Read Southern Kisi Sa᷅m 108 Bible Online

Sa᷅m 108 - Southern Kisi bible

Sa᷅m 108

¹[96] O̍o̍ Mɛ̄lɛ̄ka̍, I̍ dɔ̍ū tīīnda᷄ŋ nūu̍ kpo̍u̍ o̍ nūm ni̍ŋ. Nūm ya̍ I̍ ti̍i̍nda̍ŋ ni̍. I̍ cho̍ nu̍m sāŋgālā o̍ chōndo̍ŋ ni᷄ŋ, ndu̍yɛ̍ mī lɔ̍ɔ̄ nyɛ̄ chāa̍. Ti̍o̍ndu̍ nyi̍nā nūu̍.

²Ti̍o̍ndu̍ tōwa̍ nūu̍, a̍ nyɛ̄ nī cha̍ā lēyōō wo̍. I̍ cho̍ pāa̍le̍ si̍a̍āle̍ŋ tīndī.

³O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ nu̍m ba̍li̍ka̍a̍ mēl wāŋnda̍ tɛ̄ɛ̄ŋ. I̍ cho̍ nu̍m sāŋgālā o̍ chōndo̍ŋ ni᷄ŋ ka̍a̍la̍ŋ tɛ̄ɛ̄ŋ.

⁴Kāālā nu᷄m cho̍ le̍ te̍le̍ŋ o̍ te̍le̍ŋ ndo̍, ō ŋ̄ chɔ᷄m ŋ̄wāŋndā chīe̍e̍ wo̍, kāālā kōŋ chō ō bɛ̄ndū, māā chɔ̍ŋ lɛ᷅ŋ he̍l o̍ ha̍la̍. Ndu̍yɛ̍ sa̍kpōyɛ̍i̍ nūmnde̍, chɔ̄nɔ᷄ŋndo̍ lɛ̄ŋ mi̍ ī fūūlūū o̍ ha̍la̍ di̍.

⁵O̍o̍ Mɛ̄lɛ̄ka̍, chɔ̍m mɛ̄ɛ̍ ŋ̄ chō wāna̍ kpāāyā yɛ̍, o̍ ha̍la̍a̍ ni᷄ŋ cho̍o̍ cho̍o̍, ndu̍yɛ̍ mā chɔ̍m nāŋɔ̄ɔ̄ nu̍m bɛ̍ndōo̍ o̍ chi̍e̍ēŋndo̍ ni᷄ŋ kpo̍u̍.

⁶Mu̍li̍ na̍a̍ dīōm, ndu̍yɛ̍, mā to̍sa̍ a̍ kpāāyā nu̍m bɛ̄ndōo̍ mī ŋ̄ yēm. Ko̍ŋ to̍sā ni̍ mī na̍a̍ wānāā nūmnda̍, na̍a̍ ŋ̄ kāāla̍ ha̍ā wa̍ mī ŋ̄ chīnda̍.

⁷Mɛ̄lɛ̄ka̍ lo᷄ o̍ fo̍ndā ndɔ̍ kāsīo̍o̍ mbo̍ sūāā, mbo̍ dīmī āā, “A̍ kpāāya̍ ya̍ I̍ nɔ̍ le̍ ya̍a̍mɔ̍ɔ̍wa̍ yōmɔ̄ɔ̍ wo̍, I̍ cho̍ Si̍ɛ̍kɛ̄m chi̍e̍e̍ pi̍ɔ̍ū a̍ būŋga᷄ŋ, ndu̍yɛ̍ mī pi̍ɔ̍u̍ wāŋnda̍ lɛ̄ŋndē dɛ̍ŋgbɛ̍le̍ŋ Su̍kɔ̍tī o̍ pēmbo᷄ŋ tɛ̄ɛ̄ŋ.

⁸Ya̍ nɔ̍ Ki̍li̍a̍a̍dī ni̍, a̍ Mānāa̍sē. E̍fi̍lūēm ndu̍ cho̍ māchūāā māā mɔ̍si̍l ni̍ chɔ̄ū, ndu̍yɛ̍ mi̍ Chu̍dā ndu̍ wa᷅ māā tīnda̍ ni̍ lēmāsā.

⁹Mo̍wa̍bī cho̍ hɛ̄ŋgɛ̍i̍ nī pu̍la᷄ŋndo̍ ni̍. I̍dɔ̄m ndu̍ cho̍ māchūāā nāa̍ ya̍ I̍ kɛ̍sī kɔ̍vɛ̄i̍la̍ nīla̍ŋ nda̍, le̍ chɔ̄mndo̍ māā ya̍ nɔ̍ ndu̍ ni̍. I̍ cho̍ dēŋī chōo̍ cho̍o̍, fo̍ndōle̍, le̍ mɛ̄ɛ̍ ya̍ I̍ ye᷅m lɛ̄ŋndē Fīli̍i̍tīāŋnde̍ŋ yɛ̍.”

¹⁰O̍o̍ Mɛ̄lɛ̄ka̍, ō nɛ̄ɛ̍nɛ̍ cho̍ yɛ̍ lākɔ̄ a̍ ya̍ o̍ chi̍e̍e̍ cho̍ ho̍ō ō bɛ̄ɛ̄ndīāā ō kālā ka̍lā wo̍? Ō nɛ̄ɛ̍nɛ̍ cho̍ yɛ̍ lākɔ̄ a̍ ya̍ I̍dɔ̄m?

¹¹Mɛ̄ɛ̍ kīɔ̍ɔ̍ ŋ̄ chīi̍ ni᷅ŋ na̍a̍ nu̍a̍ā ni̍ Mɛ̄lɛ̄ka̍? A̍ cho̍ lɛ̍ lāsīsi̍ so̍vɛ̄i̍ya̍a̍ nāa̍ lāchī le̍ nda̍ kɔ̄la̍ŋ chɔ̄ūwo̍ mālāa̍ le̍?

¹²O̍o̍ Mɛ̄lɛ̄ka̍, ma̍la̍ na̍a̍ mī ŋ̄ yēm ya̍a̍mɔ̍ɔ̍wa̍a̍ nāa̍. Kāni̍ fo̍ndōle̍, mālā wāna̍ chi̍o̍o̍ ō cho̍ nyɛ᷅ o̍ nyɛ̄ le̍.

¹³Ha̍a̍a̍ mi̍ Mɛ̄lɛ̄ka̍ ō wā na̍a̍ kɔ̄ɔ̄lī, ō chō na̍a̍ kpāāyāa̍ kē mī ŋ̄ yēm. Ndu̍ pi̍la̍ cho̍ ya̍a̍mɔ̍ɔ̍wa̍a̍ nāa̍ yōmɔ̄ɔ̄ ni̍.