Read Southern Kisi Sa᷅m 107 Bible Online

Sa᷅m 107 - Southern Kisi bible

Sa᷅m 107

¹Lā me᷄l Mɛ̍lɛ̄ka̍ Ya̍a̍wɛ̄ɛ̍ ba̍li̍ka̍a̍, kāni̍ fo̍ndōle̍, ō chō wānā kɛ̍ndɛ̄, kāālā ndɔ̍ cho̍ te̍le̍ŋ o̍ te̍le̍ŋ ndo̍, ō chō le̍ fɛ̍ɛ̍ŋ a̍ fɛ̍ɛ̍ŋ.

²Nya̍ wānā o̍ wānā Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndi̍a̍a̍, lā dīmi̍ di̍ōmnda̍ŋ nda᷅ŋ le̍ ndu̍ sāŋgālāa̍. Ō lo̍ o̍ ko̍ŋ mbo̍ chīīndīāā nya̍ ya̍a̍mɔ̍ɔ̍wa̍a̍ nyāa̍ o̍ bā,

³ndu̍yɛ̍ mbo̍ sōlī nya̍ nāa̍ nya̍ wa̍ o̍ bīyɔ̄ɔ̍ ni᷄ŋ o̍ lɛ̄ŋīī sūmīālle̍ ni᷄ŋ, bā pāa̍le̍ŋ lē chāŋndo̍, a̍ bā lē de᷅llo̍ wa̍, ndu̍yɛ̍ a̍ bā lūāŋndo̍, a̍ bā tōūwo̍ wa̍, mbo̍ mīŋgī nya̍ o̍ lɛ̄ŋndē nyāle̍ŋ ni᷄ŋ.

⁴Mi̍ ā bɔ̄ɔ̍ bɔ̍ɔ̍ a̍ la̍a̍sīa̍ŋ o̍ lɛ̄ŋndē po̍lte̍ŋ ni᷄ŋ, ā nɔ̄la̍ mā chē nɛ̄īyo̍ mā kūɛ̄ o̍ chi̍e̍e̍ o̍ chi̍e̍e̍ mā cha᷅l lo̍ŋ te̍.

⁵Mi̍ yīa̍a̍ŋ mā nɛ̄i̍ nda̍, ndu̍yɛ̍ mi̍ kōlɔ̄ɔ̍ bīī nda̍, nda̍ a̍a̍ nɔ̍ lɛ̍ tīīnda᷄ŋ o̍ tīīnda᷄ŋ te̍.

⁶O̍ ko̍ŋ, ma̍ chāŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ a̍ te̍le̍ŋ nyɛ̄ pālāā kōŋ ō wa̍ nda̍ chōo̍ wo̍, ndu̍yɛ̍ mbo̍ chīīndīāā nda̍, mbo̍ sōlī nda̍ o̍ dɛ̍nɛ̍ pa̍lāā kōŋ ni᷄ŋ.

⁷Mi̍ Mɛ̄lɛ̄ka̍ chɔ᷅m nda̍ nɛ̄īyo̍, mbo̍ kūā a̍ nda̍ o̍ chi̍o̍o̍ ma̍ chāl lo̍ŋ.

⁸Le̍la̍ŋ ā nɔ̄ mā me᷄l Mɛ̄lɛ̄ka̍ Ya̍a̍wɛ̄ɛ̍ ba̍li̍ka̍, kāni̍ fo̍ndōle̍, le̍ mɛ̄ɛ̍ o̍ chɔ̍m nda̍ kāālā ndɔ̍ cho̍ le̍ te̍le̍ŋ o̍ te̍le̍ŋ ndo̍, ndu̍yɛ̍ a̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ o̍ to̍sa̍ le̍ ŋ̄wāŋndā chīe̍e̍ wo̍ŋ yɛ̍.

⁹Wānāā kōlɔ̄ɔ̍ bīī ya̍, mbō ke᷄ nda̍ mɛ̄ŋnda̍ŋ mā ko᷄l, ndu̍yɛ̍ wānāa̍ wa᷅ a̍ yīa̍a̍ŋ nda̍, mbō ke᷄ nda̍ nyɛ̄ dīa̍a̍ mā dē.

