Southern Kisi bible online

Sa᷅m 119

¹Wānāa̍ cho̍ ha̍ā ma̍ wā sa̍kpō Mɛ̄lɛ̄ka̍ o̍ hɔ̄l, ndu̍yɛ̍ mā tōsā nyɛ᷅ sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ lā dīmi̍ wo̍ wa̍, ā pɛ̄l tɔ̄nɔ̄ɔ̍.

²Wānāa̍ to̍sā nyɛ᷅ Mɛ̄lɛ̄ka̍ ō dīmūl nda̍ wo̍, ndu̍yɛ̍ mā sōōlūū ndu̍ a̍ kɔ̄ltā ndāla̍ŋ kpo̍u̍ wa̍, ā pɛ̄l tɔ̄nɔ̄ɔ̍.

³Wānāā wāā nu̍a̍ā ā to̍sā i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍. Nɛ̄i̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m nda̍ wo̍, le̍chōo̍ sa̍kpō nda̍ kūā ni̍.

⁴Mɛ̄lɛ̄ka̍ Ya̍a̍wɛ̄ɛ̄, a̍ chɔ̍m na̍a̍ sāwāla̍ nu̍mnda̍ŋ, ndu̍yɛ̍ ma̍ dīmūl na̍a̍ le̍ mī ŋ̄ wa᷄ sa̍kpō o̍ nyɛ̄ la̍ di̍mi̍ wo̍ tōsāa̍ ni᷄ŋ.

⁵Mɛ̄lɛ̄ka̍, yēēmɛ̍i̍ ī chō ya̍ bɔ̄ɔ̍ le̍ mī wa̍ sa̍kpō o̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍ ni᷄ŋ.

⁶Tē I̍ dɔ̍ū kɔ̄l nūu̍ o̍ nyɛ̄ sāwāla̍ nu̍mnda̍ŋ lā dīmi̍ wō tōsāa̍ ni᷄ŋ pɛ̍ kpo̍u̍, I̍ to̍sā i̍sɔ̍ɔ̍ o̍ īsɔ̄ɔ̍ mī si̍ɔ̍mbu̍la̍ bi̍ī ya̍ le̍.

⁷Tē I̍ pɛ̍ɛ̍ku̍ pɛ̍ le̍ nyɛ̄ sāwāla̍ nu̍mndā tōnya̍ la̍ŋ nda᷅ŋ lā dīmi̍ wo̍ tōsāa̍, I̍ nɔ̍lā mī sa̍ŋga̍la̍ nu̍m a̍ kɔ̄l nūu̍ kpo̍u̍.

⁸I̍ cho̍ sāwāla̍ nu̍mnda̍ŋ chūā kpo̍u̍ Mɛ̄lɛ̄ka̍. Le̍la̍ŋ ma᷅l la̍ le̍.

⁹Vɛ̄ɛ̍nɛ̍ chūā pīāāndōo̍ ō lōōkū yɛ̍ wā ō dīāndāā ō to̍sā yɔ᷅ŋ wɔ̄ɔ̍ŋ te̍? Mɛ̄ɛ̍ mbō tūēī nu̍m dīōm mbō tōsa̍ nyɛ̄ ŋ̄ dīmūl ndu̍ wo̍.

¹⁰I̍ cho̍ nu̍m sōōlūūwo̍ a̍ kɔ̄ nūu̍ kpo̍u̍. To̍sā mī fa̍ŋa̍ŋ o̍ nɛ̄ī ŋ̄ chɔ᷄m ya̍ wo̍ chōo̍ le̍.

¹¹I̍ lo̍ o̍ ko̍ŋ mi̍ kɛ̍si᷄ŋ di̍ōmndā nūmnda̍ŋ ya̍ o̍ kɔ̄l, le̍ māā I̍ to̍sā yɔ̄ŋ wɔ̄ɔ̍ŋndo̍ a̍ nūm te̍.

¹²Sāŋgālāa̍ chō le̍ nūm Mɛ̄lɛ̄ka̍ Ya̍a̍wɛ̄ɛ̄. Pɛ̍ɛ̍ku̍ ya̍ sāwāla̍ nu̍mnda̍ŋ Mɛ̄lɛ̄ka̍.

¹³Sāwāla̍ nu̍mnda̍ŋ kpo̍u̍, I̍ ye̍e̍ma̍ mī si̍na̍ la̍ŋ, mī nɔ̍la̍ mī mi̍ŋgi̍ la̍ŋ tōmbōlā lā pīlɛ̍ŋ pi̍lɛ̍ŋ.

¹⁴Kɔ̄l nūu̍ chō bɔ̄ɔ̍ o̍ kɛ̍ndɛ̄ le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍. Ō chō māchūāā mɛ̄ɛ̍ wāŋnda̍ sāālūŋ nu̍a̍ā nyɛ̄m ba̍āŋ kāla᷄ŋ, mā wa᷄ a̍ kɔ̄l kɛ̄ndɛ̄ yɛ̍.

¹⁵I̍ cho̍ wā yīya᷄ŋndo̍ a̍ pɛ̄ɛ̄kūlā nūmnda̍ŋ o̍kɔ̄ɔ̄ le̍ te̍le̍ŋ o̍ te̍le̍ŋ, ndu̍yɛ̍ mī to᷅l nɛ̄ī nu̍mndo̍ kɔ̄ɔ̄lī.

¹⁶Le̍ te̍le̍ŋ o̍ te̍le̍ŋ, I̍ cho̍ a̍ kɔ̄l kɛ̄ndɛ̄ le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍, I̍ pu̍ɛ̍ɛ̍nūŋ di̍ōmndā nūmnda̍ŋ te̍.

¹⁷Yāndi̍i̍ to̍sa̍l bu̍ɛ̍ī nūmndo̍ he̍ī Mɛ̄lɛ̄ka̍, to̍sa̍ mī hi̍o̍ū lāchī a̍ wāa̍ yōōmū, le̍ mī hi̍o̍ū lāchī a̍ nyɛ̄ ŋ̄ dīmūl la̍ wo̍ tōsāa̍.

¹⁸Ku̍mbi̍ ya̍ hɔ̄lta̍ŋ Mɛ̄lɛ̄ka̍, le̍ mī che᷅ dīōmndā kɔ̄ndɔ̄fi̍lta̍ cho̍ o̍ sāwāla̍ nu̍mnda̍ŋ ni᷄ŋ nda̍ŋ.

¹⁹Le̍ te̍le̍ŋ bi̍ŋgī ko̍ni̍ ya̍ I̍ cho̍ o̍ chi̍e̍ēŋndo̍ chōo̍ ni̍ Mɛ̄lɛ̄ka̍. To̍sā mī kɛ̍ɛ̍ sīnā a̍ sāwāla̍ nu̍mnda̍ŋ o̍kɔ̄ɔ̄ le̍.

²⁰Nyɛ̄ ya̍ I̍ ye̍e̍ma̍ o̍ kɔ̄l nūu̍ ni᷄ŋ mbo̍ hīāū kpo̍u̍, le̍ te̍le̍ŋ o̍ te̍le̍ŋ ndo̍ cho̍ ni̍, māā mī wa̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍.

²¹Wānāā yōŋgāā bɛ̍ndūa̍a̍ so̍li̍ nu̍m dīōm nda̍, ma̍ lō o̍ ko̍ŋ ma̍ tūsī nda̍ nyɛ̄ pālāa̍ chōo̍, mi̍ sēndi̍o̍o̍ wā nda̍ chōo̍.

²²Chɛ᷅l mī wāŋnda̍ ha̍ā ā ma᷄m ya̍, ndu̍yɛ̍ mā tɛ̄ɛ̄mbu̍u̍ ya̍ lābɛ̄ɛ̄ le̍ mɛ̄ɛ̍ ya̍ I̍ to᷅l pɛ̄ɛ̄kūlā nūmnda̍ŋ kɔ̄ɔ̄lī yɛ̍ le̍.

²³Ā yɔ᷄ŋ bɛ̍ɛ̍ mī wānāā bɛ̄ndūa̍a̍ ā cha᷄l nāa̍ pi᷅lɛ̍ mā yīi̍ ya̍ de̍fo̍o̍, I̍ cho̍ hīōūwɔ̄ɔ̄ lāchī a̍ yīya᷄ŋndo̍ a̍ pɛ̄ɛ̄kūlā nūmnda̍ŋ o̍kɔ̄ɔ̄ le̍ te̍le̍ŋ o̍ te̍le̍ŋ.

²⁴I̍ wa᷅ bɔ̍ɔ̍ a̍ kɔ̄l kɛ̄ndɛ̄ le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍. La̍ŋ la̍ si̍lā ya̍ ni̍.

²⁵I̍ cho̍ tēndu̍ pīɔ̍m Mɛ̄lɛ̄ka̍, mi̍ŋgi̍ ya̍ yōōmōo̍ o̍ mīli̍ŋ, mɛ̄ɛ̍ ŋ̄ dīmi̍ o̍ sāwāla̍ nu̍mnda̍ŋ ni᷄ŋ yɛ̍.

²⁶Nyɛ̄ o̍ nyɛ᷄ cho̍ ya̍ chōo̍, I̍ chi̍i̍ nu̍m chɔ̄m, ndu̍yɛ̍ ma̍ mūlī ya̍ dīōm. Pɛ̍ɛ̍ku̍ ya̍ sāwāla̍ nu̍mnda̍ŋ Mɛ̄lɛ̄ka̍.

²⁷Ma̍la̍ ya̍ Mɛ̄lɛ̄ka̍, mī si̍na̍ pɛ̄ɛ̄kūlā nūmnda̍ŋ pɛ̄ŋgu̍. Ko̍ŋ to̍sā ni̍ mī wa̍ yīya᷄ŋndo̍ a̍ kɔ̄ndɔ̄fi̍ltā nūmnda̍ŋ o̍kɔ̄ɔ̄.

²⁸Mɔ̍nɛ̍i̍ bɛ̍ndūe̍i̍ ī chō bɔ̄ɔ̍ i̍ pi̍a̍ā o̍ kɔ̄l nūu̍ ni᷄ŋ. To̍sa̍ mī sɔ̍la̍ dīāllūŋ kālāŋ sɛ̄nɛ̄īyo̍ŋ, mɛ̄ɛ̍ ŋ̄ chūa̍ būŋgɛ̄i̍ o̍ sāwāla̍ nu̍mnda̍ŋ ni᷄ŋ yɛ̍.

²⁹Chɛ᷅l la̍ mī to᷅l nɛ̄ī lāchōōwāa̍ kɔ̄ɔ̄lī le̍. To̍sa̍l la̍ sa̍bū, mā pɛ̍ɛ̍ku̍ ya̍ sāwāla̍ nu̍mnda̍ŋ.

³⁰Nɛ̄i̍ tōnya̍a̍ ndu̍ ya̍ I̍ to᷅l ho̍ō kɔ̄ɔ̄lī ni̍. I̍ dɔ̍ū kɔ̄l nūu̍ kpo̍u̍ o̍ sāwāla̍ nu̍mnda̍ŋ chūa̍a̍ ni᷄ŋ.

³¹I̍ to᷅l pɛ̄ɛ̄kūlā nūmnda̍ŋ kɔ̄ɔ̄lī a̍ kɔ̄l nūu̍ kpo̍u̍, Mɛ̄lɛ̄ka̍ Ya̍a̍wɛ̄ɛ̄. To̍sā mī si̍ɔ̍mbu̍la̍ŋ lā bīī ya̍ le̍.

³²Tē a̍ to̍sa̍ pɛ̍ mī sɔ̍la̍ sīnā pɛ̄ŋgo̍o̍ ta̍u̍ a̍ sāwāla̍ nu̍mnda̍ŋ o̍kɔ̄ɔ̄, nyɛ̄ o̍ nyɛ̄ ŋ̄ dīmu̍l la̍ le̍ tōsāa̍, I̍ cho̍ ō bɛ̍ɛ̍ndīa̍ŋ mī to̍sa̍ ndu̍ kpo̍u̍.

³³O̍o̍ Mɛ̄lɛ̄ka̍ Ya̍a̍wɛ̄ɛ̄, pɛ̍ɛ̍ku̍ ya̍ mɛ̄ɛ̍ ya̍ I̍ tu̍āl sa̍wāla̍ nu̍mnda̍ kɔ̄ɔ̄lī yɛ̍. Ko̍ŋ tōsā ni̍ mī wa̍ nyɛ̄ la̍ di̍mi̍ wo̍ tōsāa̍ le̍ te̍le̍ŋ o̍ te̍le̍ŋ.

³⁴Ke̍ ya̍ sīnā pɛ̄ŋgo̍o̍ le̍ mī nɔ̍la̍ mī to̍sa̍ nyɛ̄ sāwā nu̍mndo̍ dīmi̍ wo̍, ndu̍yɛ̍ mī wa̍ ndu̍ tōsāa̍ a̍ kɔ̄l nūu̍ kpo̍u̍.

³⁵To̍sa̍ mī to᷅l sāwāla̍ nu̍mnda̍ŋ kɔ̄ɔ̄lī. Kāni̍ fo̍ndōle̍, la̍ŋ la̍ to̍sā ni̍ mī wa̍ a̍ kɔ̄ kɛ̄ndɛ̄.

³⁶Dɔ̍u̍ ye̍e̍mɛ̍i̍ o̍ kɔ̄l nūu̍ ni᷄ŋ, le̍ mi̍ to̍sa̍ nyɛ̄ sāwāla̍ nu̍mnda̍ŋ lā dīmi̍ wo̍, ō wa᷅ yēēmɛ̍i̍ nu̍u̍wāā sūl te̍.

³⁷Fa̍ŋa̍ ya̍ kɔ̄l lo̍ o̍ nyɛ̄m fo̍ndo᷄ŋ Mɛ̄lɛ̄ka̍. Ma̍nda̍ yo̍o̍mū nūu̍ mɛ̄ɛ̍ ŋ̄ chu̍e̍l la̍ būŋgɛ̄i̍ yɛ̍.

³⁸To̍sa̍l ya̍ bu̍ɛ̍ī nūmndo̍ nyɛ̄ ŋ̄ chūa̍ būŋgɛ̄i̍ yo̍, būŋgɛ̄ī ŋ̄ chūe̍l wānāa̍ sīōōŋīī nūmnde̍ wa̍ ve̍.

³⁹Fa̍ŋa̍ ya̍ si̍ɔ̍mbu̍la̍ ya̍ I̍ wo̍ wō bɛ̄ndōo̍ la̍ŋ. Sāwāla̍ nu̍mnda̍ŋ lā chō sāwāla̍ kɛ̍ndɛ̄, la̍ŋ ya̍ I̍ ye̍e̍ma̍ ni̍.

⁴⁰Yēēmɛ̍i̍ Ī chō ya̍ bɔ̄ɔ̍, le̍ mī hi̍o̍ū lāchī a̍ sāwāla̍ nu̍mnda̍ŋ tōlɔ̄ɔ̍ kɔ̄ɔ̄lī. Le̍la̍ŋ mɛ̄ɛ̍ ŋ̄ chō wānā sa̍kpō yɛ̍, mi̍ŋgi̍ ya̍ yōōmōo̍ o̍ mīli̍ŋ.

⁴¹O̍o̍ Mɛ̄lɛ̄ka̍ Ya̍a̍wɛ̄ɛ̄, chɔ̍m ya̍ kāālā nu᷄m cho̍ le̍ te̍le̍ŋ o̍ te̍le̍ŋ ndo̍, ndu̍yɛ̍ mā chi̍i̍ndi̍a̍a̍ yōōmū nūu̍ mɛ̄ɛ̍ ŋ̄ chu̍e̍l la̍ būŋgɛ̄i̍ yɛ̍.

⁴²Ko̍ŋ to̍sā ni̍ mī mu̍li̍ wāŋnda̍ ha̍ā dīōm, a̍ cho̍ ya̍ ha̍ā māmɔ̄ɔ̍, le̍ tīīnda᷄ŋ ya̍ I̍ dɔ̍ū o̍ dīōm nūmndo̍ ni᷄ŋ ndo̍.

⁴³Ma̍la̍ ya̍ mī wa̍ dīōmndā tōnya̍la̍ŋ dīmīo̍o̍ le̍ te̍le̍ŋ o̍ te̍le̍ŋ, kāni̍ fo̍ndōle̍, I̍ dɔ̍ū tīīnda᷄ŋ nūu̍ kpo̍u̍ o̍ sāwāla̍ nu̍mnda̍ŋ chūa̍a̍ ni᷄ŋ.

⁴⁴Le̍ te̍le̍ŋ o̍ te̍le̍ŋ, I̍ cho̍ wā nyɛ̄ sāwa̍ nu̍mndo̍ ō dīmi̍ wo̍ tōsāa̍, ha̍a̍a̍ a̍ mɛ̄ɛ̄lu̍la̍ yōōmū nūu̍.

⁴⁵Ndu̍yɛ̍ I̍ wa̍ŋnūŋ ni̍ŋ ba̍lɔ᷄ŋndo̍ ō bā nūu̍ chōo̍ yɛ̍lɛ̍kɛ̍lɛ̍ɛ̍. Kāni̍ fo̍ndōle̍, le̍ mɛ̄ɛ̍ ya̍ I̍ dɔ̍ū kɔ̄l nūu̍ kpo̍u̍ o̍ sāwāla̍ nu̍mnda̍ŋ chūa̍a̍ ni᷄ŋ yɛ̍.

⁴⁶I̍ cho̍ māsāā bɛ̍ndūa̍a̍ dīmūl a̍ sāwāla̍ nu̍mnda̍ŋ o̍kɔ̄ɔ̄, ndu̍yɛ̍ lāsi̍ɔ̍mbu̍ o̍ lāsi̍ɔ̍mbu̍ la̍ bi̍ī ya̍ ni̍ŋ te̍.

⁴⁷I̍ cho̍ bɔ̄ɔ̍ a̍ kɔ̄l kɛ̄ndɛ̄ le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍, kāni̍ fo̍ndōle̍, I̍ ka̍a̍la̍ la̍ŋ.

⁴⁸I̍ nɔ̍ bɔ̄ɔ̍ bɛ̍ɛ̄le̍ŋ le̍ sāwāla̍ nu̍mnda̍ŋ, ndu̍yɛ̍ I̍ ka̍a̍la̍ la̍ŋ. Le̍ te̍le̍ŋ o̍ te̍le̍ŋ, I̍ wa᷅ ni̍ŋ yīya᷄ŋndo̍ a̍ la̍ŋ o̍kɔ̄ɔ̄.

⁴⁹Lo̍o̍nu̍ŋ bu̍ŋgɛ̄ī ŋ̄ chu̍e̍l la̍ ve̍, ya̍ bu̍ɛ̍ī nūmndo̍. Tīīnda᷄ŋ nūu̍ kpo̍u̍, ndu̍ cho̍ ko̍ŋ ni̍.

⁵⁰Nyɛ̄ pālāa̍ chō ya̍ chōo̍, kɛ̍ būŋgɛ̄ī ŋ̄ chu̍e̍l la̍ ve̍ ī tōsa̍ mi̍ sɔ̍lā kɔ̄l nyɔ̄ɔ̄lāa̍. Kāni̍ fu̍u̍le̍, būŋgɛ̄ī ŋ̄ chu̍e̍l la̍ ve̍ ī mīŋgi̍ ya̍ yōōmōo̍ o̍ mīli̍ŋ.

⁵¹Le̍ te̍le̍ŋ o̍ te̍le̍ŋ, wānāā yōŋgāā bɛ̍ndūa̍a̍ ā chō ya̍ māmɔ̄ɔ̍. Kɛ̍ a̍ ko̍ŋ kpo̍u̍ I̍ fe̍ŋa̍ŋ o̍ sāwāla̍ nu̍mnda̍ŋ chōo̍ le̍.

⁵²I̍ cho̍ yīya᷄ŋndo̍ a̍ sāwāla̍ nu̍mndā māsīndɛ̄la̍ŋ nda᷅ŋ o̍kɔ̄ɔ̄. Ndu̍yɛ̍ la̍ŋ la̍ to̍sā ni̍ mī sɔ̍la̍ kɔ̄l nyɔ̄ɔ̄lāa̍ Mɛ̄lɛ̄ka̍ Ya̍a̍wɛ̄ɛ̄.

⁵³Tē I̍ che᷅ pɛ̍ mī wānāā dɛ̍nɛ̍ wɔ̍ɔ̍ŋāa̍ kɛ̍ɛ̍ sāwāla̍ nu̍mnda̍ nda̍, ā wa᷄ la̍ŋ tɛ̄ɛ̄mbūūwo̍, sūɛ̍i̍ pi̍la̍ i̍ nɛ̍ī ya̍ ni̍.

⁵⁴Te̍le̍ŋ bi̍ŋgī ya̍ I̍ nɔ̍ ho̍ō le̍ wāa̍ o̍ chi̍e̍ēŋndo̍ chōo̍ wo̍, sāwāla̍ nu̍mnda̍ŋ lā chō māchūāā chōndo̍ŋ ya̍ o̍ sōndō.

⁵⁵O̍o̍ Mɛ̄lɛ̄ka̍ Ya̍a̍wɛ̄ɛ̄, īchɔ̄l pi̍i̍ pi̍i̍ I̍ lɔ᷅l yi̍ŋa᷄ŋndo̍ a̍ nūm o̍kɔ̄ɔ̄, ndu̍yɛ̍ mi̍ wa᷅ sāwāla̍ nu̍mnda̍ŋ chūa̍a̍.

⁵⁶I̍ wa᷅ bɔ̍ɔ̍ a̍ kɔ̄l kɛ̄ndɛ̄, tē I̍ wa̍ sāwāla̍ nu̍mnda̍ŋ chūa̍a̍ pɛ̍.

⁵⁷Nu᷄m pīlɛ̍ kpe̍ ya̍ I̍ ye̍e̍ma̍ o̍ yōōmū nūu̍ ni᷄ŋ ni̍ Mɛ̄lɛ̄ka̍ Ya̍a̍wɛ̄ɛ̄. I̍ chu̍a̍ būŋgɛ̄i̍ le̍ hīōūwɔ̄ɔ̍ lāchī a̍ sāwāla̍ nu̍mnda̍ŋ chūa̍a̍.

⁵⁸I̍ cho̍ nu̍m nyɔ̄ɔ̄lōo̍ a̍ kɔ̄l nūu̍ kpo̍u̍ le̍ mā chē ya̍ nyīnā. Tu̍i̍i̍nu̍ŋ ya̍ īnyīɛ̍ɛ̍, mɛ̄ɛ̍ ŋ̄ chu̍e̍l la̍ būŋgɛ̄i̍ yɛ̍.

⁵⁹I̍ mɛ̍ɛ̍nda̍ŋ ke̍lālā nīla̍ŋ kpo̍u̍, mi̍ yi̍ya᷄ŋ māā ō bɛ̄ndā mī mu̍li̍ŋ sa̍wāla̍ nu̍mnda̍ŋ tōlɔ̄ɔ̍ kɔ̄ɔ̄lī.

⁶⁰Ta̍ma̍la̍ bɛ̍ɛ̍ I̍ cho̍ to̍sā, le̍ sāwāla̍ nu̍mnda̍ŋ tōlɔ̄ɔ̍ kɔ̄ɔ̄lī le̍.

⁶¹Wānāā dɛ̍nɛ̍ wɔ̍ɔ̍ŋnda̍ ā ye᷄ŋ ya̍ yāŋɔ̄ɔ̄le̍ŋ le̍ mī mi̍i̍ŋgu̍ o̍ yɔ̄ŋ wɔ̄ɔ̍ŋndo̍ ni᷄ŋ, kɛ̍ I̍ cho̍ īsīsi̍ nyɛ̍ kɛ̄ndɛ̄ yi̍, o̍ sāwāla̍ nu̍mnda̍ŋ chūa̍a̍ ni᷄ŋ.

⁶²A̍ dītɛ̍ɛ̄ŋndo̍ bɛ̍ɛ̍ ya̍ I̍ te̍ndū ni̍, mɛ̄ɛ̍ mī me̍l nu̍m ba̍li̍ka̍a̍, kāni̍ fo̍ndōle̍, le̍ mɛ̄ɛ̍ sāwāla̍ nu̍mnda̍ŋ lā chō sāwāla̍ sa̍kpō yɛ̍.

⁶³Wānāa̍ nɔ̍ sīōōŋīī nūmnde̍ wa̍ ki̍nɛ̍i̍, nda̍ cho̍ chāāŋāā nīa̍a̍ ni̍, wānāa̍ chu̍ā sa̍wāla̍ nu̍mnda̍ŋ nda̍.

⁶⁴O̍o̍ Mɛ̄lɛ̄ka̍ Ya̍a̍wɛ̄ɛ̄, kāālā nu᷄m cho̍ le̍ te̍le̍ŋ o̍ te̍le̍ŋ ndo̍, ō chō le̍ ŋ̄wāŋndā chīe̍e̍ kpo̍u̍ o̍ chi̍e̍ēŋndo̍ ni᷄ŋ. Pɛ̍ɛ̍ku̍ ya̍ sāwāla̍ nu̍mnda̍ŋ.

⁶⁵O̍o̍ Mɛ̄lɛ̄ka̍ Ya̍a̍wɛ̄ɛ̄, a̍ to̍sa̍l ya̍ bu̍ɛ̍ī nūmndo̍ dɛ̍nɛ̍ kɛ̍ndɛ̄ bɛ̄ndū, mɛ̄ɛ̍ ŋ̄ chu̍e̍l la̍ būŋgɛ̄i̍ yɛ̍.

⁶⁶Ke̍ ya̍ tāāsi̍o̍o̍ a̍ sīnā pɛ̄ŋgo̍o̍. Kāni̍ fo̍ndōle̍, I̍ dɔ̍ū tīīnda᷄ŋ nūu̍ kpo̍u̍ o̍ sāwāla̍ nu̍mnda̍ŋ ni᷄ŋ.

⁶⁷Le̍ mɛ̄ɛ̍ ya̍ i̍i̍ fa̍ŋa̍ŋ o̍ nɛ̄i̍ nu̍mndo̍ chōo̍ yɛ̍, nyɛ̄ ko̍ŋ to̍sa̍ ni̍ ma̍ tūsī ya̍ nyɛ̄ pālāa̍ chōo̍. Kɛ̍ I̍ cho̍ ni᷅ŋ nyɛ̄ ŋ̄ dīmu̍l la̍ wō tōsāa̍.

⁶⁸Ā chō wānā kɛ̍ndɛ̄, ndu̍yɛ̍ sɔ̄ɔ̍ŋ kɛ̍ndɔ᷄ŋ kpo̍sōŋ ŋ̄ tōsā ni̍. Pɛ̍ɛ̍ku̍ ya̍ sāwāla̍ nu̍mnda̍ŋ.

⁶⁹Mi̍ chē bɛ̍ɛ̍ mi̍ wānāā yōŋgāa̍ ā wā chōōla̍ŋ dīmīo̍o̍ a̍ ya̍ o̍kɔ̄ɔ̄ ni̍, kɛ̍ I̍ cho̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍ a̍ kɔ̄l nūu̍ kpo̍u̍.

⁷⁰Wāŋnda̍ ha̍ā ā nɔ̍ si̍nā pɛ̄ŋgu̍ a̍ sāwāla̍ nu̍mnda̍ŋ o̍kɔ̄ɔ̄ le̍, kɛ̍ ya̍ ya̍, I̍ wa᷅ bɔ̄ɔ̍ a̍ kɔ̄l kɛ̄ndɛ̄ le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍.

