Read Southern Kisi Sa᷅m 135 Bible Online

Sa᷅m 135 - Southern Kisi bible

Sa᷅m 135

¹Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄. Lā sāŋga̍la̍ di̍ōla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ, nya̍ cho̍ bu̍ɛ̍īyāā ndūa̍a̍ wa̍.

²Nya̍ sa̍a̍ŋgīāl Mɛ̍lɛ̄ka̍ Ya̍a̍wɛ̄ɛ̄ o̍ chīɛ̍i̍ Mɛ̄lɛ̄ka̍ nāa̍ ni᷄ŋ nda̍, lā sāŋga̍la̍ ndu̍.

³Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄, kāni̍ fo̍ndōle̍, ō chō wānā kɛ̍ndɛ̄, lā sāŋga̍la̍ di̍o̍la̍ ndɔ̄la̍ o̍ chōnde̍i̍ ni᷄ŋ, kāni̍ fo̍ndōle̍, nyɛ᷄ bɛ̍nda̍ le̍ tōsāa̍ wo̍ cho̍ ko̍ŋ ni̍.

⁴Ndu̍ hɛ̍li̍ wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ wa̍ māā nyɛ̄m ndɔ̄ɔ̍ŋ ŋ̄kɛ᷅ ni̍, mbo̍ hɛ̄lī wāŋnda̍ I̍sɔ̄lūɛ̄ī le̍ mā wa̍ le̍ ndu̍.

⁵I̍ si̍nā māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ ō bɛ̄ndū, ō chō ō bɛ̄ndū, ō hīōū mɛ̄lɛ̄ka̍ o̍ mɛ̄lɛ̄ka̍ chēle̍ŋ.

⁶Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍mā le̍ tōsāa̍ wo̍, ndu̍ o̍ to̍sā ni̍, ɛ̄chɛ̍nɛ̄ ni̍, o̍ chi̍e̍ēŋndo̍ chōo̍ ni̍, o̍ pēe̍ mɛ̄ŋmā īhɛ᷄llo̍ ni᷄ŋ ni̍, a̍ lūmūŋ bɛ̄ndo̍ŋ ni᷄ŋ.

⁷Mbō tōsa̍ mī pīɔ̍ɔ̍ he̍l o̍ chi̍e̍ēŋndo̍ mɛ̄ɛ̄lu̍la̍ŋ pɔ̍. Mbō yɔ̍ŋ nyɛ̄ ŋūāla̍lɛ̍ī ŋūāla̍lɛ̍īyo̍ a̍ pīɔ̄ɔ̄ kōŋ lātūlu̍. Mbō tōsa̍ mī hūīyīī bɛ̄ndūe̍i̍ ī fūla̍ nāa̍ i̍ cho̍ ī kɛ̄sīāā wa̍, mī ī hīŋ a̍ kpāāyā bɛ̍ndōo̍.

⁸Mbo̍ dīū pūa̍a̍ tāsi̍a̍a̍ wāŋnda̍ I̍chi̍pī kpo̍u̍, a̍ chɔ̄lūāā tāsi̍a̍a̍ chɔ̄lūāā ndāa̍ ā kōm nda̍ lātūlu̍.

⁹Le̍ mbō tūsi̍ māsā bɛ̍ndōo̍ I̍chi̍pi̍ nda̍ wānāā bɛ̄ndūa̍a̍ wa̍ ndu̍ wa̍llo̍ o̍ bā bɛ̄ŋgu̍ wa̍ kpo̍u̍ nyɛ᷅ pālāa̍ chōo̍, mbo̍ tōsā sɔ̄ɔ̍ŋ kɔ̄ndɔ̄fi̍llo̍ŋ a̍ sɔ̄ɔ̍ŋ ka̍a̍ma᷅ŋ bɛ̄ndo᷄ŋ nya̍ tɛ̄ɛ̄ŋ ndo̍ŋ mi̍ lā chā.

¹⁰Mbo̍ tɛ̍ɛ̍mbūū lɛ̄ŋīī bɔ̄ɔ̍ bɔ̍ɔ̍, ndu̍yɛ̍ mbo̍ dīū māsāā bɛ̍ndūāā kpāāyā bɛ̍ndūa̍a̍.

¹¹Nda̍ yɔ̍nūŋ ni̍ māā Si̍hɔ̄ŋ, o̍ wa̍ māsa̍ A̍mɔ̍lu̍a̍i̍tīi̍ya̍ wo̍, a̍ Ɔ̍kū, māsāa̍ le̍ Ba̍a̍sīāŋ, ndu̍yɛ̍ a̍ māsāā bɛ̍ndūa̍a̍ ā pīli̍a̍a̍ kpo̍u̍, o̍ lɛ̄ŋndē Ke̍nāŋnde̍ŋ ni᷄ŋ.

¹²Mbo̍ kē wānāā ndūa̍a̍ lɛ̄ŋīī māsāā bɛ̍ndūa̍a̍ ha̍ā ā wa̍ chōo̍ ve̍, mbo̍ kē wāŋnda̍ I̍sɔ̄lūɛ̄ī lɛ̄ŋīī kēŋ nyɛ̄ ndā.

¹³O̍o̍ Mɛ̄lɛ̄ka̍ Ya̍a̍wɛ̄ɛ̄, le̍ fɛ̍ɛ̍ŋ a̍ fɛ̍ɛ̍ŋ, dīōlā nūmnda̍ŋ lā chō wā wāŋnda̍ o̍ sōndō. Tɔ̍ɔ̍ nu̍mndo̍ chō wā le̍ fɛ̍ɛ̍ŋ a̍ fɛ̍ɛ̍ŋ.

¹⁴Mɛ̄lɛ̄ka̍ Ya̍a̍wɛ̄ɛ̄ chō sūŋgɔ̄ɔ̄ le̍ wānāā ndūa̍a̍ mbō chīīndi̍a̍a̍ nda̍, ō chō bu̍ɛ̍īyāā ndūa̍a̍ īnyīɛ̍ɛ̍ tūīīnɔ᷄ŋ.

¹⁵Wāŋnda̍ o̍ lɛ̄ŋīī chēle̍ŋ ni᷄ŋ nda̍, mɛ̄lɛ̄ka̍ā ndāa̍, a̍ lābā nda̍ tōōsi̍a̍a̍ nda̍ ni̍. A̍ ka̍ni̍i̍ hu̍mbūe̍i̍, a̍ ko̍o̍līi̍ye̍ nda̍ tōōsi̍a̍a̍ nda̍ ni̍.

¹⁶Mɛ̄lɛ̄ka̍a̍ ndāa̍ ā nɔ̄ sōndōla̍ŋ, kɛ̍ ā su̍ū le̍. Ā nɔ̄ hɔ̄lta̍ŋ kɛ̍ ā chi᷅ le̍.

¹⁷Ā nɔ̄ nīla̍ŋ kɛ̍ ā tu̍i̍ī le̍. Ā nɔ̍lā mā yo̍o̍mu̍ le̍.

¹⁸Mbɔ̄ māā wānāa̍ to̍o̍si̍a̍a̍ mɛ̄lɛ̄ka̍a̍ ha̍ā wa̍, ā sīmnu̍ŋ mɛ̄ɛ̍ mɛ̄lɛ̄ka̍ā kāŋ ā chō nu̍a̍ā yɛ̍, ndu̍yɛ̍ wānāa̍ dɔ̍ū tīīnda᷄ŋndo̍ o̍ mɛ̄lɛ̄ka̍ā ha̍ā ni᷄ŋ nda̍ bɛ̍ɛ̍, mbɔ̄ māā ā sīmnu̍ŋ māā mɛ̄lɛ̄ka̍ā ha̍ā fɔ̍.

¹⁹Wāŋnda̍ I̍sɔ̄lūɛ̄ī, lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄. Nya̍ wānāā so̍līāā lāsa̍la̍ fu̍la̍ o̍ pūlāle̍ E̍lɔ̄ŋnde̍ŋ chōo̍ wa̍, lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄.

²⁰Lā sāŋga̍la̍ Mɛ̄lɛ̄ka̍ Ya̍a̍wɛ̄ɛ̄, nya̍ Li̍va̍īya̍. Lā sāŋga̍la̍ ndu̍, nya̍ wānāa̍ so̍o̍lūū ndu̍ wa̍ ki̍nɛ̍i̍.

²¹Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄ Sa̍a̍yɔ̄ŋ chi̍e̍e̍, lā sāŋga̍la̍ Mɛ̍lɛ̄ka̍ nāa̍ o̍ cho̍ īchāli̍ Chūlu̍sɛ̄lɛ̄m nda̍. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄.