Read Southern Kisi Sa᷅m 140 Bible Online

Sa᷅m 140 - Southern Kisi bible

Sa᷅m 140

¹[106] O̍o̍ Mɛ̄lɛ̄ka̍ Ya̍a̍wɛ̄ɛ̄, chi̍i̍ndi̍a̍a̍ ya̍, mā so̍li̍ ya̍ wānāā dɛ̍nɛ̍ wɔ̍ɔ̍ŋnda̍ o̍ bā. Ma̍nda̍ ya̍, wānāa̍ ke̍ī sɔ̍ŋgɔ̄la̍ŋ mālɔ̄ɔ̍ wa̍ ā yɔ᷅ŋ ya̍ nyɛ̄ le̍.

²Wānāā dɛ̍nɛ̍ wɔ̍ɔ̍ŋnda̍ ha̍ā le̍ te̍le̍ŋ o̍ te̍le̍ŋ, ā chō sɔ̄ɔ̍ŋ wɔ̍ɔ̍ŋndo̍ŋ kɛ̄ɛ̄sīa̍ŋndo̍ o̍ kɔ̄l a̍ ya̍, mā kēī sɔ̍ŋgɔ̄la̍ŋ mālɔ̄ɔ̍ wāŋnda̍ tɛ̄ɛ̄ŋ.

³Wānāā dɛ̍nɛ̍ wɔ̍ɔ̍ŋnda̍ ha̍ā dīɔ̄ɔ̄mūīī ndɛ̄i̍, mɛ̄ɛ̍ yɛ̍īmā kɛ̄ūwo̍ mā dīī nu̍a̍ā yɛ̍, le̍nde̍ ī cho̍ ni̍. Dīōmnda̍ fu̍lā nda̍ o̍ sōndō la̍ŋ, lā chō māchūāā mɛ̄ɛ̍ yɛ̍īmā yɛ̍lɔ̄ɔ̍ mā chō nu̍a̍ā yɛ̍.

⁴Mɛ̄lɛ̄ka̍ Ya̍a̍wɛ̄ɛ̄, yāndi̍i̍ ma̍nda̍ ya̍ mā so̍li̍ ya̍ wānāā dɛ̍nɛ̍ wɔ̍ɔ̍ŋnda̍ ha̍ā o̍ bā. Pi̍ŋi̍ ya̍ wānāa̍ ke̍ī sɔ̍ŋgɔ̄la̍ŋ mālɔ̄ɔ̍ wa̍ o̍ bā, wānāa̍ cho̍ ha̍ā ya̍ de̍fo̍o̍ yīīyo̍ wa̍.

⁵Wānāā yɔ̄ŋgāā bɛ̍ndūa̍a̍ ā bīī ma̍ yēŋ ya̍ yāŋɔ̄ɔ̄le̍ŋ. Ā tōndū ya̍ yālāa̍ lāchī le̍ mī ha̍u̍. Ā tīu̍ ya̍ yāŋɔ̄ɔ̄la̍ŋ lāchī kpo̍u̍ nāa̍ ya̍ I̍ ke̍ī ya̍ le̍ mī ha̍u̍.

⁶Nyɛ̄ kōŋ ya̍ I̍ di̍mu̍l nu̍m ni̍ Mɛ̄lɛ̄ka̍ Ya̍a̍wɛ̄ɛ̄, a̍a̍, “Nu᷄m cho̍ Mɛ̄lɛ̄ka̍ nūu̍ ni̍.” Tu̍e̍i̍ pīɛ̄īlē nīle̍ŋ Mɛ̄lɛ̄ka̍ Ya̍a̍wɛ̄ɛ̄, mā tu̍i̍i̍nu̍ŋ ya̍ īnyīɛ̍ɛ̍.

⁷O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nu̍m cho̍ Mɛ̄lɛ̄ka̍ kpāāyā bɛ̍ndū pi̍ŋī ya̍ wo̍ ni̍. Nu᷄m chi̍i̍ndi̍a̍a̍ ya̍ o̍ chɔ̄ūwo̍ ni᷄ŋ ni̍.

⁸Mɛ̄lɛ̄ka̍ Ya̍a̍wɛ̄ɛ̄, ke᷅ wānāā dɛ̍nɛ̍ wɔ̍ɔ̍ŋnda̍ nyɛ̄ nda̍ yēēma̍ wo̍ le̍, yɔ̄ŋi̍ nda̍ nɔ̄la̍ mā tōsa̍ sɔ̄ɔ̍ŋ wɔ̍ɔ̍ŋ nda̍ tūu̍ le̍ tōsāa̍ wo̍ŋ.

⁹Wānāa̍ ba̍lu̍ ya̍ ha̍ā wa̍, nyɛ̄ o̍ nyɛ̄ wɔ̄ɔ̍ŋ nda̍ tūu̍ a̍ ya̍ o̍kɔ̄ɔ̄, to̍sa̍ mbō mīīŋgu̍ nda̍ pi̍la̍ o̍ ŋ̄dīāl, mī si̍ɔ̍mbu̍la̍ŋ lā bīī nda̍.

¹⁰Mbɔ̄ māā dɛ̄ŋgūlta̍ŋ lā dēli̍ nda̍ o̍ le̍bōl. Mbɔ̄ māā ā de̍l o̍ so̍o̍ŋnda̍ŋ ni᷄ŋ, nāa̍ nda̍ nɔ̍lā lɛ̍ mā fūla̍ le̍ wa̍ fɔ̍.

¹¹Wānāā lāchōōwāa̍ ho᷅l wa᷅ŋnda̍ sɔ̄ɔ̍ŋ nda̍, mbɔ̄ māā ā di̍ī dɛ̍nɛ̍ o̍ lɛ̄ŋnde̍ŋ nde᷅ŋ ni᷄ŋ te̍ fɔ̍. Wānāa̍ ke̍ī sɔ̍ŋgɔ̄la̍ŋ mālɔ̄ɔ̍ wa̍, mbɔ̄ māā kpūndɔ̍ɔ̍ ō kōma̍l nda̍ o̍ lēpīlɛ̍ ni᷄ŋ fɔ̍.

¹²Wānāā nda̍ chō nyɛ̄ pālāa̍ tūsīo̍o̍ chōo̍ wa̍, I̍ si̍nā māā nūm Mɛ̄lɛ̄ka̍ Ya̍a̍wɛ̄ɛ̄, nu᷄m su̍ŋgū le̍ nda̍ ni̍. Nu᷄m to̍sā ni̍ mī wānāā tāmbɛ̍i̍ya̍ ā sɔ̄la̍ di̍la̍ ndāla̍ŋ.

¹³Le̍ he̍ī, wānāa̍ to̍sā sɔ̍ɔ̍ŋ kɛ̍ndɔ᷄ŋ nda̍ ā chō nu̍m sāŋgālā. Wānāa̍ cho̍ nu̍m o̍ hɔ̄l sa̍kpō wa̍, ā wā ni̍ŋ nu̍m lāchī le̍ te̍le̍ŋ o̍ te̍le̍ŋ.