⁷¹Ō bɛ̄nda̍ bɔ̄ɔ̍ ma̍ tūsī ya̍ nyɛ̄ pālāa̍ chōo̍, kāni̍ fo̍ndōle̍, nyɛ̄ pālāā kōŋ tōsa̍ mi̍ pɛ̍ɛ̍kū a̍ sāwāla̍ nu̍mnda̍ŋ o̍kɔ̄ɔ̄.

⁷²Sāwāla̍ nu̍mndā ŋ̄ ke᷄ ya̍ la̍ŋ, lā chō bɔ̄ɔ̍ nyɛ᷅ kpe̍e̍kpe̍i̍ le̍ ya̍. Lā hīōū ko̍o̍līi̍yo̍ŋ a̍ ka̍ni̍ŋ hu̍mbo᷄ŋ wāa̍la̍ŋ o̍ wāa̍la̍ŋ ni᷄ŋ.

⁷³Nu᷄m to̍o̍si̍a̍a̍ ya̍ ni̍ Mɛ̄lɛ̄ka̍, ndu̍yɛ̍ ma̍ wā yōōmū nūu̍ māndāa̍. Ke̍ ya̍ sīnā pɛ̄ŋgo̍o̍ le̍ mī pɛ̍ɛ̍ku̍ a̍ sāwāla̍ nu̍mnda̍ŋ o̍kɔ̄ɔ̄.

⁷⁴Wānāa̍ nɔ̍ sīōōŋnde̍ le̍ nūm nda̍, ā chā ya̍ ni̍ŋ mā dɔ̄ɔ̄nu᷄ŋ nya̍a̍le̍, kāni̍ fo̍ndōle̍, le̍ mɛ̄ɛ̍ ya̍ I̍ dɔ̍ū tīīnda᷄ŋ nūu̍ o̍ dīōmndā nūmnda̍ŋ ni᷄ŋ yɛ̍.

⁷⁵O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ si̍nā māā yāma᷅ŋ ŋ̄ kīlūl wa̍nā wo̍ŋ, o̍ nɛ̄i̍ sa̍kpōo̍ chōo̍ ŋ̄ kīālū mu̍ŋ ni̍. Nyɛ̄ pālāa̍ ŋ̄ tūsi̍ ya̍ chōo̍ wo̍, o̍ nɛ̄i̍ sa̍kpō ŋ̄ tūsi̍ ya̍ ndu̍ chōo̍ ni̍.

⁷⁶Chɔ̍m ya̍ kāālā nu᷄m cho̍ le̍ te̍le̍ŋ o̍ te̍le̍ŋ ndo̍, le̍ mī sɔ̍la̍ kɔ̄l nyɔ̄ɔ̄lāa̍, mɛ̄ɛ̍ ŋ̄ chu̍e̍l ya̍ bu̍ɛ̍ī nūmndo̍ būŋgɛ̄i̍ yɛ̍.

⁷⁷Tu̍i̍i̍nu̍ŋ ya̍ īnyīɛ̍ɛ̍, mā to̍sa̍ mī hi̍o̍ū lāchī a̍ wāa̍ yōōmū. Kāni̍ fo̍ndōle̍, I̍ wa᷅ bɔ̍ɔ̍ a̍ kɔ̄l kɛ̄ndɛ̄ le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍.

⁷⁸Wānāā yōŋgāa̍, mbɔ̄ māā si̍ɔ̍mbu̍la̍ŋ lā bīi̍ nda̍ fɔ̍, kāni̍ fo̍ndōle̍, le̍ chōōlā nda̍ nyīīndu̍u̍ ya̍ la̍ŋ. Kɛ̍ ya̍ ya̍, le̍ te̍le̍ŋ o̍ te̍le̍ŋ, I̍ cho̍ wā yīya᷄ŋndo̍ a̍ sāwāla̍ nu̍mnda̍ŋ o̍kɔ̄ɔ̄.

⁷⁹Mbɔ̄ māā wānāa̍ nɔ̍ sīōōŋīī nūmnde̍ wa̍ ā hu᷄ŋ nāa̍ ya̍ chu̍a̍ fɔ̍, le̍ mā hu᷄ŋ pɛ̍ɛ̍kū a̍ sāwāla̍ nu̍mnda̍ŋ o̍kɔ̄ɔ̄ ya̍ o̍ bā bɛ̄ŋgu̍.

⁸⁰Mbɔ̄ māā I̍ wa̍ nyɛ᷅ sāwāla̍ nu̍mnda̍ŋ lā dīmi̍ wo̍ tōsāa̍ a̍ kɔ̄l nūu̍ kpo̍u̍ fɔ̍. Ko̍ŋ to̍sā ni̍ si̍ɔ̍mbu̍la̍ bi̍ī ya̍ le̍.

⁸¹O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ sa̍ŋga̍ ni᷅ŋ a̍ chūmndo̍ le̍ mā chi̍i̍ndīāā ya̍. Ndu̍yɛ̍ I̍ dɔ̍ū tīīnda᷄ŋ nūu̍ kpo̍u̍ o̍ dīōmndā nūmnda̍ŋ ni᷄ŋ.

⁸²I̍ sa̍ŋga̍ ni᷅ŋ a̍ chūmndo̍ le̍ nyɛ̄ ŋ̄ chu̍e̍l la̍ būŋgɛ̄i̍ yo̍. I̍ nyu̍nā wɔ̍ nu̍m, lɔ̍ɔ̍ kūɛ̍ɛ̍nɛ̍ ŋ̄ chō yɛ̍ ya̍ kɔ̄llo̍ nyɔ̄ɔ̄lū?

⁸³I̍ yɔ̍nu̍ŋ ni᷅ŋ nyɛ̄ fo̍ndō fu̍u̍, mɛ̄ɛ̍ bɔ̄lɔ̄ pa̍a̍ndōo̍ ō wā nu̍a̍ā ō lāndāā o̍ yīŋnde̍ŋ chōo̍, wāŋnda̍ nɔ᷅ lɛ̍ kpe̍ku̍ a̍ ndu̍ le̍ yɛ̍. Kɛ̍ a̍ ko̍ŋ kpo̍u̍, I̍ pūɛ̄ɛ̄nu̍ŋ a̍ sāwāla̍ nu̍mnda̍ŋ o̍kɔ̄ɔ̄ le̍.

⁸⁴Vɛ̄ɛ̍nɛ̍ kpɛ̍ ya̍ bu̍ɛ̍ī nūmndo̍ chō yɛ̄ hīōūwɔ̄ɔ̄ lāchī a̍ chūmndo̍? Wānāa̍ tu̍si̍ ha̍ā ya̍ nyɛ̄ pālāa̍ chōo̍ wa̍, lɔ̍ɔ̍ kūɛ̍ɛ̍nɛ̍ ŋ̄ tūsī yɛ̍ ni̍ŋ nda̍ nyɛ̄ pālāa̍ chōo̍?

⁸⁵Wānāā yōŋgāa̍ cho̍ ha̍ā, ma̍ kɛ̄ɛ̄ le̍ sāwāla̍ nu̍mnda̍ŋ chūa̍a̍ wa᷄, ā lo̍ o̍ ko̍ŋ ma̍ tūū ya̍ so̍o̍ŋndo̍ le̍ mī de̍l lēni᷄ŋ.

⁸⁶Sāwāla̍ nu̍mnda̍ŋ lā chō sāwāla̍ wānā ti̍i̍nda̍ŋ. Ma̍la̍ ya̍ Mɛ̄lɛ̄ka̍, wāŋnda̍ chō ya̍ nyɛ̄ pālāa̍ tūsīo̍o̍ chōo̍ o̍ chōōla̍ŋ chōo̍.

⁸⁷Ō lo̍ ni᷅ŋ cho̍be̍, mā tīu̍ yōōmū nūu̍ bā. Kɛ̍ a̍ ko̍ŋ kpo̍u̍, I̍ me̍l sa̍wāla̍ nu̍mnda̍ chūa̍a̍ le̍.

⁸⁸Mɛ̄ɛ̍ ka̍a̍la̍ nu᷄m cho̍ le̍ te̍le̍ŋ o̍ te̍le̍ŋ ō chō ya̍ chōo̍ yɛ̍, yāndi̍i̍ ma̍nda̍ yo̍o̍mū nūu̍. Ko̍ŋ to̍sā ni̍ mī hi̍o̍ū lāchī a̍ sāwāla̍ nu̍mnda̍ŋ chūa̍a̍.

⁸⁹O̍o̍ Mɛ̄lɛ̄ka̍ Ya̍a̍wɛ̄ɛ̄, dīōm nūmndo̍ ō chō le̍ fɛ̍ɛ̍ŋ a̍ fɛ̍ɛ̍ŋ. Ndu̍yɛ̍ ɛ̄chɛ̍nɛ̄ bɛ̍ɛ̍, dīōm nūmndo̍ ō chō le̍ fɛ̍ɛ̍ŋ a̍ fɛ̍ɛ̍ŋ.

⁹⁰Ā chō wānā sa̍kpō le̍ fɛ̍ɛ̍ŋ a̍ fɛ̍ɛ̍ŋ. Mɛ̄ɛ̍ ŋ̄ tōōsi̍a̍a̍ chi̍e̍ēŋndo̍ mā sīmī ndu̍ yi̍, o̍ bā kōŋ chōo̍ o̍ cho̍ ni̍.

⁹¹Sāwāla̍ nu̍mnda̍ŋ, a̍ pāa̍le̍ hāūle̍ŋ nde᷅ŋ bɛ̍ɛ̍ lā chō lēchōo̍. Kāni̍ fo̍ndōle̍, nyɛ̄ o̍ nyɛ̄ ŋ̄ tōōsi̍a̍a̍, mu̍ŋ kpo̍u̍ ŋ̄ chō nu̍m sāāŋgīāllo̍.

⁹²Tē sāwāla̍ nu̍mnda̍ŋ la̍a̍ to̍sā mī na̍ŋ kɔ̄l te̍, māā ya̍ i̍i̍ vi᷅ ni᷅ŋ a̍ sāŋga̍ cho̍ ya̍ chōo̍ wo̍.

⁹³Le̍ fɛ̍ɛ̍ŋ a̍ fɛ̍ɛ̍ŋ I̍ pu̍ɛ̍ɛ̍nūŋ a̍ sāwāla̍ nu̍mnda̍ŋ te̍. Kāni̍ fo̍ndōle̍, o̍ sāwāla̍ŋ nda᷅ŋ ni᷄ŋ sa̍na̍a̍ ŋ̄ chō yōōmū nūu̍ māndāa̍ ni̍.

⁹⁴Le̍ nūm ya̍ I̍ cho̍ ni̍ Mɛ̄lɛ̄ka̍, chi̍i̍ndi̍a̍a̍ ya̍ fɔ̍. I̍ ki̍ndi̍ŋ o̍ nɛ̄i̍ o̍ nɛ̄i̍ ni̍ŋ, mi̍ wa᷅ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍.

⁹⁵Wānāā dɛ̍nɛ̍ wɔ̍ɔ̍ŋnda̍ ā chō ya̍ mɛ̄ŋgɛ̄lāa̍ le̍ ya̍ dīyɔ̄ɔ̍, kɛ̍ a̍ ko̍ŋ kpo̍u̍, I̍ cho̍ hīōūwɔ̄ɔ̍ lāchī a̍ yīya᷄ŋndo̍ a̍ sāwāla̍ nu̍mnda̍ŋ o̍kɔ̄ɔ̄.

⁹⁶I̍ si̍nā ndi̍ māā nyɛ̄ o̍ nyɛ̄ ō nɔ̄ mɛ̄ɛ̄lu̍la̍ŋ, kɛ̍ sāwāla̍ nu̍mnda̍ŋ nda̍ŋ lā nɔ̍ la̍mɛ̍ɛ̍lu̍ le̍.

⁹⁷I̍ ka̍a̍la̍ sāwāla̍ nu̍mnda̍ŋ bɔ̄ɔ̍ Mɛ̄lɛ̄ka̍. Le̍ te̍le̍ŋ o̍ te̍le̍ŋ, I̍ cho̍ yīya᷄ŋndo̍ a̍ la̍ŋ o̍kɔ̄ɔ̄.

⁹⁸Sāwāla̍ nu̍mnda̍ŋ lā tōsa̍, mi̍ nɔ᷅ tāāsi̍o̍o̍ mi̍ hi̍a̍ū ya̍a̍mɔ̍ɔ̍wa̍a̍ nīa̍a̍. Kāni̍ fo̍ndōle̍, le̍ te̍le̍ŋ o̍ te̍le̍ŋ lā chō ya̍ o̍ bā.

⁹⁹I̍ nɔ̍ sīnā pɛ̄ŋgo̍o̍, I̍ hi̍o̍ū bɛ̍ɛ̍ wānāa̍ cho̍ ya̍ pɛ̄ɛ̄kōo̍ wa̍. Kāni̍ fo̍ndōle̍, le̍ te̍le̍ŋ o̍ te̍le̍ŋ, I̍ cho̍ yīya᷄ŋndo̍ a̍ sāwāla̍ nu̍mnda̍ŋ o̍kɔ̄ɔ̄.

¹⁰⁰I̍ nɔ̍ kɔ̄l kālo̍o̍ I̍ hi̍o̍ū wāŋ bɛ̄ndūa̍a̍, kāni̍ fo̍ndōle̍, le̍ mɛ̄ɛ̍ ya̍ I̍ cho̍ nyɛ̄ sāwāla̍ nu̍mnda̍ŋ lā dīmi̍ wō tōsāa̍ yɛ̍.

¹⁰¹I̍sɔ̄ɔ̍ o̍ īsɔ̄ɔ̍ cho̍ sūɛ̍i̍ dɛ̍nɛ̍ wɔ̍ɔ̍ŋ, I̍ kpɛ̍kpɛ̍la̍ mu̍ŋ kpo̍u̍, kāni̍ fo̍ndōle̍, I̍ ye̍e̍ma̍ mī to̍sa̍ nyɛ̄ sāwāla̍ nu̍mnda̍ŋ lā dīmi̍ wo̍.

¹⁰²I̍ fe̍ŋa̍ŋ o̍ sāwāla̍ nu̍mnda̍ŋ chōo̍ le̍, kāni̍ fo̍ndōle̍, nūm pi̍la̍ pɛ̍ɛ̍ku̍ ya̍ la̍ŋ ni̍.

¹⁰³Dīōmndā nūmnda̍ŋ lā yēēla̍ bɔ̄ɔ̍. Lā yēēla̍ lā hīōū līa̍a̍ŋ.

¹⁰⁴O̍ sāwāla̍ nu̍mnda̍ŋ ni᷄ŋ sa̍na̍a̍ ya̍ I̍ sɔ̍lā si̍nā pɛ̄ŋgo̍o̍ ni̍. Le̍la̍ŋ nīīlūlā wɔ̄ɔ̍ŋnda̍ŋ ki̍nɛ̍i̍, I̍ tu̍l la̍ŋ lēyɛ̄.

¹⁰⁵Dīōmndā nūmnda̍ŋ, la̍ŋ la̍ cho̍ nyɛ̄ wa̍wo̍ŋndo̍ le̍ pēlūŋ nūu̍ŋ ni̍, la̍ŋ la̍ chɔ᷅m ya̍ nɛ̄īyo̍ ni̍.

¹⁰⁶I̍ me̍na̍ŋ po̍, le̍ mī tu̍si̍ŋ o̍ sāwāla̍ nu̍mnda̍ cho̍ la᷅ŋ sa̍kpō la̍ŋ bɛ̄ŋgu̍, ndu̍yɛ̍ mɛ̄ɛ̍ mī pe̍e̍lu̍ būŋgɛ̄ī kēŋ.

¹⁰⁷Sāŋga̍ cho̍ ya̍ chōo̍ wo̍ ō chō ō bɔ̄ɔ̍, yāndi̍i̍ Mɛ̄lɛ̄ka̍ Ya̍a̍wɛ̄ɛ̄, ma̍nda̍ yo̍o̍mū nūu̍ mɛ̄ɛ̍ ŋ̄ chu̍e̍l la̍ būŋgɛ̄i̍ yɛ̍.

¹⁰⁸Mɛ̄lɛ̄ka̍ Ya̍a̍wɛ̄ɛ̄, chɛ̍l sa̍ŋgālā nūu̍, mā pɛ̍ɛ̍ku̍ ya̍ sāwāla̍ nu̍mnda̍ŋ.

¹⁰⁹Le̍ te̍le̍ŋ o̍ te̍le̍ŋ, yōōmū nūu̍ chō o̍ kpūndɔ̍ɔ̍ ni᷄ŋ, kɛ̍ a̍ ko̍ŋ kpo̍u̍, I̍ pu̍ɛ̍ɛ̍nu̍ŋ a̍ sāwāla̍ nu̍mnda̍ŋ te̍.

¹¹⁰Wānāā dɛ̍nɛ̍ wɔ̍ɔ̍ŋnda̍ ā lo̍ o̍ ko̍ŋ ma̍ yēŋ ya̍ yāŋɔ̄ɔ̄le̍ŋ, kɛ̍ a̍ ko̍ŋ kpo̍u̍, I̍ me̍l sa̍wāla̍ nu̍mnda̍ŋ chūa̍a̍ le̍.

¹¹¹Sāwāla̍ nu̍mnda̍ŋ lā chō māchūāā nyɛ̄m ni̍ ŋ̄ki̍ɔ̍ɔ̍ŋ le̍ fɛ̍ɛ̍ŋ a̍ fɛ̍ɛ̍ŋ. Wa̍li̍ ni̍ kɔ̄l lo̍ kpe̍e̍kpe̍i̍, ndu̍ cho̍ nyɛ̄ sāwāla̍ nu̍mnda̍ŋ lā dīmi̍ wō tōsāa̍ ni̍.

¹¹²I̍ kɛ̍ɛ̍si̍a̍a̍ a̍ kɔ̄l nūu̍ kpo̍u̍, le̍ mī lo̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍, ha̍a̍a̍ a̍ yōōmū nūu̍ mɛ̄ɛ̄lu̍la̍ŋ.

¹¹³Mɛ̄lɛ̄ka̍, wānāa̍ cho̍ ha̍ā ā si᷅m o̍ pēlīī pīlɛ̍ chōo̍ o̍ Mɛ̄lɛ̄ka̍ sōōlūūwo̍ ni᷄ŋ te̍ wa̍, I̍ tu̍l nda̍ lēyɛ̄. Kɛ̍ ya̍ ya̍, I̍ ka̍a̍la̍ sāwāla̍ nu̍mnda̍ŋ.

¹¹⁴Nu᷄m cho̍ nāa̍ nīa̍a̍ ya̍ I̍ vi̍a̍ŋnūŋ nda̍ ni̍, ndu̍yɛ̍ nu᷄m ma̍ndā ya̍ ni̍. I̍ dɔ̍ū tīīnda᷄ŋ nūu̍ kpo̍u̍ o̍ dīōmndā nūmnda̍ŋ ni᷄ŋ.

¹¹⁵Lā fāŋa̍ŋ ya̍ īkɛ̄i̍, nya̍ wānāā dɛ̍nɛ̍ wɔ̍ɔ̍ŋnda̍ ha̍ā, mī to̍sa̍ nyɛ̄ sāwāla̍ Mɛ̄lɛ̄ka̍ la̍ŋ lā dīmi̍ wo̍.

¹¹⁶Mɛ̄lɛ̄ka̍, ke̍ ya̍ kpāāyāa̍ mɛ̄ɛ̍ ŋ̄ chu̍e̍l la̍ būŋgɛ̄i̍ yɛ̍, mā to̍sa̍ mī hi̍o̍ū lāchī a̍ wāa̍ yōōmū. I̍ dɔ̍ū tīīnda᷄ŋ nūu̍ o̍ nūm ni̍ŋ, to̍sā mī si̍ɔ̍mbu̍la̍ŋ lā bīī ya̍ le̍.

¹¹⁷Ma̍nda̍ ya̍ Mɛ̄lɛ̄ka̍, mī yōōmū nūu̍ ō sɔ̄la̍ chīndāa̍, ndu̍yɛ̍ le̍ te̍le̍ŋ o̍ te̍le̍ŋ, mī wa̍ yīya᷄ŋndo̍ a̍ sāwāla̍ nu̍mnda̍ŋ o̍kɔ̄ɔ̄.

¹¹⁸Wānāa̍ kɛ̍ɛ̍ le̍ sāwāla̍ nu̍mnda̍ŋ chūa̍a̍ wa̍ ki̍nɛ̍i̍, ma̍ kɛ̄ɛ̄ nda̍ kpo̍u̍. Kāŋgālā nda̍ wa̍ tōsāa̍ wo̍ ō sīmnu᷄ŋ nyɛ᷅ fo̍ndō fu̍u̍.

¹¹⁹Wānāā dɛ̍nɛ̍ wɔ̍ɔ̍ŋnda̍ o̍ chi̍e̍ēŋndo̍ chōo̍ ki̍nɛ̍i̍, ā chō māchūāā nu̍m o̍ hɔ̄l bīl fo̍ndō fu̍u̍. Nyɛ̄ kōŋ bɛ̍ɛ̍ to̍sa̍ ni̍ mi̍ ka̍a̍lā sāwāla̍ nu̍mnda̍ŋ.

¹²⁰Sīōōŋnde̍ bīī ya̍ a̍ nūm, mi̍ wa᷅ nyīīyāa̍ kpa᷅ kpā. Sīōōŋnde̍ chō ya̍, le̍ yāma᷅ŋ nu̍m ŋ̄ kīlūl wa᷅ŋnda̍ le̍ nda̍ nyɛ̄ pālāa̍ tūsīo̍o̍ chōo̍ wo̍ŋ.

¹²¹I̍ to̍sa̍ nyɛ᷄ cho̍ nu̍m o̍ hɔ̄l sa̍kpō, ndu̍yɛ̍ mbo̍ wā tōnya̍a̍ wo̍. Le̍la̍ŋ ma᷅l la̍ ya̍a̍mɔ̍ɔ̍wa̍a̍ nīa̍a̍ o̍ bā le̍.

¹²²Yāndi̍i̍ chūe̍l la̍ ībūŋgā, māā ā tōsā ni̍ŋ mī nyɛ̄ o̍ nyɛ̄ wa᷄ ō kɛ̄ndɛ̄ a̍ ya̍. To̍sā mī wānāā yōŋgāa̍ ā tūsi̍ ya̍ nyɛ̄ pālāa̍ chōo̍ le̍.

¹²³I̍ sa̍ŋga̍ ni᷅ŋ a̍ chūmndo̍ le̍ mā chi̍i̍ndi̍a̍a̍ ya̍ mɛ̄ɛ̍ ŋ̄ chu̍e̍l la̍ būŋgɛ̄i̍ yɛ̍, le̍ mī che᷅ mī būŋgɛ̄ī kɛ̄ndɛ̄ kɛ̍ndɛ̄ī ŋ̄ chu̍e̍l la̍ ve̍ ī pēēlu̍ŋ.

¹²⁴Bu̍ɛ̍ī nūmndo̍ ya̍ I̍ cho̍ ni̍ Mɛ̄lɛ̄ka̍, bi̍i̍ ya̍ bīyɔ̄ɔ̄ kāālā nu̍m cho̍ le̍ te̍le̍ŋ o̍ te̍le̍ŋ ndo̍, ndu̍yɛ̍ mā pɛ̍ɛ̍ku̍ ya̍ sāwāla̍ nu̍mnda̍ŋ.

¹²⁵Bu̍ɛ̍ī nūmndo̍ ya̍ I̍ cho̍ ni̍, ke̍ ya̍ sīnā pɛ̄ŋgo̍o̍, le̍ mī si̍na̍ sāwāla̍ nu̍mnda̍ŋ pɛ̄ŋgu̍.

¹²⁶Mɛ̄lɛ̄ka̍ Ya̍a̍wɛ̄ɛ̄, te̍le̍ŋ ŋ̄ nɔ̄ mā to̍sa̍ īsɔ̄ɔ̍ wo̍ cho̍ ho̍ō ni̍, kāni̍ fo̍ndōle̍, wāŋnda̍ ā chō sāwāla̍ nu̍mnda̍ŋ tɛ̄ɛ̄mbūūwo̍.

¹²⁷I̍ ka̍a̍la̍ sāwāla̍ nu̍mnda̍ŋ ō hīōū mɛ̄ɛ̍ ya̍ I̍ ka̍a̍la̍ ko̍o̍līi̍ye̍ yɛ̍, ō hīōū mɛ̄ɛ̍ ya̍ I̍ ka̍a̍la̍ ko̍o̍līi̍ di̍a̍ndɛ̄ī kɛ̄ndɛ̄ kɛ̍ndɛ̄i̍ yɛ̍.

¹²⁸Le̍la̍ŋ ya̍ I̍ yɔ̍ŋgu̍ yōōmū nūu̍ kpo̍u̍, o̍ sāwāla̍ nu̍mnda̍ŋ tōlɔ̄ɔ̍ kɔ̄ɔ̄lī ni̍ŋ ni̍. Nɛ̄ī o̍ nɛ̄i̍ cho̍ nɛ̄i̍ wɔ̍ɔ̍ŋ, I̍ tu̍l ndu̍ lēyɛ̄.

¹²⁹Pɛ̄ɛ̄kūlā nūmnda̍ŋ lā chō pɛ̄ɛ̄kūlā kɔ̄ndɔ̄fi̍li̍ bɛ̄ndū. Le̍la̍ŋ ya̍ I̍ cho̍ la̍ŋ chūa̍a̍ a̍ kɔ̄l nūu̍ kpo̍u̍ ni̍.

¹³⁰Mɛ̄ɛ̍ ŋ̄ tɛ̍ɛ̍si̍a̍l wāŋnda̍ sāwāla̍ nu̍mnda̍ŋ yɛ̍, nyɛ̄ kōŋ tōsa̍ ni̍, mi̍ sāwāla̍ nu̍mnda̍ŋ lā sīmnu᷄ŋ nyɛ᷅ wa̍wo̍ŋndo̍ le̍ wāŋnda̍. Ndu̍yɛ̍ wānāa̍ si̍nā bɛ̍ɛ̍ nyɛ᷅ o̍ nyɛ̄ le̍ wa̍, lā nɔ̄lā mī lā ke̍ nda̍ sīnā pɛ̄ŋgo̍o̍.

¹³¹Ye̍e̍mɛ̍i̍ ī chō ya̍ bɔ̄ɔ̍ le̍ nyɛ̄ ŋ̄ dīmūl la̍ wo̍ tōsāa̍.

¹³²Mu̍li̍ hɔ᷅lla̍ o̍ ya̍lo̍ mā tu̍i̍i̍nu̍ŋ ya̍ īnyīɛ̍ɛ̍, mɛ̄ɛ̍ ŋ̄ tūīīnūŋ wa̍nāa̍ ka̍a̍la̍ nu̍mnda̍ īnyīɛ̍ɛ̍ le̍ te̍le̍ŋ o̍ te̍le̍ŋ yɛ̍.

¹³³Si̍mi̍ ya̍ yi̍ o̍ nɛ̄ī nu̍mndo̍ chōo̍, mɛ̄ɛ̍ ŋ̄ chu̍e̍l būŋgɛ̄i̍ yɛ̍. Chɛ᷅l mī yɔ̄ŋ wɔ̄ɔ̍ŋndo̍ ō nɔ̄ ya̍ kpāāyāa̍ chōo̍ le̍.

¹³⁴So̍li̍ ya̍ wānāa̍ cho̍ ya̍ ha̍ā nyɛ̄ pālāa̍ tūsīo̍o̍ chōo̍ wa̍ o̍ bā, ko̍ŋ to̍sā nī mī hi̍o̍ū lāchī a̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍.

¹³⁵Bu̍ɛ̍ī nūmndo̍ ya̍ I̍ cho̍ ni̍ Mɛ̄lɛ̄ka̍, to̍sa̍l la̍ dɛ̍nɛ̍ kɛ̍ndɛ̄, ndu̍yɛ̍ mā pɛ̍ɛ̍ku̍ ya̍ sāwāla̍ nu̍mnda̍ŋ.

¹³⁶Mɛ̍mi̍a̍ŋ mā līīvi̍a̍a̍ ya̍ būŋnde̍ yɔ̍ yɔ̍ a̍ cha᷄ŋndo̍, kāni̍ fo̍ndōle̍, le̍ mɛ̄ɛ̍ wāŋnda̍ ā kɛ̄ɛ̍ le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍ yɛ̍.

¹³⁷O̍o̍ Mɛ̄lɛ̄ka̍ Ya̍a̍wɛ̄ɛ̄, ā chō wānā sa̍kpō, ndu̍yɛ̍ o̍ nɛ̄ī sa̍kpōo̍ chōo̍ ŋ̄ kīālū ya᷅ma̍ŋ ni̍.

¹³⁸Sāwāla̍ ŋ̄ ke᷄ na̍a̍ la̍ŋ lā chō sāwāla̍ sa̍kpō, ndu̍yɛ̍ lā chō sāwāla̍ wānā ti̍i̍nda̍ŋ.

¹³⁹Ye̍e̍mɛ̍i̍ ya̍ I̍ nɔ̍, le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍ ve̍, ī chō ī bɔ̄ɔ̍, kāni̍ fo̍ndōle̍, ya̍a̍mɔ̍ɔ̍wa̍a̍ nu̍mnda̍ ā chūe̍ sa̍wāla̍ nu̍mnda̍ŋ nyɛ̄ o̍ nyɛ̄.

¹⁴⁰Būŋgāŋ ŋ̄ chu̍e̍l la̍ wo̍ŋ, I̍ fu̍la̍ mu̍ŋ kɔ̄ɔ̄lī mi̍ cha᷅ mu̍ŋ būŋgāŋ tōnya̍. Nyɛ̄ ko̍ŋ to̍sa̍ ni̍ mi̍ ya̍ bu̍ɛ̍ī nūmndo̍ kāālā būŋgāŋ ŋ̄ chu̍e̍l la̍ wo̍ŋ.

¹⁴¹Mi̍ chē bɛ̍ɛ̍ I̍ cho̍ wa᷅na̍ tɔ̍ɔ̍ le̍, mi̍ wāŋnda̍ ā pɛ̄ɛ̄sā ya̍ ni̍, kɛ̍ a̍ ko̍ŋ kpo̍u̍, I̍ pu̍ɛ̍ɛ̍nu̍ŋ a̍ sāwāla̍ nu̍mnda̍ŋ te̍.

¹⁴²Ā chō wānā sa̍kpō, ndu̍yɛ̍ sa̍kpōyɛ̍i̍ nūmnde̍ ī chō le̍ fɛ̍ɛ̍ŋ a̍ fɛ̍ɛ̍ŋ. Ndu̍yɛ̍ sāwāla̍ nu̍mnda̍ŋ bɛ̍ɛ̍ sāwāla̍ tōnya̍ la̍ŋ la̍ cho̍ ni̍.

¹⁴³Nyɛ̄ pālāa̍ cho̍ ya̍ chōo̍ wo̍ ō chō ō bɔ̄ɔ̍, ndu̍yɛ̍ kɔ̄l nūu̍ tāmbu̍ ō bɔ̄ɔ̍. Kɛ̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍, ō kē ya̍ bɔ̄ɔ̍ kɔ᷅l kɛ̄ndɔ̄ɔ̍.

¹⁴⁴Pɛ̄ɛ̄kūlā nūmnda̍ŋ, lā chō pɛ̄ɛ̄kūlā sa̍kpō le̍ fɛ̍ɛ̍ŋ a̍ fɛ̍ɛ̍ŋ. Ke̍ ya̍ sīnā pɛ̄ŋgo̍o̍, le̍ mī hi̍o̍ū lāchī a̍ wāa̍ yōōmū.

¹⁴⁵I̍ cho̍ nu̍m pīɛ̄īle̍ŋ a̍ kɔ̄l nūu̍ kpo̍u̍, mu̍li̍ ya̍ dīōm Mɛ̄lɛ̄ka̍ Ya̍a̍wɛ̄ɛ̄. Ndu̍yɛ̍ I̍ cho̍ hīōūwɔ̄ɔ̄ lāchī a̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍.

¹⁴⁶I̍ cho̍ nu̍m pīɛ̄īle̍ŋ Mɛ̄lɛ̄ka̍ nūu̍, chi̍i̍ndi̍a̍a̍ ya̍, ko̍ŋ to̍sā ni̍ mī hi̍o̍ū lāchī a̍ nyɛ̄ ŋ̄ dīmī wo̍ tōsāa̍.

¹⁴⁷Tē pāa̍le̍ŋ lē sɛ̄ īdīi̍ pɛ̍, I̍ chɛ̍ŋ, I̍ pi̍ɛ̍i̍ nu̍m le̍ mā ma̍la̍ ya̍. I̍ dɔ̍ū tīīnda᷄ŋ nūu̍ kpo̍u̍ o̍ dīōmndā nūmnda̍ŋ ni᷄ŋ.

¹⁴⁸Tē nyūmnda̍ŋ mā tōl īchɔ̄l pɛ̍, mī lɔ̍l īchāli̍ pi̍i̍, hɔ̄lte̍ŋ bɛ̍ɛ̍ I̍ ku̍mbū le̍ŋ te̍, I̍ lɔ᷅l yi̍ya᷄ŋndo̍ a̍ būŋgāŋ ŋ̄ chūa̍ o̍ dīōmndā nūmnda̍ŋ ni᷄ŋ ndo̍ŋ o̍kɔ̄ɔ̄.

¹⁴⁹Mɛ̄ɛ̍ kāālā nūmndo̍ chō le̍ te̍le̍ŋ o̍ te̍le̍ŋ yɛ̍, yāndi̍i̍ tu̍e̍i̍ pi̍ɛ̍īlē nīle̍ŋ. Wāna̍ to̍sā sɔ̍ɔ̍ŋ o̍ nɛ̄ī sa̍kpōo̍ chōo̍ wo̍ ŋ̄ chō ni̍ Mɛ̄lɛ̄ka̍ Ya̍a̍wɛ̄ɛ̄, ma̍nda̍ yo̍o̍mū nūu̍.

¹⁵⁰Wānāā dɛ̍nɛ̍ wɔ̍ɔ̍ŋāa̍ yēēmā le̍ ya̍ nyɛ̄ pālāa̍ tūsīo̍o̍ chōo̍ wā, ā chō ni᷅ŋ ya̍ īkɛ̄i̍ kpɛ̍ɛ̍lūŋ. Wāŋnda̍ ha̍ā ā yēēma̍ bɛ̍ɛ̍ mā sīna̍ a̍ sāwāla̍ nu̍mnda̍ŋ o̍kɔ̄ɔ̄ le̍.

¹⁵¹Kɛ̍ ya̍ ya̍, I̍ si̍nā māā ā chō ya̍ īkɛ̄i̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ sāwāla̍ nu̍mnda̍ŋ lā chō sāwāla̍ tōnya̍.

¹⁵²Sīndɛ̄ pa̍ ya̍ I̍ pɛ̍ɛ̍ku̍ a̍ nyɛ̄ ŋ̄ dīmi̍ wo̍ o̍kɔ̄ɔ̄ ni̍, māā nyɛ̄ ŋ̄ dīmi̍ wo̍ ō chō le̍ fɛ̍ɛ̍ŋ a̍ fɛ̍ɛ̍ŋ.

¹⁵³Chɔ̍ sa᷅ŋga̍ cho̍ ya̍ chōo̍ wo̍ Mɛ̄lɛ̄ka̍, mā chi̍i̍ndi̍a̍a̍ ya̍. Kāni̍ fo̍ndōle̍, a̍ sāŋga̍ cho̍ ya̍ chōo̍ wo̍ kpo̍u̍, I̍ pu̍ɛ̍ɛ̍nu̍ŋ a̍ sāwāla̍ nu̍mnda̍ŋ te̍.

¹⁵⁴Su̍ŋgu̍ le̍ ya̍ Mɛ̄lɛ̄ka̍ mā chi̍i̍ndi̍a̍a̍ ya̍. Chi̍i̍ndi̍a̍a̍ ya̍ mɛ̄ɛ̍ ŋ̄ chu̍e̍l la̍ būŋgɛ̄i̍ yɛ̍.

¹⁵⁵Wānāā dɛ̍nɛ̍ wɔ̍ɔ̍ŋnda̍ a̍ chi̍i̍ndīāā nda̍ le̍, kāni̍ fo̍ndōle̍, le̍ mɛ̄ɛ̍ nda̍ kɛ̄ɛ̍ le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍ yɛ̍.

¹⁵⁶Ā chō wāna̍ īnyīɛ̍ɛ̍ bɛ̄ndū Mɛ̄lɛ̄ka̍ Ya̍a̍wɛ̄ɛ̄. Mɛ̄ɛ̍ ŋ̄ chō wāna̍ to̍sā sɔ̍ɔ̍ŋ o̍ nɛ̄ī sa̍kpōo̍ chōo̍ wo̍ yɛ̍, ma̍nda̍ yo̍o̍mū nūu̍.

