Read Southern Kisi Sa᷅m 116 Bible Online

Sa᷅m 116 - Southern Kisi bible

Sa᷅m 116

¹I̍ ka̍a̍la̍ Mɛ̄lɛ̄ka̍ Ya̍a̍wɛ̄ɛ̄, kāni̍ fo̍ndōle̍, le̍ mɛ̄ɛ̍ o̍ tu̍e̍ī pi̍ɛ̍īlē nīle̍ŋ, ndu̍yɛ̍ mbō mūlī ya̍ dīōm yɛ̍.

²Le̍ mɛ̄ɛ̍ o̍ tu̍e̍ī pīɛ̄īlē nīle̍ŋ yɛ̍, I̍ cho̍ ndu̍ wā dīōmndo̍ nyūnāa̍ ha̍a̍a̍ a̍ yōōmū nūu̍ mɛ̄ɛ̄lu̍la̍ŋ.

³Kpūndɛ̍ pīɔ̍mndo̍ ō wa̍ ni᷅ŋ ya̍ ō bālāā kpɔ̍kɔ̍su̍, pīɔ̍mndo̍ ndu̍ o̍o̍ ye̍ŋ ya̍ ni᷅ŋ yāŋɔ̄ɔ̄le̍ŋ. Mi̍ sīōōŋnde̍ bīī ya̍, ndu̍yɛ̍ mi̍ būūla᷄ŋ bɛ̍ndōo̍ ō lūɛ̄ī o̍ kɔ̄l nūu̍ ni᷄ŋ.

⁴O̍ ko̍ŋ, mi̍ nyu̍nā Mɛ̄lɛ̄ka̍ Ya̍a̍wɛ̄ɛ̍ dīo̍m a̍a̍, “O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ chi̍i̍ndi̍a̍a̍ yo̍o̍mū nūu̍.”

⁵Mɛ̄lɛ̄ka̍ chō wānā kɛ̍ndɛ̄, ndu̍yɛ̍ mbo̍ wā wānā sa̍kpō. Mɛ̄lɛ̄ka̍ nāa̍ ō chō wāna̍ īnyīɛ̍ɛ̍ bɛ̄ndū.

⁶Wānāa̍ nɔ̍ wa̍nā o̍ wānā ma̍lāā le̍ wa̍, Mɛ̄lɛ̄ka̍ Ya̍a̍wɛ̄ɛ̄ ndu̍ ma̍ndā nda̍ ni̍. I̍ wa̍ o̍ kpūndɛ̍ bɛ̄ndōo̍ ni᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndīāā ya̍.

⁷I̍ cho̍ vɛ̄lɛ̄ wā a̍ kɔ̄l nyūlū, kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ tōsa̍l la̍ dɛ̍nɛ̍ kɛ̍ndɛ̄.

⁸Mɛ̄lɛ̄ka̍ Ya̍a̍wɛ̄ɛ̄ o̍ so̍li̍ ya̍ o̍ pīɔ̍mndo̍ ni᷄ŋ. Ō wɔ̄ɔ̄su̍u̍ ya̍ mɛ̍mi̍a̍ŋ o̍ hɔ̄l, ndu̍yɛ̍ mbo̍ tōsā i̍ bo̍ŋ mī de̍l te̍.

⁹Le̍ he̍ī, Ī cho̍ hīōūwɔ̄ɔ̄ lāchī a̍ wāa̍ Mɛ̄lɛ̄ka̍ Ya̍a̍wɛ̄ɛ̍ lāchī, wāŋndā chīe̍e̍ya̍a̍ cho̍ yōōmū wa̍ tɛ̄ɛ̄ŋ.

¹⁰I̍ wa̍ o̍ sāŋgāa̍ ni᷄ŋ, mi̍ di̍mī o̍ kɔ̄l ni᷄ŋ a̍a̍, “Mbɔ̄ yōōmū nūu̍ ō chūū fɔ̍.” Kɛ̍ mi̍ hi̍a̍ū lāchī a̍ tīīnda᷄ŋ nūu̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ.

¹¹Mi̍ kɔ̄llo̍ lāāsīa̍ŋ ya̍ ni᷄ŋ, mi̍ di̍mī a̍a̍, “Mbɔ̄ wānā dɔ̍u̍ bɛ̍ɛ̍ ti̍i̍nda᷄ŋndo̍ o̍ wāna̍ chi̍o̍o̍ ni᷄ŋ, fo̍ndō fu̍u̍.”

¹²Ō yɛ̄ɛ̍nɛ̍ ya̍ I̍ cho̍ yɛ̍ Mɛ̄lɛ̄ka̍ Ya̍a̍wɛ̄ɛ̍ kē, le̍ sɔ̄ɔ̍ŋ kɛ̍ndɛ̄ŋ o̍ to̍sa̍l la̍ mu᷅ŋ ki̍nɛ̍i̍ yo̍ŋ?

¹³I̍ cho̍ sa̍lā mūɛ̄īmā mākīle̍pīi̍yo̍ sōlī o̍ Mɛ̄lɛ̄ka̍ Ya̍a̍wɛ̄ɛ̄ lo̍, mī me̍l ndu̍ ba̍li̍ka̍a̍ le̍ chīīndīāā o̍ chi̍i̍ndi̍a̍a̍ ya̍ wo̍.

¹⁴Tē wānāā ndūa̍a̍ ā chūūŋgi̍āŋ pɛ̍ kpo̍u̍, I̍ cho̍ būŋgɛ̄ī ya̍ I̍ chūe̍l ndu̍ ve̍ pēēlū nda̍ o̍ hɔ̄l.

¹⁵Mɛ̄lɛ̄ka̍ Ya̍a̍wɛ̄ɛ̄ tē wānāā ndūa̍a̍ ō pīlɛ̍ vī pɛ̍, ī wā bɔ̍ɔ̍ su̍ɛ̍i̍ kɔ̄l tāmbɛ̍i̍ le̍ ndu̍.

¹⁶O̍o̍ Mɛ̄lɛ̄ka̍ Ya̍a̍wɛ̄ɛ̄, bu̍ɛ̍ī nūmndo̍ ya̍ I̍ cho̍ ni̍. Nūm ya̍ I̍ cho̍ sāāŋgīāl lo̍ ni̍, mɛ̄ɛ̍ kāla̍ nūu̍ ndu̍ o̍o̍ sa̍a̍ŋgīāl nu̍m yɛ̍. A̍ so̍li̍ ya̍ o̍ pīɔ̍mndo̍ ni᷄ŋ.

¹⁷Mɛ̄lɛ̄ka̍ Ya̍a̍wɛ̄ɛ̄, I̍ cho̍ sa̍lāa̍ sōlī o̍ nūmndo̍ le̍ mī me̍l nu̍m ba̍li̍ka̍a̍, ndu̍yɛ̍ mī pi̍ɛ̍i̍ nūm.

¹⁸Tē wānāā nūmnda̍ ā chūūŋgi̍āŋ pɛ̍ kpo̍u̍, o̍ chīɛ̄ī nu̍m kāsīo̍o̍ ni᷄ŋ Chūlu̍sɛ̄lɛ̄m, I̍ cho̍ būŋgɛ̄ī ya̍ I̍ chūe̍l nu̍mnde̍ pēēlū nda̍ o̍ hɔ̄l. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄.