Read Southern Kisi Sa᷅m 115 Bible Online

Sa᷅m 115 - Southern Kisi bible

Sa᷅m 115

¹Mɛ̄lɛ̄ka̍ Ya̍a̍wɛ̄ɛ̄, nu᷄m pīlɛ̍ kpe̍ nɔ̍ ni̍ mā sɔ̍la̍ bɛ̄ɛ̄le̍ŋ, ō cho᷄ na̍a̍ ŋ̄wāŋndā chīe̍e̍ le̍, nu᷄m pīlɛ̍ kpe̍. Kāni̍ fo̍ndōle̍, le̍ mɛ̄ɛ̍ ŋ̄ chō sa̍kpō, ndu̍yɛ̍ ma̍ nɔ̄ kāālā nu᷄m cho̍ le̍ te̍le̍ŋ o̍ te̍le̍ŋ ndo̍ yɛ̍.

²Vɛ᷅ mi̍ lɛ̄ŋīī chēle̍ŋnde̍ wā na̍a̍ dīmūllo̍ āā, “Kūɛ̍ɛ̍nɛ̍ Mɛ̄lɛ̄ka̍ nyāa̍ ō chō yɛ̍, ō ma̍lā nya̍ le̍?”

³Mɛ̄lɛ̄ka̍ nāa̍ ō chō o̍ fo̍ndā ndɔ̍ kāsīo̍o̍ chōo̍ cho̍o̍. Nyɛ̄ o̍ ye̍e̍mā le̍ tōsāa̍ wo̍, ndu̍ o̍ to̍sā ni̍.

⁴Wāŋnda̍ ha̍ā, mɛ̄lɛ̄ka̍ā ndāa̍, wāŋndā chīe̍e̍ya̍ to̍o̍si̍a̍a̍ nda̍ a̍ lābā ni̍. Ka̍ni̍i̍ hu̍mbūe̍i̍, a̍ ko̍o̍līi̍ye̍ nda̍ tēēŋgīāā ni̍ mā tōōsīāā nda̍.

⁵Mɛ̄lɛ̄ka̍ā ndāa̍ ā nɔ̄ sōndōla̍ŋ, kɛ̍ ā su̍ū le̍. Ā nɔ̄ hɔ̄lta̍ŋ kɛ̍ ā chi᷅ le̍.

⁶Ā nɔ̄ nīla̍ŋ kɛ̍ ā tu̍i̍ī le̍, ā nɔ̄ mi᷄ŋnda̍ŋ, kɛ̍ ā tu̍i̍ī nyɛ᷅ chūŋ te̍.

⁷Ā nɔ̄ bāla̍ŋ, kɛ̍ nyɛ̄ pīla̍ŋ bɛ̍ɛ̍ la̍ŋ, ā si̍nāŋ te̍, ā nɔ̄ pēlo᷄ŋ, kɛ̍ ā ku̍ē le̍, kpɛ̍kɛ̍le̍ bɛ̍ɛ̍ ā ku᷅ŋ te̍.

⁸Mbɔ̄ māā wānāa̍ to̍o̍si̍a̍a̍ mɛ̄lɛ̄ka̍a̍ ha̍ā wa̍ ā sīmnu̍ŋ mɛ̄ɛ̍ mɛ̄lɛ̄ka̍ā kāŋ ā chō nu̍a̍ā yɛ̍ fɔ̍, ndu̍yɛ̍, mbɔ̄ māā wānāa̍ dɔ̍ū tīīnda᷄ŋndo̍ o̍ mɛ̄lɛ̄ka̍a̍ ha̍ā ni᷄ŋ nda̍, ā sīmnu̍ŋ māā mɛ̄lɛ̄ka̍ā ha̍ā fɔ̍.

⁹Wāŋnda̍ I̍sɔ̄lūɛ̄ī, lā dɔ̄u̍ ti̍i̍nda᷄ŋ nyāa̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ. Ō nɔ̄lā mbō māla̍ nya̍ ndu̍yɛ̍ mbō mānda̍ nya̍.

¹⁰Nya̍ wānāa̍ sōlīāā lāsa̍lāa̍, lā dɔ̄u̍ ti̍i̍nda᷄ŋ nyāa̍ o̍ Mɛ̄lɛ̄ka̍ Ya̍a̍wɛ̄ɛ̄ ni᷄ŋ. Ō nɔ̄lā mbō māla̍ nya̍, ndu̍yɛ̍ mbō mānda̍ nya̍.

¹¹Nya̍ wānāa̍ so̍o̍lūū Mɛ̍lɛ̄ka̍ Ya̍a̍wɛ̄ɛ̄ wa̍ ki̍nɛ̍i̍, lā dɔ̄u̍ ti̍i̍nda᷄ŋ nyāa̍ o̍ ndu̍ ni̍ŋ. Ō nɔ̄lā mbō māla̍ nya̍, ndu̍yɛ̍ mbō mānda̍ nya̍.

¹²Mɛ̄lɛ̄ka̍ Ya̍a̍wɛ̄ɛ̄ o̍ pu̍ɛ̍ɛ̍nūŋ a̍ na̍a̍ o̍kɔ̄ɔ̄ le̍, ō chō na̍a̍ sa̍lā dɔ̄wɔ̄ɔ̄. Ō chō wāŋnda̍ I̍sɔ̄lūɛ̍i̍ sa̍lā dɔ̄wɔ̄ɔ̄. Ō chō wānāa̍ sōlīāā lāsa̍lāa̍ sa̍lā dɔ̄wɔ̄ɔ̄.

¹³Wānā o̍ wāna̍ nɔ̍ bɛ̄ɛ̄le̍ŋ le̍ Mɛ̄lɛ̄ka̍ Ya̍a̍wɛ̄ɛ̄, wānā pɔ̍mbɔ̄ ni̍, wānā bɛ̍ndū ni̍, ō chō nda̍ sa̍lā dɔ̄wɔ̄ɔ̄.

¹⁴Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ ō to̍sa̍, nya̍ ni̍, a̍ chūāūwāā nyāa̍, mī lā kūi̍ ta̍u̍ ta̍u̍.

¹⁵Mbɔ̄ māā Mɛ̄lɛ̄ka̍ Ya̍a̍wɛ̄ɛ̄, o̍ to̍o̍si̍a̍a̍ fo̍ndāŋnda̍ŋ chōo̍ cho̍o̍, a̍ lɛ̄ŋ ndo̍, ō dɔ̄u̍ nya̍ sa̍lā.

¹⁶Mɛ̍lɛ̄ka̍ Ya̍a̍wɛ̄ɛ̄, ndu̍ nɔ̍ fo̍ndāŋnda̍ŋ chōo̍ cho̍o̍ ni̍, kɛ̍ chi̍e̍ēŋndo̍ ndu̍ mbo̍ kē na̍a̍ ŋ̄wāŋndā chīe̍e̍.

¹⁷Wānāa̍ vi᷅, ma̍ wā ni᷅ŋ chi̍e̍e̍ pīɔ̍m nda̍, ō cho̍ lɛ̍ nda̍ le̍ sa̍ŋgālā lɛ̍ Mɛ̄lɛ̄ka̍ Ya̍a̍wɛ̄ɛ̄ le̍.

¹⁸Kɛ̍ na̍a̍ ŋ̍ cho̍ yōōmū wa̍, na̍a̍ ŋ̍ nɔ̍ ni̍, mī ŋ̄ me᷄l ndu̍ ba̍li̍ka̍a̍, chɔ̍ŋ a̍ te̍le̍ŋndo̍ ho̍ō mbō kūɛ̄ a̍ fɛ̍ɛ̍ŋ a̍ fɛ̍ɛ̍ŋ. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄.