Read Southern Kisi Sa᷅m 109 Bible Online

Sa᷅m 109 - Southern Kisi bible

Sa᷅m 109

¹[97] O̍o̍ Mɛ̄lɛ̄ka̍, nūm ya̍ I̍ sa̍ŋgālā ni̍. Yāndi̍i̍ me̍i̍nu᷄ŋ nu̍a̍ā le̍.

²Wānāā dɛ̍nɛ̍ wɔ̍ɔ̍ŋnda̍, ā wānāā hu̍ī wa᷅ŋnda̍ wa̍ ā chīŋa̍la᷅ŋ ya̍. Ā chō sɔ̄ɔ̍ŋ lāchōōwa᷄ŋ dīmīo̍o̍ a̍ ya̍ o̍kɔ̄ɔ̄ kpe̍e̍kpe̍i̍.

³Ā bālu̍ ya̍ ndu̍yɛ̍ ma̍ wā ya̍ dīōmndā wɔ̄ɔ̍ŋnda̍ŋ dīmūllo̍ kpe̍e̍kpe̍i̍. I̍ yɔ̍ŋ nda̍ nyɛ̄ o̍ nyɛ̄ le̍, ma̍ chīŋa̍la᷅ŋ ya̍.

⁴Mī chɔ᷅m nda̍ kāālāa̍, mī nda̍ hāndū ya̍ sɔ̄ɔ̍ŋ chōo̍. Ndu̍yɛ̍ I̍ yɔ̍ŋ nda̍ nyɛ̄ o̍ nyɛ̄ le̍.

⁵Mī to̍sāl nda̍ sɔ̄ɔ̍ŋ kɛ̍ndɔ᷄ŋ, mā mīŋgūl la̍ a̍ īwɔ̄ɔ̍ŋnde̍. Mī ya̍ I̍ chɔ᷅m nda̍ kāālāa̍, mī nda̍ tūl la̍ lēyɛ̄.

⁶Mɛ̄lɛ̄ka̍, wānā o̍ wāna̍ tu̍l la̍ yɛ̍le̍ŋ, yu̍lu̍ ma᷅sa̍ lāka̍fāa̍ mbō kɔ̄ɔ̄sa̍ a̍ ndu̍. To̍sa̍ ndu̍ bɛ̍ɛ̍ mī ya̍a̍mɔ̍ɔ̍nɔ̍ ndɔ̄ɔ̍ ō ho᷄l ndu̍ sūɛ̍i̍ lāchōōvɛ̄i̍.

⁷Kɔ̍ɔ̍sa̍ a̍ ndu̍ mā ya̍a̍la̍ ndu̍. Chu̍a̍ pi̍ɛ̍īlē ndɔ̄le̍ŋ māā yɔ̄ŋ wɔ̄ɔ̍ŋ.

⁸Ki̍o̍lu̍ pa̍lɛ̍i̍ ndūɛ̍i̍ o̍ nɔ̍ le̍ wāa̍ yōōmū ve̍ lēcho̍ō. To̍sa̍ mī wānā che᷅le̍ŋ ō mīīŋgu̍ o̍ fōōfō ndɔ̍ wa̍llo̍.

⁹Chūāūwāā ndūa̍a̍ ā sīmnu᷄ŋ vi̍i̍ya̍a̍ nɔ̍ lɛ̍ fi̍nyā le̍ wa̍, ndu̍yɛ̍ mī la̍a̍ ndɔ̄ o̍ si̍mnu᷄ŋ vi̍i̍yo̍. O̍ nɔ̍ pɔ̍nɔ̍ le̍ wo̍.

¹⁰Mbɔ̄ māā chūāūwāā ndūa̍a̍ ā sīmnu᷄ŋ wa̍nāa̍ ba̍lū pi̍ɛ̍īle̍ŋ, ā nɔ᷅ na̍a̍ cha̍lāā le̍ wa̍ fɔ̍. To̍sa̍ mī ya̍a̍mɔ̍ɔ̍wa̍ ā sōli̍ chūāūwāā ndūa̍a̍ o̍ chi̍e̍e̍ŋ ndāa̍ŋ lāpɔ̄mndo̍ŋ ni᷄ŋ.

¹¹Mbɔ̄ māā nyɛ̄ o̍ nyɛ̄ o̍ to̍sa̍, wānāā o̍ bi̍ī kūēēla̍ŋ o̍ bā wa̍, ā pōōndi̍a̍a̍ ndu̍ mu̍ŋ o̍ lābā, ndu̍yɛ̍ mī wānāā lēkāa̍wa̍ ā kūɛ̄nu᷄ŋ a̍ nyɛ̄ o̍ nyɛ̄ o̍ fa̍fa̍la̍ mbo̍ sɔ̄lā.

¹²Mbɔ̄ māā wānā o̍ wānā ō to̍sāl ndu̍ īkɛ̄ndɛ̄ le̍ fɔ̍, ndu̍yɛ̍ wānā ko̍ma̍ tu̍i̍i̍nu᷄ŋ chu̍a̍u̍wāā ndūa̍a̍ o̍ mɛ̍i̍, ā nɔ̍ lɛ̍ fi̍nyā le̍ wa̍ īnyīɛ̍ɛ̍ le̍ fɔ̍.

¹³Mbɔ̄ māā pūlāle̍ ndɔ̄le̍ŋ lē kīōlu̍, ndu̍yɛ̍ mī wāŋnda̍ ā pūɛ̄ɛ̄nu̍ŋ a̍ ndu̍ o̍kɔ̄ɔ̄ fɔ̍.

¹⁴Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ pu̍ɛ̍ɛ̍nu᷄ŋ a̍ yɔ̄ŋndā wɔ̄ɔ̍ŋndā fi̍nyāā ndūāā ma̍māa̍ ā tōsa̍ la̍ŋ te̍ fɔ̍. Mbɔ̄ māā yɔ̄ŋndā wɔ̄ɔ̍ŋndā kāla̍ ndɔ̄ o̍ to̍sa̍ la̍ŋ lā wa᷅ lā fāŋāā le̍ fɔ̍.

¹⁵Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ wa̍ lo̍o̍nɔ᷄ŋndo̍ ā yɔ̄ŋndā ndāla̍ wɔ̍ɔ̍ŋnda̍ŋ o̍kɔ̄ɔ̄ le̍ te̍le̍ŋ o̍ te̍le̍ŋ, kɛ̍ nda̍ pi̍la̍ nda̍ nda̍ mī wāŋnda̍ ā pūɛ̄ɛ̄nu̍ŋ a̍ nda̍ o̍kɔ̄ɔ̄ fɔ̍.

¹⁶Kāni̍ fo̍ndōle̍, wāŋndo̍ ho̍ō pāa̍le̍ŋ lē pīlɛ̍ bɛ̍ɛ̍ ō yīya̍ŋ le̍ wāŋndo̍ īkɛ̄ndɛ̄i̍ to̍sāl te̍. Wānāā tāmbɛ̍i̍ya̍ ni̍, a̍ wānāā bālāhāvɛ̍i̍ya̍, a̍ wānāa̍ cho̍ a̍ kɔ̄ltā tāmbɛ̍i̍la̍ŋ nda̍, mbo̍ tūsī nda̍ nyɛ̄ pālāa̍ chōo̍, ndu̍yɛ̍ mbo̍ tōsā mi̍ ā ti᷄ŋ a̍ sɔ̄lā pīɔ̍mnda̍ŋ.

¹⁷Le̍ te̍le̍ŋ o̍ te̍le̍ŋ ō wa᷄ wāŋnda̍ sēndi̍la̍ŋ hāndɔ̄ɔ̍ chōo̍. Kɛ̍ mbɔ̄ māā sēndi̍lā lāŋ lā mīīŋgu̍ ndu̍ pi̍la̍ chōo̍ fɔ̍. Le̍ te̍le̍ŋ o̍ te̍le̍ŋ ndu̍ o̍o̍ do̍ū wa̍nā sa̍lā le̍. Le̍la̍ŋ ndu̍ bɛ̍ɛ̍ ō sɔ̍lā sa̍lā o̍ sa̍lā le̍ fɔ̍.

¹⁸Sēndi̍la̍ŋ lā wa̍ māwāā ndu̍ o̍ sōndō māā dōma̍ ndɔ̄ wo̍u̍na᷄ŋ. Mbɔ̄ māā sēndi̍lā ndɔ̄la̍ la̍ŋ lā lūɛ̍i̍ ndu̍ o̍ ŋ̄dīāl mɛ̄ɛ̍ ō kōl nu̍a̍ā mɛ̄ŋnda̍ŋ mī mā lūɛ̄ī ndu̍ ni᷄ŋ yɛ̍ fɔ̍. Lā lūɛ̍i̍ ndu̍ o̍ dīāllo̍ŋ ni᷄ŋ, mɛ̄ɛ̍ wāŋndo̍ ō sūūnūŋ nu̍a̍ā chūɛ̄īmā ɔ̄li̍fīi̍ya̍ŋ mī mā lūɛ̄ī ndu̍ o̍ ŋ̄dīāl lɛ̍.

¹⁹Lā sāāyi̍a̍ŋ ndu̍ mɛ̄ɛ̍ wāŋndo̍ ō sāāyīa̍ŋ nu̍a̍ā kōlāa̍ yɛ̍, ndu̍yɛ̍ le̍ te̍le̍ŋ o̍ te̍le̍ŋ, mī lā wa᷄ ndu̍ lā yīīna᷄ŋ māā lēyāu̍.

²⁰Mɛ̄lɛ̄ka̍ Ya̍a̍wɛ̄ɛ̄, nu̍a̍ā ŋ̄ tūsi̍ ya̍a̍mɔ̍ɔ̍wa̍a̍ nīa̍a̍ ha̍ā nyɛ̄ pālāa̍ chōo̍ ni̍, wānāa̍ cho̍ ha̍ā dīōmndā wɔ̄ɔ̍ŋnda̍ŋ dīmīo̍o̍ a̍ ya̍ o̍kɔ̄ɔ̄ wa̍.

