Read Southern Kisi Sa᷅m 132 Bible Online

Sa᷅m 132 - Southern Kisi bible

Sa᷅m 132

¹Māsānɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄, yi̍ya̍ŋ a̍ Māsāa̍ Dēēve̍, yi̍ya̍ŋ a̍ sɔ̄ɔ̍ŋ pa̍lāŋ o̍ ke̍e̍ku̍ ni᷄ŋ ndo̍ŋ.

²Yi̍ya̍ŋ a̍ būŋgɛ̄ī o̍ chūe̍l nu̍m nde̍, a̍ sēndi̍ o̍ me̍na̍ŋ nāa̍ nūm Mɛ̄lɛ̄ka̍ kpāāyāa̍ chūā wo̍, nūm Mɛ̄lɛ̄ka̍ Che̍kɔ̍pū fi̍nyā nāā ma̍mā pi̍ɛ̍ī yo̍.

³Mi̍ Dēēve̍ chu̍ā būŋgɛ̄i̍ āā, “Le̍ mī lu̍ɛ̍ī o̍ ya̍ lo̍ chi̍ɛ̍ī ni̍ŋ, mī hi̍ni̍ o̍ ya̍ lo̍ kpēlē,

⁴le̍ hɔ̄lte̍ŋ bɛ̍ɛ̍ mī ku̍mbū le̍ŋ,

⁵mɛ̄ɛ̍ mī bɛ̍ɛ̍ndi̍a̍a̍ fo̍ndāa̍ le̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ mī to̍o̍si̍a̍a̍ nāa̍ cha̍lāa̍ le̍ Mɛ̄lɛ̄ka̍ kpāāyāa̍, ō Che̍kɔ̍pū fi̍nyā nāā ma̍mā pi̍ɛ̍ī yo̍.”

⁶Ŋ̄ lo̍ Bɛ̍ti̍lɛ̍hɛ̄m mi̍ ŋ̄ tūɛ̄ī a̍ kɔ̍fū kpe̍ma̍ Mɛ̄lɛ̄ka̍a̍ o̍kɔ̄ɔ̄. Ndu̍yɛ̍ mi̍ ŋ̄ sāālu᷄ŋ ndu̍ o̍ yōndō Chi̍a̍a̍lūīm ndo̍ ni᷄ŋ.

⁷Mi̍ ŋ̄ dīmu̍la᷅ŋ a̍a̍ “Lā ŋ̄ kɔ̄nu᷅ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ, lā ŋ̄ kɔ̍ ba̍ŋnūŋ wūla̍ŋ ndu̍ o̍ lābɛ̄ŋgu̍ mī ŋ̄ sōōlu᷅ŋ ndu̍.”

⁸Hu̍ŋ mā lūɛ̄ī o̍ nūmndo̍ chi̍ɛ̍īni̍ŋ, Mɛ̄lɛ̄ka̍ Ya̍a̍wɛ̄ɛ̄, mā wa̍ lo̍ŋ. Lu̍ɛ̍i̍ a̍ na̍a̍ lātūlu̍, bōōndi̍i̍ na̍a̍ ŋ̄ chō wā lūɛ̄īyɔ̄ɔ̍ a̍ kɔ̍fū kpe̍ma̍ nu̍mndo̍ ve̍, o̍ chɔ̍m a̍ mɛ̄ɛ̍ ŋ̄ chō wāna̍ kpāāyā yɛ̍ wo̍.

⁹Wānāā nūm a̍ so̍līāā lāsa̍lāa̍ ā tōsa̍ ni̍ko̍ o̍ cho̍ sa̍kpō nu̍m o̍ hɔ̄l lo̍, le̍ te̍le̍ŋ o̍ te̍le̍ŋ. Ndu̍yɛ̍, to̍sa̍ mī wānāā nūm a̍ cho̍ sa̍kpō wa̍ ā na᷄ŋ kɔ̄l, mā dēŋi̍ chōo̍ cho̍o̍ a̍ kɔ̄l kɛ̄ndɔ̄ɔ̍.

¹⁰Le̍ sa̍bu̍ bu̍ɛ̍ī nūmndo̍ Dēēve̍, kɛ̍ɛ̄ māsā nu̍m ŋ̄ hɛ̄li̍ wo̍ le̍.

