Read Southern Kisi Sa᷅m 111 Bible Online

Sa᷅m 111 - Southern Kisi bible

Sa᷅m 111

¹Sāŋgālāa̍ ō chō le̍ Mɛ̄lɛ̄ka̍ Ya̍a̍wɛ̄ɛ̄. Tē wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍ ā chūūŋgi̍āŋ pɛ̍ le̍ ndu̍ sōōlūūwo̍, I̍ si᷅m ni̍ŋ nda̍ tɛ̄ɛ̄ŋ mī me̍l Mɛ̄lɛ̄ka̍ Ya̍a̍wɛ̄ɛ̍ ba̍li̍ka̍a̍ a̍ kɔ̄l nūu̍ kpo̍u̍.

²Wa̍lta̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā la̍ŋ lā chō wa̍lta̍ kɔ̄ndɔ̄fi̍ltā bɛ̄ndū. Wānā o̍ wāna̍ hi̍ni̍ kɔ̄l a̍ wa̍lta̍ Mɛ̄lɛ̄ka̍ tōsā la̍ŋ pɛ̍, yīya᷄ŋndo̍ o̍ yi̍yāŋ a̍ la̍ŋ o̍kɔ̄ɔ̄ le̍ te̍le̍ŋ o̍ te̍le̍ŋ ni̍.

³Wa̍lta̍ Mɛ̄lɛ̄ka̍ tōsā la̍ŋ, lā chō wa̍lta̍ lēbɛ̄ɛ̄, ndu̍yɛ̍ mi̍ lā wā wa̍lta̍ bɛ̍ndū. Ndu̍yɛ̍ sa̍kpōyɛ̍i̍ ndūɛ̍i̍, ī chō le̍ fɛ̍ɛ̍ŋ a̍ fɛ̍ɛ̍ŋ.

⁴Ō tōsa̍ mi̍ wāŋnda̍ ā wā lōōnɔ᷄ŋndo̍ a̍ wa̍lta̍ ndɔ̄la̍ kɔ̄ndɔ̄fi̍lta̍ŋ o̍kɔ̄ɔ̄ le̍ te̍le̍ŋ o̍ te̍le̍ŋ. Mɛ̄lɛ̄ka̍ Ya̍a̍wɛ̄ɛ̄ o̍ cho̍ wāna̍ īkɛ̄ndɛ̄, ndu̍yɛ̍ ō chō wāna̍ īnyīɛ̍ɛ̍.

⁵Wānāa̍ nɔ̍ bɛ̍ɛ̍le̍ ndɔ̄le̍ŋ nda̍, ndu̍ ke᷅ nda̍ nyɛ̄ dīa̍a̍ ni̍. Le̍ te̍le̍ŋ o̍ te̍le̍ŋ ō chō yīya᷄ŋndo̍ a̍ kpe̍ma̍ ndɔ̍ o̍ yi̍i̍ yo̍ o̍kɔ̄ɔ̄.

⁶Ō chɔ᷄m wānāā ndūa̍a̍ mɛ̄ɛ̍ o̍ cho̍ wāna̍ kpāāyā bɛ̍ndū yɛ̍. Mbo̍ kē nda̍ lɛ̄ŋndē kāa̍la̍ che᷅le̍ŋ le̍e̍ nɔ̍ le̍ŋ nyɛ̄ ndā.

⁷Wa̍lta̍ ndɔ̄la̍ŋ kpo̍u̍, o̍ nɛ̄ī sa̍kpōo̍ chōo̍, a̍ o̍ nɛ̄ī tōnya̍a̍ chōo̍ o̍ to̍sā la̍ŋ ni̍. Nyɛ̄ o̍ nyɛ̄ o̍ di̍mu̍l wānā pɛ̍ le̍ tōsāa̍, ō chō nyɛ̄ wānā dɔ̍ū tīīnda᷄ŋ o̍ ndu̍ ni̍ŋ.

⁸Dīōmndā ndɔ̄la̍ŋ lā chō nyɛ᷄ cho̍ le̍ fɛ̍ɛ̍ŋ a̍ fɛ̍ɛ̍ŋ. Nyɛ̄ o̍ nyɛ̄ o̍ di̍mu̍l wānā pɛ̍ le̍ tōsāa̍, o̍ nɛ̄i̍ sa̍kpōo̍ chōo̍, ndu̍yɛ̍ a̍ o̍ nɛ̄ī tōnya̍a̍ chōo̍ o̍ di̍mī ndu̍ ni̍.

⁹Mbo̍ bāŋā wānāā ndūa̍a̍, ndu̍yɛ̍ mbo̍ yīī kpe̍ma̍ fɛ̍ɛ̍ŋ a̍ fɛ̍ɛ̍ŋ ndo̍ a̍ nda̍. Ō chō Mɛ̄lɛ̄ka̍ kāsī, ndu̍yɛ̍ ō chō wāna̍ wānā wo̍.

¹⁰Tē wāŋndo̍ nɔ̄ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ pɛ̍, mɛ̄ɛ̍ wānā ko̍ŋ ō kāndu̍ kɔ̄l kālo̍o̍ sɔ̄lāa̍. Wānāa̍ to̍sā nyɛ᷅ Mɛ̄lɛ̄ka̍ ō dīmūl nda̍ wo̍ wa̍, ta̍āsi̍o̍o̍, ndu̍ Mɛ̄lɛ̄ka̍ fāndā nda̍ ni̍. Mɛ̄lɛ̄ka̍ Ya̍a̍wɛ̄ɛ̄ o̍ nɔ̍ mbō sɔ̄la̍ sāŋgālāa̍ le̍ te̍le̍ŋ o̍ te̍le̍ŋ.