍la̍ ndāla̍ŋ ni᷄ŋ, ā tōsa̍ nyɛ᷅ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ wo̍ le̍.

²⁶Le̍la̍ŋ, mi̍ Mɛ̄lɛ̄ka̍ tīāŋnu᷄ŋ o̍ ka̍lā ka̍lā le̍ mbō tōsa̍ mā vī o̍ lɛ̄ŋndē po̍lte̍ŋ ni᷄ŋ,

²⁷ndu̍yɛ̍ mbō sɛ̄ŋi̍ chūāūwāā ndāa̍ o̍ lɛ̄ŋnde̍ ni᷄ŋ, mbō tōsa̍ mā vī o̍ lɛ̄ŋīī sūmīālle̍ ni᷄ŋ.

²⁸Nda̍ bɛ̍ɛ̍ ma̍ tūāl wāŋnda̍ ā pīli̍a̍a̍ kɔ̄ɔ̄lī, ma̍ mūli᷄ŋ Mɛ̍lɛ̄ka̍ Bāāl sōōlūūwo̍ o̍ Pēmbīī Pi̍ɔ̍ɔ̄ ve̍, ndu̍yɛ̍ ma̍ dīā nyɛ̄ dīāā lāsōōlu̍u̍ nda̍ yɔ̄ŋgū o̍ mɛ̄lɛ̄ka̍ā cho̍ yo̍o̍mū le̍ wa̍ lo̍ wo̍.

²⁹O̍ ko̍ŋ, ma̍ tōsā mi̍ Mɛ̄lɛ̄ka̍ Ya̍a̍wɛ̄ɛ̄, o̍ du̍a̍u̍nu᷄ŋ tu̍mbe̍ a̍ nda̍ le̍ sɔ̄ɔ̍ŋ dɛ̍nɛ̍ wɔ̍ɔ̍ŋ nda̍ wa̍ mu̍ŋ to̍sāa̍ wo̍ŋ. Ndu̍yɛ̍ mi̍ Mɛ̄lɛ̄ka̍ tōsā mi̍ nāālā wɔ̄ɔ̍ŋ wɔ̍ɔ̍ŋndā bɛ̄ndūla̍ŋ lā dēl nda̍ tɛ̄ɛ̄ŋ.

³⁰Kɛ̍ mi̍ Fi̍ni̍ha̍a̍sī o̍ lu̍ɛ̍ī tɛ̄ɛ̄ŋ, mbo̍ tōsā mi̍ nāālā lākpūndɛ̍lā lāŋ lā fūlā nda̍ tɛ̄ɛ̄ŋ.

³¹Ndu̍yɛ̍ chɔ̍ŋ a̍ te̍le̍ŋ ko̍ŋ, wāŋnda̍ chō wɔ̄ lōōnɔ᷄ŋndo̍ a̍ nyɛ̄ o̍ to̍sa̍ ko̍ŋ ndo̍, ndu̍yɛ̍ le̍ fɛ̍ɛ̍ŋ a̍ fɛ̍ɛ̍ŋ, wāŋnda̍ chō wā lōōnɔ᷄ŋndo̍ a̍ ndi̍ o̍kɔ̄ɔ̄.

³²O̍ ko̍ŋ kɔ̍ɔ̍lī, mɛ̄ɛ̍ wāŋnda̍ I̍sɔ̄lūɛ̄ī a̍ fu̍u̍lu̍u̍ o̍ pēēla̍ pɔ̍mbɔ̄la̍ŋ Mɛ̍lu̍i̍bā, ma̍ tōsā mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ nda̍ lo̍ŋ. Ndu̍yɛ̍ mi̍ Mūu̍sē o̍ sɔ̍lā dɛ̍nɛ̍ pa̍lāa̍ le̍ sābū ndāa̍.

³³Ma̍ tōsā mi̍ Mūu̍sē o̍ du̍a̍u̍nu᷄ŋ tu̍mbe̍, o̍ ko̍ŋ, mbo̍ dīmī nyɛ̄ ndu̍ o̍o̍ nɔ̍ le̍ dīmī le̍ wo̍.

³⁴O̍ ko̍ŋ kɔ̍ɔ̍lī, mɛ̄ɛ̍ Mɛ̍lɛ̄ka̍ Ya̍a̍wɛ̄ɛ̄ o̍ di̍mu̍l nda̍ le̍ wānāa̍ wa̍ o̍ lɛ̄ŋndē lēŋ ni᷄ŋ nda̍ dīūwo̍ yɛ̍, ā dīu̍ nda̍ le̍nde̍ le̍.

³⁵Ma̍ lō o̍ ko̍ŋ, ma̍ kēna᷅ŋ la̍a̍ndūa̍a̍ nda̍ wāŋnda̍ ha̍ā, ndu̍yɛ̍ ma̍ chūā ka̍ālā ndāla̍ so̍o̍lūāā mɛ̄lɛ̄ka̍a̍ chēle̍ŋnda̍ŋ.

³⁶Nda̍ bɛ̍ɛ̍ ma̍ mūli᷄ŋ mɛ̍lɛ̄ka̍ā wāŋnda̍ ha̍ā sōōlūūwo̍, ndu̍yɛ̍ mi̍ he̍ī ī sīmnu᷄ŋ ya̍ŋɔ̄ɔ̄le̍ŋ le̍ nda̍.

³⁷Nda̍ bɛ̍ɛ̍ ma̍ wā chūāūwāā ndāā pi̍a̍a̍ndūa̍a̍, a̍ chūāūwāā ndāā la̍a̍ndūa̍a̍ sa̍lāla̍ŋ sōlīo̍o̍ o̍ mɛ̄lɛ̄ka̍ā fo̍ndūa̍a̍ lo̍.