¹⁰Wāŋnda̍ ā pūm ā wa᷄ o̍ nyūmmā tīŋgīsi̍ma̍ bɛ̍ndūa̍ŋ ni᷄ŋ, ā wa᷄ o̍ bīyɔ̄ɔ̍ ni᷄ŋ a̍ yɔ̄lɔ᷄ŋ nda̍ ŋ̄ bāāyīāā.

¹¹Kāni̍ fo̍ndōle̍, le̍ mɛ̄ɛ̍ nda̍ sīmu̍l dīo̍m Mɛ̄lɛ̄ka̍a̍, ma̍ kɛ̄ɛ̄ le̍ nīla̍ŋ yāŋɔ̄ɔ̍ o̍ sīlāla̍ Mɛ̄lɛ̄ka̍ Bɛ̄ndōo̍ Kpo̍u̍ wo̍ la̍ŋ yɛ̍.

¹²Mi̍ Mɛ̄lɛ̄ka̍ tōsā ma̍ yɔ̄kpā yɔ̄kpāa̍ pīla̍ a̍ wa̍lta̍ ka̍lā ka̍lā la̍ŋ tōsāa̍. Mā bo᷄ŋ mā de᷄l, kɛ̍ wānā o̍ wānā ve̍ mbō māla̍ nda̍ le̍.

¹³O̍ ko̍ŋ, ma̍ chāŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ a̍ te̍le̍ŋ nyɛ̄ pālāā kōŋ ō wa̍ nda̍ chōo̍ wo̍, ndu̍yɛ̍ mbo̍ chīīndīāā nda̍, mbo̍ sōlī nda̍ o̍ dɛ̍nɛ̍ pa̍lāā kōŋ ni᷄ŋ.

¹⁴Mbo̍ sōlī nda̍ nāa̍ nda̍ wa᷄ o̍ nyūmmā tīŋīsi̍ma̍ ma̍ŋ ni᷄ŋ o̍ bīyɔ̄ɔ̍ ni᷄ŋ nda̍. Yɔ̄lɔ᷄ŋ wa̍ nda̍ ŋ̄ bāāyīāā wo̍ŋ, mbo̍ kīlī kīlī mu̍ŋ.

¹⁵Le̍la̍ŋ ā nɔ̄ mā me᷄l Mɛ̄lɛ̄ka̍ Ya̍a̍wɛ̄ɛ̍ ba̍li̍ka̍, kāni̍ fo̍ndōle̍, le̍ mɛ̄ɛ̍ o̍ chɔ̍m nda̍ kāālā ndɔ̍ cho̍ te̍le̍ŋ o̍ te̍le̍ŋ ndo̍, ndu̍yɛ̍ a̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ o̍ to̍sa̍ le̍ ŋ̄wāŋndā chīe̍e̍ wo̍ŋ yɛ̍.

¹⁶Dīōlā ŋ̄bu̍lɔ̍ŋsīi̍la̍ ya̍a̍mɔ̍ɔ̍wa̍ kīīndīāā wa̍nāā ndūa̍a̍ kɔ̄ɔ̄lī, mā hāndu̍ chīli̍ŋu̍ŋ vi̍lɛ̄īyo̍ŋ su̍lu̍ku̍la̍ŋ nda̍ŋ, mbō pēsi̍ dīōlā lāŋ, mbō yīmī chīli̍ŋu̍ŋ mu̍ŋ le̍ wānāā ndūa̍a̍ chīīndīa̍a̍.

¹⁷Wāŋnda̍ pūm o̍ yɔ̄ŋndā wɔ̍ɔ̍ŋndo̍ ni᷄ŋ, ma̍ tōsā sɔ̄ɔ̍ŋ ŋ̄dīɔ̄mndo̍ŋ, ndu̍yɛ̍ mi̍ dɛ̍nɛ̍ pa̍lāa̍ tūāl nda̍ chōo̍ le̍ yɔ̄ŋndā ndāla̍ wɔ̍ɔ̍ŋnda̍ŋ.

