Read Southern Kisi Sa᷅m 112 Bible Online

Sa᷅m 112 - Southern Kisi bible

Sa᷅m 112

¹Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄. Wāna̍ ke᷅ ho̍ō Mɛ̄lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ, ndu̍yɛ̍ mbō nāŋ kɔ᷅l le̍ nyɛ̄ Mɛ̄lɛ̄ka̍ ō dīmūl ndu̍ wō tōsāa̍ wo̍, wānā ko̍ŋ ō pɛ̄l tɔ̄nɔ̄ɔ̍.

²Wānā wa̍ā le̍nde̍ chūāūwāā ndūa̍a̍, wānāā kpāāyāa̍ nda̍ sīmnūŋ o̍ lɛ̄ŋnde̍ŋ ni᷄ŋ ni̍. Dɛ̍nɛ̍ kɛ̍ndɔ̄ɔ̍ ndu̍ wa᷅ lē wānāa̍ fu̍la̍ o̍ pūlālē ndɔ̄le̍ŋ chōo̍ wa̍ ni̍.

³Dɛ̍nɛ̍ kɛ̍ndɛ̄ bɛ̄ndōo̍, a̍ sūllo̍, ndu̍ wa᷅ o̍ ndu̍lo̍ chi̍ɛ̍īni̍ŋ ni̍. Le̍ te̍le̍ŋ o̍ te̍le̍ŋ lōōnɔ᷄ŋndo̍ wāŋnda̍ lōōnūŋ a̍ sa̍kpōyɛ̍i̍ ndūɛ̍i̍ o̍kɔ̄ɔ̄ ni̍.

⁴Wānā wa̍ā le̍nde̍ ō chō māchūāā nyɛ̄ wa̍wo̍ŋndo̍, o̍ di̍a̍ndū wa̍nāā tōnya̍a̍ chōo̍ i̍chɔ᷅l lo̍. Wāna̍ īnyīɛ̍ɛ̍ yo̍ o̍ cho̍ le̍ te̍le̍ŋ o̍ te̍le̍ŋ ni̍, ō chō wāna̍ īkɛ̄ndɛ̄, ndu̍yɛ̍ mbo̍ wā wānā sa̍kpō.

⁵Wāna̍ ke᷅ ho̍ō wāŋnda̍ kūēēla̍ŋ a̍ kɔ̄l chɛ̄lāa̍, ndu̍yɛ̍ mbo̍ wā sa̍kpō o̍ nyɛ̄ o̍ nyɛ̄ ni᷄ŋ ndō, ō pɛ̄l tɔ̄nɔ̄ɔ̍.

⁶Wānā wa̍ā nu̍a̍ā, nyɛ̄ o̍ nyɛ̄ nɔ̍lā mbō hīīlu̍u̍ ndu̍ le̍. Le̍ te̍le̍ŋ o̍ te̍le̍ŋ lōōnɔ᷄ŋndo̍ wāŋnda̍ ā lōōnūŋ a̍ ndu̍ ni̍.

⁷Mɛ̄ɛ̍ o̍ mɛ̄ɛ̍ yōōŋgūlā wɔ̄ɔ̍ŋnda̍ŋ lā kōma̍l wa̍nā wa̍ā nu̍a̍ā, sīōōŋīī bi̍ī ndu̍ le̍. Ō wā i̍si̍si̍ o̍ tīīnda᷄ŋ ndɔ̄ɔ̍ chōo̍ o̍ ka̍lā ka̍lā, tīīnda᷄ŋ ndɔ̄ɔ̍ kpo̍u̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ o̍ wa᷅ ni̍.

⁸Nyɛ̄ o̍ nyɛ̄ to̍sā mī kɔ̄l ndɔ̄ɔ̍ hīīlu̍ŋ te̍, sīōōŋīī bi̍ī ndu̍ le̍ nyɛ̄ o̍ nyɛ̄ le̍. Ndu̍yɛ̍ o̍ mɛ̄ɛ̄lu̍la̍ŋ kpɔ̍ŋ, mbō chē mī ya̍a̍mɔ̍ɔ̍wa̍a̍ ndūa̍a̍ ā sɔ̄la̍ yōmɔ̄ɔ̍.

⁹Wāna̍ īkɛ̄ndɔ̄ɔ̍ ndu̍ ndu̍, a̍ kɔ̍l chɛ̄lāa̍ kpo̍u̍ o̍ ke᷅ wa̍nāā tāmbɛ̍i̍ya̍ ni̍. Le̍ fɛ̍ɛ̍ŋ a̍ fɛ̍ɛ̍ŋ mā wa̍ lōōnɔ᷄ŋndo̍ a̍ sa̍kpōyɛ̍i̍ ndūɛ̍i̍. Mbō sīmnu᷄ŋ wa᷅na̍ kpāāyā bɛ̍ndū, ndu̍yɛ̍ wāŋnda̍ kpo̍u̍ mā ke̍ ndu̍ bɛ̄ɛ̄le̍ŋ ta̍u̍ ta̍u̍.

¹⁰Tē wānāā dɛ̍nɛ̍ wɔ̍ɔ̍ŋnda̍ ā chē he̍ī pɛ̍, ā dɔ̄ɔ̄nu᷄ŋ tu̍mbe̍. Ndu̍yɛ̍ mī sūɛ̍i̍ nɛ̄i̍ nda̍, mā sīɔ̄ɔ̄nda̍, o̍ ko̍ŋ, mī mɛ̄ɛ̄lu̍la̍ ndāla̍ŋ lā fūūlu̍u̍. Nyɛ̄ o̍ nyɛ̄ nda̍ a̍a̍ kɛ̍ɛ̍si̍a̍a̍ le̍ tōsāa̍, kpo̍u̍ mbō tāmbu̍.