¹⁵⁷Wānāa̍ tu̍l la̍ yɛ̍le̍ŋ, ma̍ wā ya̍ nyɛ̄ pālāa̍ tūsīo̍o̍ chōo̍ wa̍, ā chō ā bɔ̄ɔ̍. Kɛ̍ a̍ ko̍ŋ kpo̍u̍, I̍ fe̍ŋāŋ o̍ nyɛ̄ ŋ̄ dīmi̍ wo̍ chōo̍ le̍.

¹⁵⁸Wānāa̍ kɛ̍ɛ̍ le̍ tīīnda᷄ŋndo̍ nɔ̄ɔ̍ o̍ nūm ni̍ŋ nda̍, tē I̍ to̍fa̍ nda̍ pɛ̍, sūɛ̍i̍ ndɛ̄i̍ ī nɛ̄i̍ ya̍ bɔ̄ɔ̍. Kāni̍ fo̍ndōle̍, le̍ mɛ̄ɛ̍ nda̍ kɛ̄ɛ̍ le̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍ yɛ̍.

¹⁵⁹Nūm pi̍la̍ to̍fa̍ wɔ̍ mɛ̄ɛ̍ ya̍ I̍ ka̍a̍la̍ sāwāla̍ nu̍mnda̍ŋ yɛ̍. Mɛ̄ɛ̍ ŋ̄ nɔ̄ kāālā nu᷄m cho̍ le̍ te̍le̍ŋ o̍ te̍le̍ŋ ndo̍ yɛ̍, ma̍nda̍ yo̍o̍mū nūu̍ fɔ̍.

¹⁶⁰Dīōmndā nūmnda̍ŋ kpo̍u̍ tōnya̍a̍ la̍ cho̍ ni̍. Ndu̍yɛ̍ sāwāla̍ nu̍mndā sa̍kpō la̍ŋ kpo̍u̍, lā chō sāwāla̍ cho̍ le̍ fɛ̍ɛ̍ŋ a̍ fɛ̍ɛ̍ŋ.

¹⁶¹Wānāā bɛ̄ndūa̍a̍ ā chō ya̍ nyɛ̄ pālāa̍ tūsīo̍o̍ chōo̍ o̍ fo̍ndō fu̍u̍ wo̍ chōo̍, kɛ̍ a̍ ko̍ŋ kpo̍u̍, I̍ nɔ̍ bɛ̄ɛ̄le̍ŋ ta̍u̍ ta̍u̍ le̍ sāwāla̍ nu̍mnda̍ŋ.

¹⁶²Kɔ̄l nūu̍ chō bɔ̄ɔ̍ a̍ nya̍a̍lo̍o̍, le̍ būŋgāŋ ŋ̄ chu̍e̍l la̍ wo̍ŋ. Mɛ̄ɛ̍ wāŋndo̍ ō sāālūŋ nu̍a̍ā nyɛ̄m ba̍ā kālāŋ bɛ̄ndo᷄ŋ, mbō wa᷄ a̍ kɔ̄l kɛ̄ndɛ̄ bɛ̄ndōo̍ yɛ̍, le̍nde̍ kɔ̄l nūu̍ chō a̍ nya̍a̍lo̍o̍ ni̍.

¹⁶³I̍ ye̍e̍ma̍ ni̍i̍lū lāchōōwāa̍ le̍, I̍ tu̍l ndu̍ bɔ̄ɔ̍ lēyɛ̄. Kɛ̍ sāwāla̍ nu̍mnda̍ŋ, la̍ŋ nda̍ŋ I̍ ka̍a̍la̍ la̍ŋ bɔ̄ɔ̍.

¹⁶⁴O̍ pāa̍le̍ŋ ni᷄ŋ, lē ŋɔ᷄mmɛ̍ū kpu̍lu̍ku̍u̍ ya̍ I̍ me᷅l nu̍m ba̍li̍ka̍a̍ ni̍, kāni̍ fo̍ndōle̍, le̍ mɛ̄ɛ̍ sāwāla̍ nu̍mnda̍ŋ lā chō sāwāla̍ sa̍kpō yɛ̍.

¹⁶⁵Wānāa̍ ka̍a̍la̍ sāwāla̍ nu̍mnda̍ŋ nda̍, le̍ te̍le̍ŋ o̍ te̍le̍ŋ kɔ̄l nyūlū bɛ̄ndōo̍ ndu̍ wa᷅ le̍ nda̍ ni̍. Nyɛ̄ o̍ nyɛ̄ to̍sā mā de᷄l te̍.

¹⁶⁶O̍o̍ Mɛ̄lɛ̄ka̍ Ya̍a̍wɛ̄ɛ̄, hɔ̄lte̍ŋ lē chō ya̍ o̍ nɛ̄ī le̍ pāa̍le̍ ŋ̄ bāŋā ya̍ ni̍ŋ nde̍ŋ. Ndu̍yɛ̍ I̍ cho̍ hīōūwɔ̄ɔ̍ lāchī a̍ nyɛ̄ sāwāla̍ nu̍mnda̍ŋ lā dīmi̍ wo̍ tōsāa̍.

¹⁶⁷I̍ cho̍ nyɛ̄ ŋ̄ dīmi̍ wo̍ tōsāa̍. I̍ ka̍a̍la̍ ndu̍ a̍ kɔ̄l nūu̍ kpo̍u̍.

¹⁶⁸I̍ cho̍ sāwāla̍ nu̍mnda̍ŋ chūa̍a̍, ndu̍yɛ̍ mi̍ wa᷅ nyɛ̄ ŋ̄ dīmi̍ wo̍ tōsāa̍. Nyɛ̄ o̍ nyɛ̄ ya̍ I̍ cho̍ tōsāa̍, ā sīnā kpo̍u̍.

¹⁶⁹O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ tu̍e̍i̍ pi̍ɛ̍īlē ya̍ I̍ cho̍ nu̍m nde̍ŋ, mā ke̍ ya̍ sīnā pɛ̄ŋgo̍o̍ mɛ̄ɛ̍ ŋ̄ chūa̍ būŋgɛ̄i̍ o̍ dīōmndā nūmnda̍ŋ ni᷄ŋ yɛ̍.

¹⁷⁰Ya̍ŋ ni᷅la̍ŋ o̍ pīɛ̄īlē nīle̍ŋ Mɛ̄lɛ̄ka̍. Chi̍i̍ndi̍a̍a̍ ya̍ mɛ̄ɛ̍ ŋ̄ chūa̍ būŋgɛ̄i̍ o̍ dīōmndā nūmnda̍ŋ ni᷄ŋ yɛ̍.

¹⁷¹Le̍ te̍le̍ŋ o̍ te̍le̍ŋ I̍ cho̍ nu̍m wā sōōlūūwo̍. Kāni̍ fo̍ndōle̍, le̍ mɛ̄ɛ̍ ŋ̄ pɛ̄ɛ̄ku̍ ya̍ sāwāla̍ nu̍mnda̍ŋ yɛ̍.

¹⁷²I̍ cho̍ wā chōnde̍i̍ sōlīo̍o̍ le̍ te̍le̍ŋ o̍ te̍le̍ŋ a̍ dīōmndā nūmnda̍ŋ o̍kɔ̄ɔ̄, kāni̍ fo̍ndōle̍, sāwāla̍ nu̍mnda̍ŋ lā chō sāwāla̍ sa̍kpō.

¹⁷³Wa̍ o̍ bɛ̍ɛ̍ndīa̍ŋ le̍ te̍le̍ŋ o̍ te̍le̍ŋ mā ma̍la̍ ya̍, kāni̍ fo̍ndōle̍, le̍ mɛ̄ɛ̍ ya̍ I̍ hɛ̍li̍ sāwāla̍ nu̍mnda̍ŋ, mi̍ wa᷅ nyɛ̄ la̍ di̍mi̍ wo̍ tōsāa̍ yɛ̍.

¹⁷⁴O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ tōfāa̍ o̍ nɛ̄i̍ kpe̍e̍kpe̍i̍ le̍ pāa̍le̍ ŋ̄ chīīndīāā ya̍ ni̍ŋ nde̍ŋ. Ndu̍yɛ̍ sāwāla̍ nu̍mnda̍ŋ, la̍ŋ la̍ tōsā ni̍ mī wa̍ a̍ kɔ̄l kɛ̄ndɛ̄.

¹⁷⁵To̍sa̍ mī hi̍o̍ū lāchī a̍ wāa̍ yōōmū, le̍ mī wa̍ nu̍m sāŋgālāa̍. Ndu̍yɛ̍ mbɔ̄ māā sāwāla̍ nu̍mnda̍ŋ lā mānda̍ yo̍o̍mū nūu̍ fɔ̍.

¹⁷⁶I̍ ma̍l nɛ̄i̍ nu̍mndo̍ mi̍ la̍a̍sīa̍ŋ mɛ̄ɛ̍ sāa̍ ō lāāsīāŋ nu̍a̍ā yɛ̍. Le̍la̍ŋ hu̍ŋ mā hu̍ŋ nu̍u̍vīāā ya̍ bu̍ɛ̍ī nūmndo̍, kāni̍ fo̍ndōle̍, I̍ pu̍ɛ̍ɛ̍nu̍ŋ a̍ sāwāla̍ nu̍mnda̍ŋ o̍kɔ̄ɔ̄ le̍.

Read Southern Kisi Sa᷅m 119 Bible Online

Sa᷅m 119 - Southern Kisi bible

Sa᷅m 119