¹⁸Nda̍ a̍a̍ ye̍e̍mā bɛ̍ɛ̍ mī nda̍ a̍a̍ che᷅ nyɛ̄ dīa̍a̍ a̍ lēhɔ̄l te̍. Ma̍ kūā chi̍e̍e̍ pīɔ̍m īkɛ̍i̍ kpɛ̍ɛ̍lūŋ.

¹⁹O̍ ko̍ŋ, ma̍ chāŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ a̍ te̍le̍ŋ nyɛ̄ pālāā kōŋ ō wāa̍ nda̍ chōo̍ wo̍, ndu̍yɛ̍ mbo̍ chīīndīāā nda̍, mbo̍ sōlī nda̍ o̍ dɛ̍nɛ̍ pa̍lāā kōŋ ni᷄ŋ.

²⁰Mɛ̄ɛ̍ Mɛ̄lɛ̄ka̍ sōō, mi̍ dīōmndē lēŋ lē sīŋgī nda̍, mbo̍ sōlī nda̍ nāa̍ nda̍ wa̍ pīɔ̍mndo̍ o̍ bā wa̍.

²¹Le̍la̍ŋ ā nɔ̄ mā me᷄l Mɛ̄lɛ̄ka̍ Ya̍a̍wɛ̄ɛ̍ ba̍li̍ka̍a̍, kāni̍ fo̍ndōle̍, le̍ mɛ̄ɛ̍ o̍ chɔ̍m nda̍ kāālā ndɔ̍ cho̍ te̍le̍ŋ o̍ te̍le̍ŋ ndo̍, ndu̍yɛ̍ a̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ o̍ to̍sa̍ le̍ ŋ̄wāŋndā chīe̍e̍ wo̍ŋ yɛ̍.

²²Ā nɔ̄ mā sōli̍ sa̍lāla̍ŋ o̍ ndu̍ lo̍ le̍ ndu̍ ba̍li̍ka̍a̍ mēllo̍, ndu̍yɛ̍ mā chɔ᷄m sɔ̄ɔ̍ŋ kɛ̍ndɛ̄ŋ o̍ to̍sa̍l nda̍ ki̍nɛ̍i̍yo̍ŋ, o̍ chōndu̍ŋ kɔ̄l kɛ̄ndɔ᷄ŋ ni᷄ŋ.

²³Wāŋnda̍ pūm ā wa᷄ bālɔ̄ɔ̍ o̍ pēe̍ mɛ̄ŋmā īhɛ᷄llo̍ chōo̍ o̍ dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ ni᷄ŋ. Ā wa᷄ yākōle̍ŋ tōsāa̍ o̍ mɛ̄ŋmā kpāāyāma̍ bɛ̄ndūmā māŋ chōo̍.

²⁴Mi̍ wāŋnda̍ ha̍ā chā wa̍lta̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ la̍ŋ. Ma̍ chā wa̍lta̍ kɔ̄ndɔ̄fi̍ltā o̍ to̍sa̍ o̍ pēe̍ mɛ̄ŋmā īhɛ᷄llo̍ chōo̍ la̍ŋ.

²⁵Mɛ̄ɛ̍ o̍ so̍ō, mi̍ hūēīyīī bɛ̄ndūe̍i̍ sūŋgū hɔ̄ŋndo̍, mi̍ pēe̍ mɛ̄ŋmā īhɛ᷄llo̍ ō wa̍ hīīlɔ᷄ŋndo̍ īyōkpa᷄ŋ yo̍kpa᷄ŋnde̍.

²⁶Mɛ̄ŋnda̍ŋ hūnɔ̄ɔ̍ a̍ kpāāyā bɛ̍ndōo̍ mī mā he᷄l a̍ dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ o̍ hūēīye̍ ni᷄ŋ, mī mā tōl a̍ la̍ŋ o̍ mɛ̄ŋnda̍ŋ bɛ̄ŋgu̍. Mi̍ sīōōŋīī bɛ̄ndūe̍i̍ bīī wānāa̍ ku̍ā a̍ dɛ̄ndɛ̄la̍ la̍ŋ nda̍, mi̍ kɔ̄lta̍ŋ lā lāāsi̍a̍ŋ nda̍ ni᷄ŋ kpo̍u̍.