¹¹Mɛ̄lɛ̄ka̍ Ya̍a̍wɛ̄ɛ̄, a̍ chūe̍l Dēēve̍ būŋgɛ̄i̍ ī kālā ka̍lā, ndu̍yɛ̍ a̍ fe̍ŋā le̍cho̍o̍ le̍. Ma̍ dīmūl ndu̍ āā, “Nūm Dēēve̍, I̍ cho̍ pūa̍a̍ nūm nda̍ ō pīlɛ̍ sīīŋgūū Māsā bɛ̍ndōo̍, mbō wa̍ māsāa̍ o̍ fōōfō nu̍mndo̍ chōo̍.

¹²Mā dīmu̍l nda̍ āā, tē pu̍a̍a̍ nūm nda̍ ā lo̍ o̍ kpe̍ma̍ nūu̍ chōo̍ pɛ̍, ndu̍yɛ̍, mā tōsa̍ nyɛ̄ dīōmndā nīla̍ŋ lā dīmi̍ māā ā tōsa̍ wo̍ pɛ̍, nda̍ bɛ̍ɛ̍ pūa̍a̍ ndāa̍ ā hīāū ni̍ŋ la̍chi̍ a̍ wāa̍ māsāa̍ o̍ fōōfō nūmndo̍ chōo̍ le̍ fɛ̍ɛ̍ŋ a̍ fɛ̍ɛ̍ŋ.”

¹³Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ Sa̍a̍yɔ̄ŋ, ndu̍yɛ̍, ō hɛ̄na̍ŋ mbō sīīŋgu̍u̍ ndu̍ nāa̍ ndūāā cha̍lāā.

¹⁴Mbo̍ dīmī āā, “Nāa̍ nīāā pɛ̍ŋgīāā cho̍ ha̍ā ni̍. Na̍nu᷄ŋ ya̍ I̍ cho̍ wā le̍ fɛ̍ɛ̍ŋ a̍ fɛ̍ɛ̍ŋ ni̍, kāni̍ fo̍ndōle̍, na̍nu᷄ŋ ya̍ I̍ cho̍ wā māsāa̍ ni̍.

¹⁵I̍ cho̍ Sa̍a̍yɔ̄ŋ nyɛ̄m o̍ ha̍u̍ bā wo̍ŋ yɔ̄ŋgū ta̍u̍ ta̍u̍. I̍ cho̍ wānāā ndūa̍a̍ cho̍ ā tāmbɛ̍i̍ya̍ nyɛ̄ dīa̍a̍ kē mā hīni̍ kɔ̄l.

¹⁶I̍ cho̍ wānāā sōlīāā lāsa̍lāa̍ Sa̍a̍yɔ᷄ŋ dɛ̍nɛ̍ kɛ̍ndɔ̄ɔ̍ tōsāl, mī nyɛ̄ o̍ nyɛ̄ nda̍ tōsa̍ mbō na᷄ŋ. Ndu̍yɛ̍, I̍ cho̍ tōsā mī wānāā nūm a̍a̍ sa̍kpō wa̍ mā na᷄ŋ kɔ̄l, mā dēŋi̍ chōo̍ cho̍o̍ a̍ kɔ̄l kɛ̄ndɔ̄ɔ̍.

¹⁷Sa̍a̍yɔ̄ŋ na̍nu᷄ŋ ya̍ I̍ cho̍ tōsā ni̍ mī māsa̍ kpāāyā bɛ̍ndōo̍ ō vēlu᷄ŋ, fūlāa̍ o̍ pūlāle̍ Māsāa̍ Dēēve̍le̍ŋ chōo̍. Na̍nu᷄ŋ ya̍ I̍ cho̍ tōsā ni̍, mī māsa̍ ya̍ I̍ hɛ̍li̍ wo̍ ō wa̍ o̍ māsāle̍ŋ chōo̍, māā la̍mbūi̍.

¹⁸I̍ cho̍ ya̍a̍mɔ̍ɔ̍wa̍a̍ ndūa̍a̍ si̍ɔ̍mbu̍la̍ŋ tūsī. Kɛ̍, māsa̍ ya̍ hɛ̍li̍ wo̍ ndu̍ ndu̍, māsāle̍ ndɔ̄le̍ŋ lē chō hīōūwɔ̄ɔ̄ lāchī a̍ chɔ̄ɔ̄lɔ᷄ŋndo̍ kɛ᷅ kɛ᷅.”