²¹Kɛ̍ ya̍ ya̍, yāndi̍i̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ma̍la̍ ya̍ le̍ mī dīōlā nūmnda̍ lā hīōū lāchī a̍ bɛ̄ɛ̄le̍ŋ sɔ̄lāa̍. Mɛ̄ɛ̍ ŋ̄ chō wānā kɛ̍ndɛ̄, ndu̍yɛ̍ mā chɔ̄m wa᷅ŋnda̍ kāāla̍ nu̍m cho̍ le̍ te̍le̍ŋ o̍ te̍le̍ŋ ndo̍ yɛ̍, chi̍i̍ndi̍a̍a̍ yo̍o̍mū nūu̍.

²²Wānā ta̍mbɛ̍i̍yo̍ ya̍ I̍ cho̍ ni̍, ndu̍yɛ̍ I̍ nɔ̍ wa̍nā o̍ wāna̍ ma̍la̍ ya̍ le̍. I̍ nɔ̍ lɛ̍ tīīnda᷄ŋ o̍ tīīnda᷄ŋ o̍ yōōmū nūu̍ ni᷄ŋ te̍.

²³Mɛ̄ɛ̍ wūndu̍le̍ŋ lē kēlēŋā nu̍a̍ā lōo̍ a̍ fīti̍līo̍o̍ yɛ̍, le̍nde̍ yōōmū nūu̍ ō kēlēŋā ni̍ŋ lo̍o̍ ni̍. Mɛ̄ɛ̍ hūēīye̍ ī kpēŋā nu̍a̍ā so̍o̍nu̍a̍a̍ mā kūɛ̄nu᷄ŋ yɛ̍, le̍nde̍ i̍ yɔ̍nu̍ŋ a̍ yōōmū nūu̍ ni̍.

²⁴Wūla̍ŋ lā vī ya̍ do̍o̍ŋ a̍ yīma̍ cho̍ ya̍ nɛ̄īyo̍ wa̍ŋ. I̍ nya̍u̍ mi̍ si̍mnu᷄ŋ pa̍āla̍ŋ kpo̍so̍ŋ.

²⁵I̍ si̍mnu᷄ŋ ni᷅ŋ nyɛ̄ māmāā wāŋnda̍ o̍ hɔ̄l. Wāna̍ cha᷅ ya̍ ko̍ ō hīŋ bōlle̍ŋ ō pɛ̄ɛ̄sā ya̍.

²⁶O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, yāndi̍i̍ ma̍la̍ ya̍ fɔ̍. Mɛ̄ɛ̍ ka̍a̍lā nūmndo̍ chō le̍ te̍le̍ŋ o̍ te̍le̍ŋ yɛ̍, yāndi̍i̍ chi̍i̍ndi̍a̍a̍ yo̍o̍mū nūu̍ fɔ̍.

²⁷To̍sa̍ mī ya̍a̍mɔ̍ɔ̍wa̍a̍ nīa̍a̍ sīna̍ māā nūm kpe̍e̍kpe̍i̍ chi̍i̍ndi̍a̍a̍ ya̍ ni̍.

²⁸Mī nda̍ hāndu̍ ya̍ sēndi̍o̍o̍ chōo̍, kɛ̍ nūm sa̍lāa̍ ŋ̄ dūāū ya̍ ni̍. Tē ā chīŋa̍la᷅ŋ ya̍ a̍ sɔ̍ŋgɔ̄ɔ̍ pɛ̍, to̍sa̍ mī si̍ɔ̍mbu̍la̍ŋ la̍ bi̍ī nda̍. Kɛ̍ ya̍ bu̍ɛ̍ī nūmndo̍ ndu̍ ndu̍, mī dɔ̍ɔ̍nu᷄ŋ nya̍a̍le̍.

²⁹To̍sa̍ mī si̍ɔ̍mbu̍la̍ŋ lā bīī ya̍a̍mɔ̍ɔ̍wa̍a̍ nīa̍a̍, mɛ̄ɛ̍ nda̍ kūūmbūū nu̍a̍ā wāŋndo̍ kōlāa̍ a̍ bōlle̍ŋ mɔ̍ɔ̍su̍ yɛ̍. To̍sa̍ mī bɛ̄ɛ̄la̍ ta̍mbɛ̍i̍la̍ŋ lā sāāyi̍a̍ŋ nda̍ māā kōlā.

³⁰Tē wāŋnda̍ ā chūūŋgi̍āŋ pɛ̍ kpo̍u̍, I̍ cho̍ Mɛ̄lɛ̄ka̍ Ya̍a̍wɛ̄ɛ̍ sāŋgālā o̍ chōndo̍ŋ ni᷄ŋ cho̍o̍ cho̍o̍, mī me̍l ndu̍ ba̍li̍ka̍a̍.

³¹Kāni̍ fo̍ndōle̍, ndu̍ su̍ŋgū le̍ wānāā tāmbɛ̍i̍ya̍ ni̍, mbō chīīndi̍a̍a̍ nda̍, mbō sōli̍ nda̍ wānāa̍ ki̍lūl nda̍ yāmɛ̍i̍ le̍ mā sɔ̄la̍ pīɔ̍mndo̍ wa̍ o̍ bā.