Read Southern Kisi Sa᷅m 137 Bible Online

Sa᷅m 137 - Southern Kisi bible

Sa᷅m 137

¹O̍ pēēla̍ bɛ̍ndūla̍ŋ Ba̍bi̍lɔ̄ŋ kɔ̍ŋgɔ̍ na̍a̍ ŋ̍ ku̍ā cha̍lle̍ ni̍. Lo̍ŋ na̍a̍ ŋ̄ wa̍ īchāli̍ ni̍ mi̍ ŋ̄ wā chōndi̍i̍ īmɔ̍nɛ̍i̍ he̍ī sōlīo̍o̍ mɛ̄ɛ̍ na̍a̍ ŋ̄ yīya̍ŋ a̍ Sa̍a̍yɔ̄ŋ o̍kɔ̄ɔ̄.

²Lo̍ŋ na̍a̍ ŋ̄ lɛ̄ɛ̄ndu̍u̍ tōwāla̍ nāāla̍ŋ o̍ bo̍ndi̍lle̍ ni̍, kāni̍ fo̍ndōle̍, ŋ̄ ve̍ lɛ̍ la̍ŋ lɔ̄ɔ̄ le̍.

³Mi̍ wānāa̍ ku̍ɛ̄ a̍ na̍a̍ o̍ bīyɔ̄ɔ̍ ni᷄ŋ nda̍ ā dīmūl na̍a̍ le̍ mī ŋ̄ sōlu̍l nda̍ chōndo̍ŋ. Wānāa̍ wa̍ na̍a̍ kūɛ̍i̍ yɛ̄īyo̍ wa̍, ma̍ dīmūl na̍a̍ le̍ mī ŋ̄ sōlu̍l nda̍ chōndu̍ŋ kɔ̄l kɛ̄ndɔ᷄ŋ. Ma̍ dīmūl na̍a̍ āā, “Lā sōlu̍l na̍a̍ chōndo̍ŋ a̍ Chūlu̍sɛ̄lɛ̄m o̍kɔ̄ɔ̄.”

⁴Vɛ̄ɛ̍nɛ̍ na̍a̍ ŋ̄ sōlī yɛ̍ chōndu̍ŋ na̍a̍ ŋ̄ sōlūl Mɛ̍lɛ̄ka̍ Ya̍a̍wɛ̄ɛ̍ wo̍ŋ, nāa̍ na̍a̍ ŋ̄ chō o̍ lɛ̄ŋndē sūmīālte̍ŋ ni᷄ŋ nda̍?

⁵O̍o̍ Chūlu̍sɛ̄lɛ̄m, tē I̍ pūɛ̄ɛ̄nu̍ŋ a̍ nūm pɛ̍, mɛ̄ɛ̍ fɛ̍ɛ̍ŋ a̍ fɛ̍ɛ̍ŋ bɛ̍ɛ̍ I̍ nɔ̍lā lɛ̍ mī lɔ̍ɔ̄ tōwāa̍ le̍.

⁶Tē I̍ lo̍o̍nu̍ŋ a̍ nūm o̍kɔ̄ɔ̄ le̍ Chūlu̍sɛ̄lɛ̄m, mī yi̍ya̍ŋ māā nūm te̍ to̍sā mī dɔ̍u̍nu᷄ŋ nya̍a̍le̍ ta̍u̍ ta̍u̍ le̍, mɛ̄ɛ̍ fɛ̍ɛ̍ŋ a̍ fɛ̍ɛ̍ŋ bɛ̍ɛ̍ I̍ nɔ̍lā lɛ̍ mī so̍li̍ chōnde̍i̍ le̍.

⁷O̍o̍ Mɛ̄lɛ̄ka̍ Ya̍a̍wɛ̄ɛ̄, lo̍o̍nu̍ŋ nyɛ᷅ wāŋnda̍ I̍dɔ̄m a̍ to̍sa̍ wo̍, bōōndi̍i̍ ya̍a̍mɔ̍ɔ̍wa̍ ā bīī Chūlu̍sɛ̄lɛ̄m nde̍. Ma̍ dēŋī chōo̍ cho̍o̍ āā, “Lā pīɔ̍l ndu̍! Lā pīɔ̍l ndu̍ mī lā mīŋgi̍ ndu̍ lɛ̄ŋ mɛ̍ mɛ̍!”

⁸O̍o̍ Ba̍bi̍lɔ̄ŋ, nūm bɛ̍ɛ̍ ā chō nu̍m hūnɔ̄ɔ̄ tɛ̍ɛ̍mbūū. Ndu̍yɛ̍ nyɛ̄ o̍ nyɛ̄ ŋ̄ tōsa̍l na̍a̍, wānāa̍ mi̍ŋgūl nu̍m ni̍ŋ ma̍a̍ wa̍, ā pɛ̄l tɔ̄nɔ̄ɔ̍.

⁹Wānāa̍ wa᷅ ni̍ŋ chɛ᷅lɛ̄kpi̍a̍a̍ nyāa̍ chūa̍a̍, mā fāsāŋīāā nda̍ o̍ pōūta̍ŋ nda̍, ā pɛ̄l tɔ̄nɔ̄ɔ̍.