³⁸Ma̍ dīū chūāūwāā ndāa̍ tɛ̍ɛ̍mbu̍u̍ ka̍ŋ i̍sɔ̍ɔ̍ o̍ i̍sɔ̄ɔ̍ le̍ wa̍, chūāūwāā ndāā pi̍a̍a̍ndūa̍a̍ a̍ chūāūwāā ndāā la̍a̍ndūa̍a̍, ndu̍yɛ̍ ma̍ sōlī nda̍ sa̍lāla̍ŋ o̍ mɛ̄lɛ̄ka̍a̍ wāŋnda̍ Ke̍nāŋ. O̍ ko̍ŋ, mi̍ lɛ̄ŋnde̍ŋ lē sīmnu᷄ŋ le̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l a̍ kōo̍wa̍ŋ.

³⁹Ma̍ tōsā ma̍ sīmnu᷄ŋ a̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l a̍ nyɛ̄ nda̍ tōsa̍ wo̍. Ndu̍yɛ̍ ma̍ tōsā a̍ Mɛ̄lɛ̄ka̍, mɛ̄ɛ̍ wānā la̍nɔ̍ ti̍a̍māa̍ ō tōsā nu̍a̍ā yɛ̍.

⁴⁰O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ wānāā ndūa̍a̍, ndu̍yɛ̍ mbo̍ tūl nda̍ lēyɛ̄, mi̍ chē bɛ̍ɛ̍ ma̍ wā māā nyɛ̄m ndɔ̍ ŋ̄kɛ᷅ ni̍.

⁴¹Mbo̍ lō o̍ ko̍ŋ, mbo̍ māl nda̍ lɛ̄ŋīi̍ pi̍ɛ̍ī Mɛ̍lɛ̄ka̍ le̍ ve̍ o̍ bā, le̍ he̍ī ma̍ wā wānāa̍ tu̍l nda̍ yɛ̄le̍ŋ nda̍ o̍ bā bɛ̄ŋgu̍.

⁴²Mi̍ ya̍a̍mɔ̍ɔ̍wa̍a̍ ndāa̍ ha̍ā ā tūsī nda̍ nyɛ̄ pālāa̍ chōo̍, ndu̍yɛ̍ ma̍ kīndīlā nda̍, ma̍ wā ni̍ko̍ nda̍ o̍ bā bɛ̄ŋgu̍ fi᷅kpi̍.

⁴³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndīāā nda̍ te̍le̍ŋnda̍ bɔ̍ɔ̍ bɔ̍ɔ̍, kɛ̍ ma̍ kɛ̄ɛ̄sīāā le̍ Mɛ̄lɛ̄ka̍ sīmūllo̍, ndu̍yɛ̍ ma̍ hīāūnu᷄ŋ ni̍ko̍ le̍ni̍ŋ a̍ yɔ̄ŋ wɔ̄ɔ̍ŋndo̍ tōsāa̍.

⁴⁴Kɛ̍ mɛ̄ɛ̍ nyɛ̄ pālāa̍ kōma̍l nda̍, ma̍ cha᷄ŋ nāa̍ Mɛ̄lɛ̄ka̍ chūā le̍ mālāa̍, mbo̍ tūɛ̄ī pīɛ̄īlē ndāle̍ŋ, mbo̍ yīya᷄ŋ nda̍ chōo̍.

⁴⁵Le̍ mɛ̄ɛ̍ nda̍ chō wānāā ndɔ̄ yɛ̍, mbo̍ lōōnu᷄ŋ a̍ kpe̍ma̍ o̍ yi̍i̍ a̍ nda̍ wo̍, ndu̍yɛ̍ a̍ kāālā ndɔ̍ cho̍ le̍ te̍le̍ŋ o̍ te̍le̍ŋ ndo̍, mbo̍ māŋgālā kɔ̄l ndɔ̄ɔ̍ ō tu̍si̍ lɛ̍ nda̍ nyɛ̄ pālāā ndu̍ o̍o̍ kɛ̍ɛ̍si̍a̍a̍ wo̍ chōo̍ le̍.

⁴⁶Mi̍ Mɛ̄lɛ̄ka̍ tōsā, mi̍ wānāā nda̍ wa̍ o̍ bā o̍ bīyɔ̄ɔ̍ ni᷄ŋ nda̍, ā tūīīnu᷄ŋ nda̍ īnyīɛ̍ɛ̍.

⁴⁷O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, yāndi̍i̍, chi̍i̍ndi̍a̍a̍ yo̍o̍mūlā nāāla̍ŋ, ma̍ so̍li̍ na̍a̍ o̍ lɛ̄ŋīī na̍a̍ ŋ̄ chō o̍ bīyɔ̄ɔ̍ ni᷄ŋ nde̍ ni᷄ŋ, mā mi̍ŋgi̍ na̍a̍ o̍ lɛ̄ŋndē nāāle̍ŋ ni᷄ŋ. O̍ ko̍ŋ, mī ŋ̄ me᷄l nu̍m ba̍li̍ka̍a̍, ndu̍yɛ̍ mī ŋ̄ sāŋga̍la̍ dīōlā nūmnda̍ kāsī la̍ŋ.

⁴⁸Mbɔ̄ māā wāŋnda̍ ā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄, ō cho̍ Mɛ̄lɛ̄ka̍ I̍sɔ̄lūɛ̍i̍ya̍ fɔ̍. Wāŋnda̍ ā sāŋga̍la̍ ndu̍, pɛ̄ŋgo̍o̍ ho̍ō, a̍ le̍ fɛ̍ɛ̍ŋ a̍ fɛ̍ɛ̍ŋ fɔ̍. Mbɔ̄ māā wāŋnda̍ kpo̍u̍ ā dīmi̍ āā, “Āmi̍i̍nā fɔ̍!” Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄.