Read Southern Kisi Sa᷅m 141 Bible Online

Sa᷅m 141 - Southern Kisi bible

Sa᷅m 141

¹[107] O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ nu̍m dīōmndo̍ nyūnāa̍, yāndi̍i̍ ke̍le̍ŋa̍ ya̍ dīōmndo̍ mūlī. Tē I̍ nyu̍na̍ nu̍m dīōm pɛ̍, yāndi̍i̍ tu̍e̍i̍ pīɛ̄īlē nīle̍ŋ.

²Mbɔ̄ māā pīɛ̄īlē nīle̍ŋ lē kōma̍l nu̍m māā sa̍lā nyɛ̄m chūŋ kɛ̄ndɛ̄ fɔ̍. Mbɔ̄ māā bālā ya̍ I̍ he̍e̍lu̍ chōo̍ cho̍o̍ le̍ nu̍m pīɛ̄īle̍ŋ nda̍ŋ, lā wa̍ māā sa̍lā fīti̍lī fɔ̍.

³O̍o̍ Mɛ̄lɛ̄ka̍ Ya̍a̍wɛ̄ɛ̄, ma̍nda̍ so̍ndō nūu̍ mɛ̄ɛ̍ ya̍ I̍ su̍a̍ā yɛ̍. Ma̍nda̍ chɔ̍chɔ̄ŋ nūu̍ŋ I̍ di̍mī dīōm wɔ̄ɔ̍ŋ te̍.

⁴Ma̍nda̍ ya̍ I̍ to̍sā sūɛ̍i̍ wɔ̍ɔ̍ŋ te̍, ndu̍yɛ̍ I̍ sɔ̍ɔ̍ŋgūū wānāā dɛ̍nɛ̍ wɔ̍ɔ̍ŋnda̍ chōo̍ o̍ sɔ̄ɔ̍ŋ ndāa̍ŋ wɔ̍ɔ̍ŋndo̍ŋ tōsāa̍ ni᷄ŋ te̍. Chɛ᷅l la̍ mī sɔ̍ɔ̍ŋgu̍u̍ nda̍ chōo̍ o̍ bɔ̄ŋa᷅ŋndā ndāla̍ nyɛ̄ dīāāla̍ŋ chōo̍ le̍.

⁵Ō bɛ̄ndā mī wāna̍ tōnya̍a̍ ō tūsi̍ ya̍ nyɛ̄ pālāa̍ chōo̍, mbō mīŋgi̍ ya̍ o̍ nɛ̄ī o̍ kāālāa̍ ni᷄ŋ. Kɛ̍ I̍ ye̍e̍ma̍ mī wānāā dɛ̍nɛ̍ wɔ̍ɔ̍ŋnda̍ ā ke̍ ya̍ lēbɛ̄ɛ̄ le̍, kāni̍ fo̍ndōle̍, le̍ te̍le̍ŋ o̍ te̍le̍ŋ, I̍ cho̍ sɔ̄ɔ̍ŋ dɛ̍nɛ̍ wɔ̍ɔ̍ŋ nda̍ chō tōsāa̍ wo̍ŋ yɛ̄le̍ŋ tūllo̍ o̍ pīɛ̄īle̍ŋ ni᷄ŋ.

⁶Tē wāŋnda̍ ā hu᷄ŋ nyi̍i̍ndūū wānāā ndāā ba̍nāa̍ o̍ pōūtā fe̍ke̍fe̍ke̍la̍ŋ pɛ̍ mā de᷄l, o̍ ko̍ŋ nda̍ chō sīnā ni̍ māā nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ tōnya̍a̍ o̍ cho̍ ni̍.

⁷Pāālā ndāla̍ŋ lā wā ni̍ŋ la̍ sɛ̍ŋīa̍ŋnda̍ŋ o̍ sɛ̄īla̍ ndāla̍ŋ īkɛ̄i̍, mɛ̄ɛ̍ yɔ̄mīī bīŋgī bi̍ŋgīe̍i̍ ī wā nu̍a̍ā lɛ̄ŋ yɛ̍.

⁸Kɛ̍ ya̍ ya̍ I̍ cho̍ hīōūwɔ̄ɔ̄ lāchī a̍ tīīnda᷄ŋ nūu̍ dɔ̄wɔ̄ɔ̍ o̍ nūm Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ni᷄ŋ. Nūm ya̍ I̍ ti̍i̍nda̍ŋ le̍ ya̍ māndāa̍ ni̍, chɛ᷅l mī vi᷅ le̍.

⁹Ma̍nda̍ ya̍ māā, I̍ ha̍ū o̍ yāŋɔ̄ɔ̄lā nda̍ ye᷄ŋ ya̍ la̍ŋ te̍. I̍ ha̍ū o̍ yāāŋɔ̄ɔ̄lā wānāā dɛ̍nɛ̍ wɔ̍ɔ̍ŋnda̍ ā ye᷄ŋ ya̍ la̍ŋ te̍.

¹⁰To̍sa̍ mī wānāā dɛ̍nɛ̍ wɔ̍ɔ̍ŋnda̍ ha̍ā, nda̍ pi̍la̍ hāu̍ o̍ yāŋɔ̄ɔ̄lā nda̍ ye᷄ŋ ya̍ la̍ŋ, mī ya̍ I̍ hɛ̍lu᷄ŋ.