Read Southern Kisi Sa᷅m 139 Bible Online

Sa᷅m 139 - Southern Kisi bible

Sa᷅m 139

¹[105] O̍o̍ Mɛ̄lɛ̄ka̍ Ya̍a̍wɛ̄ɛ̄, a̍ mɛ̍ɛ̍nda᷄ŋ ō kɔ̄l nūu̍ ni᷄ŋ kpo̍u̍, ndu̍yɛ̍ ma̍ sīnā wāna̍ ya̍ I̍ cho̍ wo̍.

²Tē I̍ cha̍l pɛ̍ ā sīnā, tē I̍ chɛ̍ŋ pɛ̍ ā sīnā. Mi̍ chē bɛ̍ɛ̍ ma̍ wā la̍nda̍ŋ a̍ ya̍, kɛ̍ ā sīnā yi̍ya᷄ŋnda̍ nīla̍ŋ kpo̍u̍.

³Bā o̍ bā ya̍ I̍ wa̍ kɔ̄la̍ŋ pɛ̍ ā sīnā, ndu̍yɛ̍ tē I̍ wa̍ īhīni̍ pɛ̍ ā sīnā. Ā sīnā a̍ ke̍lālā nīla̍ŋ o̍kɔ̄ɔ̄ kpo̍u̍.

⁴Lɔ̍ɔ̍pa̍ bɛ̍ɛ̍ mī so̍ō Mɛ̄lɛ̄ka̍ Ya̍a̍wɛ̄ɛ̄, ā chīī ni᷅ŋ sīnā nyɛ̄ ya̍ I̍ nɔ̍ le̍ sūɛ̍i̍ yo̍.

⁵Ā chō māchūāā māā sāāsā ya̍ o̍ bālāā kpɔ̍kɔ̍su̍, le̍ ya̍ māndāa̍ a̍ kpāāyā nu̍m bɛ̄ndōo̍.

⁶Ī chō bɔ̄ɔ̍ su̍ɛ̍i̍ kɔ̄ndɔ̄fi̍li̍i̍ bɛ̄ndū le̍ ya̍, le̍ mā sīnā nu̍a̍ā a̍ ya̍ o̍kɔ̄ɔ̄ kpo̍u̍. Ī cho̍ su̍ɛ̍i̍ ya̍ I̍ nɔ̍la̍ pɛ̄ŋgu̍ si̍nā le̍.

⁷Kūɛ̍ɛ̍nɛ̍ ya̍ I̍ ku̍ā yɛ̍ mī ve̍ŋnu᷄ŋ nu̍m? Kūɛ̍ɛ̍nɛ̍ ya̍ I̍ ku̍ā yɛ̍ mī nɔ̍la̍ mī hɛ̍lu᷄ŋ nu̍m?

⁸Tē I̍ he̍l ɛ̄chɛ̍nɛ̄ pɛ̍, ā chō lo̍ŋ. Tē I̍ to᷅l o̍ lɛ̄ŋnde̍ŋ bɛ̄ŋgu̍ pɛ̍, o̍ wāŋ vīlɛ̍i̍ya̍ lo̍ chi̍e̍e̍, mī kɔ̍ hi̍nī lo̍ŋ, ā chō lo̍ŋ.

⁹Tē ya̍ i̍i̍ nɔ̍ kūmba᷅ŋnda̍ŋ pɛ̍, mī ya̍ i̍i̍ chɛ̍ŋ cho̍o̍ mī ya̍ i̍i̍ ku̍ɛ̄ bā pāa̍le̍ŋ lē chāŋ ndo̍ pɔ̍, ɔ̄ɔ̄ mī ya̍ i̍i̍ ku̍ɛ̄ bā pēe̍ mɛ̄ŋmā īhɛ᷄llo̍ ō mɛ̄ɛ̄lu̍ wa̍,

¹⁰lo̍ŋ bɛ̍ɛ̍ bā nūmndo̍ ō wa̍ ya̍ wā chōo̍ le̍ ya̍ nɛ̄īyo̍ chɔ̄mndo̍, a̍ wa̍ ya̍ mālā a̍ kpāāyā nu̍m bɛ̄ndōo̍.

¹¹Ā yɔ᷄ŋ bɛ̍ɛ̍ mī nyūmnda̍ŋ mā wa̍ ya̍ mā bālāā si̍lɔ̍ le̍ ya̍ vīōŋɔ̄ɔ̍, ɔ̄ɔ̄ mī nyɛ̄ wa̍wo̍ŋ cho̍ ya̍ ō bālāā wo̍ ō sīmnu᷄ŋ nyu᷅mnda̍ŋ,

¹²o̍ nyūmmā māŋ ni᷄ŋ bɛ̍ɛ̍, ya̍ i̍i̍ nɔ̍lā mī ya̍ i̍i̍ ve̍ŋnu᷄ŋ nu̍m te̍. Kāni̍ fo̍ndōle̍, nyūmnda̍ŋ mā chō māchūāā nu̍m o̍ hɔ̄l mɛ̄ɛ̍ pāa̍le̍ŋ lē chō nu̍a̍ā yɛ̍. Nyūmnda̍ŋ a̍ pāa̍le̍ŋ nyɛ̄ pīlɛ̍ kpe̍ nda̍ chō nu̍m o̍ hɔ̄l ni̍.

¹³Nu᷄m to̍o̍si̍a̍a̍ ya̍ ni̍ a̍ nyɛ̄ o̍ nyɛ̍ cho̍ ya̍ ni᷄ŋ. Nu᷄m dɔ̍ū ya̍ kāla̍ nūu̍ o̍ dēmbē ni̍ ma̍ chīŋā chīŋīāā ya̍ mɛ̄ɛ̍ ya̍ I̍ nɔ̍ le̍ wāa̍ yɛ̍.

¹⁴I̍ sāŋgāla̍ nu̍m Mɛ̄lɛ̄ka̍, kāni̍ fo̍ndōle̍, le̍ mɛ̄ɛ̍ ŋ̄ tōōsi̍a̍a̍ ya̍ tōōsīāā kɔ̄ndɔ̄fi̍li̍ wāā nu̍a̍ā yɛ̍, mi̍ wa᷅ te̍ŋge̍le̍ŋ nya̍ā yōōmāa̍ ā pīli̍a̍a̍ tɛ̄ɛ̄ŋ. Wa̍lta̍ nu̍mnda̍ŋ lā chō wa̍lta̍ kɔ̄ndɔ̄fi̍ltā bɛ̄ndū. I̍ si̍nā he̍ī o̍ kɔ̄l nūu̍ ni᷄ŋ wa̍la̍ŋ.

¹⁵Bōōndi̍i̍ pāālā nīla̍ŋ lā kīla̍ŋ o̍ dēmbe̍ kāla̍ nūu̍ ni᷄ŋ, mi̍ dīāllūŋ nūu̍ŋ ŋ̄ chīŋā chīŋīāā nāa̍ sɔ̍ɔ̍ sɔ̍ɔ̍wa̍a̍ ka̍ŋ, mi̍ ka̍ndū hīndɔ̄ɔ̍ ve̍, ma̍ sīnā a̍ ya̍ o̍kɔ̄ɔ̄.

¹⁶Lɔ̍ɔ̍pa̍ bɛ̍ɛ̍ mi̍ vi̍a̍lu᷄ŋ, nūm o̍o̍ chi̍i̍ ya̍ ni᷅ŋ chɔ̄. Lɔ̍ɔ̍pa̍ bɛ̍ɛ̍ mi̍ ka̍ndū pālɛ̍i̍ nīi̍ o̍ chi̍e̍ēŋndo̍ chōo̍, nūm o̍o̍ chi̍i̍ ni᷅ŋ pālɛ̍i̍ ya̍ I̍ nɔ̍ le̍ wāa̍ o̍ chi̍e̍ēŋndo̍ chōo̍ ve̍ tūū, ma̍ pōōnyīāā ndi̍ o̍ yāu̍ chōo̍ kpo̍u̍.

