Read Southern Kisi Sa᷅m 118 Bible Online

Sa᷅m 118 - Southern Kisi bible

Sa᷅m 118

¹Lā ŋ̄ mēlnu᷅ŋ Mɛ̄lɛ̄ka̍ Ya̍a̍wɛ̄ɛ̍ ba̍li̍ka̍a̍, kāni̍ fo̍ndōle̍, ō chō wānā kɛ̍ndɛ̄, ndu̍yɛ̍ kāālā ndɔ̍ cho̍ le̍ te̍le̍ŋ o̍ te̍le̍ŋ ndo̍, ō chō le̍ fɛ̍ɛ̍ŋ a̍ fɛ̍ɛ̍ŋ.

²Wāŋnda̍ I̍sɔ̄lūɛ̄ī, lā dīmi̍ āā, “Kāālā ndɔ̄ɔ̍ ō chō le̍ fɛ̍ɛ̍ŋ a̍ fɛ̍ɛ̍ŋ.”

³Nya̍ wānāa̍ sōlīāā lāsa̍lāa̍, lā dīmi̍ āā, “Kāālā o̍ nɔ̍ le̍ na̍a̍ wo̍ ō cho̍ le̍ fɛ̍ɛ̍ŋ a̍ fɛ̍ɛ̍ŋ.”

⁴Wānāa̍ nɔ̍ sīōōŋīi̍ Mɛ̍lɛ̄ka̍ Ya̍a̍wɛ̄ɛ̄ ve̍ wa̍ ki̍nɛ̍i̍, lā dīmi̍ āā, “Kāālā o̍ nɔ̍ le̍ na̍a̍ wo̍ ō chō le̍ fɛ̍ɛ̍ŋ a̍ fɛ̍ɛ̍ŋ.”

⁵I̍ wa̍ o̍ nyɛ̄ pālāā bɛ̄ndōo̍ ni᷄ŋ, mi̍ nyu̍na̍ ndu̍ le̍ ya̍ mālāa̍, mbo̍ mūlī ya̍ dīōm, ndu̍yɛ̍ mbo̍ chīīndīāā yōōmū nūu̍.

⁶Mɛ̄lɛ̄ka̍ Ya̍a̍wɛ̄ɛ̄ o̍ cho̍ ya̍ kɔ̄ɔ̄lī, le̍la̍ŋ sīōōŋīī bi̍ī ya̍ le̍ wānā o̍ wānā le̍. Wānā nɔ̍lā ya̍ nyɛ̄ o̍ nyɛ̄ yɔ̄ŋ te̍.

⁷Mɛ̄lɛ̄ka̍ Ya̍a̍wɛ̄ɛ̄ o̍ cho̍ ya̍ kɔ̄ɔ̄lī, ndu̍ cho̍ wāna̍ ma̍lā ya̍ wo̍ ni̍. Ō chō ya̍a̍mɔ̍ɔ̍wa̍a̍ nīa̍a̍ yōmɔ̄ɔ̄ mī che᷅.

⁸Ō chō ī kɛ̄ndɛ̄ mī wānā dɔ̍ū tīīnda᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ le̍ nu̍m māndāa̍, mbo̍ hīāū wāna̍ chi̍o̍o̍ tīīnda᷄ŋndo̍.

⁹Ō chō ī kɛ̄ndɛ̄ mī wānā dɔ̍ū tīīnda᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ, mbo̍ hīāū wānāā bɛ̄ndūa̍a̍ tīīnda᷄ŋndo̍.

¹⁰Ya̍a̍mɔ̍ɔ̍wa̍a̍ nīa̍a̍ ā wa᷄ ya̍ ā bālāā kpɔ̍kɔ̍su̍, kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ kpāāyāa̍ mi̍ tɛ̍ɛ̍mbūū nda̍.

¹¹Ā wa᷄ ya̍ ā bālāā, ā tīūwāā kpo̍u̍, kɛ̍ mī Mɛ̍lɛ̄ka̍ Ya̍a̍wɛ̄ɛ̄ o̍ ke᷅ ya̍ kpāāyāa̍ mi̍ tɛ̍ɛ̍mbūū nda̍.

¹²Ā wa̍ ā sīīlāā, ā bālāā ya̍ mɛ̄ɛ̍ līāā ku̍ndāa̍ ā wā nu̍a̍ā yɛ̍. Ma̍ chīŋa̍la᷅ŋ ya̍ mɛ̄ɛ̍ yīŋnde̍ŋ lē chīŋa̍la᷅ŋ nu̍a̍ā yōndōo̍ yɛ̍, kɛ̍ mi̍ Mɛ̍lɛ̄ka̍ Ya̍a̍wɛ̄ɛ̄ o̍ ke᷅ ya̍ kpāāyāa̍ mi̍ tɛ̍ɛ̍mbūū nda̍.

¹³Ma̍ chīŋa̍la᷅ŋ ya̍ ō kālā ka̍lā, ma̍ hūŋ ni᷅ŋ le̍ ya̍ yōmɔ̄ɔ̍, kɛ̍ mi̍ Mɛ̍lɛ̄ka̍ Ya̍a̍wɛ̄ɛ̄ o̍ ma̍lā ya̍.

¹⁴Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ wāna̍ ma̍ndā ya̍ wo̍ ni̍, ndu̍yɛ̍ ndu̍ chi̍ɔ̍ū yo̍o̍mū nūu̍ ni̍. Ndu̍ pi̍ŋi̍ ya̍ ni̍.

¹⁵Bɔ̄ɔ̄lūū kɔ̄l kɛ̄ndɛ̄ bɛ̄ndōo̍ chō sūɛ̍i̍ o̍ tɛ̍ndīi̍la̍ wānāa̍ Mɛ̄lɛ̄ka̍a̍ ni᷄ŋ, kāni̍ fo̍ndōle̍, ā yēm ya̍a̍mɔ̍ɔ̍wa̍a̍ ndāa̍.

¹⁶Mɛ̄lɛ̄ka̍ Ya̍a̍wɛ̄ɛ̄, kpāāya̍ ndɔ̄ɔ̍ tōsa̍ mi̍ ŋ̄ yām ya̍a̍mɔ̍ɔ̍wa̍a̍ nāa̍. Kpāāya̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tōsa̍ sɔ̄ɔ̍ŋ bɛ̍ndū le̍ na̍a̍.

¹⁷I̍ cho̍ wu̍ le̍, I̍ cho̍ hīōūwɔ̄ɔ̄ lāchī a̍ wāa̍ yōōmū, mī chɔ̍m wāŋnda̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ wo̍.

¹⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ ha̍ndū ya̍ nyɛ̄ pālāa̍ chōo̍ ta̍u̍ le̍ ya̍ sīlāa̍, kɛ̍ ō chɛ᷄l mī vi᷅ le̍.

¹⁹Lā kūmbu̍l la̍ dīo̍o̍ le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍a̍ ni᷄ŋ, I̍ ye̍e̍ma̍ mī lu̍ɛ̍ī mī kɔ̍ me᷅l Mɛ̄lɛ̄ka̍ Ya̍a̍wɛ̄ɛ̍ ba̍li̍ka̍a̍.

²⁰Dīō wānā ke̍ī le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ ndo̍ cho̍ ho̍ō ni̍. Wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, nda̍ ko̍ni̍ lu̍ɛ̍ī lo̍ŋ ni̍.

²¹Sāŋgālāa̍ chō le̍ nūm Mɛ̄lɛ̄ka̍ Ya̍a̍wɛ̄ɛ̄, kāni̍ fo̍ndōle̍, le̍ mɛ̄ɛ̍ ŋ̄ mūli̍ ya̍ dīōm ma̍ chīīndīāā ya̍ yɛ̍.

²²Pōū wānāā tāŋgūlāa̍ ā kɛ̄ɛ̍ wo̍, ndu̍ si̍mnu᷄ŋ po̍u̍ sa̍a̍ tāŋgūllo̍ wo̍ ni̍.

²³Mɛ̄lɛ̄ka̍ Ya̍a̍wɛ̄ɛ̍ ndu̍ to̍sa̍ he̍ī ni̍, ndu̍yɛ̍ ī chō sūɛ̍i̍ kɔ̄ndɔ̄fi̍li̍i̍ bɛ̄ndū.

²⁴Pāa̍le̍ Mɛ̄lɛ̄ka̍ Ya̍a̍wɛ̄ɛ̄ o̍ ye᷅m ya̍a̍mɔ̍ɔ̍wa̍a̍ nāa̍ le̍ŋ le̍ cho̍ le᷅ŋ ni̍. Ŋ̄ nɔ̄ mī ŋ̄ dɔ̄ɔ̄nu̍ŋ nya̍a̍le̍, mī ŋ̄ tōsa̍ kɔ̄l kɛ̄ndɔ̄ɔ̍.

²⁵O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ chi̍i̍ndi̍a̍a̍ na̍a̍. Mɛ̄lɛ̄ka̍ Ya̍a̍wɛ̄ɛ̄, to̍sa̍ mī ŋ̄ yēm.

²⁶Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍ wa᷅na̍ o̍ ve᷅m ho̍ō mbo̍ wā hūnɔ̄ɔ̍ wo̍ sa̍lā. Mɛ̄lɛ̄ka̍ Ya̍a̍wɛ̄ɛ̄, ŋ̄ chō nu̍m sāŋgālāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ.

²⁷Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ Mɛ̄lɛ̄ka̍ ni̍. Ō tōsa̍ mi̍ nyɛ̄ ndɔ̄ wa̍wo̍ŋndo̍ ō wā na̍a̍ dīōndɔ̄ɔ̍ chōo̍. Lā bīi̍ si̍ɔ̍ɔ̍la̍ wāūla̍ŋ o̍ lābā mī lā kāndu̍ bɔ̄ŋa᷅ŋndo̍. Lā kɔ᷄ o̍ ma̍āŋndo̍ di̍ a̍ sīɔ̍ɔ̍la̍ŋ o̍ lābā.

²⁸Nu᷄m cho̍ Mɛ̄lɛ̄ka̍ nūu̍ ni̍, ndu̍yɛ̍ I̍ cho̍ nu̍m sāŋgālā o̍ chōnde̍i̍ ni᷄ŋ. Mɛ̄lɛ̄ka̍ nūu̍, I̍ cho̍ wāŋnda̍ chɔ̄m a̍ mɛ̄ɛ̍ ŋ̄ chō ō bɛ̄ndū yɛ̍.

²⁹Lā me᷄l Mɛ̍lɛ̄ka̍ ba̍li̍ka̍a̍, kāni̍ fo̍ndōle̍, ō chō wānā kɛ̍ndɛ̄. Kāālā ndɔ̍ cho̍ le̍ te̍le̍ŋ o̍ te̍le̍ŋ ndo̍, ō chō le̍ fɛ̍ɛ̍ŋ a̍ fɛ̍ɛ̍ŋ.