²⁷Ma̍ yɔ̄nu᷄ŋ ba̍lākā māā wānāā kōlāā māmūɛ̄ī. Tāāsi̍ nda̍ nɔ̄ a̍ mɛ̄ŋnda̍ŋ o̍kɔ̄ɔ̄ wo̍ kpo̍u̍, mbo̍ lāāsīa̍ŋ nda̍ o̍ lēbōl.

²⁸O̍ ko̍ŋ, ma̍ chāŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ a̍ te̍le̍ŋ nyɛ̄ pālāā kōŋ ō wāa̍ nda̍ chōo̍ wo̍, ndu̍yɛ̍ mbo̍ chīīndīāā nda̍, mbo̍ sōlī nda̍ o̍ dɛ̍nɛ̍ pa̍lāā kōŋ ni᷄ŋ.

²⁹Mi̍ Mɛ̄lɛ̄ka̍ tōsā mi̍ hūēīyīī bɛ̄ndūi̍i̍ wa̍ hɔ̄ŋndo̍ ve̍ ī pɛ̄ŋgī, mi̍ mɛ̄ŋma̍ wa̍ hīīlɔ᷄ŋndo̍ īyōkpa᷄ŋ yo̍kpa᷄ŋnde̍ wa̍ŋ mā sīm yi̍.

³⁰Mi̍ wāŋnda̍ ha̍ā ā nāŋ kɔ̄l ta̍u̍, le̍ mɛ̄ɛ̍ mɛ̄ŋnda̍ŋ māŋ mā pɛ̄ŋgi̍ hīīlɔ᷄ŋndo̍ yɛ̍. Ndu̍yɛ̍ mi̍ Mɛ̄lɛ̄ka̍ chɔ̄m nda̍ nɛ̄īyo̍, ma̍ kūā a̍ dɛ̄ndɛ̄la̍ ndāla̍ŋ nāa̍ nda̍ a̍a̍ ye̍e̍ma̍ le̍ kɔ̄la̍ŋ nda̍.

³¹Le̍la̍ŋ wāŋnda̍ ha̍ā ā nɔ̄ mā me᷄l Mɛ̄lɛ̄ka̍ Ya̍a̍wɛ̄ɛ̍ ba̍li̍ka̍a̍, kāni̍ fo̍ndōle̍, le̍ mɛ̄ɛ̍ o̍ chɔ̍m nda̍ kāālā ndɔ̍ cho̍ te̍le̍ŋ o̍ te̍le̍ŋ ndo̍, ndu̍yɛ̍ a̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ o̍ to̍sa̍ le̍ ŋ̄wāŋndā chīe̍e̍ wo̍ŋ yɛ̍.

³²Tē wāŋnda̍ ā chūūŋgi̍āŋ pɛ̍ kpo̍u̍, wāŋnda̍ ha̍ā ā nɔ̄ mā līsa̍ ndu̍ wāŋnda̍ tɛ̄ɛ̄ŋ, ndu̍yɛ̍ mā sāŋga̍la̍ dīōlā ndɔ̄la̍ŋ wāŋ bɛ̄ndūa̍a̍ o̍ hɔ̄l.

³³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ pēēla̍ŋ lā vēla̍, mī fo̍ndāŋndā lāŋ lā sīmnu᷄ŋ māā lɛ̄ŋndē po̍l. Mbo̍ tōsā mi̍ pēēla̍ pɔ̍mbɔ̄la̍ŋ lā kīōlu̍, lā ve᷄ lɛ̍ hīōūwɔ̄ɔ̄ le̍.

³⁴Mbo̍ tōsā mi̍ fo̍ndāŋndā tɔ̄lɔ̄ɔ̄la̍ŋ lā nāŋ nda̍ŋ lā tāmbū, mi̍ lā sīmnu᷄ŋ fo̍ndāŋndā īhɛ᷄lta̍ŋ, kāni̍ fo̍ndōle̍, le̍ yɔ̄ŋ wɔ̄ɔ̍ŋ wānāa̍ cho̍ o̍ lɛ̄ŋndē lēŋ ni᷄ŋ nda̍ ā tōsa̍ wo̍.

³⁵Mbo̍ tōsā mi̍ lɛ̄ŋndē po̍lte̍ŋ lē sīmnu᷄ŋ fo̍ndāŋndā māmɛ̄ŋ, ndu̍yɛ̍ mi̍ pēēla̍ pɔ̍mbɔ̄la̍ŋ lā tīū o̍ lɛ̄ŋndē vēsɛ̍i̍le̍ŋ.

³⁶O̍ ko̍ŋ, mbo̍ tōsā mi̍ wānāā yīa̍a̍ŋ mā wa᷄ chōo̍ wa̍ ā hu᷄ŋ cha᷅l lo̍ŋ, ma̍ tāŋgūl chi̍o̍o̍ lo̍ŋ ma̍ chāl lo̍ŋ.

³⁷Ma̍ tōsā chīɔ̍ɔ̍ŋ ndo̍ŋ a̍ kpe̍le̍la̍ mākīle̍pīi̍la̍ŋ, ndu̍yɛ̍ mi̍ tɔ̄lɔ̄ɔ̄lā ndāla̍ŋ lā kūām ta̍u̍ ta̍u̍.

³⁸Mbo̍ dūāū wānāā ndūa̍a̍ sa̍lā, ndu̍yɛ̍ ma̍ kūī ta̍u̍ ta̍u̍. Ndu̍yɛ̍ chɔ̄lūāā ndāa̍ bɛ̍ɛ̍ ma̍ kūī ta̍u̍ ta̍u̍.

³⁹Mɛ̄ɛ̍ ya̍a̍mɔ̍ɔ̍wa̍ yēm wānāa̍ Mɛ̄lɛ̄ka̍a̍, ma̍ tɛ̄ɛ̄mbūū nda̍ bɛ̄ɛ̄la̍ŋ, ma̍ tūsī nda̍ nyɛ̄ pālāa̍ chōo̍, ndu̍yɛ̍, ma̍ sāāŋgīāā nda̍ ta̍u̍.

⁴⁰Mi̍ Mɛ̄lɛ̄ka̍ pɛ̄ɛ̄sā wānāā bɛ̄ndūāā nda̍ wa̍ o̍ bā bɛ̄ŋgu̍ wa̍, le̍ nyɛ̄ nda̍ tōsa̍ wo̍, ndu̍yɛ̍ mbo̍ tōsā ma̍ bālū o̍ lɛ̄ŋndē po̍lte̍ŋ ni᷄ŋ, ā sēēlu̍ŋ nɛ̍ī o̍ nɛ̄i̍ nda̍ kūā le̍.

⁴¹Kɛ̍ wānāa̍ nɔ̍ nyɛ᷅ o̍ nyɛ̄ le̍ wa̍ nda̍, mbo̍ sōlī nda̍ o̍ sāŋgā nda̍ wa᷄ ni᷄ŋ ndo̍, ndu̍yɛ̍ mbo̍ tōsā mi̍ yu̍ŋgu̍la̍ ndāla̍ŋ lā kūī ta̍u̍ ta̍u̍, mɛ̄ɛ̍ chɔ̄lūa̍a̍ ā kūī nu̍a̍ā yɛ̍.

⁴²Wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍ nda̍, tē ā chē he̍ī pɛ̍, kɔ̄lta̍ŋ nda̍ nāŋ ni̍, kɛ̍ wānāā dɛ̍nɛ̍ wɔ̍ɔ̍ŋnda̍ nda̍, mā mēi̍, ba᷅ko̍ bɛ̍ɛ̍ ā su̍ū le̍.

⁴³Wānā o̍ wāna̍ nɔ̍ tāāsi̍o̍o̍ pɛ̍, mbɔ̄ māā ō lōōnu̍ŋ a̍ sɔ̄ɔ̍ŋ mu᷅ŋ o̍kɔ̄ɔ̄, ndu̍yɛ̍ mbō wa᷄ yīya᷄ŋndo̍ a̍ kāālā cho̍ le̍ te̍le̍ŋ o̍ te̍le̍ŋ ndo̍, ō Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m wānāā ndūa̍a̍ wo̍.