¹⁷Mɛ̄lɛ̄ka̍ Ya̍a̍wɛ̄ɛ̄, yīya᷄ŋnda̍ nu̍mnda̍ŋ lā chō bɔ̄ɔ̍ fa̍ŋgā. Ndu̍yɛ̍ yīya᷄ŋnda̍ nu̍mnda̍ŋ lā chō bɔ̄ɔ̍ yi̍ya᷄ŋnda̍ kɔ̄ndɔ̄fi̍li̍, I̍ nɔ̍lā mī si̍na̍ la̍ŋ pɛ̄ŋgu̍ le̍.

¹⁸Tē yīya᷄ŋnda̍ nu̍mnda̍ŋ la̍a̍ wa̍ nyɛ̄ ya̍ i̍i̍ nɔ̍la̍ chɔ̄m pɛ̍, lā chō sɛ̍lɛ̍ ha̍a̍a̍, lā hīōū bɛ̍ɛ̍ mɛ̄ɛ̍ si̍o̍ōŋnde̍ chō nu̍a̍ā o̍ pīo̍o̍ kɔ̄ŋgɔ̍ yɛ̍. Tē I̍ hi̍ni̍ īchɔ̄l pɛ̍, mī te̍ndū dīi̍mā ndɔ̄ɔ̍, ā wā a̍ ya̍ la̍tu̍lu̍ kɛ᷅.

¹⁹O̍o̍ Mɛ̄lɛ̄ka̍, ndu̍ o̍o̍ bɛ̍ndā bɔ̍ɔ̍ mī nūm o̍o̍ di̍u̍ wānāā dɛ̍nɛ̍ wɔ̍ɔ̍ŋnda̍. Ndu̍ o̍o̍ bɛ̍ndā bɔ̍ɔ̍, mī wānāā dīyāā ŋ̄wāŋndā chīe̍e̍ya̍ ha̍ā nda̍ a̍a̍ fa̍ŋa̍ŋ ya̍ īkɛ̄i̍.

²⁰Wānāā dɛ̍nɛ̍ wɔ̍ɔ̍ŋnda̍ ha̍ā, ā chō dīōmndā wɔ̄ɔ̍ŋnda̍ŋ dīmīo̍o̍ a̍ nūm o̍kɔ̄ɔ̄. Ya̍a̍mɔ̍ɔ̍wa̍a̍ nu̍mnda̍ ha̍ā, ā chō dīōlā nūmnda̍ŋ pīɔ̄lɔ̄ɔ̍ o̍ sɔ̄ɔ̍ŋ fo̍ndo̍ŋ chōo̍.

²¹Mɛ̄lɛ̄ka̍ Ya̍a̍wɛ̄ɛ̄, wānāa̍ tu̍l nu̍m lēyɛ̄ wa̍, I̍ tu̍l nda̍ lēyɛ̄. Wānāa̍ si̍mu̍l nu̍mnda̍, I̍ ye̍e̍ma̍ bɛ̍ɛ̍ mī che᷅ nda̍ le̍.

²²Yɛ̄le̍ŋ kpe̍e̍kpe̍i̍ ya̍ I̍ tu̍l wāŋnda̍ ha̍ā ni̍. I̍ chu̍a̍ nda̍ māā ya̍a̍mɔ̍ɔ̍wa̍a̍ nīa̍a̍ kpe̍e̍kpe̍i̍ nda̍ chō ni̍.

²³Mɛ̄lɛ̄ka̍, mɛ̍ɛ̍nda̍ŋ o̍ kɔ̄l nūu̍ ni᷄ŋ mā si̍na̍ nyɛ̍ cho̍ ya̍ o̍ kɔ̄l lo̍. Ke̍ ya̍ tōfāa̍ mā si̍na̍ yīya᷄ŋnda̍ nīla̍.

²⁴Mɛ̍ɛ̍nda̍ŋ ya̍ mā si̍na̍, tē bāla̍ŋ lā chō ya̍ o̍ yɔ̄ŋ wɔ̄ɔ̍ŋndo̍ ni᷄ŋ pɛ̍. Chɔ̍m ya̍ nɛ̄ī ya̍ I̍ ku̍ā cho̍o̍ wo̍, o̍ ke̍ wa̍nā yo̍o̍mū kpe̍e̍kpe̍i̍yo̍, o̍ nɔ̍ la̍ mɛ̍ɛ̍lu̍ le̍ wo̍.