Read Southern Kisi Sa᷅m 138 Bible Online

Sa᷅m 138 - Southern Kisi bible

Sa᷅m 138

¹[104] O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ me̍l nu̍m ba̍li̍ka̍ a̍ kɔ̄l nūu̍ kpo̍u̍. I̍ cho̍ nu̍m sāŋgālā o̍ chōndo̍ŋ ni᷄ŋ mɛ̍lɛ̄ka̍ā chēle̍ŋnda̍ o̍ hɔ̄l.

²I̍ cho̍ hɔ̄lla̍ mūlī kūmbū chīɛ̄ī nūmndo̍, mī ba̍ŋ wūla̍ŋ lɛ̄ŋ mī me̍l nu̍m ba̍li̍ka̍. Le̍ mɛ̄ɛ̍ ŋ̄ kāāla̍ na̍a̍ kāālā nu᷄m cho̍ le̍ te̍le̍ŋ o̍ te̍le̍ŋ ndo̍, ndu̍yɛ̍ ma̍ wā sa̍kpō a̍ na̍a̍ yɛ̍. Kāni̍ fo̍ndōle̍, a̍ chɔ̍m kpe̍nde̍ke̍le̍ māā dīōlā nūmnda̍ŋ a̍ būŋgāŋ ŋ̄ chūe̍l na̍a̍ wo̍ŋ ŋ̄ hīōū nyɛ̄ o̍ nyɛ̄.

³Mɛ̄ɛ̍ ya̍ I̍ pi̍ɛ̍i̍ nu̍m, ma̍ mūlī ya̍ dīōm. Ma̍ lūēī ya̍ yōōmūa̍ŋ a̍ kpāāyā nu̍m bɛ̄ndōo̍.

⁴Māsāā bɛ̍ndūa̍a̍ o̍ chi̍e̍ēŋndo̍ ni᷄ŋ kpo̍u̍, tē ā tūɛ̄ī dīōmnda̍ fu̍la̍ nu̍m o̍ sōndō la̍ŋ pɛ̍, ā chō nu̍m sāŋgālā Mɛ̄lɛ̄ka̍ Ya̍a̍wɛ̄ɛ̄.

⁵Ā chō chōndo̍ŋ sōlī a̍ wa̍lta̍ nu̍mnda̍ŋ o̍kɔ̄ɔ̄ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ a̍ nāŋɔ̄ɔ̄ nūm bɛ̍ndōo̍.

⁶Mi̍ chē bɛ̍ɛ̍ ma̍ wā o̍ ha̍la̍a̍ ni᷄ŋ cho̍o̍ cho̍o̍ pɔ̍ Mɛ̄lɛ̄ka̍ Ya̍a̍wɛ̄ɛ̄, kɛ̍ a̍ bu̍u̍la̍ŋ le̍ wānāā tāmbɛ̍i̍ya̍. Ndu̍yɛ̍ wānāā yōŋgāa̍ ā nɔ̍lā mā vēŋnu᷄ŋ nu̍m te̍.

⁷Tē dɛ̍nɛ̍ pa̍lāa̍ ō kōma̍l la̍ pɛ̍, nu̍m ma̍ndā yo̍o̍mū nūu̍ ni̍. Mā lo̍ o̍ ko̍ŋ, ma̍ chi̍ŋa̍la᷅ŋ ya̍a̍mɔ̍ɔ̍wa̍a̍ nīa̍a̍ dɔ̍ɔ̍nu᷄ŋ tu̍mbe̍ a̍ ya̍ wa̍, mā chi̍i̍ndi̍a̍a̍ ya̍ a̍ kpāāyā nu̍m bɛ̄ndōo̍.

⁸Mɛ̄lɛ̄ka̍ Ya̍a̍wɛ̄ɛ̄, I̍ si̍nā māā nyɛ̄ o̍ nyɛ̄ ŋ̄ chūe̍l la̍ būŋgɛ̄i̍ le̍ ya̍ tōsāllo̍, ā chō ya̍ ndu̍ tōsāl. Kāālā nu᷄m cho̍ le̍ te̍le̍ŋ o̍ te̍le̍ŋ ndo̍, chō le̍ fɛ̍ɛ̍ŋ a̍ fɛ̍ɛ̍ŋ. Wa̍li̍ kɛ̍ndɛ̄ ŋ̄ kāndu̍ tōsāa̍ wo̍, yāndi̍i̍ si̍o̍u̍ ndu̍ tōsā.